Ipapatay, Naespirituan nga
Ti naespirituan nga ipapatay ket pannakisina manipud iti Dios. Isuro dagiti nasantuan a kasuratan maipapan iti dua a pagtaudan ti naespirituan nga ipapatay. Ti umuna a pagtaudan ket ti Pannakatnag, ken ti maikadua ket ti bukod a kinasukirtayo.
Insuro ni propeta Samuel iti Libro ni Mormon, “Amin a tao babaen ti pannakatnag ni Adan a pannakaisinana manipud iti imatang ti Apo, maibilang a patay, iti agpadpada a banag a nainlasagan ken banag a naespirituan” (Helaman 14:16). Kabayatan ti biagtayo iti daga, naisinatayo manipud iti sidong ti Dios. Babaen ti Pannubbot, subboten ni Jesucristo ti tunggal maysa manipud iti daytoy naespirituan nga ipapatay. Impaneknek ni Samuel a ti Panangungar ti Mangisalakan “subbotenna ti amin a tao manipud iti immuna nga ipapatay—dayta naespirituan nga ipapatay. … Adtoy, subboten ti panangungar ni Cristo ti amin a tao, wen, ti amin a tao, ket isublina ida iti imatang ti Apo” (Helaman 14:16–17). Insuro ni propeta Lehi a gapu iti Pannubbot, “umasideg amin a tao iti Dios; gapuna, sumaklangda kenkuana, tapno ukomenna ida babaen iti kinapudno ken kinasanto nga adda kenkuana” (2 Nephi 2:10).
Dumteng ti nayon a naespirituan nga ipapatay kas bunga ti bukod a panagsukirtayo. Dagiti basbasoltayo ti mangparugit kadatayo ken saan a mangpabael kadatayo a makipagnaed iti sidong ti Dios (kitaen iti Taga Roma 3:23; Alma 12:12–16, 32; Helaman 14:18; Moises 6:57). Babaen ti Pannubbot, idiaya ni Jesucristo ti pannakasubbot manipud iti daytoy naespirituan nga ipapatay, ngem no laeng aramatentayo ti pammati Kenkuana, agbabawitayo kadagiti basbasoltayo, ken agtungpaltayo kadagiti pagbatayan ken ordinansa ti ebanghelio (kitaen iti Alma 13:27–30; Helaman 14:19; Pagannurotan ti Pammati 1:3).