Asi
Ammo ti Nailangitan nga Amatayo dagiti pagkapsutan ken basbasoltayo. Ipakitana ti asi no pakawanennatayo kadagiti basbasoltayo ken tulongannatayo nga agsubli a makipagtaeng iti sidongna.
Mabalin a maisuppiat ti kasta a panangngaasi iti linteg ti hustisia, nga agkasapulan nga awan ti narugit a banag a mapalugodan a makipagtaeng iti Dios (kitaen iti 1 Nephi 10:21). Ngem ti Pannubbot ni Jesucristo ti nangaramid iti daytoy a mabalin tapno “naan-anay ti Dios, nalinteg a Dios, ken manangngaasi met a Dios” (Alma 42:15).
Panangawat iti Asi ti Dios
Pinatgan ti Mangisalakan dagiti dawdawaten ti hustisia idi nagtakder Isuna iti lugartayo ket nagsagaba iti pannusa gapu kadagiti basbasoltayo. Gapu iti daytoy saan a managimbubukod nga aramid, siaasi ti Ama a mangibabawi iti pannusa manipud kadatayo ket awatennatayo iti sidongna. Tapno maawattayo ti pammakawan ti Apo, nasken a sipupudnotayo nga agbabawi kadagiti basbasoltayo. Kas iti insuro ni propeta Alma, “Aramaten amin ti linteg a karbenganna, ken tuntonen ti kaasi ti kukuana; ket iti kasta, awan ti maisalakan no di dagiti laeng pudno a nagbabawi” (Alma 42:24; kitaen met iti Alma 42:22–23, 25).
Ti pannakapakawan iti basol ket saan laeng a sagut ti asi nga aggapu iti Nailangitan nga Ama ken ni Jesucristo. Tunggal bendision nga awatem ket aramid ti asi, nga ad-adu pay ngem iti kabaelam nga iparabur iti bukodmo. Insuro ni Mormon, “Aggapu amin a naimbag a banag ken ni Cristo; no saan a kasta natnag koma ti tao, ket awan ti nasayaat a nagbanaganda” (Moroni 7:24). Kas pagarigan, maysaka nga umaw-awat iti nadiosan nga asi no denggen ken sungbatan ti Nailangitan nga Ama dagiti kararagmo, no umawatka iti tarabay manipud iti Espiritu Santo, ken no naimbaganka iti sakit babaen ti bileg ti priesthood. Nupay sumangbay ti amin a kasta a bendision kas bunga ti panagtungpalmo, saanka a makaawat iti kaano man kadagitoy babaen dagiti aramidmo laeng. Dagitoy dagiti manangngaasi a sagut manipud iti naayat ken manangngaasi nga Ama.
Panangipakita iti Asi kadagiti Dadduma
Iti pannakisaona kadagiti disipulona, imbilin ti Mangisalakan: “Agbalinkayo … a manangngaasi, a kas ken ni Amayo a manangngaasi” (Lucas 6:36). Masurotmo ti pagwadan ti Nailangitan nga Amam iti asi kadagiti pannakilangenmo kadagiti dadduma. Ikagumaanam nga iliklik ti biagmo iti kinakuspag, kinapasindayaw, ken kinatangsit. Agsapulka kadagiti wagas a pakapagbalinam a manangngaasi, managdayaw, manangpakawan, naayat, ken naanus, uray no ammom dagiti pagkurangan dagiti dadduma. No aramidem daytoy, ti pagwadam ti mangiturongto kadagiti dadduma nga agbalin a naas-asi, ken dakdakkelto ti awatem nga asi ti Dios.