Sakramento
Iti rabii sakbay ti Pannakailansana, nakipagkita ni Jesucristo kadagiti Apostolna ket inrugina ti sakramento. “Innalana ti tinapay, ket idi nakapagyamanen, pinisina ket intedna kadakuada, a kinunana, Daytoy isu ti bagik, a maited gapu kadakayo; aramidenyo daytoy a panglaglagip kaniak. Kasta met ti kopa kalpasan ti panangrabiida, kinunana, Daytoy a kopa isu ti baro a tulag iti darak, a naibuyat gapu kadakayo” (Lucas 22:19–20). Kalpasan ti Panagungarna, inrugina ti sakramento kadagiti Nephite (kitaen iti 3 Nephi 18:1–11).
Ita makiranudtayo iti tinapay ken danum kas panglaglagip iti pangsubbot a sakripisio ni Jesucristo. Daytoy nga ordinansa ket napateg a paset ti panagrukbabtayo ken naespirituan a panagdur-astayo. Ti ad-adda a panangutobtayo iti kinapategna, ad-adda met a nasagsagrado ti panagbalinna kadatayo.
Pananglaglagip iti Mangisalakan ken iti Pannubbotna
Ti sakramento ket mangipaay iti gundaway a pananglaglagipmo nga addaan panagyaman iti biag, panagministro, ken Pannubbot ti Anak ti Dios.
Babaen ti napirsapirsay a tinapay, lagipem ti bagina. Mapanunotmo ti pisikal a panagsagabana—nangnangruna ti panagsagabana iti krus. Malagipmo a babaen ti asi ken paraburna, agungarto ti amin a tao ken maikkan iti gundaway para iti agnanayon a biag a kadenna ti Dios.
Babaen ti bassit a baso ti danum, malagipmo nga imbukbok ti Mangisalakan ti darana iti nakaro a panagsagabana iti espiritu ken panagtuokna, a nangrugi iti Minuyongan ti Getsemani. Idiay a kinunana, “Ti kararuak silaladingit unay agingga iti ipapatay” (Mateo 26:38). Iti panangpatganna iti pagayatan ti Ama, sinagabana ti ad-adu pay ngem iti matukodtayo: “Ti dara [rimmuar] manipud iti tunggal puon ti dutdot, napalalo unay [idi] ti panagtuokna gapu iti kinadakes ken kinadangkes dagiti taona” (Mosiah 3:7). Malagipmo a babaen ti panagibukbok iti darana, insalakannaka ni Jesucristo ken ti amin a dadduma pay a tattao manipud iti aw-awagan dagiti nasantuan a kasuratan a “sigud a basol” ti panaglabsing ni Adan (Moises 6:54). Malagipmo nga Isu ket nagsagaba pay gapu kadagiti basbasol, ladingit, ken saem dagiti amin nga annak ti Nailangitan nga Ama, a mangipapaay iti pannakaugas dagiti basbasol para kadagiti agbabawi ken agbiag iti ebanghelio (kitaen iti 2 Nephi 9:21–23).
Panangpabaro kadagiti Katulagan ken Naikari a Bendision
No makiranudka iti sakramento, paneknekam iti Dios a ti pananglaglagipmo iti Anakna ket aglaylayonto iti labes ti ababa a kanito dayta sagrado nga ordinansa. Agkarika a laglagipem a kanayon Isuna. Ipaneknekmo nga agtallugodka a mangawat iti bagim ti nagan ni Jesucristo ken agtungpalkanto kadagiti bilinna. Iti pannakiranudmo iti sakramento ken panagaramidmo kadagitoy a panagkumit, pabaruem ti katulagam iti panagbuniag (kitaen iti Mosiah 18:8–10; DkK 20:37).
Umawatka kadagiti naindaklan a bendision no tungpalem ti katulagan iti panagbuniag. Bayat ti panagpabarom iti daytoy, pabaruen ti Apo ti naikari a pannakaugas dagiti basbasolmo. Nadalusanka manipud iti basol, kabaelam a “kanayon nga agtaeng [kenka] ti Espirituna” (DkK 20:77). Ti kanayon a panangkadkadua ti Espiritu ket maysa kadagiti kaindaklanan a sagut a maawatmo iti mortalidad. Tarabayennakanto ti Espiritu kadagiti dalan ti kinalinteg ken talna, a mangiturong kenka iti agnanayon a biag a kadennam ti Amam iti Langit ken ni Jesucristo.
Maikari a Pannakiranud
Kas panagsaganam para iti sakramento iti tunggal lawas, maaddaanka iti gundaway a mangamiris iti biagmo ken agbabawi kadagiti basbasolmo. Saan a kasapulan nga agbalinka a perpekto tapno makiranudka iti sakramento, ngem nasken nga addaanka iti espiritu ti kinapakumbaba ken panagbabawi iti pusom. Tunggal lawas nasken nga agsaganaka para iti dayta sagrado nga ordinansa nga addaan iti nasneban a puso ken agbabbabawi nga espiritu (kitaen iti 3 Nephi 9:20).
No umasidegka iti sakramento nga addaan panagraem ken kinapasnek a pakaikarianna, agbalin daytoy a linawas a gundaway para iti panangamiris iti bagi, panagbabawi, ken panagidaton manen—maysa a pagtaudan ti pigsa ken kanayon a panangipalagip iti Pannubbot ti Mangisalakan.