Melchizedek Priesthood
“Adda, iti simbaan, dua a kinasaserdote, a dagitoy, ti Melchizedek ken ti Aaronic” (DkK 107:1). Ti Melchizedek Priesthood, a “maibatay iti Urnos ti Dios” (DkK 107:3), ti nain-indaklan kadagitoy. “Iggem[na] … ti karbengan ti panguluen, ket addaan iti bileg ken panangituray kadagiti amin a pagakeman iti simbaan” (DkK 107:8). Iggemna pay “dagiti tulbek dagiti amin a naespirituan a bendision ti simbaan” (DkK 107:18). Naawagan daytoy a maibatay iti naindaklan a nangato a saserdote a nagbiag iti panawen ni propeta Abraham (kitaen iti DkK 107:2–4; kitaen met iti Alma 13:14–19).
Babaen ti turay ti Melchizedek Priesthood, iwanwan dagiti dadaulo ti Simbaan ken iturongda ti pannakaisuro ti ebanghelio iti intero a lubong. Kadagiti ordinansa ti Melchizedek Priesthood, “maipakita ti bileg ti kinadios” (DkK 84:20).
Naited daytoy nain-indaklan a priesthood ken ni Adan ken addan iti daga iti panawen nga impalgak ti Apo ti ebangheliona. Naipanaw daytoy manipud iti daga kabayatan ti Nakaro nga Ikakalilis iti Kinapudno, ngem naisubli daytoy idi Mayo 1829, idi intalek [conferred] daytoy da Apostol Pedro, Santiago, ken Juan kada Joseph Smith ken Oliver Cowdery.
Dagiti pagtakeman [office] ti Melchizedek Priesthood ket Apostol, Pitupulo, patriarch, high priest, ken elder. Ti Presidente ti Nangato a Priesthood ket ti Presidente ti Simbaan (kitaen iti DkK 107:64–66).
Nasken a maikari nga adddaan iti Melchizedek Priesthood dagiti lallaki iti Simbaan tapno umawatda iti endowment iti templo ket mailantipda kadagiti pamiliada para iti kinaagnanayon. Addaanda iti awtoridad wenno turay a mangannong iti masakit ken mangted kadagiti naisangsangayan a pammendision kadagiti miembro ti pamilia ken dadduma pay. Babaen ti pammalubos dagiti mangimatmaton a priesthood leader, mabalinda nga ipaay ti sagut ti Espiritu Santo ken mangorden kadagiti maikari a lallaki kadagiti pagtakeman [office] iti Aaronic ken Melchizedek Priesthood.
No awaten ti maysa a lalaki ti Melchizedek Priesthood, sumrek iti sapata ken katulagan ti priesthood. Isu ket makitulag nga agbalin a napudno, padur-asenna [magnify] ti akemna, “mangipasnek a dumngeg kadagiti balikas ti agnanayon a biag,” ken “agbiag iti tunggal balikas nga agaon iti ngiwat ti Dios.” Dagiti agtungpal iti daytoy a katulagan ket pasantuento ti Espiritu ken awatenda ti “amin nga adda iti Ama.” (Kitaen iti DkK 84:33–44.)