Espiritu Santo
Ti Espiritu Santo ti maikatlo a kameng ti Kinadios. Isu ti kinatao ti espiritu, nga awanan iti bagi a nagtagilasag ken nagtagitulang (kitaen iti DkK 130:22). Masansan a maitudo daytoy a kas Espiritu, ti Nasantuan nga Espiritu, ti Espiritu ti Apo, wenno ti Mangliwliwa.
Dagiti Akem ti Espiritu Santo
Makitinnulong ti Espiritu Santo iti naan-anay a pannakikaykaysa iti Nailangitan nga Ama ken ni Jesucristo, a mangipatpatungpal iti sumagmamano nga akem a makatulong kenka nga agbiag a sililinteg ken umawat kadagiti bendision ti ebanghelio.
Isu ti “mangsaksi iti Ama ken iti Anak” (2 Nephi 31:18) ken ipalgak ken isurona “ti kinapudno ti amin a banag” (Moroni 10:5). Makaawatka iti awan duadua a pammaneknek maipapan iti Nailangitan nga Ama ken ni Jesucristo babaen ti bileg ti Espiritu Santo. Ti pannakisaritana iti espiritum ket mangisangbay iti ad-adayo nga amang a di mapagduaduaan ngem iti ania man a pannakisarita a maawatmo babaen dagiti gagangay a pangriknam.
Kabayatan ti panagkagumaam nga agtalinaed iti dalan a mangiturong iti agnanayon a biag, ti Espiritu Santo ket “ipakitananto kadakayo amin a banag a rumbeng nga aramidenyo” (kitaen iti 2 Nephi 32:1–5). Matarabaynaka kadagiti pangngeddengmo ken masaluadannaka manipud iti pisikal ken naespirituan a pagpeggadan.
Babaen Kenkuana, maawatmo dagiti sagut ti Espiritu para iti pagimbagam ken para iti pagimbagan dagiti ay-ayatem ken pagserbiam (kitaen iti DkK 46:9–11).
Isu ti Mangliwliwa (Juan 14:26). Kas iti panangpatalna ti makabang-ar a timek ti managayat a naganak iti maysa nga agsangsangit nga ubing, dagiti arasaas ti Espiritu ti mangpakalma kadagiti panagbutengmo, mangpaawan kadagiti makariribuk a panagdandanag iti biagmo, ken mangliwliwa kenka no agladingitka. Punnuennaka ti Espiritu Santo “iti namnama ken naan-anay nga ayat” ken “mangisuro kenka kadagiti makapatalna a banag ti pagarian” (Moroni 8:26; DkK 36:2).
Babaen ti bilegna, mapasantoka kabayatan ti panagbabawim, panangawatmo kadagiti ordinansa ti panagbuniag ken kumpirmasion, ken panagtalinaedmo a napudno kadagiti katulagam (kitaen iti Mosiah 5:1–6; 3 Nephi 27:20; Moises 6:64–68).
Isu ti Nasantuan nga Espiritu ti Kari (kitaen iti Taga Efeso 1:13; DkK 132:7, 18–19, 26). Iti daytoy a pagrebbengan, ipatalgedna a maawat iti Dios dagiti ordinansa ti priesthood a naawatmon ken dagiti katulagan nga inaramidmo. Agpannuray daytoy a pananganamong iti agtultuloy a kinapudnom.
Ti Sagut ti Espiritu Santo
Amin a napudno nga agkalkalikagum iti kinapudno ket makariknada iti impluwensia ti Espiritu Santo, a mangiturong kadakuada ken ni Jesucristo ken iti ebangheliona. Nupay kasta, ti pakabuklan dagiti bendision a maited babaen ti Espiritu Santo ket sidadaan a magun-od laeng dagiti umawat iti sagut ti Espiritu Santo ken agtalinaed a maikari.
Kalpasan a nabuniaganka iti Ti Simbaan ni Jesucristo dagiti Santo iti Ud-udina nga Aldaw, impatay ti maysa wenno ad-adu pay nga addaan iti Mechizedek Priesthood dagiti imada iti rabaw ti ulom ket, iti sagrado nga ordinansa ti priesthood, nakumpirmaanka a maysa a miembro ti Simbaan. Kas paset daytoy nga ordinansa, a maawagan iti pannakapatalged [kumpirmasion], naited kenka ti sagut ti Espiritu Santo.
Maigiddiat ti sagut ti Espiritu Santo iti impluwensia ti Espiritu Santo. Sakbay ti panagbuniagmo, mariknam ti impluwensia ti Espiritu Santo iti sagpaminsan, ket babaen dayta nga impluwensia makaawatka iti pammaneknek maipapan iti kinapudno. Ita ta addaankan iti sagut ti Espiritu Santo, addaanka iti karbengan iti kanayon a panangkadkadua dayta a kameng ti Kinadios no agtungpalka kadagiti bilin.
Ti naan-anay a panangsagrap iti sagut ti Espiritu Santo iramanna ti panangawat iti paltiing ken liwliwa, panagserbi ken panagbendision kadagiti dadduma babaen dagiti naespirituan a sagut, ken pannakapasanto manipud iti basol ken pannakaaramid a maikari para iti pannakaitan-ok iti celestial a pagarian. Agpannuray dagitoy a bendision iti pannakaikarim; in-inut nga umay dagitoy kenka iti kanito a nakasaganakan para kadagitoy. Bayat ti panangitunosmo iti biagmo iti pagayatan ti Dios, in-inut a maawatmo a naan-anay ti Espiritu Santo. Impakdaar ni Propeta Joseph Smith a dagiti kinadatdatlag ti pagarian ti Dios ket “makitada laeng ken maawatan babaen ti bileg ti Nasantuan nga Espiritu, nga isagut ti Dios kadagiti mangayat kenkuana, ken mangpatarnaw iti bagbagida iti imatangna” (kitaen iti DkK 76:114–116).
Laglagipen a “saan nga agtaeng ti Espiritu ti Apo kadagiti saan a nasantuan a templo” (Helaman 4:24). Nupay inawatmon ti sagut ti Espiritu Santo, makapagtaeng ti Espiritu laeng kenka no agtungpalka kadagiti bilin. Isu ket pumanaw kenka no mapasakitam Isuna babaen ti panagbassawang, kinarugit, kinasukir, panagalsa, ken dadduma pay a basol. Pagtalinaedem a nadalus ti bagim. Punnuem ti bagim iti kinasayaat tapno makapagbalinka a maikari iti kanayon a panangkadkadua ti Espiritu Santo.