Panangimaton iti Simbaan
Agtakder ni Jesucristo iti ulo ti Simbaan. Ti mision ti Ti Simbaan ni Jesucristo dagiti Santo iti Ud-udina nga Aldaw ket mangtulong iti amin a tao nga umasideg Kenkuana (kitaen iti Moroni 10:32). Tapno maipatungpal daytoy a mision, nabukel ti Simbaan a mayannurot iti pagtuladan ti Apo “a maipaay iti pannakaan-anay dagiti sasanto, … agingga iti makagtengtay amin iti panagmaymaysa ti pammati, ken ti pannakaammo iti Anak ti Dios” (Taga Efeso 4:12–13; kitaen met iti Taga Efeso 4:11). Gupgopen ti sumaganad a balabala ti pannakabukel ti Simbaan.
Pagtaengan ken Pamilia
Ti pamilia ti kangrunaan a benneg iti Simbaan, ken ti pagtaengan ti kapatgan a lugar a pagsursuruan iti ebanghelio. Awan ti sabali pay nga organisasion a mabalin a mangsukat iti pamilia. Uray no agtultuloy a rumang-ay ti Simbaan, kanayonto latta a ti panggepna ket mangsuporta ken mangtulong kadagiti pamilia ken tunggal maysa kadagiti panagkagumaanda nga agbiag iti ebanghelio.
Sapasap a Panangimaton
Tarabayen ti Apo dagiti natulagan a tattaona iti agdama babaen ti Presidente ti Simbaan, a kankanunongantayo a kas propeta, mammadto, ken mammaltiing. Ti Presidente ti Simbaan ti mangipangulo iti intero a Simbaan. Isu ken dagiti mammagbagana, nga isuda pay dagiti propeta, mammadto, ken mammaltiing, ket buklenda ti Korum ti Umuna a Panguluen.
Dagiti miembro ti Korum dagiti Sangapulo-ket-dua nga Apostol ket isuda pay dagiti propeta, mammadto, ken mammaltiing. Isuda, a kadua ti Umuna a Panguluen, ket “naisangsangayan a saksi iti nagan ni Cristo iti intero a lubong” (DkK 107:23). Agtignayda babaen ti panangiturong ti Umuna a Panguluen “a mangbangon iti simbaan, ken mangtimon kadagiti amin a pakaseknan ti nasao kadagiti amin a pagilian” (DkK 107:33). Isuda ti “aglukat iti ridaw [kadagiti pagilian] babaen ti pannakaipakdaar ti ebanghelio ni Jesucristo” (DkK 107:35).
Maawagan dagiti miembro ti Korum dagiti Pitupulo tapno mangipakdaar iti ebanghelio ken mangbangon iti Simbaan. Agtrabahoda babaen ti panangiturong dagiti Sangapulo-ket-dua nga Apostol ken ti panangidaulo ti pito a kakabsat a lallaki a naawagan nga agserbi a kas Panguluen ti Pitupulo. Dagiti miembro ti Umuna ken Maikadua a Korum ti Pitupulo ket natudinganda a General Authority, ken mabalin a maawaganda nga agserbi iti sadino man a lugar iti lubong.
Ti Presiding Bishopric ket isu ti panguluen ti Aaronic Priesthood iti intero a Simbaan. Agserbi ti Presiding Bishop ken dagiti mamagbagana babaen ti panangiturong ti Umuna a Panguluen a mangimaton kadagiti temporal a pakaseknan ti Simbaan.
Dagiti organisasion ti Young Men, Relief Society, Young Women, Primary, ken Sunday School ket addaanda amin kadagiti panguluen a mangkita kadagiti organisasionda para iti sibubukel a Simbaan tapno mangted iti panangisuro ken panangiturong.
Panangimaton iti Area
Ti area ket isu ti kadakkelan a dibision ti heograpia ti Simbaan. Tudingan ti Umuna a Panguluen ti Panguluen ti Pitupulo a direkta a mangimaton kadagiti napili nga area ti Simbaan babaen ti panangiturong ti Korum dagiti Sangapulo-ket-dua nga Apostol. Iti dadduma pay nga area ti Simbaan, tudingan ti Umuna a Panguluen dagiti Panguluen ti Area tapno mangidaulo. Buklen ti Panguluen ti Area ti maysa a presidente, a masansan a matudingan manipud iti Umuna wenno Maikadua a Korum ti Pitupulo, ken dua a mammagbaga, a mabalin a matudingan manipud iti ania man a Korum ti Pitupulo. Agserbi dagiti Panguluen ti Area iti babaen ti panangiturong ti Umuna a Panguluen, ti Korum dagiti Sangapulo-ket-dua, ken ti Panguluen ti Pitupulo.
Maordenan ti sumagmamano a kakabsat a lallaki iti saad ti Pitupulo ngem saanda nga agserbi a kas General Authority. Maawaganda nga Area Authority Seventy, ket matudinganda kadagiti korum malaksid kadagiti Umuna wenno Maikadua a Korum ti Pitupulo, a mayannurot iti disso ti heograpia. Ti area nga imatonanda ket limitado laeng iti sapasap a rehion a pagnanaedanda. Agserbi dagiti sumagmamano nga Area Authority Seventy kadagiti Panguluen ti Area.
Lokal a Panangimaton
Dagiti Ward ken Branch.
Mabukel dagiti miembro ti Simbaan kadagiti kongregasion a masansan nga agtataripnong a sangkamaysa para iti panagdur-as iti kinaespirituan ken panaglilinnangen. Maawagan dagiti dadakkel a kongregasion kadagiti ward. Tunggal ward ket ipanguluan ti maysa a bishop, a tulongan ti dua a mammagbaga.
Maawagan kadagiti branch dagiti babassit a kongregasion. Tunggal branch ket ipanguluan ti maysa a branch president, a tulongan ti dua a mammagbaga. Mabalin a mabukel ti maysa a branch no adda uray dua laeng a pamilia a miembro nga agnanaed iti maysa nga area ken maysa kadagiti miembro ti maikari nga addaan iti Melchizedek Priesthood wenno maysa a maikari a priest iti Aaronic Priesthood. Ti panguluen ti stake, mision, wenno district ti mangbukel ken mangimaton iti branch. Mapadur-as nga agbalin a ward ti maysa a branch no daytoy ket adda iti beddeng ti maysa a stake.
Buklen ti tunggal ward wenno branch ti masinunuo nga area ti heograpia. Dagiti nadumaduma nga organisasion iti ward wenno branch a makatulong iti aramid ti Apo: dagiti grupo dagiti high priest; dagiti korum dagiti elder; ti Relief Society, para kadagiti babbai nga agtawen iti 18 ken natataengan; dagiti korum ti Aaronic Priesthood, para kadagiti agtutubo a lallaki nga agtawen iti 12 agingga iti 17; ti programa iti Young Women, para kadagiti agtutubo a babbai nga agtawen iti 12 agingga iti 17; Primary, para kadagiti ubbing nga agtawen iti 18 a bulan agingga iti 11 a tawen; ken ti Sunday School, para kadagiti miembro ti Simbaan nga agtawen iti 12 ken natataengan. Tunggal maysa kadagitoy nga organisasion ket mangipatungpal kadagiti napateg nga akem iti panangisuro iti ebanghelio, panangted iti serbisio, ken panangtulong kadagiti nagannak iti sagrado a pagrebbenganda a mangtulong kadagiti annakda a mapasurot iti ebanghelio ni Jesucristo. Agtrabaho pay a sangkamaysa dagitoy nga organisasion a mangtulong kadagiti miembro a mangibinglay iti ebanghelio kadagiti dadduma.
Dagiti Stake, Mision, ken Distrito.
Kaaduan nga area ti heograpia a nakabuklan ti Simbaan ket mabingay kadagiti stake. Ti balikas a stake ket naggapu ken ni propeta Isaias, a nangipadto a ti Simbaan iti ud-udina nga aldaw ket kaslanto iti maysa a tolda, a di maparut dagiti pasokna (kitaen iti Isaias 33:20; 54:2). Gagangay nga adda 5 agingga iti 12 a ward ken branch iti maysa a stake. Tunggal stake ket ipanguluan ti maysa a stake president, a tulongan ti dua a mammagbagana. Agreport ken umawat dagiti stake president iti panangiturong manipud iti Panguluen ti Pitupulo wenno ti Area Presidency.
Ti mision ket maysa a yunit ti Simbaan a gagangay a mangsakup iti maysa nga area a dakdakkel ngem iti sakup ti maysa a stake. Tunggal mision ket ipanguluan ti maysa a mission president, a tulongan ti dua a mammagbaga. Direkta nga agsungbat dagiti mission president kadagiti General Authority.
Kas ti maysa a branch ket basbassit a bersion ti maysa a ward, kasta met a ti maysa a district ket basbassit a bersion ti maysa a stake. Mabukel ti maysa a district no addan umdas a bilang dagiti branch nga adda iti sakup ti maysa nga area, a mangpalugod iti nalaka a komunikasion ken nagin-awa a panagbiahe a mapan kadagiti miting ti district. Maawagan ti maysa a district president a mangipangulo iti daytoy, a tulongan ti dua a mammagbaga. Agreport ti district president iti panguluen ti mision. Mapadur-as ti maysa a distrito nga agbalin a maysa a stake.
Dagiti Programa para kadagiti Awan Asawana a Miembro.
Adu a miembro ti Simbaan ti saan pay pulos a nagasawa wenno nakisina wenno nagdiborsio wenno nabalo. Buklen dagitoy a miembro ti dua a grupo: dagiti babbaro ken babbalasang [young single adults] (agtawen iti 18 agingga iti 30) ken dagiti nataengan nga awan asawana [single adults] (agtawen iti 31 ken natataengan).
Awan ti programa iti sapasap a Simbaan para kadagiti babbaro ken babbalasang ken dagiti nataengan nga awan asawana. Ngem ketdi, no adda umdas nga awan asawana a miembro nga agnanaed iti maysa nga area, maallukoy dagiti lokal a dadaulo ti priesthood nga umawag kadagiti pannakabagi kadagiti awan asawana a miembro [single-member representatives], nga agtrabaho iti babaen ti panangiturongda. Agplano dagiti pannakabagi kadagiti awan asawana a miembro kadagiti aktibidad kas kadagiti pasala, proyekto iti serbisio, ken fireside. Dagitoy nga aktibidad ti mangted kadagiti gundaway kadagiti awan asawana a miembro nga aggiinnammo ken agpipinnatibker iti tunggal maysa. Maallukoy pay dagiti awan asawana a miembro a masansan a makipagkitada kadagiti dadauloda iti priesthood tapno paglilinnawagan ti maipapan kadagiti kasapulanda ken dagiti gundaway para iti naespirituan a panagdur-as ken panagserbida.