Mensahe manipud iti Umuna a Panguluen

Naisangrat daytoy a libro a kas maysa a kadkaduam iti panagadalmo kadagiti nasantuan a kasuratan ken dagiti pannursuro dagiti propeta iti ud-udina nga aldaw. Allukoyendaka nga agibasar iti daytoy bayat ti panagadal ken panangyaplikarmo kadagiti pagbatayan ti ebanghelio. Usarem daytoy kas maysa a pagadawan no agisaganaka kadagiti bitla, mangisuro kadagiti klase, ken agsungbat kadagiti saludsod maipanggep iti Simbaan.

Bayat ti panangsursurom kadagiti kinapudno ti ebanghelio, dumur-askanto iti pannakaawatmo maipapan iti agnanayon a plano ti Nailangitan nga Ama. Babaen iti daytoy a pannakaawat kas maysa a pundasion para iti biagmo, kabaelamto ti agaramid kadagiti masirib a pangngeddeng, agbiag a maitunos iti pagayatan ti Dios, ken makasarakkanto iti rag-o iti panagbiag. Pumigpigsanto ti pammaneknekmo. Agtalinaedkanto a napudno iti pammati.

Naipangpangruna a maseknankami kadagiti agtutubo, babbalasang ken babbaro, ken kabarbaro a napasurot. Ikarimi kenka a babaen ti kanayon a bukod a panagkararag ken panagadal kadagiti nasantuan a kasuratan ken doktrina ti ebanghelio nakasaganakanto a mangsarked kadagiti dakes nga impluwensia a mangallilaw kenka ken mangdangran kenka.

Sapay ta papigsaennaka daytoy a libro kadagiti panagkagumaanmo nga umasideg iti Mangisalakan ken mangsurot iti pagwadanna.

Ti Umuna a Panguluen

Dagiti Topiko iti Ebanghelio

Naurnos iti Napagsasaganad nga Alpabeto