Dagiti Pagarian ti Gloria
Babaen ti Pannubbot ni Jesucristo, agungarto ti amin a tao (kitaen iti Alma 11:42–45). Kalpasan ti panagungartayo, agtakdertayonto iti sango ti Apo tapno maukom (kitaen iti Apocalipsis 20:12; 3 Nephi 27:14). Maikkanto ti tunggal maysa kadatayo iti agnanayon a pagnaedan a lugar iti maitudo a pagarian ti gloria. Insuro ti Apo daytoy a pagbatayan idi kinunana, “Idiay balay ni Amak, adda adu a pagianan” (Juan 14:2).
Adda tallo a pagarian ti gloria: ti celestial a pagarian, ti terrestrial a pagarian, ken ti telestial a pagarian. Ti gloria a tawidem ket agpannurayto iti kaunggan ti pannakapasurotmo, a naipeksa babaen ti panagtungpalmo kadagiti bilin ti Apo. Agpannurayto daytoy iti wagas a sika ket “immawat iti pammaneknek ni Jesus” (DkK 76:51; kitaen met iti 76:74, 79, 101).
Celestial a Pagarian
Ti celestial a pagarian ti kangatuan kadagiti tallo a pagarian ti gloria. Dagiti adda iti daytoy a pagarian ket agnaeddanto iti agnanayon iti sidong ti Dios nga Ama ken ti Anakna a ni Jesucristo. Nasken a daytoy ti panggepmo a tun-oyen: mangtawid iti celestial a gloria ken mangtulong iti dadduma pay nga umawat met iti dayta naindaklan a bendision. Saan a maragpat ti kasta a panggep a tun-oyen iti maysa a gandat; daytoy ti bunga ti tungpal biag a kinalinteg ken agtultuloy a panggep.
Ti celestial a pagarian ket isu ti lugar a naisagana para kadagiti “immawat iti pammaneknek ni Jesus” ken “nagbalin a naan-anay babaen ni Jesus a mangibabaet iti baro a katulagan, a nangipatungpal daytoy naan-anay a pannubbot babaen ti panagsayasay ti bukodna a dara” (DkK 76:51, 69). Tapno matawid daytoy a sagut, nasken nga awatentayo dagiti ordinansa ti pannakaisalakan, agtungpaltayo kadagiti bilin, ken agbabawitayo kadagiti basbasoltayo. Para iti detalyado a pannakailawlawag maipapan kadagiti agtawidto iti celestial a gloria, kitaen iti Doktrina ken Katulagan 76:50–70, 92–96.
Idi Enero 1836 immawat ni Propeta Joseph Smith iti maysa a paltiing a nangpadakkel iti pannakaawatna maipapan kadagiti kasapulan iti panagtawid iti celestial a gloria. Nalukatan dagiti langit kenkuana, ket nakitana ti celestial a pagarian. Nagsiddaaw idi makitana ni manongna nga Alvin sadiay, uray no natay ni Alvin idin sakbay ti panangawatna iti ordinansa ti panagbuniag. (Kitaen iti DkK 137:1–6.) Kalpasanna immay ti timek ti Apo ken ni Propeta Joseph Smith:
“Amin a natay a di pay nakaammo iti daytoy nga ebanghelio, a nangawat koma no napalubosanda a nagbati, agtawiddanto iti celestial a pagarian ti Dios;
“Kasta met dagiti amin a matayto manipud ita a di makaammo iti daytoy, a nangawat koma iti daytoy a sipupuso, agtawiddanto iti dayta a pagarian;
“Ta siak, ti Apo, ukomekto dagiti amin a tao a maibatay kadagiti aramidda, a maibatay iti tarigagay ti puspusoda” (DkK 137:7–9).
Iti panagsaona maipapan iti daytoy a paltiing, kinuna ni Propeta Joseph Smith, “Kasta met a nakitak nga amin nga ubbing a matay sakbay a madanonda ti tawen a mabalindan ti agsungbat maisalakanda iti celestial a pagarian ti langit” (DkK 137:10).
Manipud iti sabali pay a paltiing ken ni Propeta Joseph Smith, masursurotayo nga adda tallo a tukad iti uneg ti celestial a pagarian. Tapno maitan-ok iti kangatuan a tukad ken agtultuloy iti agnanayon kadagiti relasion ti pamilia, nasken a sumrektayo iti “baro ken agnanayon a katulagan ti panagasawa” ket agbalin a napudno iti dayta a katulagan. Iti sabali a pannao, kasapulan ti kallaysa iti templo para iti pananggun-od iti kangatuan a tukad ti celestial a gloria. (Kitaen iti DkK 131:1–4.) Amin a maikari a sumrek iti baro ken agnanayon a katulagan ti panagasawa ket maaddaandanto iti dayta a gundaway, ditoy man a biag wenno iti sumaruno.
Terestrial a Pagarian
Dagiti agtawid iti terestrial a gloria ket isudanto “dagiti mangawat iti isasarungkar iti Anak, ngem saan a ti pakabuklan ti Ama. Gapuna, isu dagiti bagi a terestrial, ket saan a dagiti bagi a celestial, ket maigidiatda iti dayag a kas iti pannakaigidiat ti bulan iti init” (DkK 76:77–78). Iti sapasap a pannao, dagiti tao iti terrestrial a pagarian ket isudanto dagiti madaydayaw a tao, “a nabulsek iti kinasikap dagiti tao” (76:75). Iramanto daytoy a grupo dagiti miembro ti Simbaan a “saan a natured iti pammaneknek ni Jesus” (DkK 76:79). Iramanannanto pay dagiti nangsupring iti gundaway nga umawat iti ebanghelio iti mortalidad ngem idi agangay inawatda daytoy iti lubong ti espiritu kalpasan ti biag iti daga (kitaen iti DkK 76:73–74). Tapno masursuro ti ad-adu pay maipapan kadagiti agtawidto iti terestrial a gloria, kitaen iti Doktrina ken Katulagan 76:71–80, 91, 97.
Telestial a Pagarian
Mailatangto ti telestial a gloria para kadagiti tao a “saan nga immawat iti ebanghelio ni Cristo, uray pay ti pammaneknek ni Jesus” (DkK 76:82). Awatento dagitoy a tao ti gloriada kalpasan ti pannakasubbotda manipud iti pagbaludan ti espiritu, a no dadduma maawagan iti impierno (kitaen iti DkK 76:84, 106). Ti detalyado a pannakailawlawag maipapan kadagiti agtawidto iti telestial a gloria ket masarakan iti Doktrina ken Katulagan 76:81–90, 98–106, 109–112.
Manangdadael
Sumagmamano a tao ti saanto a maikari nga agnaed iti ania man a pagarian ti gloria. Maawagandanto iti “annak a lallaki ti manangdadael” ken isudanto dagiti “maawat iti gloria a saan a pagarian ti gloria” (DkK 76:32; 88:24). Daytoyto ti kasasaad dagiti “makaammo iti bileg [ti Dios], ken nairanuden, ket nagsagabada babaen ti bileg ti sairo tapno maparmek, ken mangtallikud iti kinapudno ken mangkarit iti bileg [ti Dios]” (DkK 76:31; kitaen met iti DkK 76:30, 32–49).