Dios nga Ama
Ti Dios nga Ama ket isu ti Kangatuan ti Amin a patien ken pagrukbabantayo. Isu ti kangrunaan a Namarsua, Agturay, ken Mamagtaginayon iti amin a banag. Isu ket naan-anay, addaan iti amin a bileg, ken ammona ti amin a banag. Isu ket “nagtagilasag ken nagtagitulang … a marikna a kas iti tao” (DkK 130:22).
Ti Nailangitan nga Amatayo ket isu ti Dios ti panangukom ken pigsa ken pannakaammo ken bileg, ngem Isu pay ti Dios nga addaan iti naan-anay a kinaasi, kinaimbag, ken kinamanagayat. Nupay ditayo “ammo ti kaipapanan ti amin a banag,” makasaraktayo iti kappia iti awan duadua a pannakaammo nga Isu ket ay-ayatennatayo (kitaen iti 1 Nephi 11:17).
Ti Ama dagiti Espiritutayo
Maysa kadagiti naindaklan a saludsod ti biag ti “Asinoak?” Makatulong ti makaay-ayo a kanta ti Primary nga uray dagiti babassit nga ubbing ket makasungbat iti daytoy a saludsod. Kantaentayo, “Siak ti anak ti Dios, imbaonnnak ditoy.” Ti pannakaammo nga annaknatayo ti Dios ket mangipaay iti pigsa, liwliwa, ken namnama.
Maysaka a literal nga anak ti Dios, naespirituan a nayanakka iti biag sakbay daytoy a biag. Kas anakna, maipanamnama kenka nga addaanka iti nadiosan, agnanayon a potensial ken tulongannakanto kadagiti napudno a panagkagumaam a mangragpat iti dayta a potensial.
Ti Kangatuan a Namarsua
Ti Nailangitan nga Ama ti Kangatuan a Namarsua. Babaen ken ni Jesucristo, pinarsuana ti langit ken daga ken amin a banag iti unegda (kitaen iti Moises 2:1). Kinuna ni Alma, “Ipamatmat amin dagiti banag nga adda Dios; wen uray pay ti daga, ken amin a banag nga adda iti rabawna, wen, ken ti panagpusiposna, wen, ken kasta met amin dagiti planeta nga aggunay iti gagangay a langada ti mangpaneknek nga adda Kangatuan a Namarsua” (Alma 30:44).
Iti sagpaminsan, panunotem a naimbag dagiti kinapintas ti panagparsua: dagiti kayo, dagiti sabong, dagiti ayup, dagiti bantay, dagiti dalluyon ti taaw, ti maysa a kayyanak nga ubing. Maaddaan iti oras a mangmatmat kadagiti langit, a dagiti direksion dagiti bituen ken planeta ket pakakitaan iti “Dios nga aggungunay a sitatan-ok ken sibibileg” (kitaen iti DkK 88:41–47).
Ti Akin-aramid iti Plano ti Pannakaisalakan
Kayat ti Amatayo iti Langit a makipagnaedtayo Kenkuana iti agnanayon. Impakdaar ti Apo a ti aramid ken gloriana ket “mangipatungpal iti saan nga ipapatay ken agnanayon a biag ti tao” (Moises 1:39). Tapno maaramid a posible daytoy, insaganana ti plano ti pannakaisalakan. Imbaonna ti Ay-ayatenna nga Anak, ni Jesucristo, a mangwarwar kadagiti pamungo ni patay ken mangsubbot kadagiti basbasol ti lubong: “Ta kasta la unay ti panagayat ti Dios iti lubong, nga intedna ti anakna a Bugbugtong, tapno amin a mamati kenkuana saan a mapukaw, no di ket adda biagna nga agnanayon” (Juan 3:16). Daytoy a sakripisio ti kadakkelan a panangipeksa iti ayat ti Amatayo para kadatayo.
Panangam-ammo iti Dios nga Ama
Kas annak ti Dios, addaantayo iti naisangsangayan a pannakainaig Kenkuana, a pakaigiddiatantayo iti amin a dadduma pay a pinarsuana. Agkalikagumka a mangammo iti Amam iti Langit. Ay-ayatennaka, ken inikkannaka iti napateg a gundaway nga umasideg Kenkuana no agkararagka. Dagiti kararagmo, a mairuknoy iti kinapakumbaba ken kinapudno, ket mangngegan ken masungbatan.
Mabalinmo pay a maam-ammo ti Amam babaen ti panangsursurom maipapan iti Patpatgenna nga Anak ken panangaramatmo iti ebanghelio iti biagmo. Insuro ti Mangisalakan kadagiti disipulona: “No nailasindak koma, nailasinyo met koma ti Amak. … Ti nakakita kaniak nakitana ni Ama” (Juan 14:7, 9).
Mayasidegka iti Dios nga Ama kabayatan ti panagadalmo kadagiti nasantuan a kasuratan ken dagiti balikas dagiti propeta iti ud-udina nga aldaw ken kabayatan ti panangtedmo iti serbisio. No surotem ti pagayatan ti Dios ken agbiagka iti kas iti kayatna a panagbiagmo, agbalinka nga ad-adda pay a kas Kenkuana ken kas iti Anakna. Isaganam ti bagim nga agsubli a makipagtaeng iti sidongda.