Abuso
Ti abuso ket panangtrato kadagiti dadduma wenno iti bagi iti wagas a makaigapu iti pannakaranggas wenno pannakapasakit. Daytoy ti mangdangran iti panunot ken ti espiritu ken masansan a mangranggas pay iti bagi. Mabalin a mangparnuay daytoy iti pannakatikaw, panagduadua, saan a panagtalek, ken panagbuteng. Panaglabsing daytoy kadagiti linteg ti kagimongan ken naan-anay a panangsuppiat daytoy kadagiti pannursuro ti Mangisalakan. Supringen ti Apo ti abusado nga ugali iti ania man a kita—mainaig iti bagi, seks, sao, wenno rikna. Ti abusado nga ugali ket mabalin nga agbanag iti panagdisiplina ti Simbaan.
Balakad para iti Managabuso
No nagbalinka nga abusado iti ania man a relasion, nasken nga agbabawika iti basolmo. Agpakaasika iti Apo a pakawanennaka. Agdawatka iti pammakawan kadagiti dinangram. Kasaom ti bishopmo wenno ti branch presidentmo tapno matulongannaka babaen iti proseso ti panagbabawi ken, no kasapulan, tulongannaka nga umawat iti mainayon a balakad wenno dadduma pay a tulong.
No ti managpungtot a riknam ti nangrubrob iti abusado nga ugalim, sursuruem ti mangtimbeng iti riknam. Umasidegka iti Apo a sikakararag ket dawatem Kenkuana a tulongannaka. Babaen iti agnanayon a pannirigan, makitamto a dumani kanayon nga umawan ti pungtotmo kas sungbat kadagiti banag a saan unay a napateg.
No nagbasolka iti seksual a panagabuso, ikagumaanam a disiplinaen ti panunotmo. Laglagipem nga addaan dagiti panunotmo iti nabileg nga epekto iti biagmo—“kas iti pampanunoten ti [tao] iti unegna, isu kasta met” (Dagiti Proverbio 23:7). Liklikam ti pornograpia ken ti ania man a banag a makaparugso iti imoral a tarigagay iti seks. Agkararagka para iti kabaelam a “taraonan koma ti saguday ti pampanunotmo nga awan ressatna” (DkK 121:45).
Tulong para kadagiti Biktima ti Panagabuso
No maysaka a biktima ti panagabuso, agkiddawka a dagus iti tulong. Kasaom ti priesthood leadermo, gagangay a ti bishop wenno branch presidentmo ngem no dadduma ti maysa a miembro ti panguluen ti stake wenno distrito. Matulongannaka a mangammo no ania ti aramidem.
Mangnamnamaka a saan a sika ti mapabasol gapu iti makadangran nga ugali dagiti dadduma. Saan a kasapulan a mariknam a nagbasolka. No nagbalinka a maysa a biktima ti pannakarames wenno dadduma pay a seksual a panagabuso, inabusonaka man ti maysa nga am-ammom, ti maysa a ganggannaet, wenno uray pay ti maysa a miembro ti pamiliam, saanka a nakabasol iti seksual a basol. Ammom nga inosenteka ken ay-ayatennaka ti Nailangitan nga Amam.
Agkararagka para iti talna a sumangbay laeng babaen ken ni Jesucristo ken ti Pannubbotna (kitaen iti Juan 14:27; 16:33). Napasaranen ti Mangisalakan ti amin a saem ken rigatmo, uray pay dagiti gapuanan dagiti dadduma, ken ammona no kasano a matulongannaka (kitaen iti Alma 7:11–12). Imbes nga agkalikagumka a bumales, agtalinaedka ketdi kadagiti banag a makontrolmo, kas koma iti bukodmo a pannirigan iti biag. Agkararagka para iti pigsa a mangpakawan kadagiti nangdangran kenka.
Ituloymo ti agkiddaw iti tulong manipud iti priesthood leadermo tapno matarabaynaka iti unos ti proseso ti panangpaimbag iti riknam. Babaen kadagiti bendision ti ebanghelio, mabalinmo a lapdan ti pannakaulit ti panagabuso ken mawayawayaan iti napasaram a panagsagaba.