Apagkapullo
Maysa kadagiti bendision ti kinamiembro iti Ti Simbaan ni Jesucristo dagiti Santo iti Ud-udina nga Aldaw ket ti pribilehio ti panagbayad iti apagkapullo. Babaen ti panagtungpal iti linteg ti apagkapullo, makiramanka iti panangbangon iti pagarian ti Dios iti daga.
Pannakailawlawag ken Panggep ti Apagkapullo
Iti panagbayad iti naan-anay nga apagkapullo, mangtedka iti maysa nga apagkapullo ti nasapulam iti Apo babaen ti Simbaanna. Itedmo ti apagkapullom iti maysa a miembro ti bishopricyo wenno panguluen ti branchyo.
Direkta nga ipatulod dagiti lokal a dadaulo dagiti pundo ti apagkapullo kadagiti kuartel ti Simbaan, a pangikeddengan ti maysa a konseho kadagiti naipangruna a wagas a pakausaran dagiti sagrado a pundo. Buklen daytoy a konseho ti Umuna a Panguluen, ti Korum dagiti Sangapulo-ket-dua nga Apostol, ken ti Presiding Bishopric. Iti panagtignayda a mayannurot iti paltiing, agaramidda kadagiti pangngeddeng bayat ti panangiturong kadakuada ti Apo. (Kitaen iti DkK 120:1.)
Kanayon a mausar dagiti pundo ti apagkapullo para kadagiti panggep ti Apo—a mangbangon ken mangpatalinaed kadagiti templo ken balay a pagmimitingan, mangtulong kadagiti aramid ti misionario, ken mangipatungpal iti aramid ti Simbaan iti intero a lubong.
Dagiti Bendision ti Panagbayad iti Naan-anay nga Apagkapullo
Agkasapulan ti linteg ti apagkapullo iti sakripisio, ngem ti panagtungpalmo iti linteg ti mangisangbay kadagiti bendision nga ad-adu pay nga amang ngem iti ania man a banag nga insukom. Insuro ni propeta Malakias:
“Yegyo ti amin nga apagkapullo iti kamalig, tapno adda koma taraon iti balayko, ket padasendak ita iti daytoy, kuna ni Jehova dagiti buybuyot, no siak diakto luktan kadakayo dagiti tawtawa ti langit, ket ibuyatkonto kadakayo ti bendision nga awanto ti lugar a makalaon nga umawat” (Malakias 3:10).
Umay dagitoy a bendision iti amin nga agbayad iti naan-anay a sangapulo a porsiento ti matgedanda, uray no bassit unay a gatad dayta a kadagupanna. No tungpalem daytoy a linteg, bendisionannakanto ti Apo nga agpada a naespirituan ken naindagaan.
Panagkumit nga Agbayad iti Apagkapullo
No saanmo pay a naipasdek ti pagtuladan ti agtultuloy a panagbayad iti apagkapullo, mabalin a marigatanka a mamati a kabaelam nga isuko ti maysa nga apagkapullo ti natgedam. Ngem masursuro dagiti agbaybayad iti napudno nga apagkapullo a saanda a kabaelan ti saan nga agbayad iti apagkapullo. Iti pudno unay ken nakaskasdaaw a wagas, maluktan dagiti tawtawa ti langit ket maibukbok dagiti bendision kadakuada.
Laglagipen a ti panagbayad iti apagkapullo ket saan unay a pakaseknan iti kuarta no di ket pakaseknan iti pammati. Panagtalek iti Apo. Intedna ti bilin para iti pagimbagantayo, ket inaramidna ti maibuyog a kari. Agkalikagum a maaddaan iti pigsa iti pammati ni Nephi, a nagkuna “Napudnotayo koma nga agtungpal kadagiti bilin ti Apo; ta adtoy makitayo a naturturay ti Apo ngem iti amin ditoy daga” (1 Nephi 4:1).