Kararag
Anaknaka ti Dios. Ay-ayatennaka ti Nailangitan nga Amam ken ammona dagiti kasapulam, ken kayatna a makisaritaka Kenkuana babaen ti kararag. Agkararagka Kenkuana ken awanen ti sabali pay. Imbilin ni Apo Jesucristo, “Masapul nga agkararagkayo iti Ama iti naganko” (3 Nephi 18:19).
No ugaliem ti umasideg iti Dios babaen iti panagkararag, maam-ammomto Isuna ken ad-addanto a mayasisegka Kenkuana. Agbalinto dagiti tarigagaymo a kas iti tarigagayna. Kabaelamto ti mangpatalged iti bagim ken iti dadduma pay kadagiti bendision a nakasagana nga itedna no agdawatkanto a sipapammati.
Dagiti Pagbatayan ti Kararag
Kanayon a nakasagana ti Nailangitan nga Amam a dumngeg ken sumungbat kadagiti kararagmo. Agpannuray kenka ti bileg dagiti kararagmo. Bayat ti panagkagumaam a mangaramid a paset ti biagmo ti panagkararag, laglagipem daytoy a balakad:
Aramidem a napnuan kaipapanan dagiti kararagmo.
Imballaag ni propeta Mormon a no ti asino man “agkararag a saan a napudno iti pusona … awan ti magun-odna, agsipud ta awan ti awaten ti Dios a kasta” (Moroni 7:9). Tapno maaramid a napnuan kaipapanan dagiti kararagmo, nasken nga agkararagka nga addaan iti sinseridad ken “iti amin a kabaelan ti puso” (Moroni 7:48). Annadam tapno maliklikam ti “awan kapapayanna a panangulit-ulit” no agkararagka (kitaen iti Mateo 6:7). Ikkam iti napasnek a panagpanunot maipapan iti kananakemmo ken dagiti balikas nga usarem.
Usarem ti pagsasao a mangipakita iti ayat, respeto, panagrukbab, ken kinasinged.
Agduma ti pannakausar daytoy a pagbatayan a mayannurot iti pagsasao nga usarem. No agkararagka iti Ingles, kas pagarigan nasken nga usarem dagiti pangsandi a balikas dagiti nasantuan a kasuratan no umawagka iti Dios—Dakayo, Kadakayo, -Yo, ken -Kukuayo, imbes a dagiti gagangay a pangsandi a balikas a sika, kenka, ken kukuam. Ania man ti pagsasao, agtalinaed a maymaysa ti pagbatayan: No agkararagka, nasken nga usarem dagiti balikas a siuumno a mangipapanan iti naayat, managraem a pannakinaig iti Dios. Mabalin nga adda sumagmamano a panagkarigatam iti panangsursurom iti pagsasao ti kararag, ngem in-inut nga agbalinkanto a komportable bayat ti panagkararagmo ken panagbasam kadagiti nasantuan a kasuratan.
Kanayon nga agyamanka iti Nailangitan nga Amam.
Nasken nga “agyamankayo iti inaldaw, gapu iti nalabon a kaasi ken parabur nga ipapaayna kadakayo” (Alma 34:38). Bayat ti panangtedmo iti oras a manglagip kadagiti paraburmo, mabigbigmonto no kasano ti kaadu ti inaramiden ti Nailangitan nga Amam para kenka. Yebkasmo ti panagyamanmo Kenkuana.
Kalikagumam a gun-oden iti pannarabay ken pigsa ti Nailangitan nga Ama iti amin nga aramidem.
Imbalakad ni Alma iti anakna a ni Helaman: “Umararawka iti Dios iti amin a kasapulam; wen, italekmo amin nga aramidmo iti Apo ket sadino man a papanam agturongda koma iti Apo, wen, maiturong koma amin a pampanunotmo iti Apo; wen, bay-am a ti pammateg ti pusom maipaay iti Apo iti agnanayon. Pabalakadanka iti Apo iti amin nga aramidem, ket iturongnaka iti pagsayaatam; wen, no agiddaka iti rabii agiddaka iti Apo, tapno bantayannaka iti pannaturogmo; ket no bumangonka iti agsapa bay-am a mapno ti pusom iti panagyaman iti Dios; ket no aramidem dagitoy a banag, maitag-aykanto iti maudi nga aldaw” (Alma 37:36–37; kitaen met iti Alma 34:17–26).
Laglagipem dagiti kasapulan ti dadduma no agkararagka.
Mangiruknoyka kadagiti kararag “para iti pagimbaganyo, ken kasta met ti pagimbagan dagiti adda iti aglawlawyo” (Alma 34:27). Idawatmo iti Nailangitan nga Amam a bendisionan ken liwliwaenna dagiti agkasapulan. Idawatmo Kenkuana a paregtaen ken papigsaenna ti Presidente ti Simbaan, dagiti dadduma pay a General Authority, ken dagiti lokal a lider ti Simbaanyo. Akararagka para iti pagimbagan dagiti miembro ti pamiliam ken gagayyemmo. Ikararagam dagiti lider ti gobierno. Idawatmo iti Apo a paregtaen ken saluadanna dagiti misionario ken dagiti tao a sursuruanda.
Kalikagumam a gun-oden ti pannarabay ti Espiritu Santo tapno maammuamto no ania ti iramanmo kadagiti kararagmo.
Maisuronaka ti Espiritu Santo nga agkararag ken matarabaynaka kadagiti banag nga isaom (kitaen iti Taga Roma 8:26; 2 Nephi 32:8). Matulongannaka nga agkararag a “maibatay iti pagayatan ti Dios” (DkK 46:30).
No agkiddawka babaen ti kararag, aramidem ti amin a kabaelam a makatulong iti pannakapatgan daytoy.
Namnamaennaka ti Nailangitan nga Ama nga agaramidka iti ad-adda pay ngem ti agdawatka Kenkuana lattan kadagiti paraburna. No adda napateg a pangngeddeng nga aramidem, masansan nga idawatnanto a kasapulam nga “adalem iti panunotmo” sakbay nga itednanto ti maysa a sungbat (kitaen iti DkK 9:7–8). Agbalinto a nasamay laeng dagiti kararagmo para iti pannarabay kas kadagiti panagkagumaam nga umawat kadagiti arasaas wenno pammaregta ti Espiritu Santo. Dagiti kararagmo para iti bukodmo a pagimbagan ken para iti pagimbagan dagiti dadduma ket awan kaes-eskanna no “tallikudanyo dagiti makasapul, ken dagiti lamulamo, ken saanyo a sarungkaran dagiti masaksakit ken marigrigat, ken diyo ibingayan dagiti makasapul iti taraonyo, no addaankayo, kadagiti kanayon a makasapul” Alma 34:28).
No adda narigat nga aramid iti sangom, maragsakan ti Nailangitan nga Ama no agparintumengka ket agdawatka iti tulong ket kalpasanna tumakderka ket agtrabahoka. Tulongannakanto iti amin a nalinteg a tarigagayam, ngem manmano nga aramidennanto ti maysa a banag para kenka a kabaelam nga aramiden.
Bukod a Kararag
Iti Kaskasabana iti Bantay, imbalakad ni Jesucristo: “Sumrekka iti siledmo, ken inton mairikepen ti ruangan, agkararagka ken Amam iti nalimed; ket ni Amam a makakita iti nalimed gunggonaannakanto” (Mateo 6:6). Dagiti bukod, pribado a kararag ket napateg a paset ti naespirituan a panagdur-asmo.
Iti uray tunggal bigat ken tunggal rabii laeng, mangsarakka iti maysa a lugar a nawaya manipud kadagiti pannakasinga. Agparintumengka a sipapakumbaba ket kasaritam ti Nailangitan nga Amam. Nupay no dadduma mabalin a kasapulam ti agkararag a siuulimek, ikagumaanam sagpaminsan ti agkararag a sibabatad (kitaen iti DkK 19:28; 20:51).
Laglagipem a ti kararag ket dua-nga-agsabat a komunikasion. Bayat ti panangigibusmo kadagiti kararagmo, mangted iti kanito nga agsardeng ken dumgnegka. No dadduma, balakadan, iwanwan, ken liwliwaennakanto ti Nailangitan nga Ama bayat ti panagparintumengmo.
Saanka a mamati iti kapanunotan a saanka a maikari nga agkararag. Aggapu daytoy a kapanunotan ken ni Satanas, nga agtarigagay a mangpapati kenka a nasken a saanka nga agkararag (kitaen iti 2 Nephi 32:8). No saanmo a marikna a makakarkararagenka, agkararagka agingga a mariknam a makakarkararagenka.
Imbilin ti Mangisalakan, “Kanayon nga agkararagka, tapno agballigika; wen, tapno maparmekmo ni Satanas, ken tapno malibasam dagiti ima dagiti katulongan ni Satanas a mangitandudo iti aramidna” (DkK 10:5). Nupay saanka a makapagtultuloy a nakaparintumeng, kanayon nga iruknoy ti bukod, pribado a kararag, mabalin koma a “paglippiasenyo iti kararag [iti Dios]” ti pusoyo. (Alma 34:27; kitaen met iti 3 Nephi 20:1). Iti unos ti tunggal aldaw, mabalin a mapagtalinaedmo ti di agbalbaliw a rikna ti ayat para iti Nailangitan nga Amam ken ti Ay-ayatenna nga Anak. Mabalinmo a siuulimek a yebkas ti panagyaman iti Nailangitan nga Amam ken idawatmo Kenkuana a papigsaennaka kadagiti pagrebbengam. Kadagiti panawen ti pannakasulisog wenno panagpeggad ti bagi, mabalinmo ti siuulimek nga agdawat iti tulongna.
Panagkararag ti Pamilia
Mainayon iti panangbilinna kadatayo nga agkararag iti pribado, ginutugotnatayo ti Mangisalakan nga agkararagtayo a kadua dagiti pamiliatayo. Kinunana, “Agkararagkayo a sangaamaan iti Ama, a kanayon iti naganko, tapno mabendisionan dagiti assawa ken annakyo” (3 Nephi 18:21).
No naasawaanka, aramidem ti kararag ti pamilia a kanayon a paset ti biag ti pamiliam. Tunggal bigat ken rabii, sangkamaysa nga agparintumeng a sipapakumbaba. Ikkan ti tunggal miembro ti pamilia iti masansan a gundaway a mangisao iti kararag. Agkaykaysakayo iti panagyaman kadagiti bendision nga inted kadakayo ti Nailangitan nga Ama. Agkaykaysakayo iti pammati tapno umararaw para kadagiti parabur a kasapulanyo ken agkararag para kadagiti dadduma.
Babaen ti kanayon a panagkararag ti pamilia, ad-addanto a mayasidegka ken ti pamiliam iti Dios ken iti tunggal maysa. Masursuronto dagiti annakyo ti makisarita iti Amada iti Langit. Nasaysayaatto ti pannakaisaganayo amin nga agserbi iti dadduma ken mangsarked kadagiti pannulisog. Agbalinto ti pagtaenganyo a maysa a lugar ti naespirituaan a pigsa, maysa a pagkamangan manipud kadagiti dakes nga impluwensia ti lubong.
Panagkararag iti Kaaduan
No dadduma mabalin a maidawat kenka a mangiruknoy iti maysa a kararag iti kaaduan, nalabit nga iti maysa a miting wenno klase iti Simbaan. No maawatmo daytoy a gundaway, laglagipem a makisarsaritaka iti Nailangitan nga Ama, a saanka a mangted iti sermon iti kaaduan. Dika madanagan maipapan iti mabalin a panunoten dagiti dadduma no ania ti isaom. Ngem ketdi, mangiruknoyka iti simple, naimpusuan a kararag.
Panangawat kadagiti Sungbat iti Kararag
Insuro ti Mangisalakan, “Agdawatkayo, ket maikkankayto; agsapulkayo ket makasarakkayto; umawagkayo ket mailukatankayto: ta siasino nga agdawat umawat; ket ti agsapul makasarak; ket ti umawag mailuktanto” (Mateo 7:7–8). Kadagiti Nephite kinunana, “Ania man a dawatenyo iti Ama iti naganko, a nalinteg, a mamatikayo a magun-odyo, adtoy maitedto kadakayo” (3 Nephi 18:20).
Dengdenggen ti Nailangitan nga Ama dagiti kararagmo. Mabalin a saan a kanayon a sumungbat kas iti namnamaem, ngem sumungbat Isuna—iti bukodna a panawen ken mayannurot iti pagayatanna. Gapu ta ammona no ania ti kasayaatan para kenka, mabalin a no dadduma sungbatanna iti saan, uray no napudno dagiti ararawmo.
Sumangbay dagiti sungbat iti kararag iti adu a wagas. Masansan a sumangbayda babaen ti naalumamay, bassit a timek ti Espiritu Santo (kitaen iti “Paltiing,” dagiti panid 97–102). Mabalin a sumangbayda kadagiti pasamak ti biagmo wenno babaen dagiti aramid a naimbag dagiti adda iti aglawlawmo. Bayat ti panagtultuloymo nga umasideg iti Nailangitan nga Amam babaen ti kararag, ad-adda a nakasagana a mabigbigmonto dagiti naasi ken masirib a sungbat kadagiti ararawmo. Matakuatamto nga Isu ti “kamang ken bileg[mo], sisisibay unay a saranay iti panagdukot” (Salmo 46:1).