Pannakaorden sakbay a Nayanak
Iti lubong ti espiritu sakbay ti pannakaitao, nangtuding ti Dios kadagiti masinunuo nga espiritu a mangipatungpal kadagiti masinunuo a mision kabayatan ti mortal a panagbiagda. Maawagan daytoy iti pannakaorden sakbay a nayanak.
Ti pannakaorden sakbay a nayanak [foreordination] ket saan a manggarantia nga umawatto dagiti tao kadagiti masinunuo nga awag wenno pagrebbengan. Dumteng dagiti kasta a gundaway iti daytoy a biag a kas bunga ti nalinteg a panangaramat iti kinawaya nga agpili, kasta met a dimteng ti pannakaorden sakbay a nayanak a kas bunga ti kinalinteg iti biag sakbay ti pannakaitao.
Naordenan idin sakbay a nayanak ni Jesucristo tapno mangipatungpal iti Pannubbot, a nagbalin a “ti Cordero a napapatay nanipud idi pannakabangon toy lubong,” (Apocalipsis 13:8; kitaen met iti 1 Pedro 1:19–21). Salaysayen dagiti nasantuan a kasuratan maipapan kadagiti dadduma pay a naordenan idi sakbay a nayanak. Naammuan ni propeta Abraham maipapan iti pannakaordenna sakbay a nayanak idi inawatna ti maysa a parmata a nakakitaanna iti “adu a madaydayaw ken naindaklan” kadagiti espiritu iti lubong ti espiritu sakbay ti pannakaitao. Kinunana: “Nakita ti Dios a nasayaat dagitoy a kararua, ket nagtakder iti tengngada, ket kinunana: Pagbalinekto dagitoy nga agturayko; ta nagtakder iti ummong dagiti espiritu, ket nakitana a nasayaatda; ket kinunana kaniak: Abraham, maysaka kadakuada; napilikan sakbay pay ti pannakaipasngaymo” (Abraham 3:22–23). Imbaga ti Apo ken ni Jeremias, “Kasakbayan ti panangbukelko kenka iti tian nabigbigankan; ket idi kasanguanan ti pannakaipasngaymo sinantificarka, tinudinganka a mammadto kadagiti nasnasion” (Jeremias 1:5). Naordenan sakbay a nayanak ni Juan Bautista tapno isaganana dagiti tao para iti mortal a panagministro ti Managisalakan (kitaen iti Isaias 40:3; Lucas 1:13–17; 1 Nephi 10:7–10).
Ti dokrina ti pannakaorden sakbay a nayanak ket mayaplikar iti amin a miembro ti Simbaan, saan laeng iti Mangisalakan ken dagiti propetana. Sakbay ti pannakaparsua ti lubong, naikkan dagiti napudno a babbai kadagiti masinunuo a pagrebbengan ken naordenan idin sakbay a nayanak dagiti napudno a lallaki kadagiti masinunuo a pagrebbengan. Nupay dimo malagip dayta a panawen, awan duadua nga immanamongka a mangipatungpal kadagiti napapateg nga aramid iti serbisio ti Amam. Iti pannakapaneknekmo iti bagim a maikari, maikkankanto kadagiti gundaway a mangipatungpal kadagiti naituding nga aramiden nga inawatmo kalpasanna.