Panangipatay kadagiti Ima
Ti panagipatay kadagiti ima ket wagas nga impalgak ti Apo para iti panangannong iti adu nga ordinansa ti priesthood, kas iti pannakapatalged [kumpirmasion], ordinasion, panangpasingked [setting apart] kadagiti miembro tapno agserbi kadagiti awagda, panangannong iti masakit, ken panangted iti dadduma pay a pammendision ti priesthood (kitaen iti DkK 42:44; Pagannurotan ti Pammati 1:4–5). Dagiti addaan iti umno a turay ti priesthood ket ipatayda dagiti imada iti ulo ti tao nga umawat iti ordinansa. Iti panangaramid iti daytoy, agserbida a kas instrumento a pangbendisionan ti Apo kadagiti annakna (kitaen iti DkK 36:2).
Kanayon nga usaren dagiti addaan iti priesthood daytoy a wagas. Inordenan ni Adan dagiti nalinteg a lallaki nga an-annabona babaen ti panangipatay kadagiti ima (kitaen iti DkK 107:40–50). Idi insao ni Jacob dagiti pammendision kada Efraim ken Manases, impatayna dagiti imada kadagiti uloda (kitaen iti Genesis 48:14–19). Ni Alma “inordenanna dagiti saserdote ken elder, babaen ti panangipatayna kadagiti dakulapna a maibatay iti urnos ti Dios” (Alma 6:1). Impaay da Apostol Pedro ken Juan ti sagut ti Espiritu Santo babaen ti panangipatayda kadagiti imada (kitaen iti Dagiti Aramid 8:14–17). Iti daytoy a dispensasion, intalek [conferred] ni Juan Bautista ti Aaronic Priesthood kada Joseph Smith ken Oliver Cowdery babaen ti panangipatay kadagiti dakulap (kitaen iti Joseph Smith—Pakasaritaan 1:68–69).