Sulisog
Kas iti impadto ni Apostol Pablo, “aldaw a napeggad” dagiti maudi nga aldaw (2 Timoteo 3:1). Nasaknap ken makagargari ti impluwensia ti kabusor. Ngem kabaelam nga abaken ni Satanas ket maparmekmo dagiti pannulisogna. Inikkannaka ti Nailangitan nga Ama iti sagut ti kinawaya nga agpili—ti bileg a pumili iti nasayaat manipud iti dakes. Mabalinmo nga “ipakumbaba [ti bagim] iti sango ti Apo, ket awagam ti nasantuan a naganna, ken agsalukag ken agkararagka a kanayon, tapno saanka a masulisog iti nalablabes ngem iti kabaelam” (Alma 13:28). No sitatallugodka nga agtungpal kadagiti bilin, papigsaennakanto ti Nailangitan nga Amam tapno masarkedam ti pannulisog.
Ti sumaganad a balakad ket matulongannakanto a mangparmek iti sulisog.
Isentrom ti biagmo iti Mangisalakan.
Imbalakad ni propeta Helaman kadagiti annakna a lallaki, “Laglagipenyo, laglagipenyo a babaento ti bato ti Mannubbottayo, nga isu ni Cristo, ti Anak ti Dios, a nasken a bangonenyo ti pamuonyo; tapno no yeg ti sairo ti nabileg nga anginna, wen, dagiti gayang iti alipugpog, wen, no amin dagiti uraro ken nabileg a bagyona sumaplit kadakayo, awanto ti bilegna kadakayo a mangirarem iti taaw ni ladingit ken awan inggana a kinaay-ay-ay, gapu iti bato a binangonyo, nga awan duadua a pamuon, ti pamuon a no bangonen dagiti tao saanda a matuang” (Helaman 5:12).
Agkararag para iti pigsa.
Idi immay ti nangungar a Mangisalakan kadagiti Nephite, sinuruanna ti ummong: “Masapul nga agannad ken agkararagkayo a kanayon amangan ta masulisogkayo; gapu ta kayatnakayo a tagikuaen ni Satanas, tapno yakayakennakayo a kas iti trigo. Ngarud masapul nga agkararagkayo iti Ama iti naganko” (3 Nephi 18:18–19). Kadagiti ud-udina nga aldaw intedna ti isu met la a balakad: “Kanayon nga agkararagka, tapno agballigika; wen, tapno maparmekmo ni Satanas, ken tapno malibasam dagiti ima dagiti katulongan ni Satanas a mangitandudo iti aramidna” (DkK 10:5).
Agadal kadagiti nasantuan a kasuratan iti inaldaw.
No agadalka kadagiti kinapudno ti ebanghelio ket yaplikarmo dagitoy iti biagmo, bendisionannakanto ti Apo iti bileg a mangsarked iti sulisog. Insuro ni Nephi, “Asino man a mangipangag iti balikas ti Dios, ken kumpet a naimbag itoy, saandanto a maungaw; wenno dinto ida rimbawan dagiti sulisog ken dagiti naranggas a pana ti kabusor tapno mabulsek, a mangiturong kadakuada iti pannakadadael” (1 Nephi 15:24; kitaen met iti Helaman 3:29–30).
Punnuem ti biagmo iti kinaimbag.
Aduanka iti nasayaat a pagpilian tapno saan a nasken a makiranudka iti dakes. No punnuem ti biagmo iti kinaimbag, awan ibatim a lugar para iti ania man a banag.
Liklikam dagiti makasulisog a lugar ken kasasaad.
Saanmo a naan-anay a maliklikan ti pannulisog, ngem maliklikam dagiti lugar wenno kasasaad a mabalin a pakasulisogam. Maliklikam pay dagiti saan a maitutop a banag kadagiti magasin, libro, telebision, sine, ken musika ken ti Internet.
Ikagumaanam ti mangaring kadagiti dadduma para iti pagimbagan.
Kasakbayan ti panagsagabana iti Minuyongan ti Getsemani, inkararagan ti Mangisalakan dagiti disipulona: “Saanda a taga lubong, a kas kaniak a saanak a taga lubong. Diak dawaten nga ikkatem ida ditoy lubong, no di ket igagam koma ida iti dakes. Saanda a taga lubong, a kas kaniak a saanak a taga lubong. Pasantuem ida iti kinapudno: ti saom isu ti pudno. Kas imbaonnak ditoy lubong, imbaonko met ida ditoy lubong” (Juan 17:14–18). Kas disipulo ni Jesucristo iti ud-udina nga aldaw, mabalinmo ti agyan iti lubong ngem “saanka a taga lubong.” Mainayon pay iti panangliklik mismo iti sulisog, makaaringka kadagiti dadduma pay nga agbiag iti nasayaat ken naimbag a biag. Makaipakitaka iti nalinteg a pagwadan, makapagbalinka a nasayaat a gayyem, makiramanka iti panagserbi iti komunidad, ken, no maitutop, maipangngegmo ti timekmo a mangsaluad kadagiti ik-ikkan pateg a mainaig iti nadalus a panagbiag.
Iti kaano man dika agduadua kadagiti pangngeddengmo a mangsarked iti sulisog.
Ikagumaanam ti mangsurot iti pagwadan ti Mangisalakan, a “naglak-am kadagiti sulisog ngem saanna a dinengngeg ida” (DkK 20:22). Idi sinulisog ni Satanas ni Jesus iti let-ang, saan a pulos nagduadua ti Apo. Alisto ken natibker ti sungbatna: “Pumanawka kaniak, Satanas” (Lucas 4:8). Babaen dagiti nalinteg a panunot, balikas, ket aramidmo, masungbatam dagiti pannulisog ti kabusor nga addaan iti isu met a natibker a pammati. “Makibakalkayo iti diablo, ket isu agtalawto kadakayo. Umadanikayo iti Dios, ket isu umasidegto kadakayo” (Santiago 4:7–8).