Gubat
Kinuna ti Apo a kadagiti maudi nga aldaw addanto “dagiti gubat ken damdamag iti gubat, ket mariribukanto ti sibubukel a lubong, ket ti puspuso dagiti tao paglukodendanto ida” (DkK 45:26).
Kas miembro ti Ti Simbaan ni Jesucristo dagiti Santo iti Ud-udina nga Aldaw, tattaotayo nga addaan iti kappia. Surotentayo ti Mangisalakan, nga isu ti Prinsipe ti Kappia. Segseggaantayo ti panagturayna iti milenio, inton aggibus dagiti gubat ken maisublinto ti kappia iti daga (kitaen iti Isaias 2:4). Nupay kasta, bigbigentayo nga iti daytoy a lubong, no dadduma agipatulod dagiti lider ti gobierno kadagiti tropa ti militar tapno mangsaluad kadagiti nasion ken panggepda.
Nasken a di marikna dagiti Santo iti Ud-udina nga Aldaw iti buyot nga agpilida iti nagbaetan ti pagilian ken ti Diosda. Iti Simbaan, “mamatikami nga agtungpalkami kadagiti ari, presidente, mangituray, mahistrado, iti panagtungpal, panagdayaw, ken panangkanunong iti paglintegan” (Pagannurotan ti Pammati 1:12). Ti serbisio iti militar ket mangipakita iti dedikasion iti daytoy a pagbatayan.
No maawagan dagiti Santo a mapan iti paggugubatan, mabalinda a kitaen ti pagwadan ni Kapitan Moroni, ti naindaklan a lider ti buyot iti Libro ni Mormon. Nupay isu ket maysa a maingel a mannakigubat, isu ket “di naragsakan iti panagayus ti dara” (Alma 48:11). Isu ket “saan a mapekka ti pammatina ken Cristo,” ken ti rasonna laeng iti pannakirangetna ket tapno “salaknibanna dagiti taona, ti kalinteganna, ken ti pagilianna, ken ti relihionna” (Alma 48:13). No nasken a mapan dagiti Santo iti Ud-udina nga Aldaw iti gubat, nasken a mapanda iti espiritu ti kinapudno ken kinalinteg, nga addaan iti tarigagay nga agaramid iti nasayaat. Nasken a mapanda nga addaan iti ayat iti pusoda para iti amin nga annak ti Dios, agraman dagiti adda iti sumupsuppiat a bangir. Kalpasanna, no naidawat a kasapulanda ti mangibukbok iti dara dagiti dadduma, saanto a maibilang a basol ti inaramidda.