Dagiti Propeta
Kas miembro ti Ti Simbaan ni Jesucristo dagiti Santo iti Ud-udina nga Aldaw, nagasattayo a maidauluan dagiti sibibiag a propeta—dagiti naparegta a lallaki a naawagan nga agsao para iti Apo, kas kada Moises, Isaias, Pedro, Pablo, Nephi, Mormon, ken dadduma pay a propeta ti nasantuan a kasuratan. Kanunongantayo ti Presidente ti Simbaan kas propeta, mammadto, ken mammaltiingtayo—ti kakaisuna a tao iti daga nga umaw-awat iti paltiing tapno maiwanwan ti intero a Simbaan. Kanunongantayo pay dagiti mammagbaga iti Umuna a Panguluen ken dagiti miembro ti Korum dagiti Sangapulo-ket-dua nga Apostol kas propeta, mammadto, ken mammaltiing.
Kas kadagiti propeta idi un-unana, ipaneknek dagiti propeta ita ti maipapan ken ni Jesucristo ken isuroda ti ebangheliona. Ipakaammoda ti pagayatan ken ti pudno a kababalin ti Dios. Sibabatad ken silalawag nga agsaoda, a supsupringenda ti basol ken ibalballaagda ti maipapan kadagiti bungana. No dadduma, mabalin a maparegtada nga agipadto kadagiti masakbayan a pasamak para iti pagimbagantayo.
Kanayon a makapagtalekka kadagiti sibibiag a propeta. Dagiti pannursuroda ti mangyanninaw iti pagayatan ti Apo, a nangipakdaar: “Siak nga Apo, ania man a nasaok, nasaokon, ket saanko nga ilaksid ti bagik; ket uray no awanton ti langit ken ti daga, saanto a mapukaw ti balikasko, ngem matungpaldanto amin, babaen man ti timekko wenno babaen ti timek dagiti katulongak, isu nga isu” (DkK 1:38).
Agpannuray ti kangrunaan a pagtalgedam iti siiiget a panangsurotmo iti balikas ti Apo a naited babaen dagiti propetana, nangnangruna ti agdama a Presidente ti Simbaan. Ibalballaag ti Apo a matnagto dagiti di mangikankano kadagiti balikas dagiti sibibiag a propeta (kitaen iti DkK 1:14–16). Ikarina dagiti naindaklan a bendision kadagiti sumurot iti Presidente ti Simbaan:
“Imdengamto amin a balikasna ken bilbilinna nga itednanto kenka bayat ti panangawatna kadakuada, a magna iti amin a kinasanto iti imatangko;
“Ta maawatmonto ti balikasna, a kasla agtaud iti ngiwatko, iti amin a kinaanus ken pammati.
“Ta babaen ti panangaramidmo kadagitoy a banag saanto nga agballigi kenka dagiti ruangan ti impierno; wen, ket paksiatento ti Apo a Dios dagiti bileg ti kasipngetan iti imatangmo, ket padayyegennanto dagiti langit nga agpaay iti pagimbagam, ken iti dayag ti naganna” (DkK 21:4–6).