Paraiso
Kadagiti nasantuan a kasuratan, ti balikas a paraiso ket maus-usar iti nadumaduma a wagas. Umuna, daytoy ket mangituding iti maysa a lugar ti kappia ken ragsak iti lubong ti espiritu kalpasan daytoy a biag, a nailatang para kadagiti nabuniaganen ken nagtalinaed a napudno (kitaen iti Alma 40:12; Moroni 10:34). Dagiti adda iti pagbaludan ti espiritu ket addaanda iti gundaway nga agsursuro iti ebanghelio ni Jesucristo, agbabawi kadagiti basolda, ken umawat kadagiti ordinansa ti panagbuniag ken kumpirmasion babaen ti aramid nga ipatpatungpaltayo kadagiti templo (kitaen iti DkK 138:30–35). No aramidenda, mabalinda ti sumrek iti paraiso.
Ti maikadua a pakausaran ti balikas a paraiso ket masarakan iti pakaammuan ni Lucas maipapan iti Pannakailansa iti Krus ti Mangisalakan. Idi adda ni Jesus iti krus, kinuna ti mannanakaw a nailansa iti krus, “Jesus, laglagipennak inton umayka iti pagarian” (Lucas 23:42). Segun iti Lucas 23:43, insungbat ti Apo, “Pudno kunak kenka, Ita nga aldaw makipagiankanto kaniak idiay paraiso.” Inlawlawag ni Propeta Joseph Smith a biddut ti pannakaipatarus daytoy; kinuna a talaga ti Apo a kaduananto ti mannanakaw iti lubong dagiti espiritu.
Ti balikas a paraiso ket masarakan pay iti 2 Corinto 12:4, a nalabit a mangitudo daytoy iti celestial a pagarian. Iti maikasangapulo a pagannurotan ti pammati, ti balikas a kangayedan ket mangilawlawag iti dayag ti daga iti Milenio.