Edukasion
Imbilin ti Apo, “Agadalkayo, uray pay ti panagadal ken kasta met ti pammati” (DkK 88:118). Imbalakadna kadatayo nga agsursurotayo iti ebanghelio ken manggun-od iti pannakaawat “maipapan kadagiti banag ti langit ken iti daga nga agpadpada, ken iti uneg ti daga; dagiti banag a napasamaken, dagiti banag iti agdama, dagiti banag a nasken a mapasamak iti saan a mabayag; dagiti banag nga adda iti pagtaengan, dagiti banag nga adda iti ganggannaet; dagiti gubat ken dagiti pakaul-ulawan dagiti pagilian, ken dagiti panangukom nga adda iti daga; ken kasta met ti pannakaammo maipanggep kadagiti pagilian ken pagarian—tapno makapagsagana[tayo] iti amin a banag” (DkK 88:78–80).
Panagadal ken Propesional a Panagsanay
Nasken a kanayon nga agtrabahoka tapno masuruan ti panunotmo ken dagiti imam tapno makapagballigika iti napilim a tay-ak. Usarem ti edukasionmo tapno agbalin nga impluwensia para iti naimbag. No aramidem daytoy, agbalinkanto a maam-ammo a kas tao nga addaan integridad. Maisaganakanto para kadagiti gundaway bayat ti idadateng dagitoy, ket agbalinkanto a dakkel a pagimbagan ti pamiliam, ti Simbaan, ken ti komunidadmo.
Kalikaguman ti kasayaatan a panagadal a mabalin a gun-oden. Sumagmamano a posibilidad ket dagiti kolehio ken unibersidad, dagiti technical school, home-study course, edukasion iti komunidad, ken pribado a panagsanay.
Seminary ken Institute
Iti intero a lubong, dagiti Santo iti Ud-udina nga Aldaw nga agtawen iti 14 agingga iti 18 ket dumar-ay iti seminary, a mangipaay iti linawas a panangisuro manipud kadagiti nasantuan a kasuratan. Mangipaay dagiti institute ti relihion iti linawas a kurso iti nadumaduma a topiko ti ebanghelio para kadagiti Santo iti Ud-udina nga Aldaw nga agtawen iti 18 agingga iti 30.
Mangipaay dagitoy a programa iti naespirituan ken nainkaduaan a panawen a pakapagpinnulapolan iti tunggal maysa dagiti estudiante kabayatan ti panagsursuroda maipapan iti ebanghelio.
Para iti impormasion maipapan iti seminary ken institute, kontaken ti maysa a lokal a dadaulo ti priesthood.
Panagsursuro agingga iti Tungpal Biag
Agtultuloyka nga agsapul kadagiti gundaway para iti edukasion iti unos ti biagmo. Daytoy ti mangtulongto kenka a maaddaan iti pannakaammo maipapan iti kaudian nga adal, kapanunotan, wenno technique iti napilim a propesion ken iti dadduma pay a paglaingam ken paggugustom. Iti daytoy nadaras ti panagbalbalbaliwna a lubong, nasken a maaddaanka iti oras a mangpaadal iti bagim para iti agdama ken iti masakbayan.
Kas nayon iti panangpadur-as iti edukasionmo babaen iti pormal a panagadal, mabalinmo nga ituloy ti panagsursuro babaen ti panagbasa, idadar-ay kadagiti makaay-ayo a parambak a mainaig iti kultura, isasarungkar kadagiti museo ken lugar a napnuan pakasaritaan, ken panangpaliiw iti lubong iti aglawlawmo.