Kinaragsak
Iti panangipaneknekna maipapan kadagiti “agnanayon a panggep” ti Dios, insuro ni propeta Lehi, “Dagiti tao, ket tapno maaddaanda iti ragsak” (2 Nephi 2:15, 25).
Tarigagayan ti Nailangitan nga Ama a makitatayo ti pudno, manayon a ragsak. Ti kinaragsaktayo ket isu ti nakaisangratan ti amin a bendision nga it-itedna kadatayo—dagiti pannursuro ti ebanghelio, dagiti bilin, dagiti ordinansa ti priesthood, dagiti relasion iti pamilia, dagiti propeta, dagiti templo, dagiti kinapintas ti sangaparsuaan, ken uray pay ti gundaway a mangpadas iti rigat. Ti planona para iti pannakaisalakantayo ket masansan a maawagan iti “ti naindaklan a plano ti panagragsak” (Alma 42:8). Imbaonna ti Patpatgenna nga Anak a mangipatungpal iti Pannubbot tapno makapagragsaktayo iti daytoy a biag ken makaawat iti pakabuklan ti rag-o kadagiti kinaagnanayon.
Adu a tao ti mangpadas a mangsapul iti ragsak ken pannakapnek kadagiti aktibidad a maisuppiat kadagiti bilin ti Apo. Iti saan a panangikankano iti plano ti Dios para kadakuada, sinupringda ti kakaisuna a pagtaudan ti pudno a ragsak. Rimmukmada iti sairo, a “kinalikagumanna ti pannakaitebbang ti amin a tao a kas kenkuana” (2 Nephi 2:27). Iti kamaudiananna nasursuroda ti kinapudno ti ballaag ni Alma iti anakna a ni Corianton: “Saan a mabalin a pagragsakan ti kinadangkes iti uray kaano man” (Alma 41:10).
Agkalikagum laeng dagiti dadduma pay a maaddaanda iti pagraragsakan iti biag. Iti daytoy a kas kangrunaan a panggepda a tun-oyen, palugodanda ti saan a manayon a pagragsakan a mangsinga kadakuada manipud iti manayon a kinaragsak. Takawanda ti bagbagida kadagiti manayon a rag-o ti naespirituan a panagdur-as, panagserbi, ken napasnek a panagtrabaho.
Bayat ti panagkalikagummo nga agragsak, laglagipem a ti kakaisuna a dalan nga agturong iti pudno a kinaragsak ket ti panagbiag iti ebanghelio. Masarakamto ti natalna, agnanayon a kinaragsak bayat ti panagkagumaam nga agtungpal kadagiti bilin, agkararag para iti pigsa, agbabawi kadagiti basolmo, makiramam kadagiti makaay-ayo nga aktibidad, ken mangted iti napateg a serbisio. Masursuromto ti maaddaan iti pagragsakan kadagiti beddeng nga intuding ti managayat nga Ama iti Langit.
Mabalin a makaakar ti ragsakmo. Bayat ti panangpaliiw kenka dagiti dadduma, mabalin nga agtarigagayda a mangammo iti pagtaudan ti ragsakmo. Ket mabalinda met ti mangnanam iti ragsak a sumangbay babaen ti panagbiag iti ebanghelio ni Jesucristo.