Dagiti Templo
Pudno a balay ti Apo dagiti templo. Nasantuanda a lugar a pagrukbaban a mabalin a sarungkaran ti Apo. Ti laeng pagtaengan ti mabalin nga ipada kadagiti templo iti kinasagradona.
Iti unos ti pakasaritaan, binilin ti Apo dagiti taona nga agbangon kadagiti templo. Iti agdama dumdumngeg ti Simbaan iti awag ti Apo nga agbangon kadagiti templo iti intero a lubong, a mangar-aramid nga ad-adda pay a sidadaan a magun-od dagiti bendision ti templo ti dakkel a bilang dagiti annak ti Nailangitan nga Amatayo.
Dagiti Ordinansa para kadagiti Sibibiag
Ti umuna a panggep ti templo ket mangipaay kadagiti ordinansa a kasapulan para iti pannakaitan-oktayo iti celestial a pagarian. Dagiti ordinansa ti templo ti mangidalan nga agturong kadagiti kaindaklanan a bendision a sidadaan a magun-od babaen ti Pannubbot ni Jesucristo. Amin nga aramidentayo iti Simbaan—dagiti miting ken aktibidadtayo, dagiti aramidtayo a kas misionario, dagiti leksion nga isurotayo ken dagiti himno a kantaentayo—ket nasken a mangiturong kadatayo iti Mangisalakan ken iti trabaho nga aramidentayo kadagiti nasantuan a templo.
Maysa nga ordinansa nga awatentayo iti templo ket ti endowment. Ti balikas nga endowment kayatna a sawen ti “sagut,” ken pudno a sagut a naggapu iti Dios ti endowment iti templo. Buklen ti ordinansa ti maysa a serye dagiti pangiturong ken iramanna dagiti katulagan nga aramidentayo tapno agbiag a sililinteg ken agtungpal kadagiti naidawat a kasapulan ti ebanghelio. Tulongannatayo ti endowment a mangipamaysa iti imatangtayo iti Mangisalakan, ti akemna iti plano ti Nailangitan nga Amatayo, ken ti panagkumittayo a mangsurot Kenkuana.
Sabali pay nga ordinansa iti templo ket ti celestial a kallaysa, a paglantipan dagiti agassawa iti tunggal maysa para iti kinaagnanayon. Agtultuloy iti agnanayon ti panaglantip a maaramid iti templo no napudno dagiti agassawa kadagiti katulagan nga aramidenda.
Dagiti annak a nayanak kadagiti nagannak a nailantip iti templo ket nayanak iti katulagan. Madagdagus nga agbalin a paset ti agnanayon a pamilia dagitoy nga annak. Agbalin met a paset ti agnanayon a pamilia dagiti annak a saan a nayanak iti katulagan apaman a mailantip iti tunggal maysa dagiti pudno wenno nagampon a nagannak kadakuada. Maar-aramid iti templo ti ordinansa ti panangilantip kadagiti annak kadagiti nagannak.
No naawatmon dagiti ordinansa iti templo, kanayon a laglagipem dagiti katulagan nga inaramidmo. Agsublika a masansan iti templo agingga a kabaelam. No maysaka nga ama wenno ina, isurom kadagiti annakmo ti kinapateg ti templo. Tulongam ida a mangisagana iti bagbagida nga agbalin a maikari a sumrek iti templo.
No saanka pay a nakaawat kadagiti ordinansa iti templo, rugiam itan nga isagana ti bagim. No ipalubos dagiti kasasaad, dumar-ay iti templo tapno makiraman kadagiti panagbuniag ken kumpirmasion para kadagiti natay.
Dagiti Ordinansa para kadagiti Natay
Dagiti tao a pimmusayen nga awanan kadagiti kasapulan nga ordinansa ti ebanghelio ket mabalinda ti umawat kadagiti ordinansa babaen ti aramid a maannong kadagiti templo. Mabalinmo nga aramiden daytoy nga agpaay kadagiti kapuonam ken dadduma pay a pimmusayen. Iti panagtignay para kadakuada, mabalinka a mabuniagan ken makumpirmaan, umawat iti endowment, ken makiraman kadagiti panaglantip dagiti agassawa ken dagiti annak kadagiti nagannak kadakuada.
Nasken a sigaganetgetka nga agsukisok kadagiti kasuratan dagiti pimmusayen a kapuonam tapno maannong ti aramid iti templo para kadakuada.
Para iti ad-adu pay nga impormasion maipapan iti aramid iti templo para kadagiti natay ken iti aramid iti family history, kitaen iti “Aramid iti Family History ken Genealogy,” dagiti panid 10–13.
Pannakaikari a Sumrek iti Templo
Tapno sumrek iti templo, nasken a maikarika. Paneknekam ti pannakaikarim iti dua nga interbyu—maysa iti miembro ti bishopricyo wenno branch presidentyo ken ti maysa pay iti miembro ti panguluen ti stakeyo wenno ti mission president. Pagtalinaedento dagiti dadaulom iti priesthood a nalimed ken kumpidensial dagitoy nga interbyu. Iti tunggal maysa kadagiti interbyu, saludsodento kenka ti dadaulo iti priesthood maipapan iti bukodmo nga ugali ken pannakaikarim. Masaludsodto kenka maipapan iti pammaneknekmo iti Nailangitan nga Ama ken ti Pannubbot ni Jesucristo, ken masaludsodto kenka no suportaram met laeng dagiti sapasap ken lokal a lider ti Simbaan. Maidawatto kenka a patalgedam a nadalus ti dayawmo ken agtungtungpalka iti Word of Wisdom, agbaybayadka iti naan-anay nga apagkapullo, agbibiagka a maitunos kadagiti pannursuro ti Simbaan, ken saanka a makikappeng wenno makipagrikna kadagiti grupo a kimmalilis iti kinapuno.
No mangtedka kadagiti maawat a sungbat kadagiti saludsod kadagiti interbyu ken no mapennekka ken dagiti dadaulom iti priesthood a maikarika a sumrek iti templo, umawatkanto iti maysa a rekomenda iti templo. Pirmaamto ken dagiti dadaulom iti priesthood ti rekomenda, a mangipalubosto kenka a sumrek iti templo iti uneg ti agsaruno a dua a tawen, no la ketdi agtalinaedka a maikari.
Dagiti interbyu para iti rekomenda iti templo ket mangted iti naindaklan a gundaway kenka a mangamiris iti pannakaikarim ken ti pagwadan ti biagmo. No adda maysa a biddut iti biagmo, nasayaat a makipagurnoska a makisarita iti bishop wenno branch presidentmo a nasapsapa maipanggep iti interbyum para iti rekomenda iti templo. Matulongannakanto a mangisagana iti bagim tapno agbalinka a maikari iti maysa a rekomenda iti templo.
Kawes iti Templo
No mapanka iti templo, nasken nga agaruatka iti kasayaatan a kawesmo, kas iti ar-aramidem no makimisaka. No addaka iti uneg ti templo, sukatam ti kawesmo iti puraw a kawes ti templo. Maaramid daytoy a panagsukat iti kawes iti dressing room, a pangusaram iti locker ken pribado a lugar a pagpellesan. Iti templo, mapagtalinaed a nasayaat ti kinadisente.
No ikabilmo ti kawesmo iti locker, maibatim ditoy ti amin a nailubongan a pannakasinga. Nakakaweska iti puraw, mariknam ti pannakikaysa ken pannakipada kadagiti dadduma pay iti uneg ti templo, gapu ta tunggal maysa iti lawlawmo ket kapadam iti kawes.
Panangaruat iti Pagan-anay [Garment] iti Templo
Apaman a ma-endowka, addaanka iti bendision a mangikawes iti garment iti templo iti unos ti biagmo. Obligasionmo nga ikawes daytoy a mayannurot kadagiti annuroten a naited iti endowment. Laglagipem a dagiti bendision a mainaig iti daytoy sagrado a pribilehio ket agpannuray iti pannakaikarim ken kinapudnom iti panagtungpalmo kadagiti katulagan iti templo.
Ti garment ket mangted iti kanayon a palagip maipapan kadagiti katulagan nga inaramidmo iti templo. Nasken a tratuem daytoy nga addaan iti respeto iti amin a kanito. Nasken a saanmo nga ipakita daytoy kadagiti saan a makaawat iti kinapategna, ken nasken a saanmo a balbaliwan daytoy tapno laeng maibagay iti nadumaduma nga estilo ti panagkawes. No siuumno nga ikawesmo daytoy, mangted daytoy iti saluad a maibusor iti pannulisog ken dakes. Ti panangikawes iti garment ket maysa nga akinruar a panangipeksa iti akin-uneg a panagkumit a sumurot iti Mangisalakan.
Dagiti Parabur manipud iti Idadar-ay iti Templo
Kas pangnayon iti panagbalin a lugar a pakaannongan dagiti sagrado nga ordinansa, ti templo ket maysa a lugar ti talna ken paltiing. No mariribukanka wenno pakadagsenam dagiti napapateg unay a pangngeddeng, mabalinmo nga ipan dagiti parikutmo iti templo. Idiay a makaawatka iti naespirituan a pannarabay.
No dadduma mabalin a mariknam a saanka a makapagpanunot a silalawag gapu ta madagsenan ti panunotmo kadagiti problema ken adu a banag nga agkasapulan iti panangasikaso. Iti templo, mabalin nga agsardeng ti epekto dagitoy a pakaringgoran, mabalin a maawan dagitoy a pannakatikaw ken panagduadua, ket maawatam dagiti banag a saanmo pay idi a naawatan. Makasarakka kadagiti baro a wagas a pakasarangtam kadagiti karit a sanguem.
Bendisionannakanto ti Apo no makiramanka iti aramid a sagrado nga ordinansa iti templo. Ken dagiti parabur nga itedna kenka ket saanto a malimitaran iti orasmo iti templo. Bendisionannakanto iti amin nga aspeto ti biagmo. Dagiti panagbannogmo iti templo ti mangpapigsanto kenka ken mangpapino iti kinaespirituam.