Satanas
Ni Satanas, a maawagan pay iti kabusor wenno sairo, ket kabusor ti kinalinteg ken dagiti agkalikagum a sumurot iti Dios. Isu ket espiritu nga anak ti Dios a naminsan idi a maysa nga anghel nga “addaan iti turay iti imatang ti Dios” (DkK 76:25; kitaen met iti Isaias 14:12; DkK 76:26–27). Ngem iti Konseho iti Langit sakbay daytoy a biag, ni Lucifer, nga awag idi ken ni Satanas, ket nagalsa a maibusor iti Nailangitan nga Ama ken iti plano ti pannakaisalakan. Iti daytoy a panagalsa a maibusor iti Dios, ni Satanas “pinanggepna a dadaelen ti kinawaya ti tao nga agpili” (Moises 4:3). Kinunana: “Subbotek amin a sangkataw-an, tapno awan ti mapukaw nga uray no maysa a kararua, ket awan duadua nga aramidek; gapuna itdem ti panagraemmo” (Moises 4:1).
Inallukoy ni Satanas ti “apagkatlo ti pangen ti langit” tapno umadayoda manipud iti Ama (DkK 29:36). Kas bunga daytoy a yaalsa, napapanaw ni Satanas ken dagiti pasurotna manipud iti sidong ti Dios ken napaidaman iti bendision nga umawat iti pisikal a bagi (kitaen iti Apocalipsis 12:9). Napaidamanda pay iti gundaway nga umawat iti ania man a tawid iti pagarian ti gloria.
Palugodan ti Nailangitan nga Ama ni Satanas ken dagiti pasurot ni Satanas a mangsulisog kadatayo kas paset ti padastayo iti mortalidad (kitaen iti 2 Nephi 2:11–14; DkK 29:39). Gapu ta ni Satanas “kalikagumanna ti pannakaitebbang ti amin a tao a kas kenkuana” (2 Nephi 2:27), padasenna ken dagiti pasurotna ti mangyaw-awan kadatayo manipud iti kinalinteg. Iturongna ti kadagsenan a pannuppiatna kadagiti kapapatgan nga aspeto ti plano ti panagragsak ti Nailangitan nga Ama. Kas pagarigan, kalikagumanna ti saan a mamati iti Mangisalakan ken iti priesthood, pagduaduaanna ti pannakabalin ti Pannubbot, ballikugenna ti paltiing, ken singaennatayo manipud iti kinapudno, ken suppiatenna ti kaadda ti sungsungbatan ti tunggal tao. Gandatenna ti mangpakapuy iti pamilia babaen iti panangdadaelna iti panagginnusto ti babai ken lalaki iti tunggal maysa, panangitandudona kadagiti seksual a pannakinaig iti ruar ti kallaysa, pananguyawna iti panagkallaysa, ken pananglappedna iti panaganak dagiti nagkallaysa a nataengan a mangpatanor no kaskasano kadagiti ubbing iti kinalinteg.
Nasken a saanka a sumuko kadagiti pannulisog ni Satanas. Addaanka iti pannakabalin iti kaunggam tapno pumili iti nasayaat imbes a ti dakes, ken kanayon a makiddawmo ti tulong ti Apo babaen ti kararag. (Kitaen iti “Sulisog,” dagiti panid 207–8.)