Pannakaisalakan
Kadagiti pannakisarsaritam iti dadduma pay a Kristiano, no dadduma masaludsod kenka, “Naisalakanka kadin?” Dagiti agdamag iti daytoy a saludsod ket gagangay nga itudoda ti tignay ti sipapasnek a panagpudno, wenno panangipakdaar, a naawatmon ni Jesucristo a kas bukodmo nga Apo ken Mangisalakan. Iti panagdamag iti saludsod, ipakitada ti pammatida iti panangsurot kadagiti balikas, nga insurat ni Apostol Pablo:
“No ipudnom babaen ti panagsao a ni Jesus isu ti Apo ket patiem iti pusom a ti Dios pinagungarna kadagiti natay, maisalakankanto. Ta buyogen ti puso no mamati ti tao tapno makagun-od ti kinalinteg; ket iti ngiwat ti pangaramid ti panangipaduyakyak maipaay iti pannakaisalakan” (Taga Roma 10:9–10).
Panangsungbat iti Saludsod a “Naisalakanka Kadin?”
Iti Taga Roma 10:9–10, dagiti balikas a maisalakankanto ken pannakaisalakan mangipapanan iti pakainaigan iti katulagan ken ni Jesucristo. Babaen daytoy a pakainaigan iti katulagan, maipanamnama kadatayo ti pannakaisalakan manipud kadagiti agnanayon a bunga ti basol no managtungpaltayo. Maisalakan ti tunggal napudno a Santo iti Ud-udina nga Aldaw a mayannurot iti daytoy a kaipapanan. Napasurottayon iti naisubli nga ebanghelio. Babaen ti ordinansa ti panagbuniag, simrektayon iti pakainaigan iti katulagan iti Mangisalakan, nga aw-awatentayo ti naganna iti bagbagitayo. Pabaruentayo ti katulagantayo iti panagbuniag babaen ti pannakiranudtayo iti sakramento.
Dadduma pay a Kaipapanan ti Balikas a Pannakaisalakan
Iti doktrina ti Ti Simbaan ni Jesucristo dagiti Santo iti Ud-udina nga Aldaw, dagiti balikas a maisalakankanto ken pannakaisalakan ket addaanda iti agduduma a kaipapanan. Segun kadagitoy a kaipapanan, ti sungbatmonto iti saludsod “Naisalakanka kadin?” ket “Wen” wenno “Wen, ngem addaan kadagiti kondision.” Balabalaen dagiti sumaganad a panangilawlawag ti innem a nadumaduma a kaipapanan ti balikas a pannakaisalakan.
Pannakaisalakan manipud iti Pisikal nga Ipapatay.
Matay ti amin a tao iti kamaudiananna. Ngem babaen ti Pannubbot ken Panagungar ni Jesucristo, agungarto ti amin a tao—maisalakandanto manipud iti pisikal nga ipapatay. Impaneknek ni Pablo, “Ta kas matayda amin ken Adan, kasta met mabiagdanto amin ken Cristo” (1 Taga Corinto 15:22).
Pannakaisalakan manipud iti Basol.
Tapno madalusan manipud iti basol babaen ti Pannubbot ti Mangisalakan, nasken nga aramatem ti pammatim ken ni Jesucristo, agbabawi, ken agpabuniagka, ken awatem ti sagut ti Espiritu Santo (kitaen iti Dagiti Aramid 2:37–38). No nabuniagankan ken inawatmon ti Espiritu Santo babaen ti umno a turay ti priesthood, naisalakankan manipud iti basol nga adda kondisionna. Saankanto a naan-anay a maisalakan manipud iti basol agingga a nalpasmon ti biagmo iti daga, a sipupudno a nagibturka agingga iti panungpalan.
Laglagipem a saanka a maisalakan kadagiti basbasolmo; saanka a makaawat iti awan kondisionna a pannakaisalakan iti panangibagam laeng iti pammatim ken ni Cristo nga addaan iti pannakaawat a dimonto maliklikan ti aglabsing kadagiti basol iti unos ti nabati pay a panagbiagmo (kitaen iti Alma 11:36–37). Babaen ti parabur ti Dios, maisalakanka manipud kadagiti basbasolmo (kitaen iti Helaman 5:10–11). Tapno maawat daytoy a bendision, nasken nga aramatem ti pammati ken ni Jesucristo, ikagumaam ti agtungpal kadagiti bilin, isardengmon ti agbasol, ken pabaruem ti panagbabawim ken pannakadalus babaen ti ordinansa ti sakramento
Pannakayanak Manen.
No dadduma mabalin a masaludsod kenka no nayanakka manen. Masansan a makita ti pagbatayan ti naespirituan a pannakayanak manen kadagiti nasantuan a kasuratan. Aglaon ti Baro a Tulag iti pannursuro ni Jesus a nasken kadatayo a “mayanak a mabaliwan” ken malaksid no “mayanak[tayo] iti danum ken iti Espiritu, [ditayo] mabalin ti sumrek iti pagarian ti Dios” (Juan 3:3, 5). Naipatalged daytoy a pannursuro iti Libro ni Mormon: “Amin a sangkataw-an, wen, lallaki ken babbai, amin a pagilian, kakabsat, pagsasao ket tattao, nasken a maipasngay manen; wen, maipasngay iti Dios, mabaliwan iti nailubongan ken managbasol a kasasaad, iti kasasaad a kinalinteg, a sinubboten ti Dios, nga agbalin nga annakna a lallaki ken babbai; ket kastoy ti panagbalinda a baro a parsua; ket malaksid no aramidenda daytoy, pulos a dida matawid ti pagarian ti Dios” (Mosiah 27:25–26).
Daytoy a pannakaipasngay manen ket maysa a proseso a mapasamak kalpasan ti pannakabuniagtayo ken pannakaawattayo iti sagut ti Espiritu Santo. Sumangbay daytoy a kas bunga ti kinatallugodtayo “a makitulag iti Dios[tayo] nga agaramid iti pagayatanna, ken agtungpal kadagiti bilinna iti amin a banag nga ibilinnanto kada[tayo], iti amin a nabati nga aldaw[tayo]” (Mosiah 5:5). Kalpasanna “nangabaruanan dagiti puso[tayo] gapu iti pammati iti naganna; ngarud, naipasngay[tayo] kenkuana” (Mosiah 5:7). No nabuniagankan ken inawatmon ti sagut ti Espiritu Santo, nga addaan iti katulagan nga awatem iti bagim ti nagan ni Jesucristo, mabalinmo a sawen a naipasngayka manen. Ket mabalinmo a pabaruen dayta a pannakaipasngay manen iti tunggal Sabbath no makiranudka iti sakramento.
Pannakaisalakan manipud iti Kinaawan Ammo.
Agbibiag ti adu a tao iti kasasaad ti kinasipnget, a saanda nga ammo ti lawag ti naisubli nga ebanghelio. Isuda ket “mailiklik laeng iti kinapudno gapu ta dida ammo ti pagsapulanda” (DkK 123:12). Kas miembro ti Simbaan ni Cristo, naisalakanka manipud iti daytoy a kondision. Addaanka iti pannakaammo maipapan iti Dios nga Ama, ni Jesucristo, ti panggep ti biag, ti plano ti pannakaisalakan, ken ti agnanayon a potensialmo. Makapagbiagka kas maysa a disipulo ti Mangisalakan, a nangipakdaar, “Siak ti silaw ti lubong: ti sumurot kaniak saanto a magna iti sipnget, no di ket addanto kenkuana ti silaw ti biag” (Juan 8:12).
Pannakaisalakan manipud iti Maikadua nga Ipapatay.
No dadduma ibaga dagiti nasantuan a kasuratan maipapan iti pannakaisalakan manipud iti maikadua nga ipapatay. Ti maikadua nga ipapatay ket ti maudi a naespirituan nga ipapatay—pannakaisina manipud iti kinalinteg ken napaidaman iti lugar iti ania man a pagarian ti gloria (kitaen iti Alma 12:32; DkK 88:24). Saanto a dumteng daytoy maikadua nga ipapatay agingga iti Maudi a Panangukom, ken umayto daytoy iti sumagmamano laeng (kitaen iti DkK 76:31–37). Maipanamnama iti dumani amin a tao a nagbiag iti daga ti pannakaisalakan manipud iti maikadua nga ipapatay (kitaen iti DkK 76:40–45).
Agnanayon a Biag, wenno Pannakaitan-ok.
Kadagiti nasantuan a kasuratan, dagiti balikas a naisalakan ken pannakaisalakan ket masansan a mangitudo iti agnanayon a biag, wenno pannakaitan-ok (kitaen iti Abraham 2:11). Ti agnanayon a biag ket panangammo iti Nailangitan nga Ama ken ni Jesucristo ken pannakipagindeg Kadakuada iti agnanayon—agtawidto iti maysa a lugar iti kangatuan a tukad ti celestial a pagarian (kitaen iti Juan 17:3; DkK 131:1–4; 132:21–24). Tapno maawat daytoy naindaklan a sagut, nasken nga agaramidtayo iti ad-adda pay ngem iti agbabawi kadagiti basbasoltayo ken agpabuniag ken agpakumpirma iti umno a turay ti priesthood. Nasken nga awaten dagiti lallaki ti Melchizedek Priesthood, ken nasken nga agaramid ken agtungpal ti amin a miembro ti Simbaan kadagiti sagrado a katulagan iti templo, agraman ti agnanayon a kallaysa.
No usarentayo ti balikas a pannakaisalakan a mangipapanan iti agnanayon a biag, awan kadatayo ti makaisao a naisalakantayon iti mortalidad. Makaumay laeng dayta a nagloriaan a sagut kalpasan ti Maudi a Panangukom.