Panagsugal
Suppiaten ti Ti Simbaan ni Jesucristo dagiti Santo iti Ud-udina nga Aldaw ti panagsugal, agraman dagiti loteria nga itandudo dagiti gobierno.
Ti panagsugal ket guyugoyen ti tarigagay a makagun-od iti maysa a banag para iti awan. Makadadael iti kinaespirituan daytoy a tarigagay. Daytoy ti mangyadayo kadagiti makisugsugal kadagiti pannursuro ti Mangisalakan maipapan iti ayat ken mangyasideg iti kinamanagimbubukod ti kabusor. Daytoy ti mangpakapsut kadagiti saguday ti panagtrabaho ken panagsalimetmet ken ti panagtarigagay a mangted iti napudno a panagkagumaan iti amin nga aramidentayo.
Makatakuat a dagus dagiti makisugsugal ti allilaw iti kapanunotan a makaitedda iti bassit wenno awan ken umawatda iti maysa a banag a napateg kas kasukatna. Makitada nga isukoda dagiti nawadwad a gatad ti kuarta, ti bukodda a dayaw, ken ti respeto dagiti miembro ti pamilia ken gagayyem. Naallilaw ken nairuamdan, masansan nga isugalda dagiti pundo a nasken koma nga usarenda para kadagiti sabali a panggep, kas iti pangipaay kadagiti kasapulan dagiti pamiliada. No dadduma agbalin dagiti agsugsugal nga adipen ken desperadoda unay nga agbayad kadagiti utangda iti panagsugal gapu ta agbalinda a mannanakaw, nga isukoda ti bukodda a nasayaat a nagan.
Inyallukoy kadatayo ti Umuna a Panguluen a makikaysatayo kadagiti dadduma pay iti panangsuppiat iti panangaramid a legal ken panangitandudo ti gobierno ti ania man a kita ti panagsugal kadagiti komunidadtayo.