Pornograpia

Ti pornograpia ket ania man a material wenno banag a mangiparang wenno mangiladawan iti bagi ti tao wenno aramid a seksual iti wagas a mangparugso kadagiti rikna a mainaig iti seks. Maiwaras daytoy babaen ti adu a media, agraman dagiti magasin, libro, telebision, sine, musika, ken ti Internet. Daytoy ket napeggad iti espiritu kas iti kapeggad ti tabako, alkohol ken druga iti bagi. Ti panangusar iti material a pornograpiko iti ania man a wagas ket panaglabsing iti bilin ti Dios a “Saankayo nga … makiabig … wenno agaramid iti ania man a kaarngina” (DkK 59:6). Makaiturong daytoy iti dadduma pay a nadadagsen a basol. Nasken a liklikan dagiti miembro ti Simbaan ti pornograpia iti ania man a kita ken nasken a suppiatenda ti panagpataud, pannakaiwaras, ken pannakaaramat daytoy.

Nakaam-amak a maikairuam ti pornograpia. Kas kadagiti dadduma pay a pakairuaman, mangiturong daytoy kadagiti tao a mangpadas ken agkalikagum kadagiti napalaus a pannakaparugso. No padasem daytoy ket ipalubosmo ti bagim a mairuam iti daytoy, dadaelennakanto daytoy, a mangipababa iti panunot, puso, ken espiritum. Takawannakanto daytoy iti respeto iti bagim ken ti panangipategmo kadagiti kinapintas ti biag. Dadaelennakanto daytoy ken iturongnaka kadagiti dakes a pampanunot ken mabalin a dakes nga ar-aramid. Mangparnuayto daytoy iti nakaam-amak a pannakadadael kadagiti relasionyo iti pamiliam.

Gapu iti makairuam a kita ti pornograpia ken ti peggad a parnuayenna iti bagi ken espiritu, inulit-ulit a binallaagandatayo dagiti katulongan ti Dios nga adaywantayo daytoy. No maipasungalngalka iti pornograpia, isardengmo a dagus ket agpatulongka. Babaen ti panagbabawi, makaawatka iti pannakapakawan ken makasarakka iti namnama iti ebanghelio. Inka iti bishop wenno branch presidentmo tapno agpabalakadka maipapan iti no kasano a maparmekmo ti problemam, ken agkiddawka iti pannakapaimbag babaen ti Pannubbot ni Jesucristo. Dawatem iti Apo nga ikkannaka iti pigsa a mangparmek iti daytoy nalaus a pannakairuam.