Serbisio
Agtarigagay dagiti pudno a disipulo ni Cristo nga agserbi kadagiti adda iti aglawlawda. Kinuna ti Mangisalakan “Gapu itoy mailasindanto a dakayo ti adalak, no adda ayatyo iti maysa ken maysa” (Juan 13:35).
Idi nabuniaganka, nakitulagka nga awatem ti nagan ni Jesucristo iti bagim. Inlawlawag ni propeta Alma daytoy a katulagan iti maysa a grupo dagiti baro a napasurot a nagtarigagay a mabuniagan. Napaliiwna a ti tarigagayda nga “umay iti salinong ti Dios” ket mangiraman iti kinatallugod a mangted iti napnuan kaipapanan a serbisio—tapno “makipagbaklay iti imet ti tunggal maysa tapno lumag-anda,” tapno “makipagladingit kadagiti agladladingit,” ken tapno “manglinglingay kadagiti makasapul iti pannakalinglingay” (Mosiah 18:8–9).
Bayat ti panagkagumaam nga agserbi kadagiti dadduma, kitaem ti Mangisalakan a kas pagwadam. Nupay immay iti daga a kas Anak ti Dios, sipapakumbaba a nagserbi iti amin nga adda iti aglawlawna. Impakdaarna, “Kadakayo siak ti kasla agserbi” (Lucas 22:27).
Nagusar ti Mangisalakan iti pangngarig tapno isurona iti kinapateg ti panagserbi. Iti pangngarig, nagsubli Isuna iti daga iti dayagna ken inlasinna dagiti nalinteg manipud kadagiti nadangkes. Kadagiti nalinteg kinunana: “Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong: Ta nagbisinak, ket inikkandak ti kanen: nawawak, ket inikkandak ti inumen: naggangannaetak, ket pinagdagusdak: lamolamoak, ket kinawesandak: nagsakitak, ket kinablaawandak: nagianak idiay pagbaludan, ket immaykayo kaniak” (Mateo 25:34–36).
Dagiti nalinteg, a nasdaaw iti daytoy a panagipakdaar, sinaludsodda: “Apo, kaano ti pannakakitami kenka a mabisbisinan, ket tinaraonandaka? wenno mawaw, ket inikkandaka iti inumen? Kaano ti pannakakitami kenka a ganggannaet, ken pinagdagusdaka? wenno lamolamo, ket kinawesandaka? Ken kaano ti pannakakitami kenka a masakit, wenno idiay pagbaludan, ket immaykami kenka?” (Mateo 25:37–39).
Kalpasanna simmungbat ti Apo, “Gapu iti inaramidyo iti maysa kadagitoy kanunumuan kadagitoy kakabsatko, inaramidyo met kaniak” (Mateo 25:40).
Awisennaka ti Mangisalakan nga itedmo ti bagim iti panagserbi kadagiti dadduma. Awan patinggana dagiti gundawaymo a mangaramid iti dayta. Tunggal aldaw, agsapulka kadagiti wagas a mangparagsak kadagiti puso, mangisao kadagiti nasayaat a balikas, mangipatungpal kadagiti aramid nga agpaay kadagiti dadduma a saanda a kabaelan nga aramiden para iti bagbagida, mangibinglay iti ebanghelio. Agbalin a managawat kadagiti arasaas ti Espiritu, a mangtigtignay kenka nga agserbi. Maammuamto a ti pudno a tulbek iti kinaragsak ket ti agaramid para iti pagragsakan dagiti dadduma,