Maikadua a Yaay ni Jesucristo
Kabayatan ti yuuli ni Jesucristo iti langit iti pannakalpas ti panagministrona iti daga, impakdaar ti dua nga anghel kadagiti Apostolna, “Daytoy Jesus a naipangato sadi langit manipud kadakayo, kasta met umayto a kas ti pannakakitayo nga ipapanna sadi langit” (Dagiti Aramid 1:11). Inton umay manen ti Mangisalakan, umayto Isuna iti pannakabalin ken dayag a mangbigbig iti daga a kas pagarianna. Ti Maikadua a Yaayna ti mangitandanto iti rugi ti Milenio.
Ti Maikadua a Yaay ket agbalinto a nakabutbuteng, naladingit a panawen para kadagiti nadangkes, ngem agbalinto daytoy nga aldaw ti talna ken balligi para kadagiti nalinteg. Impakdaar ti Apo:
“Isuda a masirib ken nangawat iti kinapudno, ken nangala iti Nasantuan nga Espiritu a bagnosda, ken saan a pinaallilaw—pudno kunak kadakayo, saandanto a mapukan ken maipuruak iti apuy, ngem mailusotandanto ti aldaw.
“Ket maitedto ti daga kadakuada a tawidenda; ket umadudanto ken pumigsada, ket dumakkelto dagiti annakda nga awanan iti basol nga agturong iti pannakaisalakan.
“Ta addanto ti Apo iti tengngada, ket maipaayto kadakuada ti dayagna, ket isunto ti arida ken mangted kadakuada iti paglintegan” (DkK 45:57–59).
Saan nga impalgak ti Apo ti eksakto a yaaynanto manen: “Awan ti tao a makaammo iti aldaw ken oras, uray pay dagiti anghel iti langit, wenno maammuandanto agingga nga umay” (DkK 49:7). Ngem impalgaknan kadagiti propetana dagiti pasamak ken pagilasinan kasakbayanto ti Maikadua a Yaayna. Maibilang kadagiti naipadto a pasamak ken pagilasinan:
-
Ikakalilis manipud iti kinapudno ti ebanghelio (kitaen iti Mateo 24:9–12; 2 Taga Tesalonica 2:1–3).
-
Ti pannakaisubli ti ebanghelio, agraman ti Simbaan ni Jesucristo (kitaen iti Dagiti Aramid 3:19–21; Apocalipsis 14:6–7; DkK 45:28; 133:36).
-
Ti pannakaisubli dagiti tulbek ti priesthood (kitaen iti Malakias 4:5–6; DkK 110:11–16).
-
Ti idadateng ti Libro ni Mormon (kitaen iti Isaias 29:4–18; 3 Nephi 21:1–11).
-
Ti pannakaikasaba ti ebanghelio iti intero a lubong (kitaen iti Mateo 24:14).
-
Maysa a panawen ti kinadangkes, gubat, ken riribuk (kitaen iti Mateo 24:6–7; 2 Timoteo 3:1–7; DkK 29:17; 45:26–33; 88:91).
-
Dagiti pagilasinan iti langit ken iti daga (kitaen iti Joel 2:30–31; Mateo 24:29–30; DkK 29:14–16; 45:39–42; 49:23; 88:87–90).
Saanmo a pakaseknan iti bagim ti eksakto nga oras ti Maikadua a Yaay ti Mangisalakan. Ngem ketdi, agbiagka tapno nakasaganakanto no umay Isuna. Bayat ti panangpaliiwmo kadagiti didigra kadagitoy maudi nga aldaw, laglagipem a saan a nasken nga agbuteng dagiti nalinteg iti Maikadua a Yaay wenno kadagiti tanda kasakbayan daytoy. Mayaplikar kenka dagiti balikas ti Mangisalakan kadagiti Apostolna: “Saankayo a mariribukan, ta, inton mapasamak amin dagitoy a banag, ammoyonton a matungpalton dagiti karik kadakayo” (DkK 45:35).