Themeli Im: Pendohuni dhe Jini të Bindur

Koha Maksimale: 20 Minuta

Përsiatni:

Si lidhen pendimi dhe bindja me mbështetjen te vetja?

Shikoni:

“Obedience Brings Blessings” [“Bindja Sjell Bekime”], në dispozicion te srs.lds.org/videos. (Nuk keni material filmik? Lexoni tekstin e shkruar në fund të kësaj pjese.)

Diskutoni:

Çfarë bekimesh keni marrë me anë të bindjes ndaj ligjeve të Perëndisë? Si na ndihmon pendimi që të përparojmë?

Lexoni:

Vargjet te Doktrina e Besëlidhje 130:20–21 dhe citimin nga Profeti Jozef Smith.

Doktrina e Besëlidhje 130:20–21

“Ka një ligj … mbi të cili[n] të gjitha bekimet bazohen – Dhe kur ne fitojmë ndonjë bekim nga Perëndia, është me anë të bindjes ndaj atij ligji mbi të cilin ai bazohet.”

Jozef Smith

“E bëra këtë rregullin tim: Kur Zoti urdhëron, bindu.”

Mësimet e Presidentëve të Kishës: Jozef Smith (2009), f. 168

Veprimtari (5 minuta)

Bindja ndaj ligjeve të posaçme çon drejt bekimeve të posaçme.

Hapi 1: Poshtë në kolonën e majtë shkruani disa bekime që i dëshironi.

Hapi 2: Poshtë në kolonën e djathtë përcaktoni ligjet ose parimet të cilave keni nevojë t’ju bindeni, me qëllim që të merrni bekimet që dëshironi.

tabela Bekimet

Diskutoni:

Lexoni Jozueut 3:5 dhe citimet nga Plaku Xhefri R. Holland dhe Presidenti Spenser W. Kimball. Përse kemi nevojë të pendohemi, ta shenjtërojmë veten tonë dhe të përpiqemi të bëjmë mirë ndërkohë që përpiqemi të bëhemi të mbështetur te vetja?

Jozueut 3:5

“Shenjtërohuni, sepse nesër Zoti ka për të bërë mrekulli midis jush.”

Plaku Xhefri R. Holland

“Zoti i bekon ata që dëshirojnë të përmirësohen, që e pranojnë nevojën për urdhërime dhe përpiqen t’i zbatojnë ato. … Ai do t’ju ndihmojë të pendoheni, të ndreqni, të rregulloni çfarëdo që duhet rregulluar dhe të vazhdoni. Shumë shpejt do ta keni suksesin që kërkoni.”

“Nesër Zoti Ka për të Bërë Mrekulli midis Jush”, Ensign ose Liahona, maj 2016, f. 126

Presidenti Spenser W. Kimball

“Nëse na pëlqen luksi ose madje domosdoshmëritë më tepër sesa na pëlqen bindja, ne do t’i humbasim bekimet që [Perëndisë] do t’i pëlqente të na i jepte.”

Teachings of Spencer W. Kimball, red. Edward L. Kimball (1982), f. 212

Zotohuni:

Zotohuni që t’i bëni veprimet vijuese gjatë javës.

• Bindjuni ligjeve ose parimeve që zgjodhët në veprimtarinë më lart.

• Tregojani familjes apo miqve tuaj atë që keni mësuar sot rreth bindjes.

Bindja Sjell Bekime

Nëse nuk jeni në gjendje ta shikoni materialin filmik, zgjidhni një anëtar të grupit për ta lexuar tekstin vijues.

Bindja Sjell Bekime

Presidenti Tomas S. Monson: Çfarë premtimi i lavdishëm! “Ai që i mban urdhërimet e [Perëndisë], merr të vërtetë e dritë, derisa të përlëvdohet në të vërtetë dhe i di të gjitha gjërat [DeB 93:28]. …”

Vëllezërit dhe motrat e mia, prova e madhe e kësaj jete është bindja. “Dhe ne do t’i provojmë me këtë”, tha Zoti, “për të parë nëse ata do t’i bëjnë të gjitha gjërat që Zoti, Perëndia i tyre, do t’i urdhërojë” [Abraham 3:25].

Shpëtimtari shpalli: “Sepse të gjithë ata që dëshirojnë të kenë bekim nga dora ime, duhet t’i binden ligjit që u caktua për atë bekim dhe kushteve të tij, siç u ngritën që përpara krijimit të botës” [DeB 132:5].

Nuk ekziston shembull më i shkëlqyer për bindjen se ai i Shpëtimtarit tonë. Për Të Pali vërejti:

“Edhe pse ishte Bir, mësoi të jetë i bindur nga ato që pësoi,

dhe, si u bë i përkryer, u bë vepronjësi i shpëtimit të amshuar për të gjithë ata që i binden” [Hebrenjve 5:8–9].

Shpëtimtari tregoi dashuri të sinqertë për Perëndinë duke jetuar jetë të përsosur, duke e nderuar misionin e shenjtë që ishte i Tiji. Kurrë nuk ishte Ai arrogant. Kurrë nuk ishte Ai i fryrë me krenari. Kurrë nuk ishte Ai i pabesë. Gjithmonë ishte Ai i përulur. Gjithmonë ishte Ai i sinqertë. Gjithmonë ishte Ai i bindur. …

Kur u përball me agoninë e Gjetsemanit, ku Ai duroi dhembje të tillë saqë “djersa e tij… i[u] bë si gjak i mpiksur që bie për tokë” [Lluka 22:44], Ai dha shembullin e Birit të bindur duke thënë: “O Atë, po të duash, largoje këtë kupë nga unë! Megjithatë mos u bëftë vullneti im, por yti” [Lluka 22:42].

Sikurse Shpëtimtari i udhëzoi Apostujt e Tij të hershëm, kështu ju udhëzon Ai ju dhe mua: “Ti ndiqmë” [Gjoni 21:22]. A jemi të gatshëm të bindemi?

Dituria që kërkojmë, përgjigjet për të cilat jemi të dëshiruar, dhe forca që dëshirojmë sot për të përballuar sfidat e një bote të ndërlikuar dhe në ndryshim, mund të jenë tonat kur u bindemi me gatishmëri urdhërimeve të Zotit. Po i citoj edhe një herë fjalët e Zotit: “Ai që i mban urdhërimet e [Perëndisë], merr të vërtetë e dritë, derisa të përlëvdohet në të vërtetë dhe i di të gjitha gjërat” [DeB 93:28].

Është lutja ime e përulur që të mund të bekohemi me shpërblimet e bollshme që u premtohen të bindurve. Në emrin e Jezu Krishtit, Zotit dhe Shpëtimtarit tonë, amen.

(“Bindja Sjell Bekime”, Ensign ose Liahona, maj 2013, f. 89, 92)