Themeli Im: Tregoni Integritet Moral

Koha Maksimale: 20 Minuta

Përsiatni:

Përse i do Zoti ata që kanë “integritet të zemrës”?

Shikoni:

“What Shall a Man Give in Exchange for His Soul?” [“Çfarë do të Japë një Njeri si Shkëmbim të Shpirtit të Vet?”], në dispozicion te srs.lds.org/videos. (Nuk keni material filmik? Lexoni tekstin e shkruar në fund të kësaj pjese.)

Diskutoni:

Çfarë do të thotë të kesh integritet moral? Cilat janë disa mënyra të vogla në të cilat njerëzit i japin shpirtrat e tyre për të marrë gjëra në këtë jetë?

Lexoni:

Vargjet te Nenet e Besimit 1:13 dhe Jobit 27:5

Nenet e Besimit 1:13.

“Ne besojmë në qenien të ndershëm.”

Jobit 27:5

“Deri në regëtimat e fundit nuk do të heq dorë nga ndershmëria ime.”

Veprimtari (5 minuta)

Në mënyrë të pavarur, vlerësojeni veten në fushat e mëposhtme.

Vendosni një Numër Përpara Çdo Thënieje për të Treguar se sa Shpesh Veproni në Këtë Mënyrë. 1 = kurrë, 2 = nganjëherë, 3 = shpesh, 4 = gjithnjë
1. I mbaj premtimet, zotimet dhe besëlidhjet e mia.
2. Jam tërësisht i vërtetë në gjërat që them dhe në shënimet që mbaj.
3. Nuk e teproj që t’i bëj gjërat të duken më të mira se ç’janë.
4. E kthej atë që marr hua dhe nuk marr gjëra që nuk më përkasin.
5. Jam tërësisht besnik ndaj bashkëshortit/es tim/sime në fjalët dhe veprimet e mia.
6. Nuk mashtroj kurrë, edhe kur e di që nuk do më kapin.
7. Kur gjej diçka që nuk është e imja, ia kthej të zotit.
8. I shlyej paratë që marr borxh.

Diskutoni:

Lexoni te Mosia 4:28 dhe citimin nga Plaku Jozef B. Uirthlin. Përse është pagimi i një borxhi apo huaje biznesi apo studentore (e tillë si një hua nga FQA‑ja) çështje e integritetit moral vetjak?

Mosia 4:28

“Dhe unë do të doja që ju të mbanit mend se kushdo mes jush, që merr hua nga fqinji i tij duhet t’ia kthejë gjënë që ai ka marrë hua, sipas asaj që bini dakort, përndryshe do të bëni mëkat; dhe ndoshta do të shkaktoni që fqinji të bëjë mëkat gjithashtu.”

Plaku Jozef B. Uirthlin

“Integritet moral do të thotë të bëjmë gjithmonë atë që është e drejtë dhe e mirë, pavarësisht nga pasojat e drejtpërdrejta. Do të thotë të jemi të drejtë nga vetë thellësia e shpirtit tonë, jo vetëm në veprimet tona por, më e rëndësishmja, në mendimet tona dhe në zemrat tona. … Pak gënjeshtra, pak mashtrim ose marrja e një përfitimi të vogël të padrejtë, nuk janë të pranueshme për Zotin. … Shpërblimi i përkryer i integritetit moral është shoqërimi i vazhdueshëm i Frymës së Shenjtë, … [i cili do të] na udhërrëfejë në gjithçka që bëjmë.”

“Personal Integrity”, Ensign, maj 1990, f. 30, 32, 33

Zotohuni:

Zotohuni që t’i bëni veprimet vijuese gjatë javës.

• Përmirësohuni në një nga tetë aspektet që i vlerësuat në veprimtarinë më sipër.

• Tregojani familjes apo miqve tuaj atë që keni mësuar sot rreth integritetit.

Çfarë do të Japë Njeriu si Shkëmbim të Shpirtit të Vet?

Nëse nuk jeni në gjendje ta shikoni materialin filmik, zgjidhni një anëtar të grupit për ta lexuar tekstin vijues.

Education for a Better Life [Arsimim për një Jetë më të Mirë]

Plaku Robert C. Gei: Shpëtimtari një herë u bëri dishepujve të Tij pyetjen në vijim: “Çfarë do të japë njeriu si shkëmbim të shpirtit të vet?” [Mateu 16:26.]

Kjo është një pyetje që im atë më mësoi ta mendoja me maturi vite më parë. Ndërsa po rritesha, prindërit e mi më caktuan punë të përditshme përreth shtëpisë dhe më paguanin një shumë të vogël të hollash për atë punë. Shpesh ato para, pak më shumë se 50 qindarka në javë, i përdorja për të shkuar në kinema. Atëherë një biletë filmi kushtonte 25 qindarka për një 11‑vjeçar. Më mbeteshin 25 qindarka për t’u shpenzuar me ëmbëlsira, që kushtonin 5 qindarka copa. Një film me pesë ëmbëlsira! Më mirë se kaq nuk bëhej.

Çdo gjë shkoi mirë derisa mbusha 12 vjeç. Një pasdite duke qëndruar në radhë, mora vesh se çmimi i biletës për një 12‑vjeçar ishte 35 qindarka dhe kjo do të thoshte dy ëmbëlsira më pak. Jo shumë i përgatitur për ta bërë atë sakrificë, unë arsyetova me vete: “Ti dukesh njëlloj si një javë më parë”. Më pas hipa lart dhe kërkova një biletë prej 25 qindarkash. Sportelisti nuk më pa fare me sy hetues dhe unë bleva pesë ëmbëlsirat e mia të zakonshme në vend që të blija tri.

Më vonë, i ngazëllyer nga arritja ime, nxitova në shtëpi për t’i treguar tim eti për suksesin tim të madh. Kur po i tregoja hollësitë, ai nuk tha asgjë. Kur mbarova, ai thjesht më pa dhe tha: “Bir, a do të shisje shpirtin për një monedhë pesëqindarkëshe?” Fjalët e tij më therën në zemrën time 12‑vjeçare. Është një mësim që nuk e kam harruar kurrë.

(“Çfarë do të Japë Njeriu si Shkëmbim të Shpirtit të Vet?”, Ensign ose Liahona, nëntor 2012, f. 34)