Themeli Im: Përdoreni Kohën me Mençuri

Koha Maksimale: 20 Minuta

Përsiatni:

Përse koha është një nga dhuratat më të mëdha të Perëndisë?

Shikoni:

“The Gift of Time” [“Dhurata e Kohës”], në dispozicion te srs.lds.org/videos. (Nuk keni material filmik? Lexoni tekstin e shkruar në fund të kësaj pjese.)

Diskutoni:

Çfarë mësuat nga motra Benkozi?

Lexoni:

Vargun tek Alma 34:32 dhe citimin nga Presidenti Brigam Jang.

Alma 34:32.

“Pasi vini re, kjo jetë është koha për njerëzit që të përgatiten të takohen me Perëndinë; po, vini re, dita e kësaj jete është dita për njerëzit që të kryejnë punët e tyre.”

Brigam Jang

“Koha është tërë aksionet në kapital që ka në tokë. … Nëse përdoret siç duhet, ajo sjell atë që do ta shtojë ngushëllimin, volinë dhe kënaqësinë tuaj. Le ta marrim parasysh këtë e të mos rrimë më ulur duarkryq, duke e çuar kohën dëm.”

Në Discourses of Brigham Young, përzgj. John A. Widtsoe (1954), f. 214

Veprimtari (5 minuta)

Hapi 1: Me një partner, lexoni pesë hapat vijuese që mund t’i ndërmerrni çdo ditë për ta përdorur mirë kohën tuaj.

1. Renditini Detyrat	2. Lutuni	3. Vendosni Përparësi	4. Vendosni Synime, Veproni	5. Raportoni
Çdo mëngjes, bëni një listë me detyrat që duhen bërë. Shtoni emrat e njerëzve për t’u shërbyer.	Lutuni për udhërrëfim. Rishikojeni listën tuaj të detyrave. Dëgjoni. Zotohuni për të bërë më të mirën tuaj.	Në listën tuaj të detyrave, vini një “1‑sh” pranë detyrës më të rëndësishme, një “2‑sh” pranë detyrës tjetër më të rëndësishme e kështu me radhë.	Dëgjoni Shpirtin. Vendosni synime. Punoni fort. Filloni me detyrën më të rëndësishme e vazhdoni deri në fund të listës.	Çdo natë, raportojini Atit Qiellor në lutje. Bëni pyetje. Dëgjoni. Pendohuni. Ndiejeni dashurinë e Tij.

Hapi 2: Individualisht renditini detyrat tuaja të përditshme ose javore në një fletë letre. Këto duhet të jenë detyra të rëndësishme për punën tuaj, për studimet tuaja, për kishën apo shërbimin familjar – jo vetëm punët e përditshme të shtëpisë. Renditeni listën tuaj sipas përparësisë dhe lutuni për të.

Hapi 3: Duke filluar që nesër caktoni synime, veproni dhe raportojini Atit Qiellor se si e keni përdorur kohën tuaj.

Zotohuni:

Zotohuni që t’i bëni veprimet vijuese gjatë javës.

• Ushtrojini pesë hapat e përshkruar më sipër çdo ditë për ta përdorur kohën tuaj më me mençuri. Çdo natë, raportojini Atit Qiellor në lutjet tuaja.

• Tregojani familjes apo miqve tuaj atë që keni mësuar sot rreth përdorimit të kohës me mençuri.

Dhurata e Kohës

Nëse nuk jeni në gjendje ta shikoni materialin filmik, zgjidhni një anëtar të grupit për ta lexuar tekstin vijues.

Bindja Sjell Bekime

Kofi: Përshëndetje, motra Benkozi. Si je?

Motra Benkozi: A je mirë, Kofi?

Kofi: O, motra Benkozi. Jam kaq i zënë. Duhet të punoj dhe të shërbej e ta ndihmoj familjen time … dhe pastaj kam edhe futbollin. Nuk kam kohë!

Motra B.: Kofi, ti ke gjithë kohën që gjendet.

Kofi: Çfarë?

Motra B.: Djali im, Perëndia na ka dhënë një dhuratë të madhërishme – kohën tonë. Ne me të duhet të bëjmë atë që ka më shumë rëndësi.

Kofi: Por si, motra Benkozi? Ti gjithnjë ke bërë kaq shumë gjëra. Ia ke dalë mbanë me familjen tënde, me biznesin tënd. Ti u ke shërbyer e ke bekuar shumë njerëz, si unë. Nuk e di se si ia del.

Motra B.: Dëshiron vërtet ta dish? Nëse do të qëndrosh ulur e të dëgjosh, do të ta tregoj sekretin tim.

Çdo mëngjes unë ngrihem përpara lindjes së diellit. Vishem dhe laj fytyrën e duart e mia.

Lexoj shkrimet e shenjta. Pastaj bëj një listë me ato që duhet të bëj atë ditë.

Mendoj se kujt mund t’i shërbej. Lutem për të ditur vullnetin e Perëndisë. Dhe dëgjoj.

Ndonjëherë, emrat ose fytyrat e njerëzve më vijnë në mendje. I shtoj ata në listën time.

Kofi: A është kjo mënyra se si ti e di gjithnjë saktësisht se kush ka nevojë për shërbimin tënd?

Motra B.: Po, Kofi. Dhe unë lutem për forcë e urtësi. Unë lutem që Perëndia ta “shenjtërojë kryerjen [time]”. Kjo thuhet te 2 Nefi 32.

Unë e falënderoj Atë. I premtoj se do të bëj më të mirën time. I kërkoj që Ai të bëjë atë që unë nuk mundem.

Pastaj e vështroj listën time. Vë një “1‑sh” pranë gjësë më të rëndësishme, pastaj një “2‑sh”.

Kofi: Nga i di përparësitë?

Motra B.: Unë dëgjoj kur lutem! Pastaj shkoj në punë. Vështroj numrin 1 dhe përpiqem ta bëj të parin, pastaj numrin 2.

Ndonjëherë gjërat ndryshojnë. Fryma e Shenjtë më thotë të bëj diçka tjetër. Ajo është gjë e mirë.

Unë punoj shumë fort, por kam paqe. E di se Perëndia do të më ndihmojë.

Prandaj, me listën time dhe Shpirtin, unë bëj atë që ka rëndësi, Kofi.

Kofi: Kjo duket e thjeshtë dhe e vështirë në të njëjtën kohë.

Motra B.: Ke të drejtë! Kur më në fund përgatitem për shtrat, unë lutem. I raportoj Atit Qiellor. I them si shkoi dita. I bëj pyetje. E pyes se çfarë mund të bëj më mirë. Dëgjoj. Shpesh e ndiej dashurinë e Tij. E di se Ai e lartëson atë që përpiqem të bëj. Më pas kam paqe, Kofi, dhe fle.

Kofi: Ajo është gjë e mirë, mama Benkozi. Unë e dëshiroj këtë paqe. Dëshiroj ta përdor kohën time. Dëshiroj të punoj e të shërbej më mirë.