Mësoni

Koha Maksimale: 55 Minuta

1. Veprimi sipas Parimeve të Sakta

Lexoni:

Shumë parime japin ndihmesë në suksesin e biznesit. Disa prej këtyre renditen më poshtë:

• Vizioni: “Unë dhe ju kemi përgjegjësi që të kemi atë lloj vizioni i cili nuk do të kënaqet me një hap përpara ose dy hapa përpara; por vërtet të shohim fundin që nga fillimi, të kemi një vizion panoramik të mundësive tona.” (Teachings of Thomas S. Monson, përmb. Lynne F. Cannegieter [2011], f. 316).

• Puna: “Përfshih[uni] me zell në një kauzë të mirë … sepse është në ta fuqia, me anë të së cilës ata janë veprues për veten” (DeB 58:27–28).

• Frymëzimi: “Përgjërojuni [Perëndisë] për bereqetin e fushave tuaja, që ai t’ju sjellë begati. Përgjërojuni atij për tufat e fushave tuaja, që ato të mund të shtohen” (Alma 34:24–25).

• Këmbëngulja: “Nuk do të kthehemi … derisa ne të kemi plotësuar gjënë” (1 Nefi 3:15).

• Përgjegjshmëria: “Të lumtë, shërbëtor i mirë dhe besnik; ti u tregove besnik në gjëra të vogla; unë do të të vë mbi shumë gjëra” (Mateu 25:21; shih vargjet 14–30).

• Mentaliteti i bollëkut: “Toka është plot dhe ka mjaft edhe për të kursyer” (DeB 104:17).

• Administrimi i kohës: “Koha juaj është e vlefshme” (Thomas S. Monson, “Guideposts for Life’s Journey” [takim shpirtëror në universitetin “Brigam Jang”, 13 nëntor 2007], f. 1, speeches.byu.edu).

• Fuqia e gjërave të vogla dhe të thjeshta: “Nëpërmjet gjërave të vogla dhe të thjeshta gjëra të mëdha bëhen” (Alma 37:6).

• Zotimi: “Kush nga ju … nuk ulet më parë të llogaritë shpenzimet?” (Lluka 14:28; shih edhe vargjet 29–30.)

Diskutoni:

Cili nga këto parime ju bie në sy si më i zbatueshëm teksa nisni ose rritni biznesin tuaj?

2. Përse Dua të Nis ose Rrit një Biznes?

Lexoni:

Ka shumë arsye të vlefshme përse ju mund ta nisni ose rritni një biznes:

• Pronësia

• Të ardhurat shtesë

• Pasioni vetjak

• Karriera e dytë

• Sfida e përvojës

• Domosdoshmëri (mundësi të pakta ose asnjë mundësi punësimi)

• Liria dhe kontrolli personal

• Siguria më e madhe financiare

Ka një larmi shtigjesh që mund t’i ndërmerrni në biznesin tuaj. Shembujt vijues tregojnë se si disa njerëz e bënë këtë gjë.

Katër shembuj të mënyrës se si njerëzit e nisën ose e rritën biznesin e tyre

Veprimtari (5 minuta)

Individualisht merrni parasysh pyetjet që vijojnë:

1. Cili është qëllimi juaj që të doni ta nisni ose rritni një biznes?

2. Çfarë ndikimi mund të ketë kjo përpjekje te ju ose cilësia e jetës së familjes suaj?

3. A dëshironi një biznes me kohë të plotë apo me të pjesshme? Përse?

4. Sa para shpresoni të fitoni me biznesin tuaj?

Lexoni:

Ju jeni bekuar me burime të tilla si kohë, energji dhe para. Ne vendosim çdo ditë se si t’i shpërndajmë këto burime midis familjes, punës, shërbimit dhe interesave të tjera.

Pronësia e një biznesi krijon përfitime, por këto përfitime shpesh vijnë me shpenzime. Secili prej nesh duhet të kërkojë frymëzim dhe ta përdorë lirinë tonë të zgjedhjes për të përcaktuar se si ne i përdorim burimet tona për familjen dhe jetën tonë.

Veprimtari (5 minuta)

Ndahuni në grupe me nga tre veta. Secili prej jush përdorni një minutë për të treguar qëllimin tuaj përse dëshironi ta nisni ose rritni një biznes.

3. Vlerësimi i Gatishmërisë Sime Vetjake për Pronësi Biznesi

Veprimtari (15 minuta)

Hapi 1: Individualisht merrni parasysh thëniet vijuese, që kanë si qëllim t’ju ndihmojnë ta vlerësoni gatishmërinë tuaj për pronësi biznesi. Përgjigjiuni këtyre thënieve me ndershmëri, pasi secila përfaqëson një faktor kyç të suksesit të biznesit. Përgjigjet tuaja do t’ju ndihmojnë t’i kuptoni më mirë anët tuaja të forta, fushat tuaja të nevojës dhe gatishmërinë tuaj të përgjithshme si pronar biznesi. Qarkojeni përgjigjen tuaj për secilën thënie, me 10‑n si më e forta.

Thënia
1. Jam i gatshëm të punoj shumë për orë të tëra për një kohë të zgjatur.	1 2 3 4 5 6 7 8 9 10
2. I jap shtytje dhe nxitje vetes.	1 2 3 4 5 6 7 8 9 10
3. Kam pak nevojë për udhëzim në punën time.	1 2 3 4 5 6 7 8 9 10
4. Kam shëndet të mirë dhe mund të veproj me një nivel të lartë energjie.	1 2 3 4 5 6 7 8 9 10
5. Jam i fortë emocionalisht dhe mund t’ia dal mbanë mospranimit, stresit ose dështimit për një kohë të gjatë.	1 2 3 4 5 6 7 8 9 10
6. Jam i gatshëm të mbaj përgjegjësi të plotë për suksesin ose dështimet e biznesit tim.	1 2 3 4 5 6 7 8 9 10
7. Kam punuar në një biznes si ai që kam në plan të filloj.	1 2 3 4 5 6 7 8 9 10
8. E kuptoj se si ta administroj një biznes me efektshmëri.	1 2 3 4 5 6 7 8 9 10
9. Mund të funksionoj mirë në mjedise të paqarta.	1 2 3 4 5 6 7 8 9 10
10. Familja ime do të më mbështetë emocionalisht.	1 2 3 4 5 6 7 8 9 10
11. Familja ime do të më mbështetë financiarisht.	1 2 3 4 5 6 7 8 9 10
12. Kam një rrjet të mirë miqsh dhe bashkëpunëtorësh biznesi, të cilët mund të më këshillojnë për biznesin tim dhe të më ndihmojnë ta forcoj atë.	1 2 3 4 5 6 7 8 9 10
13. Jam i gatshëm të sakrifikoj për një kohë afatshkurtër që të arrij shpërblime afatgjata.	1 2 3 4 5 6 7 8 9 10
14. Ndihem rehat në marrjen e vendimeve shpejt kur është e nevojshme.	1 2 3 4 5 6 7 8 9 10
15. Jam i orientuar nga hollësitë.	1 2 3 4 5 6 7 8 9 10
16. Kam përvojë në mbajtjen e dokumenteve të organizuara.	1 2 3 4 5 6 7 8 9 10
17. Mund të punoj me efektshmëri me shumë lloje njerëzish.	1 2 3 4 5 6 7 8 9 10
18. Jam i gatshëm t’u delegoj autoritet dhe përgjegjësi të tjerëve.	1 2 3 4 5 6 7 8 9 10
19. Jam njeri i ndershëm dhe i besueshëm, të cilin të tjerët mund ta mirëbesojnë.	1 2 3 4 5 6 7 8 9 10
20. Jam i gatshëm t’i dëgjoj të tjerët dhe të pranoj përshtypje prej tyre.	1 2 3 4 5 6 7 8 9 10
21. Jam këmbëngulës dhe do ta çoj deri në fund punën time derisa të përfundohet me sukses.	1 2 3 4 5 6 7 8 9 10
22. Jam elastik dhe i gatshëm të bëj ndryshime të shpeshta për ta përmirësuar biznesin tim.	1 2 3 4 5 6 7 8 9 10
23. Jam i gatshëm të ndërmarr rreziqe të përllogaritura.	1 2 3 4 5 6 7 8 9 10
24. Jam njeri pozitiv me një këndvështrim optimist.	1 2 3 4 5 6 7 8 9 10

Hapi 2: Ndahuni në dyshe dhe diskutoni pyetjet vijuese, bazuar në përgjigjet tuaja ndaj thënieve të mësipërme:

• Cilat anë të forta do t’ju shërbejnë më mirë kur e nisni ose rritni një biznes? Përse?

• Cilat fusha kanë nevojë për zhvillim të mëtejshëm? Si do t’i bëni përmirësimet?

• Nisur nga përgjigjet tuaja, sa të përgatitur jeni që të filloni një biznes?

4. Aftësitë e Biznesit që do t’i Zhvilloj në Këtë Kurs

Lexoni:

Një qëllim i këtij kursi është t’ju ndihmojë të zhvilloni zakonet e një pronari të suksesshëm biznesi. Pronarët e suksesshëm të bizneseve janë vëzhgues, kureshtarë dhe kanë dëshirë të mësojnë ide të reja çdo ditë. Ata e kuptojnë se mundësia e tyre e biznesit është një punë në përparim e sipër. Ata e kuptojnë se do të duhet t’i bëjnë shumë përmirësime biznesit të tyre thjesht që të kenë një fillim të suksesshëm.

Që të bëheni një pronar biznesi i këtij lloji, do t’ju nevojitet të ushtroni besim dhe të dilni jashtë zonës suaj të rehatisë. Do t’ju duhet të dilni nga shtëpia ose zyra juaj dhe të flisni shpesh me klientë të mundshëm rreth nevojave dhe parapëlqimeve të tyre. Do të keni nevojë të kërkoni informacion të ri dhe përshtypje që do t’ju ndihmojnë ta përmirësoni biznesin tuaj. Pronarët e bizneseve që nuk janë të gatshëm të përfshihen me klientët e tyre, të mësojnë vazhdimisht dhe të bëjnë ndryshime të biznesit të tyre, do ta gjejnë të vështirë të kenë sukses në një kohë afatgjatë.

Ndërkohë që punojmë për t’i nisur ose rritur bizneset tona, ne do ta nxitim njëri‑tjetrin të mendojmë dhe veprojmë si pronarë të suksesshëm biznesesh. Shumë prej zotimeve javore, të cilat do t’i plotësojmë jashtë mbledhjeve të grupit tonë, do të na ndihmojnë të zhvillojmë zakone që do të na nevojiten për të qenë të suksesshëm.

Çdo javë do të praktikojmë sa vijon:

1. Të vëzhgojmë dhe të flasim me klientët: për të mbledhur ide, për të kuptuar nevojat e klientëve, për të provuar e përshtatur idetë tona të biznesit dhe për të mbledhur përshtypje.

2. Të shkruajmë mendimet tona: për të shënuar vëzhgime, ide nga të tjerët dhe mbresa nga Fryma e Shenjtë.

3. Të shesim: për të mësuar që t’i dëgjojmë nevojat e të tjerëve dhe të përcaktojmë zgjidhjet e duhura.

4. Të dokumentojmë hollësi financiare të bizneseve tona: për të gjurmuar faktorët kyç të suksesit të bizneseve tona dhe për të projektuar të ardhmen.

Këtë javë do të keni sfidën që t’i ushtroni këto aftësi dhe t’i raportoni grupit. Ju gjithashtu do të filloni të flisni me klientët tuaj të mundshëm. Do t’i raportoni rezultatet tuaja javën e ardhshme.

5. Çfarë do të Mësojmë dhe Bëjmë si Grup

Lexoni:

Ne do të punojmë së bashku që ta ndihmojmë njëri‑tjetrin për ta nisur e rritur biznesin tonë. Synimi ynë më i madh është të bëhemi të mbështetur te vetja. Kur mund të kujdesemi për veten, është më e lehtë që t’i ndihmojmë njerëzit e tjerë.

Gjatë 12 javëve të ardhshme, ne do të punojmë së bashku përmes kapitujve vijues:

• Kapitulli 1 – Gatishmëria Ime për Suksesin e Biznesit

• Kapitulli 2 – Zgjidhja e Nevojave të Paplotësuara të Klientëve

• Kapitulli 3 – Sigurimi që të Kem një Biznes Fitimprurës

• Kapitulli 4 – Gjetja e Klientëve

• Kapitulli 5 – Ruajtja e Klientëve

• Kapitulli 6 – Administrimi i Fitimprurjes së Biznesit Tim

• Kapitulli 7 – Mbajtja Veçan e Parave të Mia të Biznesit nga Ato Vetjake

• Kapitulli 8 – Administrimi i Qarkullimit të Parave të Biznesit Tim

• Kapitulli 9 – Rritja e Biznesit Tim

• Kapitulli 10 – Financimi i Biznesit Tim

• Kapitulli 11 – Përmirësimi i Vazhdueshëm i Biznesit Tim

• Kapitulli 12 – Paraqitja e Biznesit Tim

6. Organizimi i Planifikimit të Biznesit tim – Planifikuesi i Biznesit Vetjak

Lexoni:

Disa njerëz bëjnë gabimin e përpjekjes për t’i ngritur bizneset e tyre përreth hamendësimeve të tyre ose një “ndjesie të brendshme” që idetë e tyre do të funksionojnë. Zakonisht këto biznese nuk dalin me sukses. Ky kurs do t’ju nxitë të vëzhgoni dhe të përfshiheni me klientët çdo javë dhe t’i përpunoni idetë tuaja sipas asaj që mësoni. Ne do të mësojmë të “organizo[jmë] … çdo gjë të nevojshme” dhe t’i përmirësojmë vazhdimisht bizneset tona dhe fusha të tjera të jetës sonë (DeB 88:119).

Në këtë grup ju do të përdorni një Planifikues të Biznesit Vetjak për të krijuar gradualisht një plan për biznesin tuaj. Planifikuesi do t’ju ndihmojë të organizoni detaje dhe të vlerësoni vlefshmërinë e mundësisë së biznesit tuaj. Planifikuesi juaj gjithashtu do të jetë i dobishëm kur t’ia paraqitni biznesin tuaj grupit në javën 12. Pasi ta keni përfunduar kursin, ai do t’ju ndihmojë ta vazhdoni planin tuaj për ta rritur biznesin tuaj.

Hollësitë e planit tuaj të biznesit duhet të jenë eksperimentale fillimisht, ngaqë ato do të ndryshojnë teksa mësoni më shumë duke folur me klientët, furnizuesit dhe pronarë të tjerë biznesesh. Përdorni një laps kur shkruani në Planifikuesin tuaj të Biznesit Vetjak, pasi do të doni të bëni përditësime ndërkohë që e përmirësoni biznesin tuaj. Kthehuni te Shtojca që të shihni Planifikuesin e Biznesit Vetjak që do të përdorni.

7. Ushtrohuni Çdo Ditë dhe Mbajini Zotimet

Shikoni:

“Keeping Commitments Leads to Growth” [“Mbajtja e Zotimeve Çon drejt Rritjes”], në dispozicion te srs.lds.org. (Nuk keni material filmik? Lexoni tekstin e shkruar në fund të kësaj pjese.)

kutia e vënies në punë të materialit filmik

Diskutoni:

Si do ta ndihmojmë njëri‑tjetrin që të ushtrojmë aftësi dhe të mbajmë zotime?

Kutia e Mjeteve të Suksesit të Biznesit

Te Shtojca është një Kuti e Mjeteve të Suksesit të Biznesit. Kjo kuti mjetesh përmbledh disa prej parimeve kyç që do t’i mësojmë në këtë kurs dhe që mund të përdoren si referencë.

Certifikatë Përfundimi

Lexoni:

Anëtarët e grupit që marrin pjesë në mbledhje dhe i mbajnë zotimet e tyre, mund të marrin një certifikatë të mbështetjes te vetja nga Kolegji i Biznesit SHDM. Shihni kapitullin 12.

Burimet

Mbajtja e Zotimeve Çon drejt Rritjes

Zgjidhni tregimtarë dhe lexoni sa vijon:

Tregimtari 1: Ne besojmë në bërjen dhe mbajtjen e zotimeve. Këto veprime besimi janë të ngjashme me shkallët ngjitëse për përparimin tonë si individë dhe si familje. Për atë arsye gjithçka që bëjmë në grupet tona të mbështetjes te vetja, ndërtohet lidhur me bërjen dhe mbajtjen e zotimeve dhe raportimin e rezultateve tona.

Tregimtari 2: Ne bëjmë të paktën tri lloje zotimesh çdo javë. Fillimisht ne ushtrojmë parime dhe zakone themelore dhe ua mësojmë këto familjeve tona. Më pas veprojmë që të plotësojmë zhvillimin e biznesit dhe zotimet për funksionimin e biznesit, të cilat na ndihmojnë të zhvillojmë aftësi të reja për t’i rritur dhe mbajtur bizneset tona. Përpara se të largohemi nga çdo mbledhje grupi, ne i shqyrtojmë zotimet tona të biznesit për javën dhe e vëmë nënshkrimin tonë në fletoren tonë të punës për të treguar zotimin tonë. Gjithashtu i kërkojmë dikujt në grup që të jetë partneri ynë në veprim për javën. Ky person e nënshkruan fletoren tonë të punës për të premtuar përkrahjen e tij ose të saj. Dy herë gjatë javës, ose më shumë nëse është e nevojshme, ne do të vihemi në kontakt me partnerin tonë në veprim që të raportojmë veprimet tona e që të marrim sugjerimin dhe përkrahjen e tij ose të saj.

Tregimtari 3: Kur viheni në kontakt me partnerin tuaj në veprim, sigurohuni që do të lini kohë të mjaftueshme për të dëgjuar me të vërtetë dhe për t’i kushtuar vëmendje serioze përshtypjes suaj. Nëse ju nevojitet ndihmë shtesë, ju mund ta kërkoni prej familjes, miqve ose ndërmjetësit tuaj të grupit. Në mbledhjen tonë të ardhshme do të fillojmë duke raportuar mbi zotimet tona. Kjo duhet të jetë një përvojë e pëlqyeshme, pozitive ku çdokush ndien se e dëgjojnë dhe i japin kurajë.

Tregimtari 4: Ne të gjithë kemi ditë ose madje javë të vështira. Mund të dështojmë përkohësisht në një zotim ose të hasim një pengesë. Kjo është gjë që pritet. Mbani mend se çdo dështim është i vlefshëm. Prandaj mësoni nga përvojat tuaja, përdoreni atë njohuri për ta përmirësuar planin e biznesit tuaj dhe vazhdoni të ecni përpara.

Lexoni tri pyetjet më poshtë dhe merrni parasysh se si këta njerëz u ndihmuan nëpërmjet mbajtjes së zotimeve dhe raportimit.

Rebeka: “Mbajtja e zotimeve më ndihmoi të shkoj tek ide të reja dhe të përcaktoj mundësi të reja për biznesin tim. Ndërmarrja e hapave çdo javë për të folur me shitësit, me profesionistë të tjerë në fushën time dhe anëtarë të grupit më ndihmoi që të nxitem për të vazhduar përpara. Gjithashtu gjeta se mund ta shihja dorën e Perëndisë më qartë në jetën time kur me lutje e përfshiva Atë në planet e mia dhe kërkova ndihmën e Tij. Ndjeva se po e mundësoja Atë të më ndihmonte me anë të punës sime të madhe për t’i bërë të suksesshme zotimet e mia.”

Petri: “Të pasurit e një partneri në veprim më mbajti të përqendruar te zotimet e ardhshme javore. Më mbajti në udhën e duhur. Ishte e dobishme të kisha një njeri që mund të shërbente si dëgjues dhe të më ndihmonte që t’i përpunoja idetë e mia. Gjithashtu, isha në gjendje t’i ofroja ide partnerit tim që ishin jashtë bazës së njohurive të tij dhe kjo vërtet e ndihmoi të ecte përpara me idetë e veta.”

Xheki: “Mendova se mbështetja te vetja ishte diçka për ta mësuar vetë – derisa u bëra pjesë e një grupi të mbështetjes te vetja. Çdo javë pata një vend të sigurt për t’i raportuar suksesin dhe dështimin tim, për të caktuar synime, për të eksperimentuar me ide të reja dhe për ta përcaktuar sërish qëllimin e biznesit tim. Grupi im më ndihmoi t’i zgjeroja mundësitë për ta rritur biznesin tim më shumë sesa e kisha mësuar vetë.”

Plaku Marvin J. Ashton

“Lumturia e vërtetë nuk krijohet kur marrim diçka. Lumturia e vërtetë krijohet kur bëhemi diçka. Kjo mund të kryhet duke qenë të zotuar ndaj synimeve të larta. Ne nuk mund të bëhemi diçka pa u zotuar.”

“The Word Is Commitment”, Ensign, nëntor 1983, f. 61

Presidenti Tomas S. Monson

“Kam menduar kohët e fundit rreth zgjedhjeve. Është thënë se dera e historisë varet nga mentesha të vogla dhe po kështu ndodh me jetën e njerëzve. Zgjedhjet që bëjmë përcaktojnë fatin tonë.”

“Zgjedhjet”, Ensign ose Liahona, maj 2016, f. 86