Folasaga i Galuega a le Au Aposetolo
Aisea e suesue ai lenei tusi?
O Galuega a le Au Aposetolo ua fausia ai se ala laupapa i le va o faamaumauga i le soifuaga o Iesu Keriso ma aoaoga i Evagelia e fa ma tusiga ma galuega a Ana Aposetolo. O le tusi o Galuegao loo faapupula mai ai le ala na faaauau ai e le Faaola ona taitai Lana Ekalesia e ala i musumusuga a le Agaga Paia ia i latou o e umia ki o le perisitua. Sa faaalia e le Agaga Paia le upumoni i Aposetolo, o e na taitaia ma aoao atu le Ekalesia. Sa faatinoina e Aposetolo ia vavega i le suafa o Iesu Keriso. E ala i lo latou suesueina o lenei tusi, o le a aoao ai e tamaiti aoga le ala na amata ai ona salalau le Ekalesia a Iesu Keriso mai Ierusalema “e oo lava i tuluiga o le lalolagi” (Galuega 1:8). O le suesueina o lenei tusi e mafai foi ona fesoasoani ai i tamaiti aoga e vaai i le poto o perofeta o ona po nei ma aposetolo ma e mafai ona musuia i latou e tutu atu ma le totoa o ni molimau a Iesu Keriso.
O ai na tusiaina lenei tusi?
O Luka na tusiaina Galuega a le Au Aposetolo o “le lona lua o se galuega e lua-maga. … O le vaega muamua ua iloa o le Evagelia e Tusa ai ma Luka” (Taiala i Tusitusiga Paia, “Galuega a le Au Aposetolo,” scriptures.lds.org; tagai foi Luka 1:1–4; Galuega 1:1).
O anafea ma o fea foi na tusia ai lenei tusi?
Galuega na tusia ina ua mavae le Talalelei a Luka (tagai Galuega 1:1), lea atonu na tusia i le afa lona lua o le seneturi muamua T.A. Tatou te le iloa po o fea na tusia ai.
O ai na faatatau i ai le tusiaina o lenei tusi, ma pe aisea foi?
Na faatuatusi e Luka le tusi o Galuega i se tagata e igoa ia Teofilo (tagai Galuega 1:1.
O a nisi o vaaiga iloga o lenei tusi?
O le tusi o Galuega o loo faamatala mai ai le tulai mai ma le salalau atu o le faa-Kerisiano, e amata i le itumalo o le laumua o Iutaia o Ierusalema ma faaiu atu i Roma, o le laumua sili o le malo. O mea na tutupu o loo faamatala i le Galuega i se vaitau pe tusa ma le 30 tausaga (pe tusa o le T.A. 30–62) ma e taulai faapitoa atu i le galuega a Peteru (tagai Galuega 1–12) ma Paulo (tagai Galuega 13–28). A leai le tusi o Galuega, e utiuti so tatou malamalama i le talafaasolopito anamua o le Ekalesia ona o se aofaiga itiiti o loo aumaia i tusi i le Feagaiga Fou. E le gata i lea, o le Galuega foi o loo aumaia ai se matalalaga faasolopito mo tusi a Paulo.
E taua tele i le tuputupu ae o le Ekalesia anamua o le liua o Paulo (Galuega 9) ma ana misiona na sosoo ai; o le faaaliga na vaaia e Peteru e tusa ai ma le taliaina o Nuuese i le Ekalesia o e sa muai liua i le faa-Iutaia (Galuega 10:9–16, 34–35); ma aoaoga faavae na aoao atu i le konafesi i Ierusalema (Galuega 15).
E pei ona tusia i le }Luka 24:49, sa faatonuina e le Faaola ia Aposetolo e tatau ona amata la latou galuega “pe a maua e i latou le mana mai luga.” O loo tusia i le Galuega le faaeega mai o lenei mana e le Agaga Paia ma faamatala ai ona taunuuga ofoofogia, na amata i le liuaina o le fiaafe i le aso o le Penetekoso (tagai Galuega 2). I le Galuega atoa, o loo faamamafa mai ai e Luka le galuega a le Agaga Paia i tagata ma faalapotopotoga. O le fasifuaitau o le “maua o le mana mai luga” e ono uiga foi e faapea o Aposetolo “sa mauaina se malamalama patino, mana, ma faamanuiaga faapitoa, e masani e na o le Malumalu o le Alii e tuuina mai ai” (Bruce R. McConkie, Doctrinal New Testament Commentary, 3 vols. [1965–73], 1:859).
Otootoga
Galuega 1–2 ua auauna atu Iesu Keriso i Ona soo mo le 40 aso ina ua mavae Lona Toetu ona afio ae ai lea i le lagi. E ala i musumusuga, na tofia ai e Aposetolo ia Matatia e faatumu le avanoa i le Korama a Aposetolo e Toasefululua. Ua liligi mai le Agaga Paia i le aso o le Penetekoso. Ua molimau atu ma le le fefe e Peteru le Faaola toetu, ma pe tusa ma le tolu afe tagata na liua.
Galuega 3–8 ua faamalolo ai e Peteru ma Ioane se tagata sa pipili ina o fanau mai. Ua pue faapagotaina Peteru ma Ioane ona o le tali atu ma faamalolo i le suafa o Iesu Keriso ma ua laveaiina mai le falepuipui. Ua valaauina e Aposetolo ni alii se toafitu e fesoasoani ia i latou i la latou galuega; o se tasi o nei alii, o Setefano, ua molimau atu i luma o le aufono a Iutaia, ma sa fasiotia e sui o le aufono o ia. Ua talai atu Filipo ia Samaria atoa.
Galuega 9–12Ua liua Saulo ma ua amata lana galuega. E ala i se faaaliga, ua iloa ai e Peteru ua tatau ona talai atu le talalelei i Nuuese. O Herota Akeripa O ia na faatonuina le fasiotiina o le Aposetolo o Iakopo (le uso o Ioane) ma le faafalepuipuiina o Peteru.
Galuega 13–15Ua valaauina Saulo ma Panapa e fai ma faifeautalai. Ua la fetaiai ma le tetee mai o Iutaia ma ua taliaina nisi o Nuuese. Ua potopoto taitai o le Ekalesia i Ierusalema ma fuafua e le manaomia ona peritomeina ia tagata o Nuuese e liliu mai (pe faaauau ona tausia le tulafono a Mose) pe a latou auai i le Ekalesia. O Paulo (sa Saulo a o lea ua faaigoa ai nei) ua tuuvaa atu i lana malaga lona lua faafaifeautalai, faatasi ai ma Sila.
Galuega 16–20ua faamalolosia e Paulo ma Sila ekalesia eseese sa muai faatutuina muamua. I luga o le Mauga o Maresa i Atenai ua folafola atu ai e Paulo e faapea “o i tatou o fanau a le Atua” (Galuega 17:29). Ua faaiu e Paulo lana misiona lona lua ma ua tuuvaa ese atu mo se misiona lona tolu i Asia uma. Ua naunau Paulo e toe foi atu i Ierusalema.
Galuega 21–28 I Ierusalema, ua pue faapagotaina ai Paulo ma faaauau pea ona molimau atu ia Iesu Keriso. Ua toe faaali atu le Alii ia Paulo. Ua taupulepule le toatele o Iutaia e fasiotia Paulo. I Kaisaraia, ua ia molimau atu ai i luma o Filiki, Feso, ma Akeripa. Ua paulia le vaa o Paulo i lana malaga atu i Roma. Ua talai atu e Paulo le talalelei a o faapagotaina vaavaaia o ia i Roma.