Folasaga i le Tusi Muamua a Paulo i Tesalonia
Aisea e suesue ai lenei tusi?
O le Tusi Muamua i Tesalonia ua talitonu o le uluai tusi lea a Paulo na i ai ma atonu o le tusi aupito tuai lea i le Feagaiga Fou. O aoaoga a Paulo i le tusi lenei o loo taulai muamua lava i le Afio Mai Faalua o Iesu Keriso, o loo aofia ai faigata o le a feagai ma soo o Iesu Keriso a o lei toe foi mai o Ia (tagai 1 Tesalonia 3:3),o le Toetutu o Kerisiano i le Afio Mai Faalua (tagai 1 Tesalonia 4:13–14), ma le taimi o le Afio Mai Faalua o Keriso (tagai 1 Tesalonia 5:1–2). I lo latou suesueina o le tusi lenei, o le a aoao ai e le vasega e uiga i le Afio Mai Faalua ma maua ai le faamalosiauga e tumau faamaoni i le Alii.
O ai na tusiaina lenei tusi?
Na tusia e Paulo le 1 Tesalonia (tagai 1 Tesalonia 1:1; tagai foi 2:18).
O anafea ma o fea foi na tusia ai?
“Na tusia e Paulo ia tusi i Tesalonia mai Korinito i le taimi o lana malaga faalua faafaifeautalai,” pe tusa o le T.A. 50–51 (Taiala i Tusitusiga Paia, “Pauline Epistles,” scriptures.lds.org).
O ai na faatatau i ai le tusiaina o lenei tusi, ma pe aisea foi?
Na tusia e Paulo le 1 Tesalonia i tagata o le Ekalesia i Tesalonia. O Tesalonia o le aai aupito lauiloa ma tamaoaiga i Eleni anamua i le malo o Maketonia ona o vaaiga taua e lua: o le aai na fausia i luga o le faga aupito sili o le natura i le Sami Aseane, ma sa tu i le alatanu tele lea e fesootai ai Roma ma Asia.
I le taimi o le malaga lona lua faafaifeautalai, sa taitai ai e le agaga ia Paulo ma ana soa—o Sila, Timoteo, ma Luka—e malaga e sopoia le Sami Aseane i Maketonia (tagai Galuega 16:6–12). O i na amata ai le folafolaina atu o le talalelei i Europa. Ina ua uma ona folafola atu i Filipi (tagai Galuega 16:12–40), sa malaga Paulo ma Sila i Tesalonia.
Sa galulue Paulo ma Sila i Tesalonia, ae sa tutuliese faamalosi i laua e o ese mai le aai e taitai Iutaia (tagai Galuega 17:1–9). Mulimuli ane, sa lipoti atu e Timoteo ia Paulo e faapea sa tumau faamaoni le Au Paia i Tesalonia e ui i sauaga ma sa salalau la latou faatosinaga amiotonu (tagai Galuega 18:5; 1 Tesalonia 1:7–8; 3:6–8)
O tagata Tesalonia na liliu mai o nisi o uluai Europa na talia le talalelei, ma sa feagai i latou ma sauaga ona o lena. Sa tele foi a latou fesili e uiga i le Afio Mai Faalua. O le mea lea, i lana tusi i Tesalonia sa tusia ai e Paulo ia upu o faamalosiauga ma le malosi ma talanoaina ai a latou fesili e uiga i le Afio Mai Faalua o Iesu Keriso.
O a nisi o vaaiga iloga o lenei tusi?
O se tasi o autu taua a Paulo i lana Tusi Muamua i Tesalonia o le Afio Mai Faalua. Sa taulai atu o ia i le faatinoina o le amiotonu i mea e tutupu i le Afio Mai Faalua, aemaise o le Au Paia sa maliliu talu ai (tagai 1 Tesalonia 2:19; 3:13; 4:13–17; 5:1–10). E le pei o isi tusi a Paulo, 1 Tesalonia e le o i ai ni aoaiga tetele ae o loo ofo atu ai le faaviivii ma le faamalo mo le Au Paia i Tesalonia.
Otootoga
1 Tesalonia 1–3o loo faaali atu ai e Paulo le talisapaia tele mo le Au Paia i Tesalonia. Ua ia faamanatu mai i lana aufaitau le ituaiga galuega o ia faia ia i latou ma faaalia le olioli mo lo latou faamaoni. Ua ia fautuaina le Au Paia ia ola i le alofa o le tasi ma le isi ma tagata uma.
1 Tesalonia 4–5ua tau atu e Paulo i le Au Paia ia paia ma ia faapaiaina i latou lava. Ua ia faamatala atu a oo ina toe afio mai le Alii, o le Au Paia o e sa faamaoni i la latou molimau ia Keriso, o i latou ua oti ma i latou o loo ola pea, o le a tulai mai ma faafetaiai i le Alii. Ua faamatala atu e le Aposetolo i tagata o le Ekalesia ia sauniuni ma mataala mo le aso e afio mai ai Keriso.