Folasaga i le Tusi a Paulo ia Filemoni
Aisea e suesue ai lenei tusi?
O le Tusi ia Filemoni o loo i ai le fautuaga patino mai ia Paulo e tusa ai ma se tulaga o le pologa a Filemoni o Onesemo. A o suesue e le vasega lenei tusi, e mafai ona latou aoaoina faapea a auai tagata i le Ekalesia a Iesu Keriso, e avea i latou o uso ma tuafafine i le talalelei (tagai Filemoni 1:16). E mafai foi e le vasega ona lagonaina le taua o le tiute o soo o Iesu Keriso i le faaali atu o le alofa mutimutivale ma le loto faamagalo i isi (tagai Filemoni 1:16–17).
O ai na tusiaina lenei tusi?
Na tusia e Paulo le Tusi ia Filemoni (tagai Filemoni 1:1).
O anafea ma o fea foi na tusia ai?
O le Tusi ia Filemoni na saunia e Paulo i le taimi o le uluai faafalepuipuiina o le Aposetolo i Roma, pe tusa o le T.A. 60–62 (tagai Filemoni 1:1, 9; Taiala i Tusitusiga Paia, “Pauline Epistles,” scriptures.lds.org).
O ai na faatatau i ai le tusiaina o lenei tusi, ma pe aisea foi?
“O lenei tusi o se tusi patino e uiga ia Onesemo, o se pagota sa gaoia mea a lona matai, o Filemoni, ma sola ai i Roma” (Bible Dictionary, “Pauline Epistles”). O Filemoni atonu o se tagata liliu mai o Eleni ma sa nofo i Kolose (tagai Kolose 4:9). Sa ia faatagaina se faapotopotoga a le Ekalesia e potopoto i lona fale (tagai Filemoni 1:2, 5). Ina ua mavae ona sola ese, sa auai Onesemo i le Ekalesia ma avea ai o “se uso pele … i le Alii” (Filemoni 1:16; tagai Filemoni 1:10–12).
Na tusi atu Paulo ia Filemoni e fautuaina ai o ia ia toe talia Onesemo o se uso i le talalelei e aunoa ma ni faasalaga matuia ia e masani ona faatigaina ai ia pagota sosola (tagai Filemoni 1:17). Na ofo atu foi Paulo na te totogia mea na leiloloa na afua ai ona mafatia ia Filemoni (tagai Filemoni 1:18–19).
O a nisi o vaaiga iloga o lenei tusi?
O Filemoni o se tasi o tusi aupito sili ona puupuu o tusi patino a Paulo O se tusi na faatuatusi i se tagata patino e toatasi; ona o lea, e le o aofia ai se anotusi tele faaleaoaoga faavae. Ae ui o lea, o le olega a Paulo ia Filemoni e toe faalelei ma le pologa o Onesemo ua faapupula mai ai le ala e faatatau ai aoaoga faavae o le talalelei i le olaga i aso taitasi—i le tulaga lea, o le faaalia o la tatou sootaga ma Iesu Keriso e aumaia ai i tatou i se sootaga faaleaiga ma isi soo uma o Keriso ma faamamafaina ai le taua o le alofa mutimutivale ma le loto faamagalo.
Otootoga
Filemoni 1Ua faamalo atu Paulo ia Filemoni i lona alofa na ia faaalia i le Au Paia. Ua tau atu e Paulo ia Filemoni e faapea, o lana pologa na sola, o Onesemo, ua liua mai i le talalelei. Ua talosagaina e Paulo ia Filemoni e toe talia Onesemo o se uso i le Alii. Ua ofo atu Paulo e toe totogi atu ia Filemoni soo se tupe na leiloa na afua ai ona mafatia o ia ona o Onesemo.