Ina ua uma ona maua le tala i le maliu o Ioane le Papatiso, sa saili e Iesu se mea tuufua ae sa mulimuli atu i ai le motu o tagata. Sa mutimuti alofa o Ia ia te i latou, ma sa faamalolo i e mamai, ma fafagaina faavavega le silia ma le lima afe o i latou. O le po lena, sa savali atu ai Iesu i luga o le sami i Ona soo o e sa tauivi i le Sami o Kalilaia ma se afa malosi.
Ua sailia e Iesu se mea tuufua ona fafagaina lea o le silia ma le lima afe o tagata
Fai i le vasega e mafaufau i se taimi na latou oo ai i se faanoanoaga tele. Valaaulia i latou e tomanatu i se mea na latou faia e onosaia ai ma faatoilalo lo latou faanoanoaga.
O a ni auala eseese e taumafai ai tagata e onosaia ma faatoilalo le faanoanoa?
Valaaulia le vasega a o latou suesueina le Mataio 14 e vaavaai mo auala e mafai ona latou onosaia ai ma faatoilalo le faanoanoa, tofotofoga, ma faaletonu.
Otooto le Mataio 14:1–11i le faamatala atu, i le tauanau atu o lona faletua fou (Herotia), sa faafalepuipuiina ai ma le amioletonu e le Tupu o Herota ia Ioane le Papatiso. Ina ua uma ona saasaa le tama teine (Salome) a lona faletua i ona luma, sa folafola atu faalauaitele e Herota o le a ia tuuina atu “soo se mea e ole atu ai”(Mataio 14:7). Sa feutagai le tama teine ma lona tina ma talosagaina le ulu o Ioane le Papatiso, ma o le taunuuga, sa faatonuina e Herota ia vavaeese le ulu o Ioane.
Faamanatu i le vasega o Ioane le Papatiso o se uo ma e aiga ma Iesu Keriso ma sa filifilia e le Atua e avea ma perofeta o le a teuteuina le ala mo le Mesia.
Manatu faapea o oe o se uo mafana ia Ioane le Papatiso. Mata o le a lau tali atu i le faalogo atu i lona maliu le tonu?
Valaaulia se tasi e faitau leotele le Mataio 14:12–13, ma fai i le vasega e vaavaai poo le a le mea na faia e Iesu ina ua Ia faalogo i le maliu o Ioane.
O le a le mea na fai e Iesu ina ua faalogo i le maliu o Ioane? (Atonu e te manao e faamatala faapea “o se mea tuufua” e faasino i se nofoaga e paganoa [tagai Mareko 6:31, vaefaamatalaga a].)
O le a le mea na tupu ina ua taumafai Iesu ia na o ia?
O le a sou lagona pe afai e te faanoanoa ma manao ia na o oe, ae o la e sailia e isi lou taimi?
Valaaulia se tagata e faitau leotele le Mataio 14:14. Fai i le vasega e mulimuli ai, ma vaavaai pe na faapefea ona tali atu Iesu ina ua Ia silasila atu i le motu o tagata o mulimuli atu ia te Ia.
O a faataitaiga na faia e le Faaola mo i tatou e mulimuli ai pe a tatou oo i le faanoanoa? (E ono faaaoga e le vasega ni upu eseese, ae ia mautinoa ua latou faailoa mai le upumoni lenei: O le faaalia o le mutimuti alofa mo isi tusa lava pe o tatou feagai ma faanoanoaga, tatou te mulimuli ai i le faataitaiga a Iesu Keriso.
Aisea e mafai ai ona faigata ona faaali atu o le mutimuti alofa mo isi pe a tatou puapuagatia?
E mafai faapefea i le faaali atu o le mutimuti alofa mo isi ona fesoasoani ia i tatou pe a tatou puapuagatia foi i tatou lava?
O anafea na e oo ai pe oo ai foi se tasi e te iloa i le faanoanoaga tele ae faaalia pea lava le mutimuti alofa mo se tasi? Na faapefea ona fesoasoani le fesoasoani atu i se isi?
Valaaulia ni nai tamaiti aoga e feauaua’i i le faitauina leotele mai o le Mataio 14:15–21. Fai atu i le vasega e mulimuli i le faitauga, ma vaavaai pe na faapefea ona faaauau pea e Iesu ona faaalia le mutimuti alofa i le motu o tagata. (Manatua: O le vavega o loo tusia i le Mataio 14:15–21 o le a aoao auiliili i le lesona o i le Mareko 6:35–44.)
Na faapefea ona faaauau e Iesu ona faaali atu le mutimuti alofa mo tagata sa mulimuli atu ia te ia?
Ua savali Iesu i luga o le sami i le taimi o le afa
Ina ia fesoasoani i le vasega e mafaufau i tulaga latou te ono oo ai i le masalosalo ma le fefe a o latou mulimuli ia Iesu Keriso, fai i ni tagata se toalua e faitau leotele tulaga ia:
Ua lagona e se tamaitai talavou le faaletonu a o ia vaavaai atu i lona tina o mafatia i se gasegase ua ui. Ua amata ona fesilisili pe o silafia e le Tama Faalelagi le tiga o lona aiga. Sa matua manao o ia e talitonu i le Atua, ae ua amata ona lofituina o ia i ona masalosaloga.
E i ai se alii talavou faatoa auai i le Ekalesia. O le tele o ana uo tuai ua faitio mai i lana faaiuga e auai i le Ekalesia. Ua amata ona tau manatunatu pe tatau ona toaga pea ma avea o se tagata faamaoni o le Ekalesia.
O a isi auala e ono oo ai tagata i le masalosalo pe fefefe a o latou saili e mulimuli ia Iesu Keriso?
Fai i le vasega e vaavaai mo upumoni a o latou suesueina le vaega o totoe o le Mataio 14 ia e mafai ona fesoasoani ia i latou e faatoilalo le fefefe, masalosalo, ma le lotovaivai.
Otooto le Mataio 14:22 i le faamatala atu na faatonuina e le Faaola Ona soo e o i le vaa i le isi itu o le Sami o Kalilaia a o Ia auina ese atu le motu o tagata. Valaaulia se tagata e faitau leotele le Mataio 14:23. Fai i le vasega e mulimuli ai, ma vaavaai mo le mea na alu i ai Iesu ina ua uma ona Ia auina ese atu le motu o tagata. Valaaulia i latou e lipoti mai mea latou te mauaina.
Valaaulia se tagata e faitau leotele le Mataio 14:24–25, ma fai i le vasega e vaavaai mo le mea na tupu a o sopoia e soo le Sami o Kalilaia.
O le a le mea na tupu i le au soo a o latou sopoia le Sami o Kalilaia?
O le a le uiga o le “ua agi mai luma le matagi”? fuaiupu 24. (Sa agi mai i le itu faafeagai o lo latou taunuuga.)
E tusa ai ma le fuaiupu 23, o le afiafi ina ua na o Iesu i luga o le mauga a o sopoia e le au soo le Sami o Kalilaia. O le mamao e sopoia ai le sami pe tusa o le lima maila (e tusa ma le 8 kilomita) ma sa tatau ona mafai ona sopoia i le lua pe tolu itula pe a lelei le tau.
E tusa ai ma le fuaiupu 25, o le a le taimi na afio atu ai le Faaola i le au soo i luga o le sami? (O le leoleoga e fa i le po mai le 3:00 i le taeao seia oo i le 6:00 i le taeao.)
Pe tusa o le a le umi atonu na tauivi ai le au soo ma le matagi ia sopoia ai le sami? (Pe tusa o le 9 i le 12 itula.)
Valaaulia le vasega e faitau filemu le Mareko 6:47–48, ma vaavaai mo ni faamatalaga faaopoopo na saunia e Mareko e uiga i lenei mea. Fai atu i tagata e lipoti mai mea ua latou mauaina.
Pe na mafai ea e Iesu ona vave faasaoina le au soo mai la latou tauiviga? Mata o le a le faamoemoega o le tuu ai o le au soo e tauivi mo se taimi a o lei laveaiina i latou?
O le a le upumoni e mafai ona tatou aoao e uiga i a tatou lava tauiviga mai nei tala i le au soo sa taumafai e sopoia le sami? (E ono faaaoga e le vasega ni upu eseese ae e tatau ona faailoa mai le upumoni lenei: E ui atonu o le a le faasaoina i taimi uma i tatou e le Atua mai tauiviga, ae Na te silafia mea tatou te oo i ai ma o le a, maliu mai i Lona lava taimi e fesoasoani mai.
O le a se mea lelei e mafai ona maua i lo tatou tauivi mo se taimi nai lo le laveaiina vave loa lava mai o tatou tofotofoga e le Alii?
E mafai faapefea e le iloa o loo silafia e le Alii o tatou tauiviga ona faamalolosia ai lo tatou faatuatua ia te Ia tusa pe Na te le laveaiina vave mai ai loa lava i tatou.
Fai i le vasega e vaai faalemafaufau faapea o la e i luga o se vaa faagota i le vaeluapo, o tauivi ma se matagi ma galu malolosi mo le tele o itula, ona vaaia lea o se tasi o savali i luga o le vai.
Mata o le a se mea ete mafaufau i ai pe lagonaina pe afai o e i ai i lena tulaga?
Valaaulia se tagata e faitau leotele le Mataio 14:26–27, ma fai i le vasega e vaavaai pe na faapefea ona tali atu le au soo ina ua latou vaai ia Iesu.
Na faapefea ona tali atu le au soo ina ua latou vaai ia Iesu?
Na faapefea ona tali atu Iesu i lo latou fefefe?
Fai i se isi tagata e faitau leotele le Mataio 14:28, ma fai i le vasega e vaavaai pe o le a le mea na manao Peteru e fai ina ua ia faalogo atu i le leo o le Alii.
O le a le mea na manao Peteru e fai ina ua ia faalogo atu i le leo o le Alii?
Uu i luga se ata o Iesu i luma o le vasega, ma fai i le vasega e mafaufau faapea o i latou o Peteru i le vaa. Fai atu i ni tagata se toalua e feauauai i le faitauina leotele o le Mataio 14:29–30. A uma ona faitau fuaiupu taitasi, fai i le vasega pe mata o a mea o latou mafaufau i ai pe lagonaina foi pe ana fai o i latou o Peteru.
Aisea na amata magoto ai Peteru?
O o a mea e mafai ona faatusa i ai le matagi ma galu i lenei tala i o tatou olaga ia e mafai ona taitai ai i tatou e fefefe pe faaletonu?
O le a se mea e mafai ona tatou aoao mai le aafiaga o Peteru i le ala e aloese ai mai le faatoilaloina e lo tatou fefe ma masalosaloga? (E ono faaaoga e le vasega ni upu eseese, ae ia mautinoa e manino faapea afai tatou te taulai atu o tatou mata ia Iesu Keriso ma tumau lo tatou faatuatua ia te ia, o le a le faatoilaloina lava i tatou e le fefe ma le masalosalo.)
Valaaulia se tagata e faitau leotele le saunoaga lea a Peresitene Howard W. Hunter, ma fai i le vasega e faalogologo mo le matautia o le le tumau i lo tatou faatuatua i le Alii.
Ata
Peresitene Howard W. Hunter
“O lo’u talitonuga maumaututu e faapea, afai e mafai e i tatou taitoatasi, o aiga, nuu, ma malo, ona pei o Peteru, e taulai o tatou mata ia Iesu, e mafai foi e i tatou ona savavali manumalo, i luga o galu fafati o le le talitonu’ ma tumau ai ma le ‘le fefefe e ui i matagi malolosi o le masalosalo.’ Ae afai e aveese o tatou mata mai ia te ia o le e tatau ona tatou talitonu i ai, e pei ona faigofie tele ma ua matua tofotofoina tele le lalolagi e fai, afai tatou te vaavaai atu i le malosi ma le matamataita o na elemene matautia ma le faataumaoi o loo siomia ai i tatou nai lo ia o le e mafai ona fesoasoani ma laveai i tatou, ona tatou magoto ifo ai lea i se sami o feteenaiga ma faanoanoaga ma le le fiafia” (“The Beacon in the Harbor of Peace,” Ensign, Nov. 1992, 19).
E te manatu e mafai faapefea ona “taulai o tatou mata” ia Iesu Keriso e pei ona faia e Peteru i le taimi muamua?
O le a se taimi na e vaai ai i se faatuatua o se tagata ia Iesu Keriso o mafai ai e ia ona aloese mai le faatoilaloina e le fefe po o le masalosalo?
Molimau atu a tatou “taulai atu” ia Iesu Keriso ma tumau i lo tatou faatuatua ia te Ia, o le a tatou maua le faamoemoe ma le lototoa e faafetaiaia ai o tatou luitau. Valaaulia le vasega e mafaufau i suiga e mafai ona latou faia i o latou olaga e taulai atili atu ai ma faatumauina lo latou faatuatua ia Iesu Keriso ma faatuina se sini e faia na suiga.
Faamatala e faapei o Peteru, o nisi taimi e mafai ona tatou toilalo e faatumauina lo tatou faatuatua ia Iesu Keriso ma ono gauai atu ai i le fefe, faaletonu, ma le lotovaivai.
Ata
O Iesu o loo savali i luga o le vai
Faaali atu se ata o Iesu Keriso o savali i luga o le vai (tagai Tusi Ata o le Talalelei [2009], nu. 43; tagai foi LDS.org). Valaaulia se tagata e faitau leotele le Mataio 14:30–32
E tusa ai ma lefuaiupu 30, o le a le mea na faia e Peteru ina ua ia iloa ua magoto?
E mafai ona tatou aoao mai lenei tala e uiga i le mea o le a faia e le Alii pe afai tatou te sailia Lana fesoasoani pe a tuuitiitia lo tatou faatuatua? E ono faaaoga e le vasega ni upu eseese, ae e tatau ona latou faailoa mai le mataupu faavae lenei: Afai tatou te sailia le fesoasoani a le Atua pe a tuuitiitia lo tatou faatuatua, e mafai e Ia ona sii ae i tatou mai o tatou atuatuvalega ma faaletonu.
E faapefea ona sii ae i tatou e le Atua mai o tatou atuatuvalega ma faaletonu?
Valaaulia se tagata e faitau leotele le Mataio 14:33, ma fai i le vasega e vaavaai pe na faapefea e le au soo i le vaa ona tali atu ina ua uma ona tulioso atu Iesu ma Peteru i totonu o le vaa.
Otooto le Mataio 14:33–36 i le faamatala atu ina ua uma lenei mea, sa faaauau e Iesu ma Ona soo la latou malaga ma sa taunuu i apitaogalu tupito o Kalilaia. Ina ua iloa e tagata ua i ai Iesu iina, sa latou avatu ia te ia o tagata sa mafatia i faama’i. E toatele sa faamalolo i le na ona pa’i atu i tuupao o Lona ofu.
Faaiu i le uunaia o le vasega e faaaoga mea sa latou aoaoina i lenei lesona e ala i le faatinoina o soo se uunaiga sa latou mauaina.
Tala ma Faamatalaga o Talaaga
Mataio 14:25. “Ua maliu atu Iesu ia te i latou i le leoleoga e fa o le po”
A oo ina tatou faamoemoe o le a vave ona aumai e le Alii ia i tatou ni vaifofo o o tatou faafitauli, ua tatou le vaai i le faamoemoega sili atu i le faatuatuai mai o Lana fesoasoani. Na saunoa Elder D. Todd Christofferson o le Korama a Aposetolo e Toasefululua e uiga i se tofotofoga patino na fetaiai ma ia lea na lei i ai se vaifofo vave mai le Alii:
“E ui ina sa ou pagatia i lena taimi, ae a ou toe tepa i tua i le taimi lenei, ou te faafetai ona sa leai se fofo vave i lo‘u faafitauli. O le mea moni i le faamalosia o au e liliu atu i le Atua mo se fesoasoani e toetoe lava o aso uma i se vaitau faaumiumi o tausaga, na ou aoao moni ai i le auala e tatalo ma maua ai tali i tatalo ma ou aoao ai i se ala moni lava e maua ai le faatuatua i le Atua. Sa ou iloaina lou Faaola ma lou Tama Faalelagi i se ala ma i se tikeri lea semanu e le mafai ona tupu i se isi ala. … Sa ou aoao e faalagolago i le Alii ma lo’u loto atoa. Sa ou aoao e savali faatasi ma Ia i lea aso ma lea aso” (“Give Us This Day Our Daily Bread” [Church Educational System fireside, Jan. 9, 2011], LDS.org).
Na saunoa Elder Bruce R. McConkie o le Korama a Aposetolo e Toasefululua i le mea lenei e uiga i le silafia e le Faaola o le faigata i Ona soo ona sopoia le Sami o Kalilaia i le afa:
Mai le tumutumu mauga sa Ia tatalo ai … , sa vaaia e Iesu le mafatiaga ma tauiviga a ana uo pele a o latou saili atu mo le saogalemu o le apitaogalu i sisifo o le vaituloto o Kalilaia. … O Lona silafia o lo latou malaia atonu na oo mai i le mana o le Agaga nai lo mata faalenatura, aua sa silia ma le fa—atonu pe lima pe ono—maila le mamao sa latou i ai. …
“ … Pe valu pe sefulu itula sa latou malaga ai i le itiiti ifo ma le fa maila mai le apitaogalu.
“Sa matautia ma ogaoga lo latou tulaga. E oo lava i tamaloloa malolosi e le mafai ona teena ma le le mautinoa galu soua ma le malosi taavilivili o se afa i le sami. O lea ua oo i le leoleoga lona fa o le po, o nisi taimi e i le va o le tolu ma le ono i le taeao. Sa tuua e Iesu i latou e tauivi ma galulue seia uma lo latou malosi. O lea ua sau o ia e laveai”(The Mortal Messiah, 4 vols. [1979–81], 2:358–59).