Sa tau atu e nisi o tagata o le Ekalesia mai Iutaia i tagata o Nuuese ua liliu mai i Anetioka e tatau ona peritomeina i latou ina ia faasaoina ai. Sa aveina e Paulo ma Panapa le mataupu i le Au Aposetolo i Ierusalema. I le taimi o se mea sa taua o le fonotele i Ierusalema T.A. 49–50), Sa molimau atu Peteru o le a faasaoina e le Atua Iutaia ma Nuuese faamaoni, e le afaina pe na peritomeina. Na auina atu e Aposetolo ia tusi i tagata o le Ekalesia e faamalamalama i ai e faapea e le faitaulia le peritomeina mo le faaolataga. Sa filifili e Paulo ia Sila e fai ma ana soa faifeautalai ma sa tuuvaa atu mo lana misiona lona lua.
E ala i le fautuaga musuia, na tonu ai ia Peteru ma isi Aposetolo e le toe manaomia le peritomeinaina e le Alii.
Valaaulia le vasega e fai se lisi i le laupapa o faaiuga taua na tatau ona latou faia nei ma i le lumanai.
O ai e te talanoa i ai pe a e manaomia e fai ni faaiuga taua? Aisea e te talanoa ai ia i latou?
Aisea e atamai ai le sailia o le fesoasoani a le Atua a o lei faia ni faaiuga?
Valaaulia le vasega e vaavaai mo upumoni a o latou suesueina le Galuega 15ia e mafai ona taialaina ai i latou pe a latou saili ia iloa le finagalo o le Atua mo i latou.
Faamatala a o asiasi atu Paulo ma Panapa i le Au Paia i Anetioka, e i ai ni tagata Iutaia mai Iutaia sa faaliliu i le faa-Kerisiano sa latou fai atu e i ai mea e tatau ona faia e tagata liliu mai o Nuuese ina ia faasaoina ai.
Valaaulia se tamaitiiti aoga e faitau leotele le Galuega 15:1. Fai i le vasega e mulimuli ai, ma vaavaai po o a mea na fai mai ai nei tagata mai Iutaia e tatau ona faia e tagata liliu mai i Nuuese ina ia faasaoina ai.
O le a le mea na fai mai e nei tagata e manaomia ona faia e tagata o Nuuese e liliu mai ina ia faasaoina ai?
Faamatala o se vaega o feagaiga na faia ma Aperaamo, sa poloaiina ai e le Atua e faapea o tamatane uma o e osia le feagaiga ma Ia e tatau ona peritomeina. “Peritomeina sa faatinoina e ala i le tipi ese o le ‘pau o le tino’ o tama tane iti ma tagata matutua foi” (Taiala i Tusitusiga Paia, “Peritomeina,” scriptures.lds.org). O le peritomeina sa faatuina e fai ma faailoga po o se faamanatu o le feagaiga na osia e tagata ma le Atua.
Valaaulia se tamaitiiti aoga e faitau leotele le Galuega 15:2–3. Fai i le vasega e mulimuli ai, ma vaavaai po o le a le mea na tupu ina ua faalogo ia Paulo ma Panapa i nei tagata o fai mai e tatau ona peritomeina ia tagata o Nuuese e liliu mai.
E tusa ai ma le fuaiupu 2, o le a le mea na tupu ina ua fai mai nei tagata o tagata liliu mai i le Ekalesia e tatau ona peritomeina?
O le a le mea na tonu i tagata o le Ekalesia i Anetioka e tatau ona fai?
Valaaulia se tamaitiiti aoga e faitau leotele le Galuega 15:4–6. Fai i le vasega e mulimuli i le faitauga, ma vaavaai mo mea na tutupu ina ua taunuu ia Paulo ma isi i Ierusalema.
Ina ua uma ona faamatala atu e Paulo ma Panapa o la aafaiga i le faasoa atu o le talalelei i Nuuese, o le a le mea na talitonu nisi o Faresaio na liliu mai e tatau ona faia e tagata o Nuuese ua liliu mai ina ia faasaoina ai?
E tusa ai ma le fuaiupu 6, o le a le mea na potopoto ia le Au Aposetolo ma toeaina e fai?
Tusi fesili nei i le laupapa, pe saunia mo tamaiti i se tufaaga:
Tusi lesona a le Faiaoga Seminare o le Feagaiga Fou
O ai na tulai e tautala?
O le a sou manatu o le a le uiga o le tala a Peteru e faapea “ua na le faaeseeseina foi o i tatou [Iutaia ua liliu mai] ma i latou [Nuuese ua liliu mai]”?
O a fasifuaitau i fuaiupu 8, 9, ma le 11 ua tau mai ai e faapea o tagata o Nuuese ua liliu mai e le manaomia ona peritomeina ina ia faasaoina ai?
Vaevae le vasega i paga. Valaaulia le vasega e faitau ma a latou paga le Galuega 15:7–11, ma vaavaai mo tali i fesili o loo i le lisi. A o lei faitauina, faamatala o le fasifuaitau “ua tele le fefinauai” i le fuaiupu 7o lona uiga na matuai faia felafolafoaiga malolosi a le Au Aposetolo i le mataupu o le peritomeina.
A uma ua lava se taimi, valaaulia ni nai tagata e lipoti mai a latou tali i le vasega. A uma ona tali mai le vasega i le fesili muamua, faamanatu i ai o Peteru o le Aposetolo sinia i le lalolagi sa iai, o le mea lea, sa faatagaina ai ona saunoa mo le Alii.
O le a se auala e tasi e mafai ai ona tatou iloa le finagalo o le Alii? (E tatau i le vasega ona faailoa mai se upumoni e pei o lea: E mafai ona tatou iloa le finagalo o le Alii e ala i Ana perofeta soifua ma aposetolo. Tusi lenei upumoni i luga o le laupapa.)
O a ni auala e fesoasoani ai Aposetolo soifua ia tatou iloa faaaliga latou te maua?
Valaaulia se tamaitiiti aoga e faitau leotele le Galuega 15:12–15. Fai i le vasega e mulimuli ai, ma vaavaai pe na faapefea ona tali atu le motu o tagata i le tautinoga a Peteru e faapea e le manaomia le peritomeina mo le faaolataga.
Na faapefea ona tali atu le motu o tagata i le tautinoga a Peteru?
O le a le mea na faia e Paulo ma Panapa e faamautu ai le tautinoga a Peteru e faapea e lei manaomia ona peritomeina tagata o Nuuese?
E tusa ai ma le fuaiupu 15, o upu a ai na fai mai Iakopo ua ogatusa ma le tautinoga a (Simona)?
Atonu e te manao e faamatala atu o Peteru sa pulefaamalumalu i le fonotele, ma sa foliga mai sa i ai foi se matafaioi mautu a Iakopo iina. O Iakopo e tina faatasi ma Iesu Keriso ma o le uluai epikopo o le Ekalesia i Ierusalema. Aotele le Galuega 15:16–18 i le faamatala atu e faapea na sii mai e Iakopo le Amosa 9:11–12 e faaali atu ai o le tautinoga a Peteru e ogatusa ma upu a perofeta, e pei ona tusia i tusi paia.
E faavae i mea na aoao atu e Iakopo, o le a se isi auala e mafai ai ona tatou iloa le finagalo o le Alii? (E ono faaaoga e le vasega ni upu eseese ae e tatau ona faailoa mai se upumoni e pei o lenei: E mafai ona tatou iloa le finagalo o le Alii e ala i le suesue o tusitusiga paia. Tusi le upumoni lenei i luga o le laupapa.)
Valaaulia se tamaitiiti aoga e faitau leotele le Galuega 15:19–20. Fai i le vasega e mulimuli ai, ma vaavaai mo mea sa fautuaina e Iakopo ia taitai o le Ekalesia e fai. Faamatala o le upu tusi i le fuaiupu 19 o lona uiga o se fuafuaga po o se fautuaga (tagai Bruce R. McConkie, Doctrinal New Testament Commentary, 3 vols. [1965–73], 2:143).
O le a le mea na fautuaina e Iakopo ia taitai o le Ekalesia e fai mo Nuuese? (Sa fautuaina e Iakopo ia taitai o le Ekalesia e “soia le faalavelave ia i latou” [fuaiupu 19], po o le aua le faafaigataina le ola i le talalelei o tagata o Nuuese, ma aua nei faatonuina le faia o sauniga o le tulafono a Mose a o lei auai i le Ekalesia. O le tauina atu o lenei mea, e lagolagoina ai e Iakopo le faaiuga na tuuina mai muamua e Peteru.)
E tusa ai ma le fuaiupu 20, o a vaega o le tulafono a Mose na manatu Iakopo e tatau pea e tagata o Nuuese e liliu mai ona tausisia? (Faasa ona faia o agasala feusuai, ’ai o aano o manu e ofo atu ai taulaga i tupua, ma le ’ai ma le toto.)
Valaaulia ni nai tamaiti aoga e feauaua’i i le faitauina leotele mai o le Galuega 15:22–27. Fai atu i le vasega e mulimuli i le faitauga, ma vaavaai mo le faaiuga a le aufono.
O le a le mea na tonu i Aposetolo e fai? (Auina atu se tusi i tagata o le Ekalesia e tau atu ai e le manaomia le peritomeina mo le faaolataga.)
Aisea e te manatu ai ua tonu i Aposetolo e auina atu ia taitai o le Ekalesia e pei o Paulo ma Sila e tauaaoina atu le tusi? (Atonu e eseese tali a le vasega, ae o se mafuaaga e tasi o le faamaonia ai lea o le tautinoga na aumaia i le faaiuga soofaatasi a le Au Aposetolo. Ta’u i ai o le Au Peresitene Sili ma le Korama a Aposetolo e Toasefululua e mulimuli i faiga lava nei e tasi i o tatou aso e tuuina mai ai le taitaiga musuia i tagata o le Ekalesia.
O le a le upumoni e mafai ona tatou aoao mai i lenei tala e uiga i le auala e maua ai e taitai o le Ekalesia ia musumusuga e uiga i faafitauli faigata? (A maea ona tali mai tamaiti aoga, tusi le upumoni lenei i le laupapa: O le fefautuaai faatasi ma le sailia o faaaliga mai le Atua, e maua ai e taitai o le Ekalesia musumusuga e uiga i faafitauli faigata.
Ina ia fesoasoani i tamaiti aoga ia malamalama pe faapefea ona fesootai lenei upumoni ma le Ekalesia i aso nei, valaaulia se tamaitiiti aoga e faitau leotele le saunoaga lenei a Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
“O mamanu lava ia e tasi o loo mulimulitaia i le Ekalesia toefuataiina a Iesu Keriso. Atonu e faasilasila mai pe faaliliu e le Peresitene o le Ekalesia ni aoaoga faavae e tusa ai ma faaaliga e oo atu ia te ia (tagai, mo se faataitaiga, i le, MF&F 138). O faaliliuga faaleaoaoga faavae atonu e oo mai foi e ala i le aufono tuufaatasi a le Au Peresitene Sili ma le Korama a Aposetolo e Toasefululua (tagai, mo se faataitaiga, i le, Tautinoga Aloaia 2). O talanoaga a le aufono e tele lava ina aofia ai tusitusiga paia faavae, o aoaoga a taitai o le Ekalesia, ma faiga na fai muamua. Ae i le faaiuga, e pei ona sa i ai i le Ekalesia i le Feagaiga Fou, o le faamoemoega e le faapea ua na o se maliliega i sui o le aufono ae o faaaliga mai le Atua. O se faiga e aofia ai le faautautaga ma le faatuatua mo le mauaina o le mafaufau ma le finagalo o le Alii” (“O Le Mataupu a Keriso,” Ensign po o le Liahona, Me 2012, 88).
Aisea e te manatu ai e taua mo taitai o le Ekalesia ona fefautuaai faatasi soo pe a sailia faaaliga mai le Atua?
Valaaulia se tamaitiiti aoga e faitau leotele le Galuega 15:28–29. Fai i le vasega e mulimuli ai, ma vaavaai mo mea na tusia e Aposetolo ma toeaina i le tusi i tagata o le Ekalesia.
O a mea na tusia e Aposetolo ma toeaina i le tusi na auina atu i tagata o le Ekalesia?
I le fuaiupu 28, o le a le uiga o le fasifuaitau “ia le faaee atu se tasi avega ia te outou, na o nei mea e tatau”? (Sa le tau manaomia e tagata ona usitaia nisi mea na manaomia mai e tagata ae le o le Atua.)
E tusa ai ma le fuaiupu 28, na faapefea ona iloa e Aposetolo le finagalo o le Atua e tusa ai ma mea na manaonia mo tagata o Nuuese ua liliu mai?
Tau i ai na musuia e le Agaga Paia ia Aposetolo a o latou fefautuaai faatasi. Sa Ia aumaia foi se molimau faamautu ua sao la latou faaiuga.
E faavae i le auala na iloa ai e taitai o le Ekalesia le finagalo o le Alii e pei ona tusia i le fuaiupu 28,e mafai faapefea ona tatou iloa le finagalo o le Alii? (E ono faaaoga e le vasega ni upu eseese, ae ia mautinoa latou te malamalama e faapea e mafai ona tatou iloa le finagalo o le Alii e ala i musumusuga a le Agaga Paia. Tusi le upumoni lenei i luga o le laupapa.)
Valaaulia le vasega e vaavaai mo upumoni o i le laupapa.
E mafai faapefea ona fesoasoani nei upumoni pe a tatou mananao e faia se faaiuga taua?
E tusa ai ma nei upumoni, o le a le mea e tatau ona tatou faia ina ia iloa ai le finagalo o le Alii?
O anafea na e lagonaina ai ua e iloa le finagalo o le Alii a o e mulimuli i nei upumoni?
Fautuaina le vasega e suesue i upu a perofeta o ona po nei ma tusitusiga paia. Faamatala a o latou faia, e mafai ona latou iloa le finagalo o le Alii e ala i le Agaga Paia pe a faia ni faaiuga taua.
Na auina atu e Paulo ma isi le tusi a le Au Aposetolo i tagata o le ekalesia i Anetioka.
Aotele le Galuega 15:30–41 i le faamatala atu e toatele taitai o le Ekalesia na auina atu le tusi a Aposetolo i tagata o le Ekalesia i Anetioka. Ina ua uma le talaiga i Anetioka, sa fesili Paulo ia Panapa la te o e asiasi i nofoaga ia sa la folafola atu ai le talalelei. Sa manao Panapa e latou te o ma Mareko, ae sa musu ia Paulo. Ina ua mavae se finauga i le va o taitai e toalua o le Ekalesia, sa tonu ia Panapa e o ma Mareko, o lea na filifilia ai e Paulo ia Sila e fai ma ana soa faamisiona ma malaga atu ai i lana misiona lona lua. Faamatala e le o se agasala le eseese o manatu. Peitai, nai lo le fefinauai, e ao ona tatou saili faatasi e sue ni vaifofo i o tatou feeseeseaiga. (Ua tatou aoao i le 2 Timoteo 4:11e faapea o le faafitauli i le va o Paulo ma Mareko sa foia mulimuli ane.)
Faaiu i le molimau atu i upumoni na faailoa mai e le vasega i le Galuega 15.
Tala ma Faamatalaga o Talaaga
Galuega 15:6. “Na faapotopoto ia aposetolo ma toeaina e filifili i lenei mataupu”
Na faamalamalama mai e Elder D. Todd Christofferson o le Korama a Aposetolo e Toasefululua le ala e faaalia mai ai e le Faaola Lona finagalo i Ana perofeta:
“E faapefea ona faaali atu e le Faaola Lona finagalo ma le mataupu faavae i perofeta, tagatavaai, ma talifaaaliga? E mafai ona Ia galue e ala i avefeau po o Ia lava. E mafai ona Ia fetalai mai i Lona lava siufofoga po o le siufofoga o le Agaga Paia—o se fesootaiga a le Agaga i le agaga lea e mafai ona faailoa i upu po o lagona lea e fesootai ai malamalamaaga ia e faigata ona faamatalaina i upu (vaai 1 Nifae 17:45; MF&F 9:8). E mafai ona Ia tuusao atu o Ia lava i Ana auauna taitoatasi pe galue i aufono (tagai 3 Nifae 27:1–8)” (“O Le Mataupu a Keriso,” Ensign po o le Liahona, Me 2012, 87).
Galuega 15:6–11. Na tautino atu e Peteru le finagalo o le Alii ina ua uma ona fefautuaai faatasi le Au Aposetolo
Na aoao mai Peresitene Gordon B. Hinckley e uiga i faaiuga a le Au Peresitene Sili ma le Korama a Aposetolo e Toasefululua:
“E leai se tonu mai filifiliga a le Au Peresitene Sili ma le Toasefululua e faia e aunoa ma le autasi o le manatu o i latou uma. I le amataga o le talanoaina o se mataupu, atonu e i ai se eseesega o taofi. O se mea mautinoa lena mea. O nei tamalii e o mai mai talaaga eseese. O i latou o ni tamalii e mafaufau mo i latou lava. Peitai a o lei faia se tonu faaiu, e i ai le autasi i o latou finagalo ma siufofoga.
“Ua faamoemoeina lena mea pe afai tatou te mulimulitai i le afioga faaalia a le Alii. Ou te toe sii mai le faaaliga e faapea:
“‘O tonu a nei korama, po o se tasi o ia [korama], e tatau ona faia ma le amiotonu uma, i le paia, ma le maualalo o le loto, agamalu, ma le faapalepale, ma i le faatuatua, ma le loto mama, ma le poto, faautauta, onosai, amioatua, ma le agalelei ma le alofa faauso;
“‘Auā o le folafolaga e faapea, afai e faateleina ia mea ia te i latou o le a lē aunoa i latou ona fua tele mai i le malamalama o le Alii’ (MF&F 107:30–31).
“Ou te faaopoopo atu se molimau, i le luasefulu tausaga talu ona ou auauna o se tasi o le Aufono a le Toasefululua ma faapea ma le toe itiiti ona atoa o le sefulutolu o tausaga o ou auauna i le Au Peresitene Sili, sa lei i ai lava se mataupu taua na talanoaina sa lei faia ai lenei auala. Ua ou vaai i le eseese o manatu na tuuina mai i nei soalaupulega. Mai i lenei ala o le faaalia e nei uso o o latou lava mafaufauga na ala mai ai le iloiloga ma le filiga o manatu ma mataupu. Peitai ou te lei vaai lava i se feeseeseaiga tele po o se feitagai o le tasi i le isi o ou Uso nei. Ae ua ou molimauina se mea matagofie ma ofoofogia—o le aumai faatasi lea, i lalo o le taitaiga a le Agaga Paia ma lalo o le mana o faaaliga, o taofi eseese seia oo lava ina i ai le autasi ma le maliliega atoatoa. Ona faatoa faia lea o se mea. Ou te molimau atu, o lena mea, o se faamaoniga a le agaga o faaaliga o faaalia mai pea lava pea i le taitaiga o le galuega lenei a le Alii” (“O Le Atua o Loo i le Ao o Lenei Ekalesia,” Liahona, Iulai 1994, 72).
“Talu ai o le tulafono a Mose e faasa ai le ’ai o le toto (tagai Levitiko3:17; 17:10–14; 19:26), o le fautuaga a Iakopo ia taumamao mai ‘mea e titina, ma le toto’ atonu o lona uiga ia aloese mai le avatu o le faatiga i tagata Iutaia ma faalavelaveina ai le galuega faafaifeautalai ia i latou” (Tusi lesona a le Tagata Aoga o le Feagaiga Fou [Church Educational System manual, 2014], 309).