Sa uunaia e Peteru le Au Paia ia taumafai ia avea e pei o Iesu Keriso. Sa faamautu atu e Peteru ia i latou, o lenei tuputupu a’e faaleagaga e mafai ona fesoasoani ia i latou “ia faamauina lo [latou] valaauina ma lo [latou] filifilia” (2 Peteru 1:10). Sa saunoa foi Peteru e uiga i lona aafiaga i luga o le Mauga o Liua ma faamamafa mai o tusitusiga paia e musuiaina e le Atua.
Ua aoao mai e Peteru le auala e maua ai le natura paia o Iesu Keriso
Ae le’i amataina le vasega, tusi le faamatalaga lenei i le laupapa (“O Le Loto i Totonu,” Ensign, Me 1987, 68):
“O le tatou galuega, ia avea i tatou lava ma tagata sili ona lelei” (Peresitene Thomas S. Monson).
Vaevae tamaiti aoga i ni paga. Valaaulia i latou e faitau le faamatalaga o loo i luga o le laupapa ma talanoa ma a latou paga i fesili nei:
O le a sou manatu i le uiga o le saunoaga a Peresitene Monson o le avea o “i tatou lava ma tagata sili ona lelei”?
Aisea e te manatu e taua ai le avea o i tatou lava ma tagata sili ona lelei?
O le a le mea e mafai ona taofia i tatou mai le avea o i tatou lava ma tagata sili ona lelei?
Valaaulia tamaiti aoga e vaavaai mo se upumoni a’o latou suesue i le 2 Peteru 1, e mafai ona fesoasoani latou te iloa ai le auala e mafai ona avea ai i latou lava ma tagata sili ona lelei.
Aotele le 2 Peteru 1:1–2 i le faamalamalama atu, sa tusi atu Peteru i tagata o le Ekalesia o e na maua le faatuatua ia Iesu Keriso.
Valaaulia se tamaitiiti aoga e faitau leotele le 2 Peteru 1:3–4. Fai atu i le vasega e mulimuli i le faitauga, ma vaavaai mo le mea na aoao atu e Peteru e fesoasoani ai i le Au Paia ia tumau faamaoni i a latou molimau i le Faaola.
E tusa ai ma nei fuaiupu, o le a le mea na aoao atu e Peteru i le Au Paia?
O le a le uiga o le “ia tofusia faatasi ai outou i le amio Atua”? (fuaiupu 4).
Valaaulia tamaiti aoga e faitau filemu le 2 Peteru 1:5–7, ma vaavaai mo uiga auaumama o Iesu Keriso lea sa valaaulia e Peteru le Au Paia e atiina a’e. Fai atu i tamaiti aoga e lisi i luga o le laupapa ia uiga auaumama latou te maua. Mafaufau e valaaulia tamaiti aoga e su’e i se lomifefiloi ia uiga o soo se tasi o nei uiga auaumama latou te fia malamalama atili i ai.
Valaaulia tamaiti aoga e mafaufau i nei faataitaiga o se taimi na faaalia ai e le Faaola se tasi o nei uiga auaumama paia. Fai atu i nisi o tagata o le vasega e lipoti mai o latou manatu i le vasega.
Tusi le mataupu faavae e le’i mae’a lenei i luga o le laupapa: A’o tatou atiina a’e uiga auaumama paia i totonu o i tatou lava, e mafai ona tatou …
Fai atu i se tamaitiiti aoga e faitau leotele le 2 Peteru 1:8–9. Valaaulia le vasega e mulimuli i le faitauga, ma vaavaai mo se faamanuiaga e mafai ona tatou maua a’o tatou atiina a’e ia uiga auaumama paia o le Faaola.
O le a se faamanuiaga e mafai ona tatou maua a’o tatou atiina a’e uiga auaumama paia? (A uma ona tali mai tamaiti aoga, faauma le faamatalaga o loo i luga o le laupapa ina ia faitauina faapenei: A’o tatou atiina a’e uiga auaumama paia i totonu o i tatou lava, e mafai ona tatou iloa ai Iesu Keriso.)
Aisea e te manatu ai, o le atiina a’e o uiga auaumama paia e fesoasoani tatou te iloa ai Iesu Keriso?
Valaaulia se tamaitiiti aoga e faitau leotele le 2 Peteru 1:10–11. Fai atu i le vasega e mulimuli i le faitauga, ma vaavaai mo se isi faamanuiaga e mafai ona oo mai ia i latou o e filiga i le atiina a’e o uiga auaumama paia.
O le a le faamanuiaga e mafai ona oo mai ia i latou o e filiga i le atiina a’e o uiga auaumama paia o Iesu Keriso? (Faamalamalama atu o le fuaitau “ia faamauina lo outou valaauina ma lo outou filifilia” [fuaiupu 10] o lona uiga ia maua i lenei olaga le faamautinoaga a le Atua, o le a e maua le ola e faavavau. Sa faatatau atu foi Peteru i lenei mea o “le upu o le valoaga e sili lona mausali” [2 Peteru 1:19. Tagai foi MF&F 131:5].)
O le a le mataupu faavae e mafai ona tatou aoao mai i nei fuaiupu e uiga i le pogai e tatau ona tatou filiga ai i le atiina a’e o o tatou faamoemoega paia? (E tatau ona faailoa mai e tamaiti aoga le mataupu faavae lenei: Afai tatou te filiga i le atiina a’e o o tatou gafatia paia a’o i ai i lenei olaga, e mafai ona tatou maua le faamautinoaga a le Atua o le ola e faavavau. Tusi lenei mataupu faavae i luga o le laupapa.)
Mafaufau e faasoa atu lau molimau e faapea, o le atiina a’e o uiga auaumama paia e fesoasoani tatou te iloa ai Iesu Keriso ma saunia ai i tatou ia maua le ola e faavavau.
Valaaulia tamaiti aoga e tusi i a latou api o le vasega po o api talaaga mo le suesueina o tusitusiga paia se tasi o uiga auaumama paia atonu o le a latou atiina a’e. Fai atu ia i latou e tusi se faatinoga faapitoa e mafai ona latou faia e atiina a’e ai lena uiga auaumama.
Ua faasoa mai e Peteru lana molimau ia Iesu Keriso ma aoao mai e uiga i tusitusiga paia
Mafaufau e tusi i luga o le laupapa tausaga o nisi o Aposetolo aupito matutua o loo i ai i le taimi nei. Faitau leotele le saunoaga lenei a Elder M. Russell Ballard o le Korama a Aposetolo e Toasefululua:
Ata
Elder M. Russell Ballard
“Fai mai isi ua matou matutua tele. Ia, e sa’o o le toaiva o Aposetolo ua silia i le 80 tausaga o le matutua! O a’u ua 85” (“Be Still, and Know That I Am God” [faigalotu a le Ofisa o Aoga a le Ekalesia, Me 4, 2014], broadcasts.lds.org).
Aisea e te manatu e faitio ai nisi o tagata i le matutua o nisi o perofeta ma aposetolo?
E faapefea ona e tali atu i le faitioga e faapea, o perofeta ma aposetolo o aso nei ua matutua tele e le toe aoga?
Valaaulia tamaiti aoga, a’o faaauau ona latou suesue i le 2 Peteru 1 ia vaavaai mo se upumoni e uiga i perofeta ma aposetolo e sili atu le taua nai lo o latou tausaga.
Faamalamalama atu, i le 2 Peteru 1:12–19 sa faasoa mai ai e Peteru lana molimau vaaitino ia Iesu Keriso.
Valaaulia se tamaitiiti aoga e faitau leotele le 2 Peteru 1:20–21, e aofia ai le Faaliliuga a Iosefa Samita o le 2 Peteru 1:20 o loo maua i le fuaiupu 20, vaefaamatalaga a. Fai atu i le vasega e mulimuli i le faitauga, ma vaavaai mo le mea na aoao mai e Peteru e uiga i le matafaioi a “tagata paia o le Atua,” o lona uiga i le tulaga lenei o perofeta.
O le a le mea na aoao mai e Peteru e uiga i le matafaioi o perofeta? (E tatau ona faailoa mai e tamaiti aoga le upumoni lenei: E maua mai e perofeta ia tusitusiga paia e ala i le Agaga Paia. Tusi le upumoni lenei i luga o le laupapa.)
Ina ia fesoasoani i le vasega ia malamalama po o le a le tusitusiga paia, valaaulia se tamaitiiti aoga e faitau leotele le faamatalaga lenei:
“[O tusitusiga paia o] upu, e tusia ma tautalagia, e tagata paia o le Atua pe a uunaia ai e le Agaga Paia” (Taiala i Tusitusiga Paia, “Scriptures,” scriptures.lds.org; tagai foi MF&F 68:2–4). O nisi o tusitusiga paia ua tuufaatasia ma taliaina ua moni. O se tuufaatasiga lea o “ tusi paia ua lauiloa ma ua faia i le pule tatau. I Le Ekalesia a Iesu Keriso o le Au Paia o Aso e Gata Ai, o tusi ua tuufaatasia ma talia o tusitusiga paia ua ta’ua o tusitusiga faavae ma e aofia ai le Feagaiga Tuai ma le Feagaiga Fou, le Tusi a Mamona, o le Mataupu Faavae ma Feagaiga, ma le Penina Tau Tele” (Taiala i Tusitusiga Paia, “Canon,” scriptures.lds.org).
Valaaulia se tamaitiiti aoga e faitau leotele le saunoaga lenei a Elder Dallin H. Oaks o le Korama a Aposetolo e Toasefululua. Fai atu i le vasega e faalogo mo lana molimau e faapea, e faaauau pea ona maua e perofeta tusitusiga paia i aso nei.
Ata
Elder Dallin H. Oaks
“[O perofeta] o le auala lea ua fetalai mai ai le Atua i Ana fanau e ala i tusitusiga paia i taimi ua mavae. Ma i lenei lava laina o loo Ia fetalai mai ai i le taimi nei e ala mai i aoaoga ma fautuaga a perofeta soifua ma aposetolo ma isi lava taitai musuia” (“Two Lines of Communication,” Ensign po o le Liahona, Nov. 2010, 84).
Aisea e te manatu e taua ai le iloa e faaaoga e le Atua lenei mamanu e maua ai tusitusiga paia mo Ana fanau?
E mafai faapefea e le malamalama i lenei mamanu ona tuu atu ia te oe le talitonu sili atu i upu tautalagia ma tusitusia a perofeta anamua ma aso nei?
Faitau leotele atu ia fesili nei, ma valaaulia tamaiti aoga e tusi a latou tali i a latou api o le vasega po o api talaaga mo suesuega o tusitusiga paia.
O a fuaitau o tusitusiga paia, pe mai perofeta anamua po o perofeta o aso nei, ua faatosinaina ai lou olaga? Na faapefea ona faamanuiaina oe e ala i na mau?
Valaaulia ni nai tamaiti aoga e faasoa mai a latou tali i le vasega. Atonu e te manao foi e faasoa atu se faataitaiga o le ala ua faamanuiaina ai oe e ala i tusitusiga paia.
Tagai i le faamatalaga na muamua atu a Elder Oaks, ma valaaulia tamaiti aoga e molimau atu i isi pe a faatonuina ai e le Agaga e uiga i le moni o perofeta ma tusitusiga paia.
Tala ma Faamatalaga o Talaaga
2 Peteru 1:10. “Ia atili ai ona faamalolosi outou ia faamauina lo outou valaauina ma lo outou filifilia”
Na aoao mai Elder Bruce R. McConkie o le Korama a Aposetolo e Toasefululua e faapea, “ina ia faamauina le valaauina ma le filifilia o se tasi, o le faamauina lea i le ola e faavavau; o le i ai o se faamautinoaga e le mataofiofia o le faaeaga i le lagi aupito maualuga o le malo selesitila … a’o le’i oo i le aso e ulufale moni ai le au faamoani i le afioaga e faavavau e nonofo ai ma Keriso i lona nofoalii” (Doctrinal New Testament Commentary, 3 vols. [1965–73], 3:330–31).
Na aoao mai foi e Elder McConkie le mea lenei:
“O tagata uma i le Ekalesia o e i ai i le ala sa’o ma le vaapiapi, o e o loo taumafai ma tauivi ma mananao ia fai le mea sa’o, e ui lava ina mamao mai le atoatoa i lenei olaga; afai e aluese atu o ia mai lenei olaga ae o loo i ai pea i le ala sa’o ma le vaapiapi, o le a agai atu o ia i le taui e faavavau i le malo o le Tama.
“… Afai o loo e i ai i lena ala ma fetaomi pea i luma, ma a e oti, o le a e le aluese lava ma le ala. … O le mea e tatau ona e faia o le tumau pea i mea masani o le Ekalesia ma ola o ni tagata sa’o ma lelei i le Ekalesia—tausia o poloaiga, totogi au sefuluai, auauna atu i faalapotopotoga o le Ekalesia, alofa i le Alii, tumau i le ala sa’o ma le vaapiapi. Afai e te i ai i lena ala pe a oo mai le oti—aua o le taimi ma le aso atofaina lenei, o le tofi faataitai lenei—e le taitai lava ona e pau ese mai ai, ma, mo faamoemoega uma o le a faamanuiaina, o lou valaauina ma le filifilia ua faamauina. Ia, e le o le faauigaga lena o lena upu, ae o le taunuuga faaiu o le a tutusa lava” (“The Probationary Test of Mortality,” Salt Lake Institute of Religion devotional, Ian. 10, 1982, 12–13).
2 Peteru 1:19. “[O] le upu o le valoaga e sili lona mausali”
Ua faamautu ma faamanino mai e faaaliga i onaponei le uiga o le fuaitau “le upu o le valoaga e sili lona mausali” (2 Peteru 1:19). Fai mai le Mataupu Faavae ma Feagaiga 131:5 , “O le upu sili atu ona mautinoa o le valoaga o lona uiga o le iloa lea e se tagata ua faamauina o ia mo le ola e faavavau, e ala i faaaliga ma le agaga o valoaga, e ala i le mana o le Perisitua Paia.”
E mafai e tamaitai faapea foi ma alii o le Ekalesia ona maua le faamanuiaga o le faamauina o le valaauina ma le filifilia o se tasi, po o le mauaina o le upu sili atu ona mautinoa o valoaga.
Na aoao mai Elder Bruce R. McConkie o le Korama a Aposetolo e Toasefululua:
“O na tagata o le Ekalesia o e tuuto atoatoa atu i latou lava i le amiotonu, ola i afioga uma e tulei mai le fofoga o le Atua, ua faamauina lo latou valaauina ma le filifiliga. O lona uiga, latou te maua le upu sili atu ona mautinoa o valoaga, o lona uiga e faamau e le Alii lo laua faaeaga i o laua luga a’o i ai i le taimi nei i lenei olaga. Na aoteleina e Peteru le ala o le amiotonu lea e tatau ona tulitulimatagauina e le au paia, ina ia faamauina ai o latou valaauina ma le filifilia, ma faapea mai ai lea, (e faatatau i lenei aafiaga i le Mauga o Liua faatasi ma Iakopo ma Ioane) na maua e lena toatolu le upu sili atu ona mautinoa o le valoaga. (2 Peteru 1.)” (Mormon Doctrine, 2nd ed. [1966], 109).
Sa aoao mai le Perofeta o Iosefa Samita:
“A faatuatua se tagata ia Keriso, salamo i ana agasala, ma ua papatisoina mo le faamagaloina o ana agasala ma maua le Agaga Paia, (e ala i le faaee atu o lima), o le Fesoasoani muamua lea, ona tuu atu lea o ia ia faaauau pea ona faamaualalo o ia lava i luma o le Atua, ia fiaai ma fiainu i le amiotonu, ma ola i afioga uma a le Atua, ma o le a le umi ae fetalai mai le Alii ia te ia, Atalii e, ia faaeaina oe. Pe a faamaonia lelei o ia e le Alii, ma iloa ai ua naunau le tagata e auauna ia te Ia e tusa lava po o a faigata uma, ona maua ai lea e le tagata le faamauina o valaauina ma le filifilia, ona avea ai lea ma ona faamanuiaga le maua o le isi Fesoasoani. …
“O ai le isi Fesoasoani? E le sili lava pe itiiti ifo nai lo o le Alii o Iesu Keriso Lava Ia; … pe a maua e soo se tagata lenei Fesoasoani mulimuli, o le a ia maua le peresona o Iesu Keriso e faatasi atu ia te ia, pe faaali atu ia te ia” (i le History of the Church, 3:380–81).
Sa saunoa Elder M. Russell Ballard o le Korama a Aposetolo e Toasefululua i tulaga e lelei ai le i ai o ni taitai matutua, ma poto masani i le aufono pulefaamalumalu o le Ekalesia:
“O loo i ai se mea e uiga i le atamai o le tagata toatasi ma le atamai tuufaatasi o le Usoga e tatau ona outou maua ai sina mafanafana. Ua matou oo uma i ai, e aofia ai taunuuga o tulafono ma aiaiga faavae eseese faalemalo, faanoanoaga, faalavelave, ma maliu i o matou lava aiga. E le o tāvavaeeseina i matou mai i o outou olaga.
“Ou te fia faapea atu foi, e leai se tasi o le Toasefululua o se [fualaau] vaioleti mamae. E tofu i matou taitoatasi ma ;e malosi faaletagata lava ia . O lea la, a matou autasi i se faaiuga, ia outou mautinoa ua matou fefautuaa’i faatasi ma o mai ai i lena faaiuga i le mavae ai o talosaga e tele ma soalaupulega loloto. …
“E talavou o matou loto, ma ua faamanuia i matou e le Alii e faaagai i luma Lana galuega i ala tulaga ese” (“Be Still, and Know That I Am God” [faigalotu a le Ofisa o Aoga a le Ekalesia, Me 4, 2014], broadcast.lds.org).