Anomea o Sauniuniga mo le Faiaoga o Suesuega i le Aiga
Aotelega o Lesona Suesueina i le Fale i Aso Taitasi
O otootoga o aoaoga faavae ma mataupu faavae nei sa aoaoina e tamaiti aoga ao latou suesueina le Eperu 5–Iakopo 1 (iunite 28) e le o faamoemoeina e aoao atu o se vaega o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
Mai tusitusiga a Paulo e uiga i le pule o le perisitua, na aoao ai e tamaiti aoga o i latou o e ua faauuina i le perisitua, e ao ona valaauina e le Atua i le faaaliga e ala mai i Ana auauna tofiaina. Sa aoaoina foi e tamaiti aoga ia upumoni nei: E ala i le filiga e oo i le iuga, faatuatua ia Iesu Keriso, ma le onosai, e mafai ai ona tatou maua faamanuiaga ua folafolaina mai e le Atua. O lo tatou faamoemoe i folafolaga a le Atua o se taula faaleagaga mo o tatou agaga.
A’o suesueina e tamaiti aoga le Eperu 7–10, na latou aoao ai, sa ofoina mai e Iesu Keriso Lona lava soifua o se taulaga mo a tatou agasala, ma ona o le Togiola a Iesu Keriso, ua mafai ai ona tatou ulu atu i le malo selesitila pe afai tatou te taofi mau i lo tatou faatuatua ia te Ia.
I le latou suesuega o aoaoga a Paulo e uiga i le faatuatua, na aoao ai e tamaiti aoga, o le faatuatua o le mautinoa lea o mea ua faamoemoe i ai, ae le o vaaia. Na latou aoaoina foi le mea lenei: Ina ia faamalieina le Atua, e ao ona faaaoga lo tatou faatuatua e ala i le o mai ia te Ia, talitonu ia te Ia, ma talitonu e tauia e Ia i latou o e saili ma le filiga ia te Ia. A’o faaali atu lo tatou faatuatua ia Iesu Keriso, e mafai ona tatou onosaia puapuaga, faia vavega, maua folafolaga paia, faamalosia a tatou molimau e uiga ia te Ia, ma agai atu i le atoatoaga.
A’o suesueina e tamaiti aoga le faaiuga o le tusi a Paulo i tagata Eperu, sa latou iloa ai, a’o tatou vaai atu i le faataitaiga a Iesu Keriso, e mafai ona tatou maua le malosiaga e faataatiaese ai a tatou agasala ae onosaia ma le faapalepale teteega. Na latou aoaoina foi, afai tatou te usitai i le aoaiga mai le Tama Faalelagi, o le a tatou avea atili e pei o Ia ma maua le filemu lea e sau mai i le amiotonu. I le latou suesuega o le Iakopo 1, na aoao ai e tamaiti aoga, e foai tele mai e le Atua le poto ia i latou o e ole atu ia te Ia i le faatuatua.
Folasaga
Na fautuaina e le Aposetolo o Iakopo tagata Isaraelu na faasalalauina ina ia fai ma e anaana i le upu, auauna atu i isi, ma ia tumau le mama faaleagaga.
Fautuaga mo le Aoaoina Atu
Manatua: Sa aoaoina e tamaiti aoga ia fuaitau o mau tauloto e lua i le iunite lenei—Eperu 12:9 ma le Iakopo 1:5–6. Atonu e te manao e faitau pe tauloto faatasi o se vasega nei fuaitau, ma valaaulia tamaiti aoga e faamatala mai aoaoga faavae ma mataupu faavae o loo aoao mai i fuaitau.
Ua valaaulia e Iakopo ana au faitau ia avea ma e faalogo ma anaana i le upu ma ia auauna atu i isi
Valaaulia se tamaitiiti aoga e faitau leotele le tala lenei a Elder Quentin L. Cook o le Korama a Aposetolo e Toasefululua:
Ata
Elder Quentin L. Cook
“Talu ai nei sa ou feiloai ai i se alii talavou lelei. O ana sini o le alu i se misiona, ia aotauina, faaipoipo i le malumalu, ma ia maua se aiga fiafia ma faamaoni. Sa ou fiafia tele i ana sini. Ae i nisi o a ma talanoaga, sa manino mai ai o ana amio ma filifiliga sa ia faia sa lei ogatusa ma ana sini. Sa ou lagonaina lona manao faamaoni e alu i se misiona ma sa aloese mai agasala matuia ia o le a taofia ai o ia mai se misiona, ae o ana amioga i aso uma sa lei saunia ai o ia mo luitau faaletino, faalelagona, faaleagafesootai, faaleatamai, ma faaleagaga o le a la fetaiai. Sa lei aoao o ia e galue malosi. Sa lei manatu mamafa o ia i le a’oga po o le seminare. Sa ia auai i le lotu, ae sa ia lei faitauina le Tusi a Mamona. Sa ia faaaluina se taimi tele i taaloga vitio ma le initoneti. Sa foliga mai na ia manatu o le tau na ona alu i lana misiona o le a lava lea” (“Filifili ma le Atamai,” Ensign po o le Liahona, Nov. 2014, 47).
Ana faapea sa e i ai i le tulaga o Elder Cook, o a ni ou popolega e ono i ai i le le lava o tapenaga a lenei alii talavou mo le misiona?
Valaaulia se tamaitiiti aoga e faitau leotele le Iakopo 1:22 . Fai atu i le vasega e mulimuli i le faitauga, ma vaavaai mo le mea na aoao mai e Iakopo e mafai ona fesoasoani ai i le alii talavou na ta’ua i le tala e Elder Cook.
O le a le mea na aoao mai e Iakopo e mafai ona fesoasoani ai i lena alii talavou?
Faamatala atu, e pei ona tusia i le Iakopo 1:23–24, sa faatusaina e Iakopo se tagata e faalogo [i le upu] ae le anaana i ai, i se tagata e vaavaai ia te ia lava i le faaata, ma ina ua aluese atu, ona galo ai lea ia te ia o ona foliga.
Valaaulia se tamaitiiti aoga e faitau leotele le Iakopo 1:25 . Fai atu i le vasega e mulimuli i le faitauga, ma vaavaai mo le mea e tupu ia i latou o e filifili e faatino upumoni latou te faalogo i ai.
O le a le mea e tupu ia i latou o e e le gata ina faalogo ae anaana foi [i le upu]? (A uma ona tali mai tamaiti aoga, tusi le mataupu faavae lenei i luga o le laupapa: A tatou faalogo ma faatino le upu a le Atua, o le a Ia faamanuia i tatou i a tatou galuega.)
Valaaulia tamaiti aoga e fai se iloiloga o i latou lava o ni tagata e faalogo ma anaana i le upu a le Atua, e ala i le mafaufau loloto i fesili nei. Atonu e te manao e faitau leotele atu nei fesili pe tusi i luga o le laupapa.
O le a le atoatoa o lo’u talitonu i upumoni o loo o’u aoaoina i tusitusiga paia, i le aiga, i le lotu, ma i le seminare?
E faafia ona ou faatutuina ni sini faaleagaga e faatino upumoni o loo o’u aoaoina? E faafia ona ou ausia ia [sini]? E faafia ona galo ia te a’u ia [sini]?
O le a se mea e mafai ona lelei atu ai lo’u faiga ina ia avea ai ma se e anaana i le upu ae le na o le faalogo?
Molimau atu i faamanuiaga e oo mai pe a tatou faatino mea ua tatou aoaoina.
Valaaulia se tamaitiiti aoga e faitau leotele le Iakopo 1:26–27. Fai atu i le vasega e mulimuli i le faitauga, ma vaavaai mo fautuaga a Iakopo mo auala e mafai ona tatou ola ai i la tatou amioatua.
E tusa ai ma fautuaga a Iakopo, o a ni auala e mafai ona tatou ola ai i la tatou amioatua, pe faaali atu lo tatou tuuto i le Atua?
Faamatala atu, i le fuaiupu 27 sa faaaoga ai e Iakopo le manatu o le “tauasiasi atu i e matua oti ma fafine ua oti a latou tane” e manaomia le fesoasoani, o se tasi o faataitaiga o le tausia o isi ma ia “leoleo [le tagata ia te ia] ina ne’i pisia mai o ia i le lalolagi” o lona uiga o le tumau i le mama faaleagaga, e tusa lava, pe o se lalolagi e mafai ona taulamua ai le amioleaga.
O le a se upumoni e mafai ona tatou aoao mai i le Iakopo 1:27? (E ono faaaoga e tamaiti aoga ni upu eseese, ae ia mautinoa latou te faailoa mai le upumoni lenei: Tatou te faaalia le amioatua pe a tatou alolofa atu i isi ma tausia i tatou lava ia mama faaleagaga. Tusi le upumoni lenei i luga o le laupapa.)
O a ni auala e ono mafai e le alolofa atu i isi ma le tausia o i tatou lava ia mama faaleagaga, ona avea ma ni faaaliga taua o lo tatou tuuto i le Atua?
O ai e te iloa o se faataitaiga lelei o le faaaliga o le “amioatua” i lona olaga i aso uma? O le a le mea e fai e lenei tagata e musuia ai oe?
Valaaulia tamaiti aoga e tusi i se fasipepa se galuega se tasi pe lua o le a latou faia i le aluga o le vaiaso a sau e alofa atu ai i se tasi e manaomia le fesoasoani po o le tausia o i latou lava “ne’i pisia mai …i le lalolagi.” Valaaulia i latou ia avea ma e anaana i upu a le Atua e ala i le faaaoga o lenei mataupu faavae i o latou olaga.
Faamalamalama atu i tamaiti aoga, ao latou suesue i le Iakopo 2–1 Peteru 5, o le a latou iloa ai tali i fesili nei: O le a le mea na fautua Iakopo i le Au Paia e fai pe a latou vaai i se uso po o se tuafafine ua “le ofu, …ma ua leai foi sana mea e ai i lea aso ma lea aso”? (Iakopo 2:15). Ae faapefea pe a tatou le faia se mea e fesoasoani ai i e matitiva? Aisea na fai mai ai Iakopo o le “faatuatua ua mate pe a leai ni galuega”? (Iakopo 2:26). O le a le vaega o le tino na fai mai Iakopo “o se afi” ma e mafai ona “[leaga] ai le tino uma”? (Iakopo 3:6.) O le a le faamanuiaga o loo faatalitali mai ia i latou o e fesoasoani e faaliliu mai se tagata agasala “nai lona ala sese”? (Iakopo 5:20). O a ni mafuaaga na tuuina mai e Peteru mo le talaiga o le talalelei i e ua maliliu? Valaaulia tamaiti aoga e vaavaai mo tali i fesili nei a o latou suesueina le poloka mau e sosoo ai.