A o malaga atu i Roma o se pagota, sa afatia le folauga a Paulo i se motu. I lea motu, sa u ai o ia e se gata ae sa lei afaina o ia, ma sa ia faamaloloina le toatele sa mamai. Na iu ina avatu Paulo i Roma, lea sa ia nofo vaavaaia ai i se fale mo tausaga e lua ma aoao atu ma molimau atu ia Iesu Keriso.
A o lei amataina le vasega, tusi faamatalaga nei i le laupapa. (O loo maua nei faamatalaga i le Mo Le Malosi o le Autalavou [tamaitusi, 2011], 4, 11, 16.)
“Ia aloese mai i le tafafao soo ma le tagata lava e tasi.
“Aua e te alu, matamata, pe auai i soo se mea e paaa, le mama, vevesi, pe faaponokalafi i soo se itu.”
“Afai e uunai oe e au uo e faia mea e sese, ia avea oe ma tagata e tu atu mo le mea sao, e tusa lava pe e te tu na o oe.”
Valaaulia se tasi e faitau leotele ia faamtalaga na tusia i le laupapa.
Aisea e ono filifili ai e nisi talavou e le usitaia nei faamatalaga o lapataiga ma fautuaga?
Valaaulia le vasega e vaavaai mo upumoni a o latou suesueina le Galuega 27 ia o le a fesoasoani e faamalolosia ai lo latou faatuatua e usitaia lapataiga ma fautuaga a auauna a le Alii.
Faamanatu i le vasega na tuuaia pepelo ia Paulo i le faatupu vevesi ma sa faafalepuipuia ai. Na toe talosagaina e Paulo lona faamasinoga ia Kaisara i Roma, o lana aia tatau lea o se tagatanuu o Roma. Aotele le Galuega 27:1–8i le faamatala atu e faapea na malaga ia Paulo ma isi pagota i le vaa agai atu i Roma, i lalo o le vaavaaiga a se taitai o le toaselau a Roma (o se taitai militeli a Roma e faafoeina ni alii se 50 e oo i le 100.) Ina ua mavae ni aso se tele o le folauga, sa latou tutu i se uafu i le motu o Kereta. Ao latou tuua le uafu, sa lapatai atu Paulo ia i latou sa i luga o le vaa e aua nei faaauauina la latou malaga.
Valaaulia se tamaitiiti aoga e faitau leotele le Galuega 27:9–10. Fai i le vasega e mulimuli ai, ma vaavaai mo mea sa iloa e Paulo o le a tupu pe afai e faaauau e ia ma isi sa i le vaa la latou malaga i Roma. Atonu e te manao e faamatala o le upu anapogii le anotusi lea o lona uiga o le taofia o le ’ai i lou lava loto malie. I le tulaga lea “o le anapogi” atonu sa faasino i le aso paia o Iutaia sa faaigoaina o le aso o le Togiola, lea sa faailoga ai le amataga o le vaitau lea e masani ona faapea e le saogalemu ona malaga ai i le Sami Meititirane ona o le matautia o matagi.
E tusa ai ma le fuaiupu 10, o le a le lapataiga ma le valoaga na tuu atu e Paulo e uiga i le mea o le a tupu pe afai e faaauau pea la latou malaga?
Valaaulia se tamaitiiti aoga e faitau leotele le Galuega 27:11–12. Fai i le vasega e mulimuli ai, ma vaavaai pe na faapefea ona tali atu le taitai Roma o le toaselau ma isi sa i le vaa i le lapataiga a Paulo.
Nai lo le gauai atu i le lapataiga a Paulo, o ai na faatuatuaina e le taitai o le toaselau?
Aisea e te manatu na faigofie ai i le taitai o le toaselau ona talitonu i le pule o le vaa nai lo Paulo?
E tusa ai ma le fuaiupu 12, aisea na le amanaia ai e le toatele o tagata sa i le vaa le lapataiga a Paulo? (Faamatala o le upu taulaga e faasino i se uafu ma le lelei o lona uiga toafilemu pe faigofie.)
Valaaulia ni nai tamaiti aoga e feauauai i le faitauina leotele mai o le Galuega 27:13–21. Fai i le vasega e mulimuli ai, ma vaavaai mo mea na tutupu a o folau atu pea le vaa i Roma.
O le a le mea na tupu a o folau atu pea le vaa i Roma?
Ina ua vaai atu i le “agi malie o le matagi i saute” fuaiupu 13, mata o a ni mafaufauga o tagata sa i le vaa e uiga ia Paulo ma le lapataiga na ia tuu atu?
E tusa ai ma le fuaiupu 20, o a ni lagona o i latou sa i luga o le vaa i le taimi o le afa?
E pei ona faapupula mai i le faaupuga a Paulo o loo tusia i le fauiupu 21, o le a se mataupu faavae e mafai ona tatou aoao mai i le mea e mafai ona tupu pe a tatou le amanaiaina ia lapataiga a auauna a le Alii? (E ono faaaoga e le vasega ni upu eseese ae e tatau ona latou faailoa maia le mataupu faavae lea: Afai tatou te le amanaiaina ia lapataiga ma fautuaga a auauna a le Alii, ona tatou tuuina lea o i tatou lava i tulaga matautia. Tusi lenei mataupu faavae i le laupapa. Faamatala o tulaga matautia e mafai ona aofia ai le faoa o faamanuiaga semanu tatou te maua.)
Toe iloilo faatasi ma le vasega ia mafuaaga na le amanaia ai e le taitai o le toaselau ma isi tagata sa i le vaa le lapataiga ma le fautuaga a Paulo (tagai Galuega 27:11–12).
O faapefea e tagata i ona po nei ona faia o ’alofaga foi faapena e le amanaia ai ia lapataiga ma fautuaga a auauna a le Alii?
Faaaoga le Mo Le Malosi o le Autalavoupo o lauga o le konafesi talu ai nei, tuu atu nisi faataitaiga o lapataiga ma fautuaga a perofeta e te manatu e talafeagai i tagata o le vasega.
O a tulaga matautia e ono tuu ai e tagata i latou lava e ala i le le amanaiaina o na lapataiga ma fautuaga mai i perofeta?
Valaaulia se tamaitiiti aoga e faitau leotele le Galuega 27:22–26. Fai atu i le vasega e mulimuli i le faitauga, ma vaavaai mo le mea na ta’u atu e Paulo i tagata sa i le vaa.
Pe ana faapea sa e i ai i le vaa i le lotolotoi o le afa matautia, o a upu a Paulo e faamafanafanaina ai oe?
O le a le mea na valoia e Paulo o le a tupu i tagata ma le vaa?
Aotele le Galuega 27:27–30i le faamatala atu e faapea o le po lona 14 o le afa, sa lafoai ai e le auvaa ia taula e fa i le sami e puipuia ai le vaa mai le fetoai ma papa. Ona o atu ai lea o le auvaa i le taumua o le vaa ma sa foliga mai o le a latou toe lafoina nisi taula i lalo. Peitai, sa latou fuafua e tuua le vaa ae sosola i se tamai vaa ona sa latou fefefe nei goto le vaa.
Valaaulia se tamaitiiti aoga e faitau leotele le Galuega 27:31–32. Fai i le vasega e mulimuli ai, ma vaavaai mo le lapataiga na tuu atu e Paulo i le taitai o le toaselau ma fitafita. Faamatala o le upu latou na i le fuaiupu 31 e faasino i tagata o le auvaa o e sa taumafai e sosola.
O le a le lapataiga na tuu atu e Paulo i le taitai o le toaselau ma fitafita?
Na faapefea ona tali atu fitafita i le lapataiga ma le fautuaga a Paulo? (Sa latou usitaia lana lapataiga ma sa puipuia ai le auvaa mai le sosola ese e ala i le tatipiina o maea o le tamai vaa ma tuu e faatafetafea.)
Faamatala i le taeao na sosoo ai, sa aioi atu Paulo i le auvaa, o e sa anapopogi, ina ia aai (tagai Galuega 27:33–34). Sa ia toe faamautinoa atu ia i latou o le a leai se tasi o i latou e oti.
Valaaulia se tamaitiiti aoga e faitau leotele le Galuega 27:35–36. Fai atu i le vasega e mulimuli i le faitauga.
Na faapefea ona tali atu le auvaa i le fautuaga a Paulo?
Aotele le Galuega 27:37–41i le faamatala atu e faapea na to’a le vaa a o folau agai atu i le motu o Melita. Ona valaaulia lea o tamaiti e faitau lē leoa le Galuega 27:42–44 ma vaavaai mo mea na tutupu i tagata na i le vaa.
O le a le mea na tupu i tagata sa i le vaa?
Faamanatu i le vasega le valoaga a Paulo o loo tusia i le Galuega 27:22–26faapea e leai se tasi e oti e ui ina o le a malepe le vaa.
O a mataupu faavae e mafai ona tatou aoao mai i lenei tala e uiga i le mea e mafai ona tupu pe a tatou gauai atu i fautuaga ma lapataiga a auauna a le Alii? (E mafai e le vasega ona faailoa mai mataupu faavae pei o nei: Afai tatou te gauai atu i fautuaga ma lapataiga a auauna a le Alii, ona faataunuuina lea e le Alii o Ana folafolaga ia i tatou. Afai tatou te gauai atu i fautuaga ma lapataiga a auauna a le Alii, ona mafai lea ona tatou tatalia tulaga matautia e faamata’uina ai i tatou. Tusi mataupu faavae nei i luga o le laupapa.)
Ina ia fesoasoani ia malamalama le vasega i mataupu faavae sa latou faailoa mai i le Galuega 27, valaaulia se tasi e faitau leotele le saunoaga lea a Peresitene Henry B. Eyring o le Au Peresitene Sili:
Ata
Peresitene Henry B. Eyring
“O taimi uma i lo’u olaga pe a ou filifili ai e faatuatuai ona mulimuli i se fautuaga musuia pe filifili faapea e le aofia ai au, sa oo ina ou iloa ai sa ou tuuina au lava i se ala e pagatia ai. O taimi uma lava na ou faalogo ai i fautuaga a perofeta, ma lagonaina i se tatalo e faamautu ai, ma mulimuli i ai, na ou iloa ai lou agai atu i le saogalemu” (“Mauaina o le Saogalemu i Fautuaga,” Ensign, May 1997, 25).
Na faapefea e le gauai atu i lapataiga ma fautuaga musuia a auauna a le Alii ona fesoasoani ia te oe e tatalia ai tulaga matautia e faamata’uina ai lou saogalemu faaleagaga ma le faaletino? (Faamanatu i le vasega e mafai ona latou suesue i fautuaga a perofeta a le Alii i ona po nei i mekasini a le Ekalesia faapea foi i le Mo Le Malosi o le Autalavou.)
Valaaulia le vasega e mafaufau pe o latou le amanaiaina soo se lapataiga po o se fautuaga mai auauna a le Alii pe mafaufau i ni auala e mafai ona latou gauai atili ai i lapataiga ma fatuaga ua latou maua. Valaaulia le vasega e tusi i lalo se sini pe faapefea ona latou gauai atili i lena fautuaga.
Ua aveina atu Paulo i Roma, lea na ia aoao atu ai ma molimau atu ia Iesu Keriso
Faaali i le vasega se atao se asiosio po o matagi taavilivili (pe tusi se ata i le laupapa).
Ata
asiosio
Faamatala na taua e Elder Neil L. Andersen o le Korama a Aposetolo e Toasefululua ia luitau o le olaga ma tofotofoga o ni “asiosio faaleagaga” (tagai “Asiosio Faaleagaga,” Ensign po o le Liahona, Me 2014, 18–21).
O a ni nai faataitaiga o tofotofoga ma faigata e mafai ona faatusatusa i asiosio?
Valaaulia le vasega e vaavaai mo se mataupu faavae a o latou suesueina le Galuega 28 lea e mafai ona fesoasoani latou te onosaia ai ma le faamaoni ia “asiosio faaleagaga” latou te fetaiai.
Faamatala e faapea i le Galuega 28tatou te faitau ai e uiga i aafiaga o Paulo i le motu, o lana malaga faifai pea i Roma, ma lona faafalepuipuiina i Roma.
Vavae le vasega i ni vaega se tolu pe sili atu foi e fuafua lava i le toatele o lau vasega. Tofi vaega taitasi e suesue se tasi o poloka mau nei: Galuega 28:1–6; Galuega28:7–14; Galuega 28:16–24, ma le tuuina atu o le poloka lava e tasi mo isi vaega e tele pe a manaomia. Valaaulia vaega taitasi e suesue a latou poloka mau ua atofa atu ona fai lea o mea nei (tusi faatonuga nei i le laupapa):
Tusi se ata pe tusi se folamua o se nusipepa lea e aotele ai mea na tutupu o loo faamatala i le poloka mau.
Faaali i le vasega lau ata pe faitau lau folamua ma aotele ia mea na tutupu o loo faamatala mai i lau poloka mau.
A uma ua lava se taimi, fai atu i vaega taitasi e lipoti mai i le vasega. (Afai e silia ma le tolu ni vaega, valaaulia ia vaega o loo tai lua poloka mau e faasoa mai la latou ata po o la latou folamua ma nisi malamalamaaga sa latou maua mai i la latou faitauga mai ia latou fuaiupu na atofa atu)
O a faigata na feagai ma Paulo a o ia malaga atu ma nofo ai i Roma?
Valaaulia se tamaitiiti aoga e faitau leotele le Galuega 28:30–31. Fai i le vasega e mulimuli ai, ma vaavaai mo mea na mafai ona fai e Paulo i Roma e ui ina latou vaavaaia faapagota o ia. Fai atu i tagata aoga e lipoti mai mea ua latou mauaina.
O le a le mea na faia e Paulo na faaalia ai lona tumau faamaoni i le Atua e ui i faigata na feagai ma ia?
O le a se mea lelei na maua mai i tofotofoga ma faigata na feagai ma Paulo a o i ai i le vasa, a o afatia le vaa ma a o faafalepuipuia i Roma? (A maea ona tali mai tamaiti aoga, tusi le mataupu faavae lea i le laupapa: Afai tatou te faamaoni, e mafai e le Atua ona fesoasoani ia i tatou e faaliliu ia faigata e avea ma faamanuiaga mo i tatou lava ma isi.)
O afaataitaiga o auala e mafai e le Atua ona fesoasoani i tagata e faaliliu ia faigata e avea ma faamanuiaga mo i latou lava ma isi?
O anafea na fesoasoani ai le Atua ia te oe po o se tasi e te iloa e faaliliu se tofotofoga po o se faigata i se faamanuiaga mo oe lava pe mo isi? (Mafaufau e faasoa atu sa oe lava faataitaiga.)
Fautuaina le vasega e mulimuli i le faataitaiga a Paulo ma filifili e tumau faamaoni pe a latou feagai ma tofotofoga ina ia mafai ai ona fesoasoani mai le Atua ia i latou ma faaliliu na tofotofoga e fai ma faamanuiaga mo i latou lava ma isi.
“O le mea ua tatou iloa, o Paulo o le uluai faifeautalai na folafola atu le talalelei i Roma. E pei ona sa ia faia i aai, sa muamua ona talai atu Paulo i Iutaia, o nisi sa talitonu ia te ia, ona faliu atu ai lea ia i ‘latou uma na o mai ia te ia’ Galuega 28:30 A o vaavaaia faafalepuipui o ia i se fale, sa tusia ai e Paulo nisi o ana tusi ia sa taua e nisi o ‘tusi i le falepuipui’—Kolose, Efeso, Filemoni, ma Filipi. Ina ua uma ona ia faaaluina le lua tausaga i le vaavaaiga faafalepuipui i se fale i Roma, e talitonu sa faamasinoina ia Paulo ma toe tatala ma o lea sa ia galue ai i Asia, Eleni, ma atonu ma Sepania a o lei toe faafalepuipuia o ia i Roma. E tusa ai ma uputuu, sa fasiotia o ia i le taimi o sauaga i lalo o le puleaga a Niro, i se taimi o le va o le T.A. 64 ma le 68. Sa faaiteite mai e Paulo lona maliu i le lumanai i le 2 Timoteo 4:6–8”(Tusi lesona a le Tagata Aoga o le Feagaiga Fou [Church Educational System manual, 2014], 330).
Galuega 28. Afai tatou te faamaoni, e mafai e le Atua ona fesoasoani ia i tatou e faaliliu ia faigata i faamanuiaga mo i tatou lava ma isi.
Sa aoao mai e Peresitene Ioane Teila e faapea a tatou tumau faamaoni ma usiusitai i le Alii, e mafai ona avea o tatou tofotofoga mo tatou lelei ma faamanuiaga:
“Pe o e vaai i le taua ona i ai o nei tofotofoga ma mafatiaga ma vaaiga e tatau ona tatou pasi atu ai? O le Alii o loo tuuina i tatou i ni tulaga ua sili ona fuafuaina e siitia ai le manuia o lona nuu. O lou manatu la, e mamao mai nei mea o loo siomia ai i tatou e faamanua ai i tatou ma le malo o le Atua, o le a aumaia ai se tasi o siitaga aupito silisili [po o faagaeetia] o le a i ai, ma o le a tonu mea ma sa’o mea uma pe afai tatou te tausia poloaiga a le Atua. O le a la le tulaga, e tatau ona tatou tutu ai—tane uma, fafine uma ma tamaiti? Fai o tatou tiute i luma o le Atua, faamamalu ia te ia, ona tonu lea o mea uma. Ma e tusa ai ma mea e lei faaalia mai, e tatau ona tatou tuu atu i aao o le Atua ma mafaufau po o le a lava, e sao, ma o le a faafoe e le Atua mea uma mo lo tatou lelei silisili ma le manuia o lana ekalesia ma le malo i le lalolagi” (Aoaoga a Peresitene o le Ekalesia: Ioane Teila [2011], 206–7).