Anomea o Sauniuniga mo le Faiaoga o Suesuega i le Fale
Aotelega o Lesona o Suesuega i le Fale i Aso Taitasi
O otootoga o aoaoga faavae ma mataupu faavae nei sa aoaoina e tamaiti aoga ao latou suesueina le Mataio 26:31–Mareko 3 (Iunite 7) e le o faamoemoeina e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma mataupu faavae nei. Mulimuli i musumusuga a le Agaga Paia a o e mafaufau i manaoga o au tamaiti aoga.
A o suesueina e le vasega puapuaga o Iesu i le Faatoaga o Ketesemane, sa latou aoaoina ai na gauai atu Iesu Keriso i le finagalo o le Tama ina ia faataunuuina ai le Togiola ma tatou te mulimuli i le faataitaiga a Iesu Keriso pe a tatou filifili e gauai atu o tatou loto i le finagalo o le Tama Faalelagi. Mai faatonuga a le Faaola i le au Aposetolo i Ketesemane, sa aoao ai e le vasega afai tatou te mataala ma tatalo e le aunoa, o le a tatou maua le malosi e tetee atu ai i faaosoosoga.
Mai le tala i le Faasatauroga o le Faaola, na aoao ai e le vasega o se vaega o le Togiola, sa lagonaina ai e Iesu Keriso le alu ese o le Agaga o le Tama Faalelagi. Sa latou aoaoina foi na puapuagatia Iesu Keriso ina ia faataunuu ai le finagalo o le Tama Faalelagi, pei ona Ia folafola mai i le i Mataio 26. Ma a o suesue e le vasega le tala i le ie puipui o le malumalu na saeluaina i le maliu o le Faaola, sa latou aoao ai na faatusa i le upumoni aua o le Togiola a Iesu Keriso, ua mafai ai e i tatou uma ona ulu atu i le afioaga o le Atua pe afai tatou te salamo ma tausi i a tatou feagaiga.
Mai le tala ia Iesu na tulieseina se agaga leaga, sa aoao ai e le vasega e i ai i le Faaola le mana e pule ai i le tiapolo ma ana ’au. Sa aoaoina foi e le vasega e pei lava ona mutimuti alofa Iesu i le lepela ma faamamaina, a tatou faaaoga foi le faatuatua e o atu ai i le Faaola, o le a ia mutimuti alofa foi mo i tatou ma faamama i tatou mai agasala.
A o suesue e le vasega le faamagaloina ma le faamalologa o le tagata supa, sa latou aoaoina ai e i a Iesu Keriso le mana e faamalolo ai i tatou faaleagaga ma faaletino. A o latou suesue e uiga ia Iesu o aai faatasi ma telona ma e agasala, sa latou aoaoina ai e finagalo le Faaola e fesoasoani ia tatou salamo i a tatou agasala ma faamaloloina. A o latou faitau e uiga i Faresaio o tausalaina Iesu ma Ona soo i le solia o le Sapati, sa aoao e le vasega e mafai ona tatou tausia le paia o le Sapati i le vivii atu i le Atua ma faia galuega lelei.
Folasaga
Na toetu mai Iesu Keriso ma faaali atu i le toatele o tagata taitoatasi, e aofia ai ma Ana Aposetolo. Na poloaiina e Ia Ana Aposetolo ia auina atu Lana talalelei i malo uma.
Fai i le vasega e mafaufau pe i ai se tagata latou te latalata i ai pe o se tasi latou te iloa ua maliu. Ona fesili lea i le vasega:
Aisea e faigata ai mo i tatou le maliu o se tagata tatou te alolofa i ai?
Fai i le vasega e vaavaai mo upumoni a o latou suesueina le Mataio 28o le a fesoasoani latou te maua ai le mafanafana pe a oti se tasi e pele i ai latou.
Faamatala i le taeao po o le uluai aso o le vaiaso—Aso Sa—na o atu ai Maria le Makatala ma se tasi fafine e igoa foi ia Maria i le tuugamau i le mea na tuu ai le tino o Iesu.
Valaaulia ni nai tamaiti aoga e feauauai i le faitauina leotele mai o le Mataio 28:1–6. Fai atu i le vasega e mulimuli i le faitauga, ma vaavaai mo le mea na ta’u mai e le Alii i le au amioleaga ma le au fouvale
O le a le mea na maua e fafine ina ua latou taunuu atu i le tuugamau? (Faamatala i le Faaliliuga a Iosefa Samita mo nei fuaiupu o loo faamanino ai na vaaia e fafine ia agelu etoaluaae le toatasi, [tagai Mataio 28:2, vaefaamatalaga a; tagai foi Ioane 20:12].)
O le a sou manatu i ni ou lagona pe ana e vaai i ni agelu se toalua?
E tusa ai ma le fuaiupu 4, na faapefea ona tali atu leoleo?
E tusa ai ma fuaiupu 5–6, o le a le mea na ta’u atu e agelu i fafine?
O a ni upumoni e mafai ona tatou aoao mai i nei upu? A maea ona tali mai tamaiti, tusi le upumoni lea i le laupapa: Ua toetu Iesu Keriso mai le Oti
Ina ia fesoasoani i le vasega ia malamalama i le aoaoga faavae o le Toetu, vaevae i latou i ni vaega taitoalua pe taitoatolu ma valaaulia i latou e faamaea le tufaaga lea i a latou vaega.
Fai i ni nai tagata e lipoti mai i le vasega mea sa latou aoaoina i le faamaeaina o le tufaaga.
Valaaulia se tamaitiiti e faitau leotele le saunoaga lenei mai ia Peresitene Gordon B. Hinckley:
Ata
Peresitene Gordon B. Hinckley
“O le vavega o lena taeao o le toetu, le uluai Aso Sa o le Eseta, o se vavega mo tagata uma. O le vavega o le mana o le Atua, na tuuina atu e Lona Alo Pele Lona soifua e togiola ai mo agasala a tagata uma, o se osigataulaga o le alofa mo atalii ma afafine uma o le Atua. O le faia o lena mea ua Ia motusia ai noataga o le oti. …
“Ma e faapei ona Ia aveina ae Lona tino ma toe aumaia mai le tuugamau, o le a faapena fo i tatou uma ona olioli i se toe tuufaatasiga o le tino ma le agaga e avea ai ma agaga ola i le aso o lo tatou lava toetutu.
“O le mea lea, tatou te olioli ai, e faapei o le toatele, ma e tatau ai i tagata uma, pe a tatou manatua mea aupito viia, aupito faamafanafanaina, aupito mautinoa o mea uma o le talafaaolopito o le tagata—o le manumalo lea i le oti” (“O Le Manumalo i le Oti,” Ensign, Ape. 1997, 4).
Valaaulia se tamaitiiti e faitau leotele le Mataio 28:7–10. Fai atu i le vasega e mulimuli i le faitauga, ma vaavaai po o le a le mea na ta’u atu i fafine sa i ai i le tuugamau o Iesu.
E tusa ai ma fuaiupu e 7–23, o le a le mea na faatonuina e agelu ia fafine e fai?
Aisea e te manatu ai na o ese atu fafine “ma le fefefe ma le fiafia tele”? (Mataio 28:8).
O le a le mea na tupu i fafine a o la o atu e ta’u i le au soo le mea na la vaaia?
Otooto le Mataio 28:11–15 i le faamatala atu a o faataalise atu ia fafine e avatu le talafou o le Toetu o Iesu, sa faalogo ai le au faitaulaga sili i le mea na tupu mai fitafita sa leoleoina le tuugamau. Sa fefefe taitai Iutaia nei iloa e tagata le mea moni, o lea sa latou totogia ai ia leoleo ina ia faasalalau le talapepelo faapea na ave e soo o le Faaola Lona tino mai le tuugamau a o momoe ia leoleo.
Fai i se tamaitiiti e faitau leotele le Mataio 28:16–18. Valaaulia le vasega e mulimuli ai, ma vaavaai mo faamanuiaga na oo mai i Aposetolo e toasefulutasi a o latou usitaia le savali na avatu ia i latou e fafine ma o atu ai i Kalilaia.
O le a le faamanuiaga na oo mai i Aposetolo e toasefulutasi ona sa latou usitaia le savali e o i Kalilaia? (Na latou vaai i le Alii toetu.)
Valaaulia le vasega e tutu ma faitau leotele faatasi le Mataio 28:19–20. Faamanatu i ai latou o se mau tauloto lea.
Fai i le vasega e toe iloilo le fuaiupu 19–20, ma vaavaai mo mea na poloaiina e le Faaola Ana Aposetolo e fai ina ua latou vaai ia te Ia.
O le a le mea na poloaiina le au Aposetolo e fai ina ua uma ona latou vaai i le Faaola?
O le a se mea e mafai ona tatou aoao mai i lo latou aafiaga e uiga i lo tatou tiutetauave ina ua tatou maua se molimau ia Iesu Keriso? A uma ona tali mai le vasega, tusi le mataupu faavae lea i luga o le laupapa: A tatou maua se molimau ia Iesu Keriso, ua i ai tatou le tiutetauave e molimau atu ai ia te Ia i isi.
Faamanatu i le vasega o se vaega o le lesona e suesue i le aiga i le Mataio 27–28, latou te lisiina ni auala e mafai ona latou molimau atu ai ia Iesu Keriso i isi (galuega faatino 3 i le Iunite 7: Aso 2 lesona). Valaaulia ni tagata e faasoa mai mea sa latou tusia ma faamatala mai ma aumai ni faataitaiga o o latou manatu. Atonu e te manao e lisi nisi o o latou manatu i luga o le laupapa.
E tusa ai ma le Mataio 28:20, o le a le folafolaga na tuu atu e le Faaola i Ona soo?
Na faapefea ona “faatasi ma oe” le Alii, pe fesoasoani foi ia te oe, i au taumafaiga e faasoa atu le talalelei?
Fuafua e valaaulia le vasega e faasoa mai a latou molimau ia Iesu Keriso i le vasega, i ni vaega toalaiti, pe i paga. Atonu foi e te manao e faasoa atu lau molimau ia Iesu Keriso i le vasega. Faamanatu i le vasega ua latou tusia foi se sini i a latou api talaaga o le suesueina o le talalelei e tusa ai ma auala o le a latou molimau atu ai ia Iesu Keriso. Valaaulia ni nai tagata aoga e faasoa mai a latou tali i le vasega.
Faamatala i le vasega i le isi iunite o le a latou aoao ai nisi mea e uiga i vavega na faatinoina e Iesu Keriso e pei o le savali i luga o le vai, tutulieseina o temoni mai se tagata, ma le faatuina mai o se teineitiiti mai le oti. Fai i le vasega pe na i ai se matagi matautia na latou i ai ma pe o a o latou lagona i lena taimi. Valaaulia i latou e mafaufau pe na i ai se taimi na latou feagai ai ma ni matagi matautia po o ni luitau i o latou lava olaga. Valaaulia i latou, a o latou suesueina le Mareko 4–9i le vaiaso a sau, e vaavaai mo ni auala e maua ai le filemu i ni taimi o luitau.