Potutusi
Lesona 87: Galuega 8

Lesona 87

Galuega 8

Folasaga

O sauaga e faasaga i le Ekalesia i Ierusalema na mafua ai ona faasalalauina tagata o le Ekalesia ia Iutaia Sa galue Filipo i Samaria, lea sa toatele tagata e talia le talalelei a Iesu Keriso. Ina ua uma ona faaee atu e Peteru ma Ioane le meaalofa o le Agaga Paia i luga o tagata faatoa liliu mai, sa taumafai se faataulaitu e igoa ia Simona e faatau mai le perisitua. Sa taitai mulimuli ane e le Atua ia Peteru i se taitai Aitiope lea na aoao atu ai e Filipo e uiga ia Iesu Keriso ma papatisoina.

Fautuaga mo le Aoaoina Atu

Galuega 8:1–25

Ua galue Filipo i Samaria, lea na taumafai ai Simona le faataulaitu e faatau mai le perisitua

Faaali ni nai tupe. Fai i le vasega e manatu e faapea sa latou mauaina se tupe tele.

  • O le a se mea o le a e faatauina i le tupe?

Tau i ai o nisi tagata e talitonu e mafai ona faatau i tupe soo se mea. Peitai, e i ai ni mea aupito taua i le olaga e le mafai ona faatauina. Valaaulia le vasega e vaavaai a o latou suesueina le Galuega 8 mo se meaalofa mai le Atua e le mafai ona faatauina.

Faamanatu i le vasega o le Galuega 7ua tatou aoao ai e uiga i le maliu o le soo o Setefano i lima o le au faaoosala. Valaaulia ni tamaiti aoga e feauauai i le faitauina leotele o le Galuega 8:1–5. Fai i le vasega e mulimuli ai, ma vaavaai mo mea na faia e tagata o le Ekalesia ona o sauaga faasaga i le Ekalesia i Ierusalema. Atonu e te manao e faamatala o le fetoso(Galuega 8:3) o lona uiga o le tatoso po o le toso.

  • O le a le mea na faia e tagata o le Ekalesia ona o sauaga?

Tatai le vasega i le igoa oFilipo i le fuaiupu 5. Faamanatu i le vasega o Filipo o se tasi o soo e toafitu na faauuina e fesoasoani i Aposetolo e Toasefululua e galulue mo mea o manaomia e tagata o le Ekalesia (tagai Galuega 6:5). Fai i le vasega e tagai i le tufaaga o le “Vaaiga Aoao i Galuega a Aposetolo” (tagai i le faaopoopoga o lenei tusitaiala) ma sue ai le poloaiga a le Faaola o loo tusia i le Galuega 1:8.

  • E tusa ai ma le Galuega 8:5, na faapefea ona amata e Filipo ona faataunuu le poloaiga a le Faaola?

Valaaulia se tamaitiiti aoga e faitau leotele le Galuega 8:6–8. Fai atu i le vasega e mulimuli i le faitauga, ma vaavaai pe na faapefea ona tali atu tagata Samaria i le talaiga a Filipo.

  • Na faapefea ona tali atu tagata Samaria i le talaiga a Filipo?

  • E le gata i le talai atu o le talalelei, o a isi galuega na faia e Filipo?

Valaaulia se tamaitiiti aoga e faitau leotele le Galuega 8:9–11. Fai atu i le vasega e mulimuli i le faitauga, ma vaavaai mo le faamatalatalaina o se tagata Samaria e igoa ia Simona.

  • O le a se mea ua tatou aoao e uiga ia Simona mai i nei fuaiupu? Faamatala o le “faaaogaina o le mana e maua mai i le fesoasoani po o le pulega a agaga leaga e taua o le faataulaitu” [Bruce R. McConkie, Doctrinal New Testament Commentary, 3 vols. (1965–73), 2:82].)

  • O le a le faatosinaga na faia e Simona i tagata?

Valaaulia se tamaitiiti aoga e faitau leotele le Galuega 8:12–13. Fai atu i le vasega e mulimuli i le faitauga, ma vaavaai pe na faapefea ona tali atu Simona i le talaiga a Filipo. Fai atu i tagata aoga e lipoti mai mea ua latou mauaina.

  • E tusa ai ma le fuaiupu 13, na faapefea ona aafia ia Simona i “vavega ma faailoga” na ia vaai i ai?

Aotele le Galuega 8:14–16i le faamatala atu o Peteru ma Ioane na o mai i Samaria ina ua faalogo ua talia e tagata iina le afioga a le Atua. Sa la tatalo ina ia maua e tagata Samaria ua liliu mai le meaalofa o le Agaga Paia.

Fai i le vasega e faitau filemu le Galuega 8:17ma vaavaai mo mea na faia e Peteru ma Ioane mo tagata fou o le Ekalesia i Samaria.

  • O le a se mea ua mafai ona tatou aoao mai i lenei tala e uiga i le ala na tuuina atu ai le meaalofa o le Agaga Paia? A maea ona tali mai tamaiti aoga, tusi le aoaoga faavae lea i le laupapa: O le meaalofa o le Agaga Paia e faaee atu pe a uma le papatisoga e ala i le faaee atu o lima o e umia le perisitua ma ua faatagaina.

Valaaulia se tamaitiiti aoga e faitau leotele le Galuega 8:18–19. Fai atu i le vasega e mulimuli i le faitauga, ma vaavaai mo le mea na ofo atu e Simona ia Peteru.

  • O le a le ofo na tuu atu e Simona ia Peteru?

Faaali i le vasega le tupe na e faaalia i le amataga o le lesona. Valaaulia i latou e mafaufau pe na semanu e faapefea ona latou tali atu ia Simona pe ana faapea sa latou i ai i le tulaga o Peteru.

Valaaulia ni nai tamaiti aoga e feauaua’i i le faitauina leotele mai o le Galuega 8:20–24. Fai i le vasega e mulimuli i le faitauga, ma vaavaai mo mea na aoao atu e Peteru ia Simona e uiga i le mauaina o le perisitua.

  • O le a le mea na aoao atu e Peteru ia Simona e uiga i le perisitua, e pei ona tusia i le fuaiupu 20?

  • Ina ua ia ofoina atu i Aposetolo le tupe e fesuiai ai ma le mauaina o le perisitua, o le a le mea na lei malamalama i ai Simona e uiga i le perisitua? (Ona o le perisitua e a le Atua ia, e mafai ona faaee atu i le na o le tusa ai ma Lona finagalo. Ua faatuina e le Atua le auala e mafai ai ona mauaina le perisitua.)

  • E tusa ai ma le fuaiupu 21–23, aisea na le mafai ai e Simona ona maua le perisitua? E te manatu na faapefea ona “le tonu le loto [o Simona] i luma o le Atua”? (fuaiupu 21).

  • O le a se mea ua mafai ona tatou aoao mai i lenei tala e uiga i le mauaina o le perisitua? (E ono faaaoga e le vasega ni upu eseese, ae ia mautinoa latou te faailoa maia le upumoni lea: O le perisitua e faaee atu e tusa ai ma le finagalo o le Atua ma tulaga faatonuina o le agavaa. Tusi le upumoni lenei i luga o le laupapa.)

  • Aisea e te manatu ai e taua ona iloa o le perisitua e faaee atu i luga o tagata taitoatasi i le na o le tusa ai ma le finagalo o le Atua ma tulaga faatonuina o le agavaa?

Aotele le Galuega 8:25i le faamatalaina e faapea na talai atu e Peteru ma Ioane le talalelei i le tele o nuu o Samaria.

Galuega 8:26–40

Ua aoao atu e Filipo ma papatiso se auauna sili Aitiope

Fai i le vasega e mafaufau i tulaga sa latou manaomia ai pe o le a manaomia ai se tagata e taiala i latou.

  • O a ni tulaga e mafai ona avea ai oe o se taiala mo se isi tagata? (E mafai ona e valaaulia tagata e mafaufau i taunuuga po o mataupu latou te malamalama lelei i ai po o taleni ua latou atinaeina.)

Valaaulia le vasega e vaavaai a o latou suesueina le vaega o totoe o le Galuega 8mo se auala taua e mafai ona latou taiala ai isi.

Valaaulia se tamaitiiti aoga e faitau leotele le Galuega 8:26–28. Fai i le vasega e mulimuli ai, ma vaavaai pe aisea na alu ai Filipo i Kasa.

  • Aisea na alu ai Filipo i Kasa?

  • O ai sa faimalaga i le itu lea na i ai Filipo? (O se eunike Aitiope. Faamatala o le eunike o se auauna sili i le maota o se tupu po o se masiofo [tagai Bible Dictionary, “Eunuch”].)

  • O le a le mea a le auauna sili Aitiope sa faia i le nofoa faataavale? (Sa ia faitauina mai le Isaia, po o upu a Isaia.)

Tuu ni nofoa se lua e faafesagai i luma o le potu. Fesili mo ni volenitia se toalua e faatinoina matafaioi a le auauna sili Aitiope ma Filipo i le tala e sosoo mai. (Atonu e te manao e tofi ia matafaioi ia a o lei amataina le vasega ma valaaulia tagata nei e sauniuni e faatino a laua vaega. Fai i le tagata o loo fai ma auauna sili Aitiope e nofo i le isi nofoa a o le tagata o loo fai ma Filipo e tu i autafa o le faitotoa. Valaaulia se tagata lona tolu e faatino le matafaioi a le faamatala.

Fai i tagata na e faitau leotele mai le Galuega 8:29–39 ma faatino mai a laua vaega. Fai i le vasega e mataitu le mea na tupu i le va o Filipo ma le auauna sili Aitiope. A o faitau ma faatino mai e tamaiti a laua vaega, fai mea nei:

  1. A uma ona faitau e le faamatala ia fuaiupu 32–33, valaaulia le vasega e fuafua e tusi le Isaia 53:7–8 o se mau fefaasinoai i a latou tusi paia i autafa o le Galuega 8:32–33.

  2. A uma ona faitau e le faamatala le fuaiupu 35, fai i le tagata na faatinoina le matafaioi a Filipo e faamatala i le vasega le mea o le a ia aoao atu e uiga i le Faaola i le tulaga lea. (Atonu e te manao e valaaulia le vasega e aumai foi ni a latou fautuaga.)

  3. A faitau e le faamatala le fuaiupu 38, fai faalelei atu i le au volenitia e aua nei faatinoina le faiga o le papatisoga.

A uma ona faatino e volenitia le gaoioiga lea, faafetai atu i ai ma fai i ai e toe foi i o laua nofoaga.

  • E tusa ai ma le fuaiupu 29, aisea na alu ai Filipo i le nofoa faataavale o le auauna sili Aitiope?

  • E tusa ai ma lefuaiupu 31, o le a le mea na fai mai le auauna sili e na te manaomia ina ia malamalama ai i tusiga a Isaia?

  • E tusa ai mafuaiupu 35–38, na faapefea ona avea Filipo ma taiala i le auauna sili?

  • O le a le mataupu faavae e mafai ona tatou aoao mai i le aafiaga o Filipo e uiga i taunuuga o le usitai i uunaiga mai le Atua? (E ono faaaoga e le vasega ni upu eseese ae ia mautinoa e manino e faapea a tatou usiusitai i uunaiga mai le Atua, e mafai ona tatou maua le avanoa e fesoasoani ai e taiala isi ia Iesu Keriso. Tusi le mataupu faavae lenei i luga o le laupapa.)

Tuu atu i le vasega ni kopio le tufaaga lea. Valaaulia le vasega e mulimuli i faatonuga o i le tufaaga ma mafaufau i auala e mafai ai ona latou taialaina se tasi ia Iesu Keriso. Faamatala o le a latou maua se avanoa e faasoa atu ai i le vasega mea ua latou tusia.

Ata
tufaaga

Taialaina o Isi ia Iesu Keriso

Tusi lesona a le Faiaoga Seminare o le Feagaiga Fou—Lesona 87

Filifili se tasi o tulaga nei:

  • O se alii talavou lua te uo e auai i se isi ekalesia Kerisiano. I se tasi aso i le malologa, na uunaia ai oe e talanoa atu ia te ia e uiga i le Ekalesia.

  • A o lua savavali i le fale mai le aoga, na e vaai i se tamaitai talavou o tagi. Na e iloa atu o ia o se tasi o lau uarota e lei toe sau i sauniga lotu mo le tele o tausaga. Ua uunaia oe e te talanoa ia te ia. A o e taumafai e faamafanafana ia te ia, sa ia faamatala atu ona luitau ma fesili, “Aisea ua le mafai ai ona na ona ou fiafia?”

  • Na maliu talu ai nei le tina o se alii talavou lua te fesootai i le upega tafailagi. Ua uunaia oe e te tali atu i lana tusiga talu ai nei: “Ua lagona lava le tuuatoatasi i le taimi nei. Maimau e pe ana i ai se tasi e malamalama.”

I tua o le fasipepa lea, po o lau api po o le api talaaga mo le suesueina o tusitusiga paia, tusi ai sau tala ma le mea e te faia e fesoasoani ai e taialaina lea tagata ia Iesu Keriso. I lau faamatalaga, ia aofia ai tali i fesili nei:

  • O a upumoni o le talalelei e te fia faasoa atu e fesoasoani ai e taiala lenei tagata ia Iesu Keriso?

  • O le a se mau se tasi e te ono valaaulia ai lenei tagata e suesue i ai?

  • O le a se mea o le a e valaaulia ai lenei tagata e fai?

© 2015 Puletaofia e le Intellectual Reserve, Inc.Ua taofia aia tatau uma.

A uma ua lava se taimi, vaevae le vasega i ni paga. Valaaulia le vasega e faamatala i a latou paga mea na latou tusia ma pe aisea o le a latou faia ai lena mea. Ona valaaulia lea o ni tagata e faamatala i le vasega atoa mea sa latou tusia. E mafai ona e fuafua e valaaulia tagata na filifilia se tasi o tulaga e lua muamua e faatino ia mea o le a latou fai atu ai ma fai i nei tulaga, ae faatino e oe le vaega a le tagata lea o loo latou taumafai e fesoasoani i ai. (A outou faia, tuu i tagata se minute e sauniuni ai a o lei valaauliaina i latou e faatino ia taga o le tulaga faatasi ma oe.) Ona fai atu lea i le vasega ia fesili nei:

  • O anafea ma na faapefea ona e fesoasoani e taiala se tasi i a Iesu Keriso?

  • O anafea ma pe na faapefea ona fesoasoani se tasi e taiala oe ia Iesu Keriso?

Fautuaina le vasega e usitai i uunaiga mai i le Atua ina ia mafai ai ona taitai i latou i tagata e mafai ona latou fesoasoani e taiala ia Iesu Keriso. Valaaulia tagata e mafaufau pe o a mea e mafai ona latou faia i nai aso a sau e fesoasoani ai e taiala se tasi latou te iloa ia Iesu Keriso. Fautuaina tagata e toe lipoti atu i le vasega mea ua latou iloa.

Tala ma Faamatalaga o Talaaga

Galuega 8:18–23. Mauaina ma le faaaogaina o le perisitua

Sa faamatala e Peresitene James E. Faust o le Au Peresitene Sili le ala e eseese ai le mauaina o le mana o le perisitua ma le ala e maua ai le mana po o le pule faalelalolagi:

“O lenei mana silisili o mana uma, le mana lea o le perisitua, e le pei o le auala o loo faaaogaina ai malosiaga i le lalolagi. E le mafai ona faatauina mai pe faatauina atu. … O le toatele o outou ua outou vaavaai ma le maofa i nisi o tagata taaalo lauiloa, ma nisi foi o i latou ua latou faaaogaina le tamaoaiga, lauiloa, upufai, ma le malosi faavaegaau. O le malosiaga faalelalolagi e masani ona faaaogaina ma le saua. Ae peitai, o le mana o le perisitua ua faaaogaina ia na o mataupu faavae lava o le amiotonu lea e puleaina ai le perisitua”(“Pule o le Perisitua,” Ensign, May 1997, 43).

Na taua e Peresitene Gordon B. Hinckley:

“O le agavaa patino ua avea ma tulaga faatonuina o le agavaa e maua ai ma faaaoga ai lenei mana paia” (“O Le Agavaa Patino e Faaaoga ai le Perisitua,” Ensign, May 2002, 52).

Galuega 8:27–38. Taialaina o isi ia Iesu Keriso

Na saunoa mai Elder Jeffrey R. Holland o le Korama a Aposetolo e Toasefululua e uiga i le taua o le taialaina o isi i le Faaola:

“Mo i tatou taitoatasi ia ‘o mai ia Keriso’ [MF&F 20:59], e tausia Ana poloaiga ma mulimuli i Lana faataitaiga e toe foi atu ai i le Tama, o le faamoemoega moni aupito maualuga lea ma le paia o le tagata soifua. Ina ia fesoasoani i isi e faia foi faapena—e aoao atu, faatauanau, ma taitai i latou ma le agaga tatalo e savavali i lena ala o le togiola—e tatau ona avea moni lena mea ma galuega lona lua aupito taua i o tatou olaga. Atonu o le mafuaaga lea na saunoa ai Peresitene Tavita O. MaKei i se tasi taimi, ‘E leai se tiutetauave sili atu e mafai ona tauave e se alii [po o se tamaitai] nai lo le avea o se faiaoga o fanau a le Atua’ [i le Conference Report, Oct. 1916, 57]” (“O se Aoao ua Maliu mai mai le Atua,” Ensign, May 1998, 25).