Lesona 5: Matalalaga ma le Vaaiga Aoao i le Feagaiga Fou
Lesona 5
Matalalaga ma le Vaaiga Aoao i le Feagaiga Fou
Folasaga
I le lesona lenei, o le a aoao ai e tagata aoao le matalalaga faasolopito ma faaleaganuu o le Feagaiga Fou, e aofia ai mea moni sa saofaga i le toatele o Iutaia na teenaina Iesu o le Mesia ma le Faaola. O le a aoao ai foi e tagata aoga le fausaga o le Feagaiga Fou.
Fautuaga mo le Aoaoina Atu
O matalalaga o le Feagaiga Fou.
Ata
faamatalaga o le atavali, Setefano
Ata
Ua Vaai Setefano ia Iesu i le Itu Taumatau o le Atua
Faaali se vaega o le ata Ua Vaai Setefano ia Iesu i le Itu Taumatau o le Atua (Tusi Ata o le Talalelei [2009], nu. 63; tagai foi LDS.org)i le faaaogaina o se pepa po o se isi mea e ufiufi ai mea uma o i le ata sei vagana ai ia Setefano (le tagata pulou lanumoana).
Valaaulia le vasega e faamatala mai le mea lea e tupu i leata. Fesili i ai pe aisea ua latou manatu ai o loo tu le tagata i le eleele ma falo atu lona lima. A uma ona tali mai le vasega, faailoa atu mea o totoe o le ata.
E fesoasoani faapefea le vaai i le ata atoa e te malamalama ai i le mea o loo tupu?
Valaaulia le vasega e faitau le faaulutala o le mataupu o le Galuega 7 ia malamalama ai o le ata lenei ua faaalia mai ai Setefano, o se soo o Iesu Keriso, na fetogia i maa ma maliu ai ma na vaai ia Iesu o tu i le itu taumatau o le Atua.
E mafai faapefea ona tatou faatusaina le aveesea o le ufiufi o lenei ata i le malamalama i tusitusiga paia?
Faamatala o lenei gaoioiga ua faapupula mai ai le taua o le malamalama i le matalalaga o tusitusiga paia. o le upumatalalagae faasino i tulaga o loo siosio ai pe aumaia ai le talaaga o se fuaitau o se mau, mea na tupu, po o se tala. Ta’u i ai a oo ina masani ia tagata aoga ma le matalalaga faasolopito ma faaleaganuu o le Feagaiga Fou, e mafai ona latou malamalama atili ma faaaoga ona aoaoga.
O taitai faalelotu o Iutaia i le taimi o le galuega a Iesu
Valaaulia se tamaitiiti aoga e faitau leotele le 2 Nifae 10:3–5. Fai i le vasega e mulimuli ai, ma vaavaai mo upu po o fasifuaitau na faaaoga e le perofeta o Iakopo e faamatala ai le tulaga faaleagaga o nisi o Iutaia i le taimi o le galuega a le Faaola.
O a upu po o fasifuaitau na faaaoga e Iakopo e faamatala ai le tulaga faaleagaga o nisi o Iutaia? (Faamatala le upu faitaulaga pepelo i le fuaiupu 5 e faasino i le talaiga e saili ai “oloa ma viiga o le lalolagi” ae le o le soifua manuia o le nuu o le Atua[2 Nifae 26:29]. O i latou na tausalaina o ni faitaulaga pepelo o taitai amioleaga faalelotu i Iutaia o e sa taitaiseseina tagata.)
Valaaulia se tamaitiiti aoga e faitau leotele le Mataio 23:16, 24. Fai i le vasega e mulimuli ai, ma vaavaai pe o faapefea ona faamatala e le Faaola nei taitai Iutaia faalelotu i le taimi o Lana galuega.
Na faapefea ona faamatala e le Faaola nei taitai Iutaia faalelotu?
O a mea na aoao mai e le Faaola e uiga i nei taitai i le faaigoaina o i latou o “taitai tauaso”?
O faaopoopoga i le tulafono a Mose ma isi filosofia pepelo
Ina ia fesoasoani i le vasega ia malamalama atili i le ala na taitaisese ai e taitai faalelotu ia tagata, tusi se li’o i luga o le laupapa ma tusi le Tulafono a Mose i lona totonugalemu. Tusi se isi li’o faataamilo i le li’o muamua ma faaigoa o le Tulafono Tuutaliga
Faamatala o le leai o ni perofeta, sa faaopoopo ai e aoao ma taitai Iutaia a latou lava tulafono ma faaliliuga i le tulafono. Sa lauiloa eseese o le tulafono tuutaliga, o uputuu tuutaliga, po o uputuu a toeaiina, o nei tulafono faaopoopo ma faaliliuga sa faamoemoe e puipuia mai ai le solia o le tulafono a le Atua. Ina ia faapupula atu se tasi o nei tulafono, valaaulia ni tagata se toalua e o mai i luma o le vasega. Tuu atu i ai se maea o i ai se faapona. Fai i se tasi o i la’ua e talatala le faapona e faaaoga ai na o le lima e tasi, ma fai i le isi e tatala le faapona e faaaoga ai lima uma e lua. A uma ona la taumafai e fai lea mea, valaaulia i laua e toe foi i o la nofoaga.
Faamatala e tusa ai ma le tulafono tuugutu, sa sa ona tatala se faapona i lima uma e lua i le Sapati. O le faia o lena mea sa manatu i ai o se galuega ma o lona uiga o le solia lea o le aso Sapati. Peitai, o le tatalaina o se faapona i le na o le lima e tasi sa faatagaina.
Mata o le a se tulaga matautia o le faaopoopo o tulafono e faia e le tagata i poloaiga a le Atua?
Valaaulia se tagata aoga e faitau leotele le saunoaga lenei a Elder Bruce R. McConkie o le Korama a Aposetolo e Toasefululua e faatatau i taitai Iutaia faalelotu:
Ata
Elder Bruce R. McConkie
“Sa latou ave mea manino ma le faigofie o talitonuga mama faalelotu ma faaopoopo i ai le anoanoai o a latou lava faaliliuga; sa latou faateleina i sauniga ma faatinoga faaopoopo; ma sa latou avea se ala fiafia, tausaafia o tapuaiga ma suia i se faiga faatapulaa, faasasa, ma lemautonu o sauniga faalelotu ma faatinoga. O le agaga ola o le tulafono a le Alii na oo ina avea i o latou lima o le mataitusi mate o sauniga faalelotu a Iutaia”(The Mortal Messiah, 4 vols. [1979–81], 1:238).
E tusa ai ma Elder McConkie, o le a le mea na fai e taitai Iutaia Faalelotu i le tulafono a le Atua ma a latou faaliliuga faaopoopo?
Ta’u i ai o Iutaia i ona po o Iesu sa i se tulaga o le liliuese. E ui o le pule ma sauniga o le Perisitua Arona sa latou faaauauina pea, o le toatele o tagata Iutaia na pauu ese mai faiga moni o a latou tapuaiga e pei ona sa faaalia e le Atua ia Mose (tagai MF&F 84:25–28). O uputuu a toeaiina sa mauaina le faamuamua nai lo tapuaiga mama ma le upu tusitusia a le Atua.
Valaaulia se tamaitiiti aoga e faitau leotele le Mataio 12:14 Fai i le vasega e mulimuli ai, ma vaavaai mo mea na mananao ia Faresaio e fai ia Iesu ona sa Ia le amanaiaina la latou pule ma nisi o a latou tu masani tuugutu.
O le a le mea na taupulepule nei taitai faalelotu e fai ia Iesu?
Faamatala e le gata i tu masani liliuese a Iutaia, ae na faatosinaina foi e isi filosofia sese ia le teenaina e tagata o Iesu Keriso ina ua mavae Lona Toetu. Mo se faataitaiga, o le faasalalauina o aganuu a Eleni lea na taitai atu ai le toatele o tagata e teena le moni o se toetu mai i le tino (tagai 1 Korinito 15:12). O lea, a o molimau atu Aposetolo i le Faaola toetu ina ua mavae Lona Faasatauroga, e toatele na teenaina a latou molimau.
O tulafono mai fafo ma le faatalitali atu i se Mesia e faasaolotoina ia Isaraelu
Tusi upu nei i luga o le laupapa: Papelonia, Peresia, Maketonia (Eleni), ma Roma.
E tusa ai ma Iutaia, o a mea na tutusa ai nei malo anamua? (Sa latou manumalo ma pulea ia Iutaia.)
Vaevae le vasega i ni vaega ma avatu i ai le tufaaga lea i vaega taitasi:
Vagana ai le periota tasi o le tutoatasi, e oo atu i taimi o le Feagaiga Fou o nonofo ia Iutaia o se nuu ua faatoilaloina mo le silia ma le 500 tausaga. O se fou na taitaina e le Au Makapi, o se aiga lotonuu o Iutaia, na taitaia seia oo ina tutoatasi pe tusa o le 160 tausaga a o lei soifua mai Keriso. Peitai, e oo atu i le taimi na soifua mai ai Keriso, ua faatoilaloina e Roma ia Isaraelu. O le Tupu o Herota (lea foi na lauiloa o Herota le Sili), lea sa faaipoipo atu i le aiga o le Au Makapi, sa tofia e Roma e pulea ia Isaraelu. Sa teena e Iutaia tulafono a Roma ma sa naunau atu mo se Mesia folafolaina lea na latou talitonu o le a faasaolotoina i latou mai tagata Roma. Talu ai e toatele Iutaia na faamoemoe i se Mesia o le a faasaolotoina i latou mai tulafono mai fafo, sa latou teenaina Iesu Keriso o lo latou Faaola.
Fai i le vasega e faitau le tufaaga ma talanoaina faavaega ia fesili nei (atonu e te manao e kopi fesili nei i luga o le laupapa).
O le a le mea na faamoemoeina e le toatele o Iutaia mai le Mesia o le a afio mai?
Aisea e te manatu ai o lenei faamoemoega pepelo na afua ai ona teena e le toatele o Iutaia ia Iesu o le Mesia?
Faamatala e ui ina sa teena e nisi Iutaia ia Keriso, o isi sa lotomaualalo ma nofouta faaleagaga na latou iloaina o Ia o le Mesia ma le Faaola.
Valaaulia ni nai tamaiti aoga e feauaua’i i le faitauina leotele mai o le Luka 2:25–33. Fai i le vasega e mulimuli ai, ma vaavaai mo mea sa faia e se tagata amiotonu e igoa ia Simeona ina ua avatu e Iosefa ma Maria ia Iesu i le malumalu o se pepe meamea.
E tusa ai ma fuaiupu 30–32, aisea na auina mai ai Iesu i le lalolagi? (E mafai e le vasega ona faaaoga ni upu eseese ae e tatau ona faailoa mai upumoni nei: Na auina mai Iesu e aumaia le faaolataga i tagata uma.)
O le a le mea na faia e Iesu e faatagaina ai tagata uma ia faaolaina?
Faaali le ata o Setefano lea na faaali i le amataga o le lesona. Fautuaina le vasega ia manatua le matalalaga faaleaganuu ma faasolopito sa outou talanoaina a o latou suesueina le Feagaiga Fou. A o latou faia, o le a sili ona latou malamalama i aoaoga a le Faaola ma Ana Aposetolo. (Mo nisi faamatalaga e uiga i le matalalga faasolopito ma faaleaganuu o le Feagaiga Fou, tagai i le “The Intertestamental Period” and “The New Testament Setting” in the New Testament Student Manual ([Church Educational System manual,2014], 1–3). O lenei anomea o loo aofia ai ni faamatalaga pupuu o vaega e pei o le au Samaria, au Faresaio, au Satukaio, au Saneterini, ma le au tusiupu).
O se muai vaaiga i le Feagaiga Fou
Ata
O Keriso o loo Faamaloloina le Tagata Ma’i i Petesa
Ta’u i le vasega o le a e faaalia se ata mo le 10 sekone ona e valaaulia ai lea o i latou e tusia se faamatalaga auiliili o mea sa latou vaai i ai. Faaali i le vasega leO Keriso o loo Faamaloloina le Tagata Ma’i i Petesa (Tusi Ata o le Talalelei, nu. 42; tagai foiLDS.org). A uma le 10 sekone, tuu ese le ata ae valaaulia le vasega e tusi a latou faamatalaga. A uma ua lava se taimi, fai atu i ni nai tagata o le vasega e faitau mai a latou faamatalaga i le vasega.
E ui sa outou vaai uma i le ata, aisea na eseese ai a outou faamatalaga?
Aisea e taua ai le i ai o ni molimau e sili atu i le tasi o se mea na tupu?
Tusi ia igoa o tusitala o Evagelia e fa i luga o le laupapa: Mataio, Mareko, Luka, ma Ioane. Faamatala o nei soo taitoatasi o Iesu Keriso, sa tusifaamaumauina mea na tutupu ma aoaoga mai le soifuaga o le Faaola. Ua faaigoaina a latou faamaumauga o Evagelia. O le upu talalelei o lona uiga o “tala e lelei.” Ta’u i ai o le Faaliliuga a Iosefa Samita ua suia ai le faaulutala o Evagelia taitasi i le molimau, e pei ona i ai i le “O Le Molimau a Sagato Mataio.”
Aisea e fesoasoani tele ai le sili atu o molimau nai le evagelia po o le molimau e tasi i le soifuaga ma aoaoga a Iesu Keriso?
Faamatala e ui ina eseese ia Evagelia e fa i ni nai faamatalaga ma vaaiga, ae o loo latou faitauina uma mea na tutupu i le soifuaga o le Faaola ma le galuega i le lalolagi i tagata Iutaia. O Evagelia uma e fa o loo molimau mai o Iesu Keriso o le Alo o le Atua ma le Faaola o le lalolagi (tagai Bible Dictionary, “Gospels”).
Atonu e te manao e avatu i le vasega ni kopi o le fatuga faapuupuu o le siata “O Le Soifuaga i le Ola Nei o Iesu Keriso i sina Tepa” o i le faaiuga o le lesona lenei. O le aoaoga o lenei siata o loo i le faaopoopoga o lenei tusi lesona. Valaaulia le vasega e faaaoga le siata e faailoa mai ai ni nai mea taua na tutupu i le galuega a le Faaola i le olaga nei.
E tusa ai ma le siata, o le a le umi o le galuega a le Faaola i le olaga nei?
O fea sa i ai le Faaola i le tele o Lana galuega?
Valaaulia le vasega e faaaoga le siata lea e malamalama atili ai i le matalalaga o Evagelia e fa a o latou suesueina le Feagaiga Fou.
Fai i le vasega e susue i le siata o anotusi o le Tusi Paia. Faamatala e ui o loo tuuina mai e Evagelia se tala i le galuega a le Faaola, o tusi mai le Galuega e oo atu i le Faaaliga o loo tusia ai le galuega a Aposetolo anamua a Keriso ina ua mavae Lona Faasatauroga, Toetu, ma le Afio Ae. Sa femalagaai nei Aposetolo i le nuu o Isaraelu ma le Malo o Roma e talai atu le talalelei ma faatutuina lala o le Ekalesia. O le suesue i galuega ma tusitusiga a nei Aposetolo, e mafai ai ona tatou faamalolosia lo tatou faatuatua i le Faaola ma aoao ai i le ala e maua ai faamanuiaga o Lona Togiola. E mafai foi ona tatou vaai i le latalata o le ogatusa o Le Ekalesia a Iesu Keriso o le Au Paia o Aso e Gata Ai ma le ekalesia anamua a Iesu Keriso.
Fuafua e molimau atu i upumoni sa e maua mai le suesueina o le Feagaiga Fou. Valaaulia le vasega e vaavaai mo upumoni o le a faamanuiaina ai i latou a o latou suesue i le Feagaiga Fou i lenei tausaga.
Tala ma Faamatalaga o Talaaga
O le vaitau i le va o le Feagaiga Tuai ma le Feagaiga Fou
Mo nisi faamatalaga e uiga i le faatulagaga faasolopito ma le faaleaganuu o le Feagaiga Fou, tagai S. Kent Brown ma Richard Neitzel Holzapfel, “The Lost 500 Years: Mai ia Malaki ia Ioane le Papatiso,” Ensign, Dec. 2014, 56–60; Robert L. Millet, “Looking beyond the Mark: Aisea na Le Taliaina ai e le Toatele le Mesia,” Ensign, July 1987, 60–64; ma Richard D. Draper, “O Le Moni o le Toetu,” Ensign, Apr. 1994, 32–40.
O Evagelia e Fa
Na faamatala e Elder Bruce R. McConkie o le Korama a Aposetolo e Toasefululua le tusiaina o Evagelia mo ni aofia eseese ae e tutusa le faamoemoega na tusia ai o le aoao atu e uiga i le paia o Iesu Keriso:
“E moni o evagelia e fa o le Feagaiga Fou e eseese itu o loo aumai ai o le uiga patino ma aoaoga a lo tatou Alii. E foliga mai na faasinotonu e Mataio lana evagelia i tagata Iutaia. Na ia tuuina mai le Keriso o le Mesia na folafolaina ma le Au Kerisiano o le faataunuuina o le faa-Iutaia. Na manino na tusia e Mareko ma le faamoemoe e tosina ai le mafaufau o tagata Roma ma Nuuese. O le evagelia a Luka o loo tuuina atu ai le Matai i Eleni, i e pupu i le aganuu ma le tauleleia. Ma o le evagelia a Ioane o le tala mo le au paia; o le aupito silisili o le talalelei mo le Ekalesia, mo i latou o e malamalama i tusitusiga paia ma o latou faatusa ma o e popole i mea faaleagaga ma faavavau. E iloagofie lava o ia faiga eseese e tele le aoga mo le tuuina atu o upumoni o le faaolataga i tagata o aganuu eseese, talaaga, ma aafiaga. O le mea moni faigofie, o tusitala uma o evagelia na tusia e ala i musumusuga, ma e tutusa uma o latou faamoemoega: 1. Ia molimau atu i le paia o le tulaga o le Alo o lo tatou Alii; ma le 2. Ia aoao atu ai upumoni o le ata o le faaolataga”(Mormon Doctrine, 2nd ed. [1966], 336).
O tusi o Galuega e oo atu i le Faaaliga
O le tusi o Galuega o loo tusia ai nisi o gaoioiga autu faafaifeautalai a Aposetolo. O tusi mai le Roma ia Iuta o ni tusi ia, po o tusi na tusia e Paulo ma isi taitai o le Ekalesia e faatonutonu ai ma faagaeetia le Au Paia. O tusi a Paulo o loo faatulagaina “i le uumi, i le faasologa agai i lalo mai le aupito umi (Roma) i le tusi aupito puupuu (Filemoni). O le tulaga lea vagana ai ia tusi i Eperu, lea sa tuu faamulimuli ona sa fesiligia e nisi pe na tusia e Paulo pe leai” (Bible Dictionary, “Pauline Epistles”). O tusi a Iakopo e oo i le Iuta e faasino o Tusi Lautele “aua e le o faasinotonu i se tagata e toatasi po o se lala patino o le Ekalesia” (Bible Dictionary, “General Epistles”). O le tusi o Faaaliga, ua faaigoaina foi o le Apokalifa, o loo i ai fautuaga patino a Ioane le Soo Pele i lala e fitu o le Ekalesia i Asia faapea foi o se faaaliga ia Ioane o loo aofia ai le talafaasolopito o le lalolagi, aemaise o aso e gata ai.
O a Evagelia e fa?
O Evagelia e fa o uluai tusi e fa o le Feagaiga Fou. Na tusia e Mataio, Mareko, Luka, ma Ioane, o loo i ai ia molimau e fa i le soifuaga faaletino o Iesu ma mea na tutupu i Lana galuega. I le tele o itu, o le tusi o le3 Nifaei le Tusi a Mamona e pei foi o Evagelia ma o nisi taimi e faasino ai “o le Evagelia Lona Lima.”
“O tusi o le Feagaiga Fou na muai tusia i le faa-Eleni. “O le upu Eleni mo letalalelei o lona uiga ‘o tala fiafia.’ O le tala fiafia o Iesu Keriso na faia se togiola o le a togiolaina ai tagata uma mai le oti ma tauia ai tagata taitoatasi e tusa ai ma [po o ana] galuega” (Taiala i Tusitusia Paia, “Gospels,” scriptures.lds.org).
O fea e mafai ona ou maua ai se ogatusa o tala i Evagelia e fa?
O se ogatusa o tala a evagelia e fa ma se siata o aoaoga faatusatusa a Iesu Keriso pei ona tusia i le Mataio, Mareko, Luka, Ioane, ma faaaliga o Aso e Gata Ai, e mafai ona maua i le faaopoopoga i le Tusi Paia.
