Lesona 86

Galuega 6–7

Folasaga

Na faauuina e Aposetolo ni soo se toafitu e fesoasoani i le galuega a le Alii. O Setefeano, o se tasi o i latou na filifilia, sa faatinoina vavega e tele. Sa tuuaia o ia e nisi o Iutaia i le upu leaga ma sa aumaia o ia i luma o le au Saneterini, o le mea sa faaliliuina ai o ia. Ina ua uma ona aoaia ia Iutaia i le teenaina o le Faaola, sa vaaia e Setefano le Tama Faalelagi ma Iesu Keriso. Ona tulieseina ai lea o ia i tuapa o le aai ma fetogia i maa.

Fautuaga mo le Aoaoina Atu

Faaaogaina o mataupu aoaoina

A e saunia se lesona, ia toe faamanatu ma le agaga tatalo le mataupu aoaoina faatasi ma au suesuega o le poloka mau. A o e faia, e mafai e le Agaga Paia ona fesoasoani ia te oe e faapatino le lesona i manaoga o tagata o lau vasega. E mafai ona e filifili e faaaoga ia fautuaga uma po o se vaega foi o mataupu aoaoina e aoao atu ai se poloka mau, pe e mafai foi ona e fetuunai ia manatu fautuaina ia tusa ai ma manaoga o lau vasega.

Galuega 6:1–8

E toafitu soo ua filifilia e fesoasoani i Aposetolo i le galuega

Valaaulia le vasega e mafaufau i se tasi i lo latou aiga, uarota, po o le nuu e i ai se luitau patino faaletino po o se manaoga.

• O a ni ou lagona pe a e mafaufau i lenei tagata ma ona tulaga o i ai?

• O le a sou manatu o a lagona o le Tama Faalelagi e uiga i nei tagata?

Valaaulia le vasega e vaavaai a o latou suesueina le Galuega 6:1–8mo le auala na saunia ai le Alii e faafetaiaia manaoga o Ana fanau.

Valaaulia se tamaitiiti aoga e faitau leotele le Galuega 6:1–2. Fai atu i le vasega e mulimuli i le faitauga, ma vaavaai mo le popolega na aumaia e le Au Elenisi mo le silafia e Aposetolo. O le Au Elenisi “o Kerisiano Iutaia e tautatala i le gagana Eleni,” a o Eperu “o Kerisiano-Iutaia Palesitina” (Tusi lesona a le Tagata Aoga o le Feagaiga Fou [Church Educational System manual, 2014], 288).

• O le a le atugaluga na faaalia e le Au Paia Elenisi?

Faamatala e faapea o le taimi lea, sa televave le tuputupu ae o le Ekalesia ma sa faapena foi i manaoga faaletino o le toatele o tagata, e aofia ai ma fafine ua oti a latou tane. Ona o Aposetolo sa nafa ma le folafolaina atu o le talalelei i “nuu uma” (Mataio 28:19), o lea sa le mafai ai ona latou taulima patinoina manaoga uma o tagata taitoatasi o le Ekalesia.

Valaaulia ni nai tamaiti aoga e feauauai i le faitauina leotele mai o le Galuega 6:3–6. Fai atu i le vasega e mulimuli i le faitauga, ma vaavaai pe na faapefea ona foia e Aposetolo lea faafitauli. Valaaulia tamaiti aoga e lipoti mai mea ua latou mauaina.

• O a uiga auaumama na tatau ona i ai ina ia agavaa ai e na filifilia e fesoasoani i manaoga faatupulaia o le Ekalesia? Atonu e te manao e fautua atu i tagata o le vasega e faailoga upu i le fuaiupu e 3 ma le 5 o loo faamatala mai ai nei uiga auaumama.)

• O faapefea ona tutusa lea faiga ma le mea o loo faia e le Alii i Lana Ekalesia i ona po nei ina ia mautinoa o loo faafetaiaia manaoga o tagata o le ekalesia? A maea ona tali mai tamaiti aoga, tusi le upumoni lenei i le laupapa: E valaauina tagata agavaa o le Ekalesia e fesoasoani e faatautaia manoaga o isi.

Valaaulia ni tagata e o mai i le laupapa ma tusi i lalo ia valaauga i le Ekalesia. Mo ni valaauga na latou lisiina, fesili:

• O manaoga o ai e faatautaia e tagata o e auauna faamaoni i lea valaauga?

• Aisea e te manatu ai e taua ona i ai uiga auaumama o loo taua i fuaiupu 3 ma le 5i tagata o e e tofia e fesoasoani i le faatautaiga o manaoga o isi?

Valaaulia tamaiti e faitau lemu le Galuega 6:7–8. Atonu e te manao e fautuaina i latou e maka ni taunuuga lelei e afua mai i le valaauga o nei soo e toafitu e auauna atu i isi. Fai atu i tagata aoga e lipoti mai mea ua latou mauaina.

Galuega 6:9–7:53

Ua aumaia Setefano i luma o le au Saneterini ma tautino atu ua latou teena le Mesia

Valaaulia ni nai tagata e tutu ma faataitai mai pe o a foliga pe afai o latou taumafai e teena le fesoasoani a se isi tagata i tulaga nei, tusa lava pe latou te manaomia le fesoasoani: faia o meaaoga, kukaina o se meaai, foiaina o se faafitauli tele i o latou olaga.

• Aisea tatou te teena ai le fesoasoani a isi i nisi taimi?

• O a taunuuga e mafai ona oo mai mai le teenaina o le fesoasoani a isi?

Tau i ai o se tasi o auala e fesoasoani mai ai le Tama Faalelagi ia i tatou e ala mai lea i le Agaga Paia. Valaaulia le vasega e vaavaai a o latou suesueina le Galuega 6:9–7:53mo taunuuga o le teenaina o le Agaga Paia.

Faamatala e pei ona tusia i le Galuega 6:9, o le toatele o tagata e lei talitonu ia Iesu Keriso sa faafinau atu ia Setefano a o ia aoao atu le talalelei. Valaaulia se tamaitiiti aoga e faitau leotele le Galuega 6:10–11. Fai i le vasega e mulimuli ai, ma vaavaai mo mafuaaga na aafia ai i latou o e sa faafinau atu ia Setefano. (Atonu e manaomia ona e faamalamalama atu o le faaupuga fai lemu atu i le fuaiupu 11 o lona uiga o le faapele.

• Na faapefea ona aafia tagata o e sa faafinau atu ia Setefano i ana aoaoga?

• O le a le mea na tuuaia ai Setefano?

Aotele le Galuega 6:12–14i le faamatala atu e faapea sa aumaia Setefano i luma o le aufono faatonu a Iutaia, e igoa o le au Saneterini.

Valaaulia se tagata aoga e faitau leotele le Galuega 6:15. Fai i le vasega e mulimuli ai, ma vaavaai mo mea na tulaga ese i foliga o Setefano a o ia tu atu i luma o le aufono.

• O le a sou manatu o le a le uiga e faapea na ia Setefano “fofoga o se agelu”? (fuaiupu 15). (Sa faaliliuina Setefano. O lenei faaliliuga paia o se tasi o auala sa faaalia ai e le Atua i tagata e faapea sa Ia faamaonia ia Setefano ma lana savali. [Tagai i le Bruce R. McConkie, Doctrinal New Testament Commentary, 3 vols. [1965–73], 2:67.])

Aotele le Galuega 7:1–50i le faamatala atu e faapea ina ia tali atu i tuuaiga e faasaga ia te ia, sa toe faamatala ai e Setefano sina vaega o le talafaasolopito o Isaraelu.

Valaaulia se tamaitiiti aoga e faitau leotele le Galuega 7:35–39. Fai i le vasega e mulimuli ai, ma vaavaai mo mea na fai atu ai Setefano e uiga i le faiga e Isaraelu o le perofeta o Mose.

• E tusa ma lefuaiupu 35,e faapefea ona tali atu le fanauga a Isaraelu ina ua sau Mose e laveai i latou mai Aikupito?

• Na faapefea ona latou tali atu ia Mose tusa lava pe ua uma ona ia laveaiina i latou (tagai fuaiupu 39)?

Faamanatu i le vasega o Iesu Keriso o le perofeta lea na valoia e Mose (tagai fuaiupu 37).

Valaaulia se tamaitiiti aoga e faitau leotele le Galuega 7:51–53. Fai i le vasega e mulimuli ai, ma vaavaai pe na faapefea ona faatusatusa e Setefano ia taitai Iutaia o ona taimi ia Isaraelu anamua sa ia faamatalaina.

• E tusa ai ma le fuaiupu 51, e tutusa faapefea ia taitai Iutaia o ona po o Setefano ma Isaraelu anamua na ia faamatalaina? (Na latou taufai teenaina le Agaga Paia. Faamatala o le “ua maaa ma ua le peritomeina i loto” e faasino i loto faamaualuga ma le agasala atoa ai ma le amioleaga o Iutaia.)

• E tusa ai ma le fuaiupu 52, o ai na teena ma sauaina e Iutaia anamua a o latou teenaina le Agaga Paia? (O perofeta, e aofia ai ma Mose.)

• O ai lea na taua e Setefano na teena e le aufono a Iutaia? (O “Le Amiotonu” [fuaiupu 52], o lona uiga o le Faaola.)

Faamatala e faapea na faapupula mai e Setefano e faapea e faapei lava ona sa teena ai e Isaraelu anamua le perofeta o Mose, sa faapena foi ona teena e taitai Iutaia i ona po o Setefano le Faaola.

• O le a le upumoni e mafai ona tatou aoao e uiga i le teenaina o le Agaga Paia? (E ono faaaoga e le vasega ni upu eseese ae e tatau ona faailoa mai se upumoni e pei o lea: O le teenaina o le Agaga Paia e mafai ona tau atu i le teenaina o le Faaola ma Ana perofeta.

• E mafai faapefea e le teenaina o le Agaga Paia ona taitai atu ai i tatou e teena ia aoaoga a le Faaola ma Ana perofeta? (Ua molimau mai le Agaga Paia ia Iesu Keriso ma molimauina le moni o Ana afioga ma upu a Ana perofeta. O le mea lea, o le teenaina o le Agaga Paia o le a faavaivaia ai le molimau a se tasi ma lana faaiuga e mulimuli i le Faaola ma Ana perofeta.)

Valaaulia le vasega e faamatala mai pe mafai faapefea ona faaosoosoina se tasi e teena le Agaga Paia i tulaga nei: (1) filifilia o mea faafiafia ma ala o fesootaiga,(2) filifili pe mulimuli i le fautuaga a perofeta i tafaoga faamasani, ma le (3) filifili pe faaaoga ia mataupu faavae o le salamo na aoao mai e Iesu Keriso ma Ana perofeta.

• O le a se mea e mafai ona tatou faia nai lo le teenaina o le faatosinaga a le Agaga Paia?

Valaaulia le vasega e mafaufau pe faapefea e le taliaina o le faatosinaga a le Agaga Paia ona taitai i latou e talia le Faaola ma Ana perofeta ma faaaoga a latou aoaoga.

Fautuaina le vasega e mafaufau i le mea e tasi e mafai ona latou fai i le vaiaso a sau e valaaulia lelei ai le faatosinaga a le Agaga Paia i o latou olaga. Valaaulia i latou e tusi le sini lea i a latou api po o api talaaga mo le suesueina o tusitusiga paia, ma fautuaina i latou e faataunuu lena sini.

Galuega 7:54–60

Ua fetogia Setefano i maa ma ua maliu ai

Tusi le upu puapuaga i le laupapa ma fesili i tamaiti aoga po o le a lona uiga. A uma ona latou tali mai, tusi le faauigaga lea i autafa o le upu: o se afuaga o se faafitauli tele po o se mafatiaga.

• E tatau i se a ona tatou manatu o le a i ai puapuaga a o avea ai ma soo o Iesu Keriso?

Fautuaina le vasega e vaavaai a o latou suesueina le Galuega 7:54–60 mo se mataupu faavae lea e mafai ona fesoasoani ia i tatou pe a tatou feagai ma puapauga.

Faamatala e faapea ina ua uma ona aoaia e Setefano ia taitai amioleaga o Iutaia, sa “lotoa i latou” (fuaiupu 54) ma ua lilivau o latou nifo.

Valaaulia se tamaitiiti aoga e faitau leotele le Galuega 7:55–56. Fai i le vasega e mulimuli ai, ma vaavaai mo mea sa oo i ai Setefano i le taimi lea o sauaga.

• O le a le faatosinaga na tumu ai Setefano?

• O ai na vaai i ai Setefano?

Ua Vaai Setefano ia Iesu i le Itu Taumatau o le Atua

Faaali le ata o Ua Vaai Setefano ia Iesu i le Itu Taumatau o le Atua (Tusi Ata o le Talalelei [2009], nu. 63; tagai foiLDS.org).

• O le a le aoaoga faavae autu e uiga i le Aigaatua e mafai ona tatou aoao mai i le tala i le faaaliga a Setefano? (E ono faaaoga e le vasega ni upu eseese, ae ia mautinoa latou te faailoa maia le aoaoga faavae lenei: O le Tama Faalelagi, Iesu Keriso, ma le Agaga Paia o ni tamalii mavaevae. Atonu e te manao e fautua atu i tagata o le vasega e tusi le faauigaga lenei i le laina o a latou tusi paia i autafa o le Galuega 7:55–56.

Valaaulia ni nai tamaiti aoga e feauauai i le faitauina leotele mai o le Galuega 7:57–60. Fai atu i le vasega e mulimuli i le faitauga, ma vaavaai po o le a le mea na faia e tagata ia Setefano. Valaaulia tagata aoga e lipoti mai mea ua latou mauaina.

• O le a se mea na tulagaese i le tatalo a Setefano?

• Aisea e te manatu ai na faamatala e Luka le maliu matautia o Setefano i le fasifuaitau “ona moe ai lea o ia”? (fuaiupu 60). (Ta’u i ai o lea fasifuaitau e ono faasino i se agaga amiotonu ua malolo mai faalavelave o le olaga ma le filemu ua momoli atu ai sea ituaiga o tagata mai lenei olaga i le isi [tagai MF&F 42:46].)

Valaaulia le vasega e mafaufau i mea na oo i ai Setefano a o lei aveina atu o ia ma fasiotia (tagai Galuega 7:55–56).

• Na faapefea ona faamalosia e le Atua ia Setefano i ona aafiaga uma ma le au Saneterini? (Sa faatumulia ia Setefano i le Agaga Paia ma sa ia vaai i le Faaola o tu i le itu taumatau o le Atua.)

• O le a le mataupu faavae e mafai ona tatou aoao mai i le aafiaga o Setefano lea e mafai ona fesoasoani ia i tatou e tumau faamaoni ia Iesu Keriso i taimi o puapuaga? E ono faailoa mai e le vasega ni mataupu faavae eseese, ae ia mautinoa latou te malamalama i le mataupu faavae lenei: Afai tatou te tumau faamaoni ia Iesu Keriso i le taimi o puapuaga, o le a faatasi o Ia ma i tatou.

• O a ni auala e mafai ai e le Alii ona faatasi ma i tatou a o tatou feagai ma puapuaga?

• E ui ina ua maumau le ola o Setefano, a o le a le mea na ia maua?

Faamatala ua faitaulia Setefano i se tulaga lautele o le muai maturo Kerisiano. E le gata i lea, e mafai ona vaai atu ia te ia o se ituaiga o Keriso, aua o i la’ua uma ma Keriso na tutu i luma o se aufono ina ia faamasinoina, tautino atu upumoni i mata o o la’ua fili, tuu atu o la’ua soifua i se mafuaaga amiotonu, ma e tutusa lava faaupuga na gagana atu ai ina o le a maliliu (tagai Luka 23:33–34, 46). Atonu e te manao e ta’u i ai o se taulealea e igoa ia Saulo—o le na mulimuli ane avea ma Aposetolo o Paulo—sa i ai o se molimau i le faamaturoina o Setefano (tagai fuaiupu 58).

Molimau atu i upumoni na aoao i lenei lesona atoa.

Tala ma Faamatalaga o Talaaga

Galuega 6:1–6. O i latou ua valaauina e fesoasoani i le Toasefululua i mataupu faaletino

E faapei foi ona valaauina e le Alii ia alii agavaa e fesoasoani i le Toasefululua e saunia mea mo manaoga faaletino o le Ekalesia e pei ona tusia i le tusi o Galuega, ua tofia ai foi e le Alii ia le Au Epikopo Pulefaamalumalu e fesoasoani i le Toasefululua i le saunia o manaoga faaletino o le Ekalesia i ona po nei. O le Au Epikopo Pulefaamalumalu ma ona fesoasoani e toalua e galulue i lalo o le taitaiga a le Au Peresitene Sili e faatautaia mataupu faaletino a le Ekalesia. O taulaga anapogi o se vaega taua o lenei polokalama ma e saunia ai e fesoasoani mo se taimi le tumau e lagolago ai le olaga mo e matitiva i le lalolagi atoa. (Mo nisi faamatalaga, tagai i le autu “Presiding Bishopric” i le mormonnewsroom.org.)

Galuega 6:15. Faaliliuina o Setefano

Na faamatala e Elder Bruce R. McConkie le mafuaaga na foliga mai ai foliga o Setefano i “foliga o se agelu” (Galuega 6:15):

“Na faaliliuina Setefano i o latou luma, o se molimau vaaia sa faatasi le Atua ma ia. I se tulaga e itiiti ifo, o Setefano e faapei o Mose, o le na [pupula] mai pau o ona fofoga ina ua uma ona ia talanoa ma le Alii mo aso e fasefulu i luga o le mauga. (Eso. 34:29–35.)” (Doctrinal New Testament Commentary, 3 vols. [1965–73], 2:67).

“O le teena o Setefano ma lana molimau, sa teena ai foi e taitai Iutaia le Atua, o le na tuuina atu se faailoga na iloagofie e faaalia ai Lona faamaonia o Setefano” (Tusi lesona a le Tagata Aoga o le Feagaiga Fou [Church Educational System manual, 2014], 289).

Galuega 7:56. “Atalii o le tagata”

“E silia ma le 80 mau faasino i le ’Atalii o le tagata’ i Evagelia e fa. E toetoe o taimi uma sa faasino ai Iesu ia te Ia lava i le faalaniga lenei. Atonu o le mafuaaga lena na ta’ua ai e Setefano le Faaola faapena—na manao o ia i le aofia ia iloa pe o ai moni lava Iesu Keriso. Mo nisi faamatalaga e uiga i le faalaniga ’Atalii o le Tagata,’ tagaiMose 6:57 ma faamatalaga mo le Mataio 8:20; 9:6; 10:23; 11:19; 12:8, 32, 40 ma mo le Mareko 14:53–65” (Tusitaiala a le Tagata Aoao o le Feagaiga Fou [Church Educational System manual, 2014], 291).