Ina ua uma ona taumamafa i le Paseka, sa mulumulu e Iesu ia vae o Ana Aposetolo ma faailoa atu o Iuta o ia lea o le a faalataina o Ia. E ui i le vaofilifili o le toe vaiaso o Lana galuega i le olaga nei, sa taulai atu e Iesu Ana aoaoga i le usiusitai, auauna atu ma le alofa---o uiga faaleatua na iloga ai Lona soifua ma e tatau foi ona iloga ai olaga o Ona soo i tupulaga uma.
Faitau leotele ia fesili nei, ma valaaulia le vasega e mafaufau pe faapefea ona latou taliina (faamatala latou te le tau tali leotele maia):
O gafea o le a e tuu ai oe lava i le fuafaatatau lea?
Pe e te manao ia sili atu lou fiafia nai lo le mea o e i ai nei?
Pe mafai ona e mafaufau i se tasi e te fia manao e fesoasoani i ai ia fiafia atili?
Valaaulia le vasega e vaavaai mo se mataupu faavae a o latou suesueina leIoane 13 o le a fesoasoani latou te iloa ai le mea e mafai ona latou faia ina ia fiafia atili ai:
Ina ia fesoasoani ia malamalama le vasega i le matalalaga o le Ioane 13, faamanatu i ai na faamanatuina e Iesu ma Ana Aposetolo le Paseka. Otooto le Ioane 13:1–3, i le faamatala atu a o taumamafa Iesu faatasi ma Ana Aposetolo i le tausamaaga mulimuli a o loma Lona Faasatauroga, sa silafia e Ia e le o toe mamao ona fasiotia lea o Ia ma toe foi atu i Lona Tama Faalelagi.
Valaaulia se tagata e faitau leotele le Ioane 13:4–5, ma fai i le vasega e mulimuli ai, ma vaavaai po o le a le mea na fai e Iesu ina ua uma ona taumamafa ma Ana Aposetolo i le tausamiga o le Paseka. Faamatala o le fasifuaitau ”ua tuu ese ona ofu” i le fuaiupu 4o lona uiga ua tuu ese e Iesu se laei i tua, e pei ona aveese e se tagata sona peleue i o tatou taimi.
O le a le auaunaga na faia e le Faaola mo Ona soo?
Faamatala faapea ”i ona po o le Feagaiga Fou, sa faaaoga e tagata ia seevae tosotoso, sa tele ina savavali i auala palapala e tumu ai otaota o manu, ma sa le maua i taimi uma ni vai e taeele ai. E matua palapala o latou vae, ma o le mulumuluina o vae o se tasi o galuega e inoino ai. … O lenei agaifanua o le talimalo e masani ona faatino e auauna aupito maualalo” (Tusitaiala a le Tagata Aoao o le Feagaiga Fou [Church Educational System manual, 2014], 242). I le taimi o le talisuaga mulimuli, ”Na tu lemu ane ai Keriso, fusi ia lava e pei ona faia e se auauna po o se pologa, ma tootuli e mulumulu vae o Aposetolo” (Jeffrey R. Holland, “He Loved Them unto the End,” Ensign, Nov. 1989, 25).
Pe ana fai sa e i ai iina a o mulumulu e Iesu vae o Ana Aposetolo, mata o le a sau mea e fai pe a amata ona mulumulu e Iesu ou vae?
O le a se mea ua faailoa mai i le gaoioiga o le mulumuluina o vae o Ana Aposetolo e uiga i le uiga o Iesu?
Valaaulia se tagata e faitau leotele le Faaliliuga a Iosefa Samita, Ioane 13:8 (i le faaopoooga i le Tusi Paia). Fai i le vasega e mulimuli ai, ma vaavaai po o le a le tala a Peteru ina ua amata e le Faaola ona mulumulu ona vae.
Valaaulia se tagata e faitau leotele le Faaliliuga a Iosefa Samita, Ioane 13:9–10 (i le faaopoopoga o le Tusi Paia). Fai i le vasega e mulimuli ai, ma vaavaai mo le tali a Peteru i le mea na ta’u atu ia te ia e le Alii.
O le a se mea ua tatou aoao mai e uiga ia Peteru mai lana tali, o loo tusia i le fuaiupu 9, i le mea na ta’u atu e le Alii ia te ia? (Na faaaloalo ia Peteru i le Alii ma sa manao e mulimuli atoa ia te Ia.)
Faamatala o le mulumuluina o vae o Ana Aposetolo, sa le gata ina faatino ai e le Faaola se galuega matagofie o le auauna atu, ae sa Ia faataunuu ai foi le tulafono a Mose ma faatuina ai se sauniga paia (tagai Bruce R. McConkie, Doctrinal New Testament Commentary, 3 vols. [1965–73], 1:708–9). O lenei sauniga na toefuatai mai i lo tatou tisipenisione e ala mai le Perofeta o Iosefa Samita (tagai MF&F 88:74–75, 137–41).
Valaaulia se tagata e faitau leotele le Ioane 13:11ma fai i le vasega e mulimuli ai, ma vaavaai pe aisea na fetalai atu ai Iesu i Aposetolo ua ”mama, ae le o outou uma.”
O ai na faasino i ai le Faaola ina ua Ia fetalai atu i Aposetolo ua ”mama, ae le o outou uma”? (O Iuta le Sekara, lea e le o toe mamao ona ia faalataina lea o Ia.)
Valaaulia ni nai tamaiti aoga e feauaua’i i le faitauina leotele mai o le Ioane 13:12–17. Fai i le vasega e mulimuli ai, ma vaavaai mo mea na aoao atu e le Faaola i Ana Aposetolo ina ua uma ona Ia mulumulu o latou vae.
E tusa ai ma le fuaiupu 13–16, o le a le faataitaiga na faia e le Faaola ma valaaulia Ana Aposetolo e mulimuli ai? (E ui o le Faaola o le ”Aoao ma le Alii” [fuaiupu 13], ma o le silisili i lo tagata uma, ae sa Ia auauna atu i isi.)
E fua i le folafolaga a le Faaola i Ana Aposetolo o loo tusia i le fuaiupu 17, o le a le faamanuiaga o le a tatou maua pe a tatou mulimuli i Lana faataitaiga e ala i le auauna atu i isi? (I le faaaogaina o a latou lava upu, e tatau ona faailoa mai e tamaiti se mataupu faavae e talitutusa ma lenei: Pe a tatou mulimuli i le faataitaiga a le Faaola e ala i le auauna atu i isi, o le a tatou fiafia.)
Aisea e te manatu ai o le a sili atu lo tatou fiafia pe afai tatou te auauna atu i isi e pei ona faia e le Faaola?
Fai i le vasega e mafaufau i se taimi na latou fiafia ai ona sa latou mulimuli i le faataitaiga a le Faaola e ala i le auauna atu i isi. Valaaulia ni nai tagata aoga e faasoa mai o latou aafiaga i le vasega. Atonu e te manao e faasoa atu se tasi o ou lava aafiaga.
Ina ia fesoasoani i tagata aoga ia malamalama i lenei mataupu faavae, valaaulia se tagata e faitau leotele le saunoaga lenei a Elder M. Russell Ballard o le Korama a Aposetolo e Toasefululua.
Ata
Elder M. Russell Ballard
”I a outou tatalo o le taeao i aso fou taitasi, ole atu i le Tama Faalelagi e taiala oe ia iloa se avanoa e auauna atu ai i se tasi o Ana fanau faapelepele. Ona e faagasolo lea i le aso faatasi ma lou loto ua faatumulia i le faatuatua ma le alofa, e saili mo se tasi e fesoasoani i ai. Afai e te faia le mea lea, o le a faateleina lou aafiaga faaleagaga ma e iloa ai avanoa e auauna atu ai lea ete lei iloaina e mafai” (“Be Anxiously Engaged,” Ensign po o le Liahona, Nov. 2012, 31).
E tusa ai ma Elder Ballard, e mafai faapefea ona tatou maua avanoa e auauna atu ai i isi?
Fautuaina le vasega e mulimuli i le faataitaiga a le Faaola e ala i le auauna atu i isi. Fuafua e valaaulia le vasega e sauniuni e lipoti mai o latou aafiaga i le auauna atu i isi i le taimi o isi vasega o i luma.
Otooto le Ioane 13:18–30, i le faamatala atu ina ua uma ona aoao atu e Iesu Ana Aposetolo o le a latou fiafia pe afai latou te auauna atu i isi, sa Ia fetalai o se tasi o i latou o le a faalataina o Ia. Ina ua fesili Ioane ia Iesu po o ai o le a faalataina o ia, sa ta’u atu e Iesu o se tasi o Ana Aposetolo (o Iuta) o le a faalataina o Ia.
Fesili i le vasega pe na i ai se tasi na tuuaia i latou e le o ni Kerisiano moni, pe o ni soo o Iesu Keriso, aua o i latou o tagata o Le Ekalesia a Iesu Keriso o le Au Paia o Aso e Gata Ai. Afai e i ai nisi e sii mai lima, fesili pe na faapefea ona latou tali atu i tuuaiga e le o i latou o ni Kerisiano. Afai e leai se tasi na oo i lea mea, fesili:
E faapefea ona e tali atu pe afai e fai atu se tasi e le o oe o se Kerisiano?
Valaaulia se tagata o le vasega e faitau leotele le Ioane 13:34–35. Fai i le vasega e mulimuli ai, ma vaavaai po o le a le fetalaiga a le Faaola o le a fesoasoani i isi e iloa ai o Aposetolo o soo o Iesu Keriso.
E tusa ai ma le fuaiupu 34, o le a le poloaiga na tuu atu e Iesu i Ana Aposetolo?
E tusa ai ma lefuaiupu 35, o le a se mea o le a iloa e isi pe afai e fealofani le au Aposetolo e pei ona alofa o Iesu ia i latou?
O le a se mataupu faavae e mafai ona tatou aoao mai aoaoga a le Faaola i Ana Aposetolo? (I le faaaogaina o a latou lava upu, e tatau ona faailoa mai e tamaiti aoga se mataupu faavae e talitutusa lava ma lenei: A o tatou alolofa atu i le tasi ma le isi, o le a iloa e isi o i tatou o Ona soo.)
E tusa ai ma mea sa outou suesueina i le tausaga e uiga ia Iesu Keriso, o a ni auala ua Ia faaalia ai e alofa o Ia i tagata?
Ina ia fesoasoani i le vasega ia lagonaina le moni ma le taua o le mataupu faavae sa faatoa o latou faailoa mai, valaaulia se tasi e faitau leotele mai le tala lea, na faamatalaina e Elder Paul E. Koelliker o le Fitugafulu:
Ata
Elder Paul E. Koelliker
”Sa tuitui ni faifeautalai talavou se toalua i se faitotoa, ma le faamoemoe e maua ai se tasi e taliaina le la savali. Sa matala le faitotoa, ma sa faafeiloai i laua e se tamaloa sa fai si tino tele, i se leo sa le fiafia: ‘Faapea lava na ou fai atu ia te oulua e aua ne‘i lua toe tuitui mai i lo‘u faitotoa Sa ou lapataia muamua oulua afai lua te toe foi mai, o le a oo loa i se aafiaga le lelei. O ese loa.’ Sa vave ona ia tapunia le faitotoa.
”A’o savavali ese atu faifeautalai, sa tuu e le faifeautalai matua atu, ma tele atu lona potomasani, lona lima i luga o le tauau o le faifeautalai laitiiti e faamafanafana ma faalototele o ia. Ma lo la le iloaina, o loo tilotilo mai le tamaloa ia i laua i se faamalama ina ia mautinoa ua la malamalama i lana tala. Sa manatu o ia, o le a ia vaaia i laua o talie ma ta’umamaina lana tali faalelelei i le la taumafaiga e asia o ia. Ae peitai, a’o ia molimauina le faaalia o le agalelei i le va o faifeautalai e toalua, sa vave lava ona faamaluluina ai lona loto. Sa ia toe tatalaina le faitotoa ma talosagaina ia faifeautalai e toe foi atu ma faasoa atu le la savali ia te ia.
“… O le mataupu faavae lenei o le alofa o le tasi i le isi ma le atiina ae o lo tatou gafatia ina ia taulai atu ia Keriso i le auala tatou te mafaufau ai, tautala ai, ma galue ai, e taua lea i le avea ai ma soo o Keriso (“He Truly Loves Us,” Ensign po o leLiahona, May 2012, 17).
Na faapefea e faifeautalai o i lenei tala ona mulimuli i le fautuaga a le Alii ia fealofani?
Valaaulia le vasega e usu le “Love One Another” (Hymns, no. 308), ma fai i ai e mafaufau i se tasi latou te iloa, e iloagofie lava o se soo o Iesu Keriso ona o lona alofa i isi. A uma ona usu le pese, valaaulia nisi e faasoa mai igoa o tagata sa latou mafaufau i ai, ma faamatala ni auala patino e faaalia ai e na tagata le alolofa mo isi. Fuafua e faamatala i le vasega se tasi sa e mafaufau foi oe i ai.
Faamalosia tagata aoga e tusi i a latou api o le vasega po o api talaaga mo le suesueina o tusitusiga paia, ni mea o le a latou faia ina ia alolofa atili ai i isi e pei ona alofa mai le Faaola ia i latou.
Otooto le Ioane 13:36–38, i le faamatala atu ina ua uma ona tautino atu e Peteru o le a ia ofoina atu lona ola mo Iesu Keriso, sa ta’u atu e Iesu ia Peteru o le a ia faafitia faatolu Iesu a o lei vivini moa.
Ata
aikona o mau tauloto
Faamanatuina o Mau Tauloto
Taitai le vasega i se suega mau e faaaoga ai faaataataga e fesoasoani ai e faataitai ona sue vave fuaitau i a latou tusitusiga paia. Mo faaataataga, e mafai ona e faaaogaina ia upu autu, faamatalaga o talaaga, aoaoga faavae ma mataupu faavae, ma le faaaogaaga mai kata o mau tauloto. E mafai foi ona fai a oe lava faaataataga. O gaoioiga o suega mau lea e taututuu ai tagata aoao e su’e fuaitau, e mafai ona fesoasoani latou te auai ai ma le mataalia i le aoaoina o fuaitau o mau tauloto. Pe a faaaoga gaoioiga o suega mau, fai i se auala e le matua’ia ai ni lagona tiga pe tausuai ai i le Agaga. Fesoasoani i tagata ia aloese mai le soona faia o a latou tusitusiga paia po o le ova tele foi o le lagona faatauva. Ia mafaufau foi e tuu atu i tagata aoga e tauva ma se tulaga faatonuina nai lo o le tasi ma le isi. Mo se faataitaiga, e mafai ona taututuu tagata aoao ma le faiaoga, po o le tuu atu foi ia i latou e taututuu e vaai pe mafai e se pasene faapitoa o le vasega ona maua se fuaitau faapitoa i se taimi faatulagaina.
Tala ma Faamatalaga o Talaaga
Ioane 13:1–17 O le mulumuluina e le Faaola o vae o Ona soo
Na faamatala e Elder Jeffrey R.Holland o le Korama a Aposetolo e Toasefululua faapea o le mulumuluina o vae o soo e le Faaola na faaalia ai Lona tuuto e le uma i Ona soo:
“I le totonugalemu o le Talisuaga Mulimuli], sa tulai filemu Keriso, ma fusi ia te ia i le ie soloi faapei, o se pologa po o se auauna ma tootuli e mulumulu vae o le Au Aposetolo’. (Tagai Ioane 13:3–17.) O lenei lio itiiti o tagata talitonu i lenei malo ua faavaeina ua lata ina sopo atu i o latou tofotofoga aupito matuia, o lea na tatau ai ona ia faataatia ese lona atu ua faateleina ina ia mafai ai ona toe auauna tasi ai ma faamalolosia i latou. E le afaina le leai o se tasi e mulumuluina ona aao. I le lotomaualalo faateleina na ia faaauau ai ona aoao atu i latou ma faamamaina. O le a oo lava i le toe itula—ma ona talaatu—e avea ai pea o ia ma a latou auauna” (“He Loved Them unto the End,” Ensign, Nov. 1989, 25).
Ioane 13:4–12 O le mulumuluina o vae o se sauniga o le talalelei.
Ua saunia e le Faaliliuga a Iosefa Samita se malamalamaaga faaopoopo i le mulumuluina o vae o le au soo: ‘O le tumasani lenei a tagata Iutaia e i lalo o la latou tulafono; o le mea lea, na faia ai e Iesu lenei mea ina ia faataunuuina ai le tulafono’ (Faaliliuga a Iosefa Samita, Ioane 13:10 [in the Bible appendix]).
Na aoao mai Elder Bruce R. McConkie o le Korama a Aposetolo e Toasefululua:
”O le taua atoatoa o lenei mea e le iloagofie e le tagata faitau faasamasamanoa, ma e le tatau ai lava, aua o le mulumuluina o vae o se sauniga paia e faia i nofoaga paia mo i latou e faaagavaaina i latou lava. Peitai, e iloagofie lava, o Iutaia e i ai foi a latou saungia paia e faia i lo latou malumalu, o se malamalama sa lei faasaosaoina, e le mafai foi, i soo se tusiga ua oo mai ia i tatou” (The Mortal Messiah, 4 vols. [1979–81], 4:38–39).
O se upu lapatai: E te le tau auiliilia tele le saunoaga lea a Elder McConkie e tusa ai ma le sauniga paia o le mulumuluina o vae o loo faia i malumalu ”mo i latou o e faaagavaaina i latou lava.” Manatua le lapataiga lenei mai ia Peresitene Spencer W. Kimball:
”O nisi taimi e fai ai e se tasi ni fesili pe taumafai e tautala e uiga i sauniga e le oo i ai lona malamalama ma e le aofia ai i lona tiutetauave. E faia e se faiaoga se taga faataumaoi i ana tagata aoao pe a ia faamumuina le fiailoa pe uunaia foi se talanoaga e uiga i na mea e le o se vaega o o latou olaga po o o latou poto masani---o faamanuiaga patino o loo ta’ua i mau, o avanoa patino ia e tapulaa e na o i latou e iai le pule faapitoa e tuu atu i ai e i latou o e ua i ai le pule faapitoa ma i lalo o ni tulaga faapitoa. … E atamai moni lava pe a tuu ai pea e o tatou faiaoga nei mataupu ma aua nei popole i ai, pe popole foi i ai tagata o le vasega” (“The Ordinances of the Gospel” [address to seminary and institute of religion faculty, June 18, 1962], 2–3).
Na ta’ua e Peresitene Thomas S. Monson e maua le fiafia mai le auauna atu i isi:
”Ina ia maua le fiafia moni, e tatau ona tatou sailia i se taulaiga e ese mai ia i tatou lava. E leai se tasi ua aoaoina le uiga o le ola ai seia vagana ua ofoina atu ia lava e auauna atu i ona uso a tagata. O le auauna atu i isi e aiga ma le tiute---o le faataunuuina o mea e aumaia ai le olioli moni (“Guideposts for Life’s Journey” [Brigham Young University devotional, Nov. 13, 2007], 4, speeches.byu.edu).
Ioane 13:23. ”Ua taoto ane foi i le fatafata o Iesu le tasi o ona soo”
”I ona po o Ierusalema, o i latou e talisua i talisuaga aloaia, e tele ina faatalaleu i nofoa malolo e tuu faataamilo i laulau, e faalagolago ifo o latou ulu i o latou lima agavale agai i le laulau ma o latou vae e u ese mai le laulau. O le mea lea, o le malo e nofo i le itu taumatau o le talimalo e faalagolago agai atu i le talimalo. E foliga mai la o le mea na nofo ai le Aposetolo o Ioane, ’ua taoto ane i le fatafata o Iesu,’ pe faatalaleu agai ia Iesu, i le taimi o le taligasua (faatusatusa Luka 16:22). O lea tulaga na mafai ai e Ioane, o le soo ’ua alofaina e Iesu,’ ona fai ni a la talatalanoaga patino ma le Faaola e le lagona mai e tagata uma i le tausamiga, e pei o lea na faatatau i le faalataina e Iuta (tagai Ioane 13:23–28)” (Tusitaiala a le Tagata Aoao o le Feagaiga Fou [Church Educational System manual, 2014], 242).
Na saunoa Elder Joseph B. Wirthlin o le Korama a Aposetolo e Toasefululua i le taua o le alofa ma le avea ma soo:
”O le alofa o le amataga, o le ogatotonu, ma le faaiuga o le ala lea o le avea ma soo. … I le iuga, o le alofa e taitaiina atu i tatou i le mamalu ma le maoae o le ola e faavavau. …
”Ina ua tuu atu e Iesu i Ona soo se poloaiga fou ’ia outou fealofani; pei ona ou alofa atu ia te outou’ [Ioane 13:34], na Ia tuuina atu ia i latou le ki atoa i le fiafia i lenei olaga ma le mamalu i le isi.
”O le alofa o le mea aupito silisili o poloaiga uma---o isi uma ua faapipii i ai. O la tatou tulimataiga o ni soo o le Keriso soifua” (“O Le Poloaiga Sili,” Ensign po o le Liahona, Nov. 2007, 28–29, 30–31).
Ina ua uma ona sii mai le Ioane 13:34–35, sa aoao mai e Elder M. Russell Ballard o le Korama a Aposetolo e Toasefululua:
”O le alofa na faamatala mai e le Faaola o se alofa e ola. E le faaalia e ala i ni galuega tetele ma le totoa ae o nai faatinoga faigofie o le agalelei ma le auauna atu” (“Mauaina o le Olioli e la i Auaunaga Alofa,” Ensign or Liahona, May 2011, 47).
Sa aoao mai Peresitene Dieter F. Uchtdorf o le Au Peresitene Sili:
”O le alofa o le uiga moni lea e iloa ai se soo o Keriso” (“O Le Alofa o le Atua,” Ensign po o le Liahona, Nov. 2009, 22).
