Ina ua tuua ia Filipi, sa aoao atu e Paulo ma Sila le talalelei i Tesalonia ma Perea. O sauaga mai tagata e le talitonu i nei aai na faamalosia ai ona sosola ia Paulo i Atenai, i le Mauga o Maresa, lea na ia aoao atu ai i tagata e uiga i le natura moni o le Atua.
Ua taumafai nisi o Iutaia i Tesalonia e taofi ia Paulo mai le folafola atu o le talalelei.
Valaaulia tamaiti aoga e faamatala mai po o a ni fautuaga o le a latou tuu atu i tagata o i tulaga nei:
Ua faalogologo se alii talavou o se tagata o le Ekalesia i se uso o le Korama a Aposetolo e Toasefululua o saunoa e uiga i le taua o le faaipoipoga ma le aiga i le fuafuaga a le Tama Faalelagi. Sa faaalia e uo a le alii talavou lo latou le ioeina o aoaoga a le Aposetolo. Ua manao le alii talavou e iloa mo ia lava pe moni ia aoaoga a le Aposetolo.
Ua fesiligia e se tamaitai talavou le taua o le tausia o le aso Sapati ia paia. O le toatele o ana uo e faaalu le Aso Sa e faatau ai ma momoe ae le o i le lotu. Ua faamatala e lona tina ia faamanuiaga e mafai ona maua mai i le faamamaluina o le Alii i le Aso Sa, ae o loo tauivi pea lava le tamaitai talavou e talitonu e faapea o le tausia o le paia o le aso Sapati e taua.
Valaaulia le vasega e vaavaai mo mataupu faavae a o latou suesueina le Galuega 17lea o le a fesoasoani latou te iloa ai mo i latou lava le moni o savali tatou te maua mai auauna a le Alii.
Faamatala na malaga ia Paulo ma Sila i Tesalonia lea na la aoao atu ai i le sunako o Iutaia. (Atonu e te manao e valaaulia ia le vasega e sue ia Tesalonia i Faafanua o le Tusi Paia nu. 13, “O Malaga Faafaifeautalai a le Aposetolo o Paulo.”) Valaaulia se tamaitiiti aoga e faitau leotele le Galuega 17:1–3. Fai i le vasega e mulimuli ai, ma vaavaai mo mea na faaaoga e Paulo ina ia aoao atu ai tagata Iutaia.
O le a le mea sa faaaoga e Paulo ina ia aoao atu ai tagata Iutaia?
Faamatala e faapea o le faasino atu (fuaiupu 3)o lona uiga o le faaali atu pe tautino atu. Sa faaaoga e Paulo ia fuaitau e tautino atu ai pe faaali atu ai o Iesu o le Keriso.
Valaaulia se tagata e faitau leotele leGaluega 17:4–5, ma fai i le vasega e vaavaai pe na faapefea ona tali atu tagata o Tesalonia i aoaoga a Paulo. Atonu e te manao e faamatala atu e faapea o le faaopoopoina uiga o le faapotopoto ma pe auai faatasi ma e tafafaovale o lona uiga o e amioleaga.
Na eseese faapefea ia tali a tagata i aoaoga a Paulo?
Aotele le Galuega 17:6–9i le faamatala atu sa taumafai se vaega faatupu faalavelave le talitonu e sue Paulo ma Sila. Ina ua le mafai ona latou mauaina i laua, sa o atu le au faatupu faalavelave i taitai o Tesalonia ma tau atu o aoaoga a Paulo ua faamatauina ai le pule a Kaisara.
Valaaulia se tamaitiiti aoga e faitau leotele le Galuega 17:10–12. Fai i le vasega e mulimuli ai, ma vaavaai po o fea na sosola i ai Paulo ma Sila. Valaaulia tamaiti aoga e lipoti mai mea ua latou mauaina.
E tusa ai ma le fuaiupu 12, na faapefea ona tali atu Iutaia i Perea i aoaoga a Paulo?
E tusa ai ma le fuaiupu 11, o le a le mea na muamua fai e tagata lea na tau atu ai i lo latou talitonuga i aoaoga a Paulo? (A uma ona tali mai le vasega, tusi le faamatalaga lea i le laupapa o le vaega muamua o le fuafaatusa: Sa latou taliaina upu a Paulo ma le fiafia tele.
Ina ia fesoasoani ia malamalama le vasega i le uiga o le “[taliaina] o le upu ma le fiafia tele,” aumai se polo i le vasega ma valaaulia ni tamaiti se toalua e o mai i luma o le vasega. Fai i le tasi o i laua e sauniuni e sapo le polo, ae faatonu le isi e togi le polo i le tagata muamua. A uma, fesili i le vasega pe na mafai faapefea ona latou iloa sa saunia le tagata muamua e sapo le polo.
O le isi, valaaulia le tagata muamua e faataitai lesaunia e sapo le polo ma ia tu ai pea faapena a o toe togi atu e le isi tagata le polo. Fai i le isi tagata e togi le polo (ae ia faaeteete aua nei i ai se manua). Fesili i le vasega pe mafai faapefea ona latou iloa e lei saunia le tagata muamua e sapo le polo. Fai i tagata ia e toalua e toe foi i o laua nofoaga.
Valaaulia le vasega e faataitai pe faapefea foliga o le saunia e talia ia upu a auauna a le Atua. Ona fai lea i ai e faataitai pe o a foliga o se tasi e leo saunia e talia upu a auauna a le Atua. (Mo se faataitaiga, atonu e tapuni e tagata a latou tusitusiga paia, talanoa i se tuaoi, pe faalavelaveina e mea faaeletonika.)
E ese mai i ona foliga vaaia, mata o le a se mea sa tupu i le loto ma le mafaufau o se tasi ua saunia e talia se savali o le talalelei?
Tatai le vasega i le avanoa lona lua i le fuafaatusa o i le laupapa.
E tusa ai ma le fuaiupu 11, o a isi mea na faia e tagata na tau atu ai i lo latou talitonuga i aoaoga a Paulo? (A uma ona tali mai le vasega, tusi le faamatalaga lea i le laupapa o le vaega lona lua o le fuafaatusa: Sa latou saili i tusi paia i lea aso ma lea aso ia malamalama ai i upu a Paulo.
O le a se mataupu faavae e mafai ona tatou aoao mai i le Galuega 17:10–12 lea e mafai ona faamalolosia ai o tatou talitonuga i upu a auauna a le Atua? (E ono faaaoga e le vasega ni upu eseese, ae ia mautinoa ua latou faailoa mai le mataupu faavae lenei: Afai tatou te talia ia upu a auauna a le Atua ma le fiafia tele ma saili i tusitusiga paia i aso taitasi, ona malosi ai lea o lo tatou talitonuga i a latou upu.
Toe iloilo ia tulaga e tolu o loo i le amataga o le lesona.
E mafai faapefea ona fesoaoani lenei mataupu faavae i tagata o i nei tulaga?
O a ni auala e mafai ai e le suesue i aso taitasi i tusitusiga paia ona tosina ai lo tatou tomai e talitonu i upumoni?
Valaaulia le vasega e mafaufau i taimi na latou molimauina ai le moni o lenei mataupu faavae. E mafai ona e valaaulia nisi o i latou e faasoa mai o latou aafiaga.
Fautuaina le vasega e talia upu a perofeta, taitai, faiaoga, ma matua ma le “fiafia tele” ma faitau tusitusiga paia i aso taitasi.
Aotele le Galuega 17:13–15i le faamatala atu e faapea ina ua faalogo ia tagata Iutaia i Tesalonia o loo folafola atu Paulo i Perea, sa latou o atu ma faaoso i tagata o Perea. Sa toe sola ia Paulo, ona ia malaga atu ai lea i Atenai.
Valaaulia le vasega e sue i Ata o le Tusi Paia, nu. 29, “Atenai,” i le faaopoopoga i le Tusi Paia. Tau i ai o le ata lenei o loo faaalia ai se tasi o le mau malumalu i Atenai na faaaoga e tapuai ai i atua pepelo. O totonu o nei malumalu sa i ai ni faatagata o nei atua na gaosia e tagata. I fafo sa i ai fatafaitaulaga sa ofo atu ai taulaga i nei atua pepelo.
Aotele le Galuega 17:16–21i le faamatala atu e faapea sa matua popole lava Paulo e uiga i le ifo i tupua i Atenai, ma sa ia aoao atu i sunako ma nofoaga faitele iina. Sa valaaulia e le au faafiapopoto ia Paulo e faamalamalama atu lana “mataupu fou” fuaiupu 19 i le aufono, lea sa fono i Areopako.
Valaaulia se tamaitiiti aoga e faitau leotele le Galuega 17:22–23. Fai i le vasega e mulimuli ai, ma vaavaai mo mea na matau e Paulo i se tasi o fatafaitaulaga a Atenai.
O le a le mea na vaaia e Paulo i luga o se tasi o fatafaitaulaga a Atenai?
Faamatala o le fuaiupu 22 o loo tusia ai e faapea na faaviivii atu Paulo i tagata Atenai i le faapea atu ua “sili la latou tapuai i atua,” o lona uiga sa tele lo latou faalelotu“ po o le “faaeteete i mea paia” (Galuega 17:22, vaefaamatalaga a). O le fatafaitaulaga “mo le atua e le iloa” fuaiupu 23 o le taumafaiga a Atenai e faafilemu se atua e le o iloa po o se isi lava atua e lei iloa se igoa. Sa manino lo latou le mananao e faatiga pe faatuatuanai soo se atua.
Tau i ai le fuaiupu mulimuli o le Galuega 17:23, ona fesili lea:
Aisea na taua ai e Paulo lenei fatafaitaulaga “mo le atua e le iloa”? (Sa ia faaaogaina e folasia atu ai le manatu o le Atua moni, le Tama Faalelagi, o le Atua sa latou le i iloa.)
Vaevae tamaiti i paga po o vaega laiti. Valaaulia vaega taitasi e saili i le Galuega 17:24–31 ni upumoni uma e mafai ona latou maua e uiga i le Atua e le i iloa e tagata o Atenai. A o latou suesue, lisi numera o fuaiupu taitasi (24--31) i le laupapa. A uma ua lava se taimi, valaaulia ni tagata e o mai i le laupapa e tusi se upumoni latou te mauaina i autafa o le numera o le fuaiupu sa latou mauaina ai. (Ina ia fesoasoani i le vasega e faailoa mai se upumoni i le Galuega 17:27, atonu e manaomia ona e faasino i latou i le Faaliliuga a Iosefa Samita Galuega 17:27, vaefaamatalaga b.)
E mafai foi ona e fautuaina ia maka e tamaiti upumoni taitasi i a latou tusi paia. O nisi o upumoni na latou lisiina i le laupapa e ono aofia ai mea nei:
Fuaiupu 29: Na foafoaina i tatou i le faatusa o le Atua.
Fuaiupu 30: Ua poloaiina e le Atua tagata uma ia salamo.
Fuaiupu 31: O le a faamasino i tatou e le Atua; o le a toe faatu mai e le Atua tagata uma mai le oti.
Valaaulia le vasega e filifili se upumoni se tasi o i le laupapa e taua ia i latou. Fesili i ni nai tagata e faasoa mai po o le fea upumoni na latou filifilia ma pe aisea e taua ai ia i latou.
Faasino i le aoaoga faavae“O i tatou o fanau a le Atua.”
O le a le uiga o le avea o se “fanau” a le Atua? (O i tatou o fanau agaga a le Tama Faalelagi.)
Aisea e matuai taua ai le malamalama i lenei aoaoga faavae? (E mafai ona fesoasoani tatou te iloa ai lo tatou taua e le uma i le Tama Faalelagi ma lo tatou gafatia e avea e faapei o Ia.)
O a faafitauli po o fenumiaiga e mafai ona tulai mai i le le malamalama i lenei aoaoga faavae?
Valaaulia se tagata o le vasega e faitau leotele le faamatalaga lenei a Elder Dallin H. Oaks o le Korama a Aposetolo e Toasefululua. Fai i le vasega e faalogologo pe aisea e tatau ai ona tatou manatua e muai vaai muamua ia i tatou lava o ni fanau a le Atua.
Ata
Elder Dallin H. Oaks
“Ia faaeteete i le ala e te faafoliga i ai oe lava. Aua e te faafoligaina pe faamatalaina oe lava i ni uiga auaumama e le tumau. Na pau lava le uiga auaumama e tasie tatau ona faamatalaina ai i tatou o le, o i tatou o se atalii po o se afafine o le Atua. O lena mea moni e sili atu i lo isi faauigaga uma e aofia ai lanu, galuega, uiga faaletino, mamalu, e oo lava i auga faalelotu”(“How to Define Yourself,” New Era, June 2013, 48).
Aisea e taua ai ona manatua o i tatou o ni fanau muamua ma aupito i taua a le Atua?
E faasino i le mataupu faavae “Afai tatou te naunau e saili le Atua o le a tatou iloa ai e le o mamao lava o Ia ma i tatou.”
O a ni auala e mafai ona tatou sailia ai ia iloa ma latalata atu i le Atua?
E mafai faapefea e le malamalama i la tatou sootaga ma le Atua ona aafia ai lo tatou manao e saili ia te Ia?
O anafea na elagonaina aile latalata atu o le Tama Faalelagi ia te oe?
Aotele le Galuega 17:32–34 i le faamatala atu e faapea o tagata Atenai sa filogia o latou manatu i le tauaina e Paulo “o le toetu mai o e ua oti” (fuaiupu 32). O nisi o i latou sa tauemu ia Paulo, o isi na mananao e faaalogo atili, a o nisi na talitonu.
Atonu e te manao e molimau atu e mafai e tamaiti aoga ona iloa ma malamalama i le Atua, tusa lava pe le iloa o Ia e le tele o tagata. Valaaulia le vasega e tusi le Mo Le Atua e Iloa i se fasipepa po o se kata ma lisi ni auala o le a latou sailia ma atiina ae ai se sootaga ma le Atua. Fautuaina i latou e tuu lea pepa i se mea o le a faamanatu atu ai ia i latou a latou sini.
“I Atenai, sa fetaiai ai Paulo ma tagata filosofia o le ituaiga o Epikuro ma Setoiki (tagai Galuega 17:18). O le ituaiga o Epikuro na faaigoa ia Epikuro (341–270 T.L.M.). E tusa ai ma lana filosofia, na faafuaveta ona i ai le lalolagi ma sa leai sona faamoemoega po o se mamanu. Sa talitonu le au Epikuro e faapea o atua, pe afai e i ai ni atua, e le faaaofiaina i latou lava i olaga o tagata ola ma e tatau ona maua le fiafia i le leai o ni mea e popole i ai ma tiga ma olioliga i fiafiaga e le soona faia.
“O le ituaiga o Setoiko na amata i aoaoga a se tagata e igoa ia Seno (333–264 T.L.M.). O le talitonuga faa-Setoiko o mea uma na foafoaina, faatulagaina, ma faagaoioia e se faautautaga faalelagi. Sa talitonu Setoiko e faapea o se tagata na faaeeina i se aloiafi o le faautautaga ma e ao ona saili ia ogatusa ma le faatulagaga paia o mea, faatoilalo tuinanauga, ma ola i se olaga tonu ma mama” (Tusi lesona a le Tagata Aoga o le Feagaiga Fou [Church Educational System manual, 2014], 315–16; tagai foi Bible Dictionary, “Epicureans,” “Stoics”).
Galuega 17:11. “Sa latou taliaina le upu ma le fiafia tele”
Sa aoao mai Peresitene Dieter F. Uchtdorf o le Au Peresitene Sili:
“O le faateleina o le liliu atu o o tatou loto ma mafaufau i le Atua, o le faateleina foi lena o le malamalama faalelagi e oo mai i o tatou agaga. Ma o taimi uma tatou te saili atu ai ma le naunautai ma le faamaoni i lena malamalama, tatou te faailoa atu i le Atua lo tatou saunia e maua atili le malamalama. E faasolosolo malie, o mea na muamua foliga mai e puaoa, pogisa, ma motutasi e oo ina manino, malamalama, ma tatou masani ai”(“Mauaina o se Molimau i le Malamalama ma le Upumoni,” Ensign po o le Liahona, Nov. 2014, 22).