undefined undefined Leksyon 12: Dugang nga mga Kasulatan sa Atong Panahon
Librarya
Leksyon 12: Dugang nga mga Kasulatan sa Atong Panahon


12

Dugang nga mga Kasulatan sa Atong Panahon

Pasiuna

Ang Ginoo nagpadayon sa paghatag og balaan nga mga instruksyon ngari kanato pinaagi sa pagpadayag sa Iyang pulong ug sa Iyang kabubut-on ngadto sa Iyang mga sulugoon pinaagi sa Espiritu Santo. Tungod kay ang Dios nagpadayon sa pagsulti ngadto sa modernong mga propeta, ang kanon sa kasulatan nagpabilin nga bukas. Ang dugang nga mga kasulatan nga gipagawas sa atong panahon—sama sa Hubad ni Joseph Smith sa Biblia ug sa basahon ni Abraham—nagkumpirma, nagpatin-aw, ug nagpadako sa atong pagsabut sa ebanghelyo.

Background nga Basahunon

  • Jeffrey R. Holland, “Ang Akong mga Pulong … Dili Gayud Mohunong,” Liahona, Mayo 2008, 91–94.

  • “Translation and Historicity of the Book of Abraham,” Gospel Topics, lds.org/topics.

  • Elizabeth Maki, “Joseph Smith’s Bible Translation: D&C 45, 76, 77, 86, 91,” serye sa Revelations in Context, Mar. 20, 2013, history.lds.org.

Mga Sugyot alang sa Pagtudlo

Mga kasulatan sa ulahing mga adlaw

Dapita ang mga estudyante sa paghunahuna nga ang usa ka higala sinsero nga nangutana, “Nganong ang mga Mormon daghan man og kasulatan gawas sa Biblia? Abi nako ang Biblia naglangkob sa kompleto nga pulong sa Dios.” Hangyoa ang mga estudyante sa pag-isa sa ilang mga kamot kon napangutan-an na sila og susama niini. Dapita ang pipila ka estudyante sa pagpaambit kon giunsa nila sa pagtubag ang pangutana ug unsay ilang gibati samtang mipamatuod sila sa mga kasulatan ngadto sa uban.

Isulat ang pulong nga kanon diha sa pisara. I-display ang mosunod nga mga pamahayag ni Elder Jeffrey R. Holland ug Elder Dallin H. Oaks sa Korum sa Napulog Duha ka mga Apostoles, ug hangyoa ang duha ka estudyante nga magpuli-puli sa pagbasa niini og kusog. Hangyoa ang klase sa pagpaminaw sa kahulugan sa pulong nga kanon diha sa konteksto niini nga mga pamahayag.

Elder Jeffrey R. Holland

“Ang ubang mga Kristiyano, sa kasagaran tungod sa ilang matinud-anong gugma sa Biblia, nag-ingon nga wala na gayuy laing awtorisado nga kasulatan gawas sa Biblia. Pinaagi sa pag-ingon nga ang awtorisadong hugpong sa kasulatan igo na, ang atong mga higala sa ubang tinuohan dili na modawat sa balaanong pahayag nga gihambin natong anaa sa Ang Simbahan ni Jesukristo sa mga Santos sa Ulahing mga Adlaw: ang Basahon ni Mormon, ang Doktrina ug mga Pakigsaad, ang Perlas nga Labing Bililhon, ug ang nagpadayon nga giya nga nadawat sa tinugotan sa Dios nga mga propeta ug mga apostoles” (Jeffrey R. Holland, “Ang Akong mga Pulong … Dili Gayud Mohunong,” Liahona, Mayo 2008, 91).

Elder Dallin H. Oaks

“Kadaghanan sa mga Kristiyano nagtuo nga ang Dios misira sa kanon sa kasulatan—ang katungod sa pagkolekta sa sagradong mga basahon nga gigamit isip mga kasulatan—sa wala madugay human sa kamatayon ni Kristo ug wala nay susamang mga pagpadayag sukad niadtong panahona. Si Joseph Smith mitudlo ug mipakita nga bukas pa ang kanon sa kasulatan [tan-awa sa Mga Pagtulun-an sa mga Presidente sa Simbahan: Joseph Smith (2007), 232]. …

“… Si Joseph Smith mitudlo nga ang Dios mogiya sa Iyang mga anak pinaagi sa paghatag og bag-ong pagdugang ngadto sa kanon sa kasulatan. Ang Basahon ni Mormon mao ang ingon nga dugang. Mao usab ang mga pagpadayag diha sa Doktrina ug mga Pakigsaad ug ang Perlas nga Labing Bililhon” (Dallin H. Oaks, “Importante sa Among Tinuohan,” Ensign, Ene. 2011, 33).

  • Unsay gipasabut sa mga pulong nga “kanon sa kasulatan”? (Kini ang “giila, gamhanan nga pagtipon sa sagrado nga mga basahon. Diha sa Simbahan ni Jesukristo sa mga Santos sa Ulahing mga Adlaw, ang kanonikal nga mga basahon gitawag og sumbanan nga mga kasulatan” [Giya ngadto sa mga Kasulatan, “Kanon,” scriptures.lds.org].)

  • Unsay gipasabut nga ang mga Santos sa Ulahing mga Adlaw mituo sa usa ka bukas nga kanon? (Bisan kon tingali mogamit sila og lain-laing mga pulong, siguroa nga nasabtan sa mga estudyante ang mosunod nga kamatuoran: Ang awtorisado nga pulong sa Dios wala masulod diha sa Biblia lamang [tan-awa sa Mga Artikulo sa Hugot nga Pagtuo 1:9].)

  • Unsay kalainan nga mahimo sa pagtuo nga ang Ginoo mopadayag gihapon og kasulatan ngadto sa mga propeta sa ulahing mga adlaw?

Doktrina ug mga Pakigsaad 42:56; 45:60–62; 76:15–19; 93:53; 94:10

Ang Hubad ni Joseph Smith sa Biblia

Isulat sa pisara ang mosunod nga kamatuoran:

Pinaagi ni Propeta Joseph Smith, ang Ginoo mipadayag og dugang nga kasulatan nga nagmatuod, nagpatin-aw, ug nagpalapad sa atong kahibalo sa kamatuoran.

Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 35. Hangyoa ang klase sa pagsunod ug sa pagpangita kon unsa ang gibuhat ni Propeta Joseph Smith ug Sidney Rigdon sa dihang nadawat nila ang pagpadayag nga nalakip niini nga seksyon.

  • Unsay gitrabaho ni Propeta Joseph Smith ug Sidney Rigdon sa dihang nadawat nila kini nga pagpadayag?

Aron makatabang sa pagpasabut kon unsa ang Hubad ni Joseph Smith sa Biblia, dapita ang usa ka estudyante sa pagbasa og kusog sa mosunod nga duha ka paragraph:

Niadtong ting-init sa 1830, ang Ginoo misugo ni Joseph Smith sa paghubad sa Biblia. Si Joseph Smith wala mohubad sa Biblia gikan sa usa ka pinulongan ngadto sa lain ug wala siyay orihinal nga manuskrito nga maoy trabahoon. Hinoon, si Joseph mibasa ug mituon og mga tudling gikan sa King James Version sa Biblia ug dayon mihimo og mga koreksyon ug mga pagdugang sumala sa pagdasig sa Espiritu Santo. Sa ingon, ang paghubad mas usa ka dinasig nga pag-usab kay sa usa ka tradisyonal nga paghubad.

Ang Hubad ni Joseph Smith nakaapekto og sobra sa 3,000 ka mga bersikulo sa King James Version nga Biblia. Kini nga mga kalainan naglakip sa mga pagdugang (aron maklaro ang kahulugan o konteksto o mapahiuli ang mapanagnaon nga mga sinulat, sama sa basahon ni Moises), pagtangtang, pag-usab sa han-ay sa mga bersikulo, ug hingpit nga pagpang-usab sa piho nga mga kapitulo. Alang sa dugang nga impormasyon sa Hubad ni Joseph Smith, tan-awa sa Bible Dictionary o sa Giya ngadto sa mga Kasulatan, “Hubad ni Joseph Smith (HJS).”

Kopyaha ang mosunod nga tsart diha sa pisara:

Doktrina ug mga Pakigsaad 45:60–62

Doktrina ug mga Pakigsaad 42:56, footnote a

Doktrina ug mga Pakigsaad 76:15–19

Doktrina ug mga Pakigsaad 93:53

Mga ulohan sa seksyon alang sa Doktrina ug mga Pakigsaad 35; 76; 77; 86; 91

Doktrina ug mga Pakigsaad 94:10, footnote b

Bahina ang klase ngadto sa duha ka grupo. Dapita ang matag grupo sa pagtuon sa materyal sa usa sa mga kolum, nga mangita og impormasyon mahitungod sa Hubad ni Joseph Smith sa Biblia. Human sa igong panahon, dapita ang mga estudyante sa pagreport kon unsay ilang nakat-unan. Dayon ipangutana ang mosunod:

  • Unsa kaha ang epekto sa buhat sa paghubad ngadto sa espirituhanong edukasyon ni Joseph Smith ug sa pagpahiuli sa mga kamatuoran sa ebanghelyo?

Aron matabangan ang mga estudyante nga magpasalamat sa epekto diha sa Simbahan sa buhat ni Joseph Smith sa paghubad sa Biblia, dapita ang mga estudyante sa pagpakli ngadto sa “Nagsunod-sunod nga Han-ay sa mga Sulod” (anaa sa sinugdanan sa Doktrina ug mga Pakigsaad) ug ipasabut nga ang Propeta mitrabaho sa paghubad sa dakong bahin gikan sa Hunyo 1830 hangtud Hulyo 1833. Dayon ipangutana:

  • Pila ka mga seksyon sa Doktrina ug mga Pakigsaad ang nadawat gikan sa Hunyo 1830 hangtud Hulyo 1833? (Ang Propeta nakadawat og 74 ka mga pinadayag nga nahimong kabahin sa Doktrina ug mga Pakigsaad sa niini nga panahon.)

Mahimo usab nimong ipasabut nga ang mga basahon ni Moises, Abraham, ug Joseph Smith—Mateo, nga tanan anaa sa Perlas nga Labing Bililhon, parte usab sa paghubad ni Joseph Smith sa Biblia ug nadawat atol niini nga panahon. Ang basahon ni Moises mao ang Hubad ni Joseph Smith sa unang walo ka mga kapitulo sa Genesis. Si Joseph Smith nahibalo kon unsa ka dako ang nawala gikan sa Biblia samtang naghubad siya sa mga bersikulo kabahin ni Enoch. Ang King James Bible naglangkob og 109 ka mga pulong mahitungod ni Enoch, ug ang Basahon ni Moises naglangkob og 5,240 ka mga pulong mahitungod ni Enoch.

  • Unsa ang masugyot sa daghang mga pinadayag nga nadawat niining panahona mahitungod sa tahas sa Hubad ni Joseph Smith diha sa Pagpahiuli?

  • Samtang magtan-aw kamo sa mga seksyon sa Doktrina ug mga Pakigsaad nga nadawat atol niini nga panahon, unsa ang pipila ka importante nga mga doktrina nga gipadayag niining panahona? (Ang mga ehemplo sa importanting mga doktrina nga gipadayag atol niini nga panahon makita sa mga seksyon 29, 42, 45, 76, 88, ug 93.)

I-display ang mosunod ug dapita ang usa ka estudyante sa pagbasa niini og kusog:

“Ang paghubad sa Biblia sa Propeta maoy importante nga bahin sa iyang kaugalingong espirituhanon nga edukasyon ug sa pagbutyag sa pagpahiuli sa ebanghelyo sa kamatuoran. Samtang nag-usab siya sa Daan ug Bag-ong Tugon, kanunay siya nga makadawat og mga pagpadayag nga nagpatin-aw o nagpalapad sa mga tudling sa kasulatan. Sa ingon niini nga paagi, ang Propeta nakadawat og daghang mga doktrina gikan sa Ginoo, lakip na niadtong makita karon diha sa Doktrina ug mga Pakigsaad 74, 76, 77, 86, ug 91, ug sa mga kabahin sa daghang uban nga mga seksyon sa Doktrina ug mga Pakigsaad” (Mga Pagtulun-an: Joseph Smith, 248).

Pagpamatuod nga ang Ginoo mipadayag og mahinungdanong porsyon sa Doktrina ug mga Pakigsaad isip direkta nga sangputanan sa buhat ni Joseph Smith sa paghubad sa Biblia. Mahimo usab nimong ipasabut nga ang mga porsyon sa Hubad ni Joseph Smith gidugang sa 1979 nga LDS edition sa King James Version sa Biblia, nga naghimo niining importante nga mga pinadayag nga mas magamit aron sa pagpanalangin sa mga kinabuhi sa mga miyembro sa Simbahan.

Ang basahon ni Abraham

Dapita ang mga estudyante sa pagbasa sa mga ulohan sa kapitulo sa basahon ni Abraham. Hisguti og kadiyot ang sulod sa basahon ni Abraham diha sa klase. Dayon ipasabut nga sa ting-init sa 1835 usa ka tawo nga ginganlan og Michael Chandler midala og upat ka Ehiptohanon nga mga mummy ug pipila ka linukot nga papyrus nga adunay karaan nga Ehiptohanong sinulat ngadto sa Kirtland, Ohio. Ang mga miyembro sa Simbahan mipalit sa mga mummy ug mga linukot nga papyrus. Bisan og ang tukma nga paagi sa paghubad wala masayri, si Propeta Joseph Smith mihubad sa pipila sa mga sinulat sa mga bulan human maangkon ang Ehiptohanon nga mga papyrus. Sugod sa Marso 1842, mga parte sa basahon ni Abraham gimantala sa usa ka pamantalaan sa Simbahan nga gitawag og Times and Seasons. Ang basahon ni Abraham sa wala madugay gimantala diha sa Perlas nga Labing Bililhon.

Ipaambit ang mosunod nga summary mahitungod sa pagtungha sa Basahon ni Abraham. Dapita ang mga estudyante sa pagpaminaw kon unsa ang atong nahibaloan kabahin sa proseso sa paghubad.

Usa ka komon nga pagsupak sa katinuod sa basahon ni Abraham mao nga ang mga manuskrito (papyri) dili igo ang ka karaan aron masulat ni Abraham, kinsa nagpuyo hapit 2,000 ka tuig sa wala pa si Jesukristo. Si Joseph Smith wala gayud mangangkon nga ang papyri gisulat mismo ni Abraham o nga kini gikan sa panahon ni Abraham. “Ang karaang mga rekord kasagaran ipadala isip mga kopya o mga kopya sa mga kopya. Ang rekord ni Abraham mahimong gi-edit … sa ulahi nga mga tigsulat sama nga ang Basahon ni Mormon nga mga propeta-magsasaysay nga sila Mormon ug Moroni miusab sa mga sinulat sa nag-unang katawhan” (“Translation and Historicity of the Book of Abraham,” Gospel Topics, lds.org/topics).

Samtang naghubad, si Propeta Joseph Smith tingali mitrabaho sa mga seksyon sa papyri nga sa wala madugay nangadaut. Sa ingon, “malagmit nga walay pulos ang pagtimbang-timbang sa abilidad ni Joseph sa paghubad sa papyri kon ang anaa kanato karon usa lamang ka porsyon sa papyri ng anaa kaniya kaniadto” (“Translation and Historicity of the Book of Abraham”). Posible usab nga ang mabinantayong pagsusi ni Joseph Smith sa mga sinulat miresulta sa iyang pagdawat og “pinadayag mahitungod sa importanting mga panghitabo ug mga pagtulun-an sa kinabuhi ni Abraham, sama nga nakadawat siya sa sayo pa og usa ka pinadayag mahitungod sa kinabuhi ni Moises samtang nagtuon sa Biblia” (“Translation and Historicity of the Book of Abraham”). Bisan og wala kita tukma nga masayud kon giunsa ni Joseph Smith sa paghubad ang basahon ni Abraham, kita nasayud nga ang paghubad gihimo pinaagi sa gasa ug gahum sa Dios.

  • Unsa ang pipila ka mga ehemplo kon sa unsang paagi ang dugang nga mga kasulatan nga anaa pinaagi ni Propeta Joseph Smith nakatampo sa atong pagsabut sa plano sa Dios alang sa Iyang mga anak?

Mahimo nimong ipamatuod nga samtang ang mga estudyante magtuon sa basahon ni Abraham nga importante sa doktrinal nga paagi, ang Espiritu Santo mosaksi ngadto kanila sa kaimportante ug katinuod niini.

Doktrina ug mga Pakigsaad 1:38; 68:3–5

Ang padayon nga pagpadayag moabut pinaagi sa buhing mga propeta

Dapita ang usa ka estudyante sa pagbasa og kusog sa Doktrina ug mga Pakigsaad 1:38, ug dapita ang laing estudyante sa pagbasa og kusog sa Doktrina ug mga Pakigsaad 68:4. Pangutan-a ang klase kon unsay ilang nakat-unan gikan niini nga mga tudling. (Ang mga estudyante kinahanglang mahibalo sa mosunod nga baruganan: Kon ang mga sulugoon sa Ginoo mamulong pinaagi sa gahum sa Espiritu Santo, ang ilang mga pulong nagpadayag sa kabubut-on sa Ginoo.)

  • Unsa nga mga kasinatian nga aduna kamo nga nakapahimo ninyo nga mapasalamaton nga ang Ginoo nagpadayon sa pagbu-bu og pagpadayag karon?

Pasabta ang mga estudyante nga diha sa Simbahan, ang pipila ka mga pagpadayag ngadto sa ulahing mga adlaw nga mga propeta gihimo kanon (gidawat isip kasulatan) pinaagi sa balaod sa inuyunan sa kadaghanan [common consent] (tan-awa sa D&P 26:1–2). Ang mga miyembro sa Simbahan gihangyo nga mopaluyo sa propeta ug mga apostoles sa pagdugang og usa ka pinadayag ngadto sa mga kasulatan. Sama pananglit, sa kinatibuk-ang komperensya sa Oktubre 1978, ang mga miyembro sa Simbahan mipaluyo sa propeta ug mga apostoles sa pagdugang sa Opisyal nga Pahayag 2, diin ang priesthood gihatag ngadto sa tanang takus nga mga miyembro nga lalaki, ngadto sa kanon sa kasulatan.

Dapita ang mga estudyante sa paglingi ngadto sa ilang tupad ug sa lakbit hisgutan unsay ilang isulti sa usa ka tawo kinsa nagtuo nga sirado na ang kanon sa kasulatan ug dili na kita makadawat og dugang nga kasulatan gikan sa Dios.

Tapusa pinaagi sa paghangyo sa mga estudyante sa pagpamalandong kon unsay ilang buhaton sa paglig-on sa ilang mga pagpamatuod nga bukas ang kalangitan ug nga ang Ginoo nagpadayon sa pagpadayag sa Iyang mga pulong sa atong panahon.

Mga Basahunon sa Estudyante