Leksyon 14: Ang Templo sa Kirtland ug ang mga Yawe sa Priesthood
14
Ang Templo sa Kirtland ug ang mga Yawe sa Priesthood
Pasiuna
Human sa hapit tulo ka tuig nga kalisud ug pinansyal nga pagsakripisyo, ang Kirtland Temple gipahinungod niadtong Marso 27, 1836. Ang milagrusong mga panghitabo miduyog sa pagpahinungod, ug paglabay sa usa ka semana, ang langitnong mga mensahero mipahiuli sa mga yawe sa priesthood ngadto ni Joseph Smith ug Oliver Cowdery. Kini nga mga yawe usa ka talagsaong nga kalahian sa Simbahan ug nakapanalangin og minilyon ka mga tawo kinsa mipundok ngadto sa Simbahan.
Background nga Basahunon
Jeffrey R. Holland, “Ang Atong Talagsaong Hiyas,”Liahona, Mayo 2005, 43–45.
David A. Bednar, “Madungganon nga Paghupot og usa ka Pangalan ug Katungdanan,”Liahona, Mayo 2009, 97–100.
“Glorious Days in Kirtland, 1834–1836,” kapitulo 13 sa Church History in the Fulness of Times Student Manual, 2nd ed. (manwal sa Church Educational System, 2003), 153–68.
Ang mga Santos misakripisyo aron sa pagtukod sa Templo sa Kirtland
Pakit-a ang mga estudyante og litrato sa Templo sa Kirtland (tan-awa sa Libro sa mga Hulagway sa Ebanghelyo [2009], nu. 117; tan-awa usab sa LDS.org). Ipasabut nga ang mga Santos nagtrabaho ug nagsakripisyo og dul-an sa tulo ka tuig sa pagtukod sa Templo sa Kirtland. Sa pagbuhat niini, ilang nasaksihan ang katumanan sa saad sa Ginoo nga kon sila motuman sa Iyang mga sugo, sila “makabaton sa gahum sa pagtukod niini” (D&P 95:11). Hapit 1,000 ka mga tawo ang mitambong sa pagpahinungod sa templo, nga gipahigayon niadtong Marso 27, 1836. Ang pagpahinungod nga pag-ampo, nga nadawat ni Joseph Smith pinaagi sa pagpadayag, girekord diha sa Doktrina ug mga Pakigsaad 109.
Dapita ang duha ka estudyante nga magpuli-puli sa pagbasa og kusog sa Doktrina ug mga Pakigsaad 109:1–5. Awhaga ang klase sa pagsunod, nga timan-an pag-ayo ang mga pulong nga naghulagway sa mga sakripisyo sa mga Santos sa pagtukod sa templo. Dayon ipangutana ang mosunod nga mga pangutana:
Unsa nga mga pulong ang gigamit ni Joseph Smith sa paghulagway sa mga sakripisyo sa mga Santos?
Aron matabangan ang mga estudyante nga mas masabtan ang mga sakripisyo nga gihimo sa mga Santos, hangyoa ang usa ka estudyante sa pagbasa og kusog sa mosunod nga summary:
Gikan sa Hunyo 1833 hangtud sa Marso 1836, ang mga lalaki ug mga babaye nagtinabangay sa pagtukod ug sa pagkompleto sa balay sa Ginoo. Ang uban mibuhat sa trabaho sa mason, ang uban mihakot og bato, ang uban milala ug migansilyo og mga sinina alang sa mga trabahante, ug ang uban mitrabaho sa mga kurtina alang sa balay sa Ginoo. Gibuhat nila kining tanan “aron ang Anak sa Tawo adunay usa ka dapit sa pagpakita sa Iyang kaugalingon ngadto sa Iyang mga katawhan” (D&P 109:5). Ang pipila sa mga Santos sa Ulahing mga Adlaw, sama ni John Tanner, mihatag og dakong parte sa ilang bahandi alang sa pagtukod sa templo. Sa kinatibuk-an, ang templo tingali nagkantidad og mga 40,000 ka US dolyares aron matukod—dako kaayo nga kantidad alang niana nga panahon. Bisan pa sa gasto ug sakripisyo, ang mga Santos nagmatinud-anon sa ilang mga paningkamot sa pagsunod niini nga sugo sa Ginoo (tan-awa sa D&P 95:11). Ang Templo sa Kirtland maoy usa ka buhat sa gugma ug usa ka pagpakita sa pagkamasulundon, pagsakripisyo, ug hugot nga pagtuo.
Unsa nga mga sakripisyo ang gikinahanglan nga atong himoon karon aron matagamtam ang mga panalangin sa templo?
Unsa nga mga panalangin ang moabut sa atong kinabuhi kon mosakripisyo kita aron sa pagbuhat sa buhat sa Ginoo?
Aron sa pagtabang nga matubag kini nga pangutana, i-display ang mosunod nga pamahayag ni Sister Carol B. Thomas sa Kinatibuk-ang Kapangulohan sa Young Women. Dapita ang usa ka estudyante sa pagbasa niini og kusog:
“Ang sakripisyo usa ka talagsaon nga baruganan. Samtang andam kitang mohatag sa atong panahon ug mga talento ug sa tanan nga atong gipanag-iya, mahimo kining usa sa atong labing matinud-anon nga mga matang sa pagsimba. Mapalambo kini sulod kanato og halawom nga gugma alang sa usag usa ug sa atong Manluluwas, si Jesukristo. Pinaagi sa sakripisyo ang atong mga kasingkasing mahimong mausab; magpuyo kita nga mas duol sa Espiritu ug gamay ra og gana sa mga butang sa kalibutan” (“Sacrifice: An Eternal Investment,” Ensign, Mayo 2001, 64).
Dapita ang mga estudyante nga hilum nga mobasa sa Doktrina ug mga Pakigsaad 109:12–13 ug 20–21, nga mangita kon sa unsang paagi ang kasagrado sa templo gihulagway niini nga pag-ampo. Hangyoa ang mga estudyante sa pagpaambit kon unsay labing tataw diha kanila niini nga mga bersikulo.
Sultihi ang mga estudyante nga diha sa pagpahinungod nga pag-ampo, si Joseph Smith nangamuyo sa Ginoo alang sa piho nga mga panalangin. Hangyoa ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 109:12–15, 22–28. Awhaga ang klase sa pagsunod ug sa pagpangita sa mga panalangin nga mahimong moabut niadtong takus nga mosimba diha sa templo. Mahimo nimong isugyot nga markahan sa mga estudyante ang importanting mga pulong nga makahuluganon kanila. Dayon hisguti ang mosunod nga mga pangutana:
Sa mga panalangin nga inyong nailhan, unsa ang labing makahuluganon alang kaninyo? Ngano man?
Unsa nga doktrina o baruganan ang atong makat-unan gikan niini nga mga bersikulo? (Siguroa nga ang mga estudyante mahibalo sa mosunod nga baruganan: Samtang matinud-anon kitang mosimba didto sa templo, makadawat kita og mas dako nga panalipod ug gahum batok sa pagkadautan sa kalibutan.)
I-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
“Palihug ikonsiderar [ang Doktrina ug mga Pakigsaad 109:24–28] nga maghunahuna sa pagsupak sa yawa ug … [atong] pagkaandam nga modala nganha kanato sa pangalan ni Jesukristo ug ang panalangin sa proteksyon nga gisaad ngadto niadtong kinsa madungganon nga naghupot og usa ka pangalan ug katungdanan diha sa balaan nga templo. Ang mahinungdanon pa, kini nga mga panalangin sa pakigsaad alang gayud sa tanang mga henerasyon ug sa tibuok kahangturan. Ako modapit kaninyo sa pagbalik-balik sa pagtuon ug sa pagpamalandong sa mainampoong paagi sa paggamit niini nga mga kasulatan sa inyong kinabuhi ug alang sa inyong pamilya.
“Dili kita mahibulong sa mga paningkamot ni Satanas sa pagbabag o pagdaut sa pagsimba ug sa buhat sa templo. Ang yawa masilag sa kaputli ug sa gahum sa balay sa Ginoo. Ug ang proteksyon nga anaa sa matag usa kanato diha ug pinaagi sa mga ordinansa ug mga pakigsaad sa templo nagsilbi isip usa ka dakong babag ngadto sa dautan nga gimugna ni Lucifer” (“Madungganon nga Paghupot og usa ka Pangalan ug Katungdanan,”Liahona, Mayo 2009, 99–100).
Sa unsang paagi kamo mibati og dugang nga espirituhanong gahum isip resulta sa pagsimba didto sa templo?
Dapita ang mga estudyante sa pagpamalandong kon unsay ilang mabuhat aron makadawat og dugang nga mga panalangin nga gisaad niadtong matinud-anong nagsimba didto sa templo. Pahinumdumi ang mga estudyante nga samtang mamalandong sila sa mga kasulatan ug sa mga pulong sa mga propeta, ang ilang mga kasingkasing ug hunahuna mahimong mas bukas sa inspirasyon gikan sa Ginoo.
Si Jesukristo, Moises, Elijah, ug Elias mipakita didto sa Templo sa Kirtland
Ipasabut nga gigantihan sa Dios ang sakripisyo sa mga Santos sa pagtukod sa Templo sa Kirtland uban sa abunda nga espirituhanong mga pagpakita sa mga adlaw nga naglibut sa pagpahinungod. Kon dunay igong panahon, pagpaambit sa daklit og pipila sa mga istorya diha sa kapitulo 13 (“Glorious Days in Kirtland, 1834–36”) sa Church History in the Fulness of Times Student Manual, 2nd ed. (manwal sa Church Educational System, 2003), ilabi na ang seksyon nga giulohan og “A Pentecostal Season” (mga pahina 164–67). Sultihi ang mga estudyante nga tingali ang labing importante niadto nga mga panghitabo nahitabo sa Abril 3, 1836, usa ka semana human sa pagpahinungod sa templo.
Ngadto kang kinsa kini nga panan-awon gihatag? Unsa ang gibuhat ni Joseph Smith ug Oliver Cowdery sa wala pa mahitabo kini nga panan-awon?
Ipasabut sa mga estudyante nga ang unang napulo ka mga bersikulo sa Doktrina ug mga Pakigsaad 110 naglangkob sa usa ka mahimayaong panan-awon nga gihatag kang Joseph Smith ug Oliver Cowdery mahitungod sa Manluluwas, kinsa mipakita kanila aron sa pagpahayag sa Iyang pagdawat sa Templo sa Kirtland. Dapita ang mga estudyante nga hilum nga mobasa niini nga mga bersikulo samtang mangita sa importanting mga kamatuoran kalabut sa Manluluwas ug sa templo. Human sa igong panahon, ipangutana ang mosunod:
Unsa ang anaa niini nga mga tudling nga makahuluganon nganha kaninyo? Ngano man?
Sumala sa bersikulo 6, ang Manluluwas mipahayag, “Himoa ang mga kasingkasing sa akong tanan nga mga katawhan nga magmaya.” Ngano kaha nga ang mga Santos adunay rason nga magmaya nianang panahuna?
Ipasabut nga human matapos ang panan-awon mahitungod sa Manluluwas, ang nagsunod-sunod nga mga panan-awon misunod. Niini nga mga panan-awon, si Moises, Elias, ug Elijah tagsa-tagsa nga mipakita ngadto ni Joseph Smith ug Oliver Cowdery.
Bahina ang klase ngadto sa tulo ka grupo. I-assign ang matag grupo og usa sa mga ngalan nga gisulat diha sa pisara. Dapita ang mga estudyante sa pagtuon sa tukma nga tudling sa kasulatan aron makat-on sa piho nga mga yawe sa priesthood nga gipahiuli. Human sa igo nga panahon, dapita ang mga estudyante sa pagpaambit sa unsay ilang nakit-an.
Ang mosunod nga mga pagpasabut makahatag sa mga estudyante og mas lawom nga pagsabut sa unsay ilang nabasa. Dapita ang usa ka estudyante sa pagbasa og kusog sa matag pamahayag human nimo mahisgutan ang tukma nga tudling sa kasulatan:
Moises: Ang mga yawe sa pagpundok sa Israel naghatag sa awtoridad sa pagdumala sa pagsangyaw sa ebanghelyo ngadto sa upat ka suok sa kalibutan. “Angayan lamang nga si Moises, kinsa unang nangulo sa mga anak sa Dios ngadto sa ilang yutang panulundon, maoy motugyan sa mga yawe sa pagpundok sa Israel ngadto sa gipahiuli nga Simbahan” (Russell M. Nelson, “Ang Pagpundok sa Nagkatibulaag nga Israel,”Liahona, Nob. 2006, 82, footnote 28).
Elias: “Usa ka tawo nga gitawag og Elias maklaro nga nagpuyo sa pagka-mortal sa kapanahunan ni Abraham, kinsa mitugyan sa dispensasyon sa ebanghelyo ni Abraham ngadto kang Joseph Smith ug Oliver Cowdery didto sa Templo sa Kirtland (Ohio) niadtong Abril 3, 1836” (Bible Dictionary sa LDS English version sa Biblia, “Elias”). “Si Elias [midala] og balik ‘sa ebanghelyo ni Abraham,’ ang halangdong pakigsaad kang Abraham diin ang mga matinud-anon makadawat sa mga saad sa mahangturong paglambo, mga saad nga pinaagi sa celestial nga kaminyoon ang ilang mahangturong kaliwatan mahimong sama ka daghan sa mga balas sa baybayon o sa mga bitoon sa kalangitan” (Bruce R. McConkie, “The Keys of the Kingdom,” Ensign, Mayo 1983, 22).
Elijah: “Kini nga gahum sa pagbugkos nga gitugyan kang Elijah, mao ang gahum sa pagbugkos sa mga bana ug asawa, ug sa mga anak ngadto sa mga ginikanan alang sa karon ug sa kahangturan. Kini ang makabugkos nga gahum nga anaa sa matag ordinansa sa Ebanghelyo. … Pinaagi niini nga gahum nga ang tanang ordinansa kalabut sa kaluwasan gibugkos, o gi-seal, ug mao kini ang misyon ni Elijah sa pag-anhi, ug sa pagpahiuli niini” (Joseph Fielding Smith, Elijah the Prophet and His Mission [1957], 5).
Basaha og kusog ang Doktrina ug mga Pakigsaad 110:16, ug awhaga ang mga estudyante sa pagsunod. Hangyoa ang mga estudyante sa pagtino kon unsa ang gitugyan ngadto kang Joseph Smith ug Oliver Cowdery nianang higayuna (“mga yawe niini nga dispensasyon”). Dayon ipangutana ang mosunod:
Sumala sa bersikulo 16, unsay mahimo natong mahibalon tungod kay napahiuli kini nga mga yawe? (Ang Ikaduhang Pag-anhi hapit na.)
Magtimaan sa bersikulo 16, nganong ang mga yawe nga gipahiuli ni Moises, Elias, ug Elijah kinahanglan nga ipahiuli sa dili pa ang “mahinungdanon ug makalilisang nga adlaw sa Ginoo”?
Sa unsang paagi kamo napanalanginan pinaagi sa pagpahiuli niini nga mga yawe sa priesthood? (Human makatubag ang mga estudyante, i-summarize ang kaimportante sa pagpahiuli niini nga mga yawe pinaagi sa pagpahayag niini nga baruganan: Ang mga yawe sa misyonaryo nga buhat, mahangturong mga pamilya ug buhat sa templo nagtabang kanato nga maandam ang atong mga kaugalingon ug ang kalibutan alang sa Ikaduhang Pag-anhi ni Jesukristo.)
I-display ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
“Ang priesthood sa Dios, uban sa mga yawe niini, mga ordinansa niini, ang balaanong sinugdanan ug gahum nga mabugkos didto sa langit unsa ang gibugkos dinhi sa yuta, kinahanglanon kaayo sa tinuod nga Simbahan sa Dios ingon nga kini talagsaon ug … kon wala kini wala Ang Simbahan ni Jesukristo sa mga Santos sa Ulahing mga Adlaw” (“Ang Atong Talagsaong Hiyas,”Liahona, Mayo 2005, 43).
Ipaambit kon sa unsang paagi napanalanginan ang imong kinabuhi tungod kay napahiuli kini nga mga yawe sa priesthood. Ipamatuod nga ang mga yawe sa priesthood mao ang talagsaon nga kalahian sa Simbahan; nagpalain kini sa Ang Simbahan ni Jesukristo sa mga Santos sa Ulahing mga Adlaw gikan sa matag simbahan dinhi sa yuta.