Sunda ang Buhing Propeta

Pasiuna

Sa adlaw nga ang Simbahan naorganisar, ang Ginoo misaad og espirituhanong kasiguroan niadtong mopatalinghug sa mga pulong sa propeta (tan-awa sa D&P 21:4–6). Wala madugay human niana, aron sa pagtabang sa mga miyembro sa Simbahan nga makalikay sa pagpanglingla, dugang nga mipadayag ang Ginoo nga bugtong ang propeta lang ang gitugutan sa pagdawat og pagpadayag alang sa tibuok Simbahan (tan-awa sa D&P 28:1–7). Ang propeta usab adunay awtoridad sa pagpatin-aw sa kasulatan. Ang pagsabut niini nga mga kamatuoran makahatag og dugang nga espirituhanong kasiguroan niining ulahing mga adlaw.

Background nga Basahunon

Russell M. Nelson, “Pagpaluyo sa mga Propeta,” Liahona, Nob. 2014, 74–77.
Ezra Taft Benson, “Fourteen Fundamentals in Following the Prophet” [debosyonal sa Brigham Young University, Peb. 26, 1980], speeches.byu.edu; tan-awa usab sa Tambuli, Hunyo 1981, 1–8.

Mga Sugyot alang sa Pagtudlo

Doktrina ug mga Pakigsaad 21:1–6

Mopatalinghug sa mga pulong sa propeta

Pangutan-a ang mga estudyante kon unsa nga mga titulo ang atong gamiton usahay nga nagpasabut sa Presidente sa Simbahan. Isulat diha sa pisara ang mga tubag sa mga estudyante. Dayon dapita ang usa ka estudyante sa pagbasa og kusog sa Doktrina ug mga Pakigsaad 21:1 samtang ang klase magsunod. Ilista sa pisara ang bisan unsang dugang nga mga titulo. Dayon ipangutana:

Sa unsang paagi ang matag usa sa mga titulo niini nga bersikulo naghulagway sa buhat sa Presidente sa Simbahan?

Tabangi ang mga estudyante nga makasabut sa konteksto sa Doktrina ug mga Pakigsaad 21 pinaagi sa pagpasabut nga ang pinadayag nga narekord niini gipadayag sa adlaw nga ang Simbahan naorganisar. (Pahinumdom: Kon ang mga estudyante makakat-on sa pagsabut sa konteksto sa usa ka kasulatan, mas dali silang makasabut sa kahulugan ug importansya sa unsay ilang gibasa.) Dayon ipangutana:

Nganong importante man unta alang sa unang mga miyembro sa Simbahan nga masayud nga lahi gayud kaayo ang calling ni Joseph Smith kay sa mga tahas sa mga lider sa ubang simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 21:4–5 samtang magsunod ang klase. Dayon hisguti ang mosunod:

Nganong magkinahanglan man usahay og pailub ug hugot nga pagtuo ang pagpatalinghug sa tambag sa propeta?

Kon gikinahanglan, ikonsiderar ang pagpaambit sa mosunod nga pamahayag gikan ni Presidente Harold B. Lee (1899–1973) ngadto sa mga estudyante:

“Kinahanglan gayud nga kita magkat-on sa pagpaminaw sa tanan nga mga pulong ug mga sugo nga ang Ginoo mohatag pinaagi sa Iyang propeta. … Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini supak sa inyong politikanhong mga panghunahuna. Mahimo nga kini supak sa inyong sosyal nga mga panghunahuna. Mahimo kining mosamok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan’ (D&P 21:6)” (Mga Pagtulun-an sa mga Presidente sa Simbahan: Harold B. Lee [2000], 101).

Kon aghaton sa Espiritu, mahimo nimong ipasabut ang mosunod:

Isip mga Santos sa Ulahing mga Adlaw, wala kita magtuo nga perpekto nga mga tawo ang mga propeta. Hinoon, ang Ginoo dili gayud motugot nga ipahisalaag nila ang Simbahan (tan-awa sa Opisyal nga Pahayag 1, “Mga Kinutlo gikan sa Tulo ka mga Pakigpulong ni Presidente Wilford Woodruff Mahitungod sa Manipesto”).
Kita nagtuo ug nagmaya sa padayon nga pagpadayag. Adunay mga higayon sa kasaysayan sa Simbahan nga ang usa ka propeta mipatin-aw sa miaging propetikanhong tambag o miila og mga pagtulun-an o binuhatan nga kasagarang gidawat kaniadto nga sa kadugayan nagkinahanglan og kausaban. Sama pananglit, sa sayong katuigan sa Simbahan, ang mga miyembro giawhag nga magpundok ngadto sa usa ka sentro nga dapit, sama sa Kirtland, Ohio, o sa Jackson County, Missouri. Karon, ang mga miyembro sa Simbahan giawhag nga magpundok sa ilang lokal nga mga stake o district.

Dapita ang usa ka estudyante sa pagbasa og kusog sa Doktrina ug mga Pakigsaad 21:6. Hangyoa ang klase sa pagsunod ug sa pag-ila sa mga saad nga ihatag niadtong mopatalinghug sa mga pulong sa propeta. Mahimo nimong isugyot nga markahan sa mga estudyante ang ilang mga nakit-an. Dayon ipangutana:

Unsaon ninyo sa pag-summarize ang mga saad nga gihatag niadtong mopatalinghug sa mga pulong sa propeta? (Bisan kon tingali mogamit sila og lain-laing mga pulong, ang mga estudyante kinahanglang mahibalo sa mosunod nga baruganan: Kon mopatalinghug kita sa mga pulong sa propeta, mapanalipdan kita batok sa kaaway. Samtang motubag ang mga estudyante, mahimo nimong ipasabut nga ang usa ka kahulugan sa pagkurog mao ang pagtangtang o pagbuhi sa usa ka butang gikan sa usa ka suporta o sudlanan. Sa ingon, ang usa ka hubad sa bersikulo 6 mahimo nga kon mokurog ang mga langit “alang sa [atong] kaayohan,” ang mga pagpadayag ug mga panalangin “gibuhian” ug gibubu nganhi kanato.)

I-display ang mosunod nga pamahayag ni Presidente Henry B. Eyring sa Unang Kapangulohan, ug hangyoa ang usa ka estudyante sa pagbasa niini og kusog:

“Ang pagpangita sa dalan sa kasiguroan diha sa tambag sa mga propeta importante niadtong adunay lig-on nga pagtuo. Kon ang propeta mamulong, kadtong gamay ra og pagtuo maghunahuna nga nakadungog sila og maalamon nga tawo nga naghatag og tambag. …

“… Apan ang pagpili nga dili modawat sa propetikanhong tambag nag-usab sa mismong dapit nga atong gibarugan. Nahimo kining mas delikado. Ang kapakyas sa pagdawat og propetikanhong tambag makapakunhod sa atong gahum sa pagdawat og dinasig nga tambag sa umaabut” (“Finding Safety in Counsel,” Ensign, Mayo 1997, 25).

Ngano nga ang “mismong dapit nga atong gibarugan” mahimong “mas delikado” kon atong isalikway ang tambag sa mga propeta? Unsa nga mga ehemplo ang nagpakita nga kini tinuod?
Kanus-a kamo o ang tawo nga inyong kaila napanalanginan tungod sa pagpatalinghug sa tambag sa buhi nga mga propeta?
Sa unsang paagi ang baruganan sa pagpatalinghug sa propetikanhong tambag magamit sa relihiyuso, moral, ug sosyal nga mga pangutana sa atong panahon?

Awhaga ang mga estudyante sa pagpamalandong kon unsay mahimo nilang buhaton aron makaangkon sa mga panalangin nga gisaad diha sa Doktrina ug mga Pakigsaad 21:6. Pasaligi sila nga samtang kinasingkasing silang mopatalinghug sa mga pulong sa buhi nga mga propeta, makadawat sila og dagkong mga panalangin karon ug sa kahangturan. Ipasabut nga ang pagpatalinghug sa tambag sa mga propeta wala magpasabut nga mosunod lang sa ilang mga pulong nga walay pagsabut.

Basaha og kusog ang mosunod nga pamahayag ni Presidente Harold B. Lee:

“Dili igo alang kanato isip mga Santos sa Ulahing mga Adlaw sa pagsunod sa atong mga lider ug sa pagdawat sa ilang tambag, apan kita adunay mas dako nga obligasyon sa pag-angkon alang sa atong mga kaugalingon sa dili matarug nga pagpamatuod sa balaan nga pagkatudlo niini nga mga tawo ug sa saksi nga unsay ilang gisulti kanato mao ang kabubut-on sa atong Langitnong Amahan” (Mga Pagtulun-an: Harold B. Lee, 53–54).

Doktrina ug mga Pakigsaad 28:2, 6–7; 43:1–7

Ang Ginoo mohatag og pagpadayag sa han-ay nga paagi

Ipasabut nga sa wala madugay human naorganisar ang Simbahan, pipila ka mga miyembro sa Simbahan nalingla pinaagi sa mga paningkamot sa kaaway sa paghatag og peke nga propetikanhong direksyon. Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 28 samtang magsunod ang klase (tan-awa usab sa Jeffrey G. Cannon, “All Things Must Be Done in Order: D&C 28, 43,” Revelations in Context series, Abr. 4, 2013, history.lds.org). Dayon ipangutana:

Kon ang mga miyembro sa Simbahan mipadayon sa pagtuo diha sa gituohan nga mga pinadayag gikan kang Hiram Page, unsa kaha nga mga problema ang nahitabo?

Hatagi og higayon ang mga estudyante sa pagtuon sa Doktrina ug mga Pakigsaad 28:2, 6–7. Dayon ipangutana:

Sa unsang paagi kini nga mensahe gikan sa Ginoo nagklaro sa tahas sa Presidente sa Simbahan? (Ang mga estudyante kinahanglang makasabut sa mosunod nga doktrina: Ang Presidente sa Simbahan naghupot sa mga yawe sa pagdawat og pagpadayag alang sa Simbahan.)

Aron matabangan ang mga estudyante nga mapalawman ang ilang pagsabut niini nga doktrina, hangyoa ang usa ka estudyante sa pagbasa og kusog sa mosunod nga background nga kasaysayan sa Doktrina ug mga Pakigsaad 43:

Sa Pebrero 1831, usa ka babaye nga ginganlan og Mrs. Hubble miadto sa mga Santos sa Kirtland, Ohio. Nangangkon siya nga siya usa ka propeta, nga siya nakadawat og mga pagpadayag alang sa Simbahan, nga siya nasayud nga ang Basahon ni Mormon tinuod, ug nga kinahanglang mahimo siya nga usa ka magtutudlo sa Simbahan. Nakahimo siya sa paglingla sa ubang mga Santos. Si Joseph Smith ug ang uban nabalaka mahitungod sa iyang impluwensya ug sa ubang bakak nga mga pagpadayag diha sa mga Santos. Ang Propeta nakahukom nga mangutana sa Ginoo kon unsay angay nga buhaton, ug nakadawat siya og pagpadayag, nga karon narekord diha sa Doktrina ug mga Pakigsaad 43 (tan-awa sa Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 257).

Dapita ang mga estudyante nga hilum nga mobasa sa Doktrina ug mga Pakigsaad 43:1–7, nga mangita sa mga doktrina nga gipasabut sa Ginoo nianang panahuna. Mahimo nimong isugyot nga markahan sa mga estudyante ang ilang mga nakit-an. Mahimo ka usab nga mosugyot nga i-cross-reference nila kini nga mga bersikulo ngadto sa Doktrina ug mga Pakigsaad 28:2. Ipasabut nga ang pinadayag nga narekord diha sa seksyon 28 gitumong ngadto sa mga Santos sa New York, ug ang pinadayag nga narekord diha sa seksyon 43 gitumong ngadto sa mga Santos sa Kirtland. Dayon ipangutana:

Sa panahon nga gihatag ang pinadayag nga narekord diha sa Doktrina ug mga Pakigsaad 43, kinsa ang gitudlo nga modawat sa mga sugo ug mga pagpadayag alang sa tibuok Simbahan?
Unsa nga mga doktrina ang atong makat-unan gikan niini nga mga bersikulo? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga mga doktrina: Adunay usa lamang ka tawo nga gitudlo matag panahon aron modawat og pagpadayag alang sa tibuok Simbahan. Kadtong mopatalinghug sa Presidente sa Simbahan dili malingla.)

Ikonsiderar ang pagpaambit sa mosunod nga pamahayag ni Elder L. Tom Perry sa Korum sa Napulog Duha ka mga Apostoles:

“Adunay han-ay sa paagi ang Ginoo sa pagpadayag sa Iyang kabubut-on ngadto sa katawhan. Tanan kita adunay katungod sa paghangyo sa Ginoo ug pagdawat sa inspirasyon pinaagi sa Iyang Espiritu sulod sa utlanan sa atong kaugalingong pagkatinugyanan. Ang mga ginikanan makadawat og pagpadayag alang sa ilang kaugalingong pamilya, ang usa ka bishop alang sa iyang gitakda nga kongregasyon, ug hangtud ngadto sa Unang Kapangulohan alang sa tibuok nga Simbahan. … Si Propeta Joseph Smith mipahayag:

“‘Supak kini sa ekonomiya sa Dios nga bisag kinsa nga miyembro sa Simbahan, o bisag kinsa, nga modawat og panudlo alang niadtong may awtoridad, nga mas labaw pa kay sa ilang mga kaugalingon’ [Mga Pagtulun-an sa mga Presidente sa Simbahan: Joseph Smith (2007), 236]” (“Kami Nagtuo sa Tanan nga Gipadayag sa Dios,” Liahona, Nob. 2003, 85–86).

Sa unsang paagi ang pagkasayud nga ang pagpadayag gikan sa Dios kanunay nga moabut pinaagi sa giila nga awtoridad sa priesthood makatabang kaninyo sa paglikay nga malingla? Sa unsang paagi kini nga kahibalo makahatag og kalinaw sa inyong kinabuhi?
Sa unsang paagi ang sundanan sa Ginoo sa pagpadayag makapabilin sa kahan-ay diha sa Simbahan?

Doktrina ug mga Pakigsaad 90:1–6

Ang Ginoo miestablisar sa han-ay sa Simbahan

Ipasabut nga sa pagtubo sa Simbahan ang Ginoo misugo ni Propeta Joseph Smith sa pag-organisar sa priesthood ug sa mga miyembro sa Simbahan.

Basaha og kusog o i-summarize ang mosunod nga pamahayag:

“Sa pagtubo sa pagpasakop sa Simbahan, ang Propeta mipadayon sa pagdawat og mga padayag mahitungod sa mga katungdanan sa priesthood. Sama sa gimando sa Ginoo, siya miorganisar sa Unang Kapangulohan, siya isip Presidente ug si Sidney Rigdon ug Frederick G.Williams isip mga magtatambag. Siya usab miorganisar sa Korum sa Napulog Duha ka mga Apostoles ug [sa Unang] Korum sa Seventy. Siya mitawag ug mi-orden og mga bishop ug ilang mga magtatambag, high priest, mga patriarch, halangdong mga konseho, mga seventy, ug mga elder. Iyang gi-organisar ang unang [mga] stake sa Simbahan” (Ang Atong Panulundon: Usa ka Mubong Kasaysayan sa Ang Simbahan ni Jesukristo sa Mga Santos sa Ulahing mga Adlaw [1996], 31).

Ipasabut nga ang Unang Kapangulohan naghupot og usa ka talagsaon nga posisyon sa Simbahan. Dapita ang mga estudyante sa pagtuon sa Doktrina ug mga Pakigsaad 90:1–6 ug sa pag-ila sa piho nga mga katungdanan sa Unang Kapangulohan. (Ang Unang Kapangulohan “naghupot sa mga yawe sa gingharian” [bersikulo 2] ug mao ang paagi nga “ang mga orakulo mahatag” ngadto sa Simbahan [bersikulo 4]). Samtang motubag ang mga estudyante, tingali kinahanglan nimong ipasabut nga ang mga pulong nga “mga orakulo” nagpasabut sa mga pinadayag gikan sa Dios nga gihatag pinaagi sa Iyang mga propeta.

Dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw sa duha ka managlahing paagi diin ang doktrina gi-establisar diha sa Simbahan.

“Niadtong 1954, si Presidente J. Reuben Clark Jr., nga sakop sa Unang Kapangulohan, mipasabut unsaon sa pagpakatap ang doktrina diha sa Simbahan ug sa talagsaong buluhaton sa Presidente sa Simbahan. Kabahin sa mga sakop sa Unang Kapangulohan ug sa Korum sa Napulog Duha ka mga Apostoles, miingon siya: ‘Kinahanglan gayud nga [atong] hinumduman nga pipila sa mga General Authority gihatagan sa espesyal nga calling; duna silay espesyal nga gasa; gi-sustain sila nga mga propeta, manalagna, ug tigpadayag, nga naghatag nila og espesyal nga espirituhanong tuga kalabut sa ilang pagpanudlo sa mga tawo. Duna silay katungod, gahum, ug awtoridad sa pagpahayag sa hunahuna ug kabubut-on sa Dios ngadto sa katawhan, ubos sa tanang gahum ug awtoridad sa Presidente sa Simbahan. …’

“… Ang Presidente sa Simbahan mopahibalo o mopasabut sa mga doktrina basi sa gipadayag kaniya (tan-awa, pananglitan, sa D&P 138). Ang doktrinal nga pagpasabut moabut usab pinaagi sa hiniusa nga council sa Unang Kapangulohan ug sa Korum sa Napulog Duha ka mga Apostoles (tan-awa, pananglit ang, Opisyal nga Pahayag 2)” (“Ang Doktrina ni Kristo,” Liahona, Mayo 2012, 86–88).

Nganong importante man nga hinumduman kon si kinsa ang adunay awtoridad nga mopahayag sa “hunahuna ug kabubut-on sa Dios” ngadto sa kalibutan?

Tapusa pinaagi sa paghangyo sa mga estudyante sa pagkonsiderar kon unsay ilang nakat-unan gikan sa mga mensahe sa buhi nga mga propeta ug apostoles. Dapita ang mga estudyante sa pagpaambit sa ilang pamatuod kon sa unsang paagi kini nga mga mensahe mipanalangin kanila.

Mga Basahunon sa Estudyante

Doktrina ug mga Pakigsaad 21:1–6; 28:2, 6–7; 43:1–7; 90:1–6, 16.
Kevin R. Duncan, “Ang Ato Gayud nga Pagpakabuhi,” Liahona, Nob. 2010, 34–36.
Russell M. Nelson, “Pagpaluyo sa mga Propeta,” Liahona, Nob. 2014, 74–77.