Ang Basahon ni Mormon—Sukaranang Bato sa Atong Relihiyon

Pasiuna

Ang Basahon ni Mormon mao ang sukaranang bato sa atong relihiyon ug ebidensya nga ang Dios mipahiuli sa ebanghelyo ni Jesukristo dinhi sa yuta sa atong panahon. Si Presidente Ezra Taft Benson (1899–1994) mitudlo nga ang Basahon ni Mormon “mao ang sukaranang bato sa atong pagsaksi kang Kristo. Kini mao ang sukaranang bato sa atong doktrina. Kini mao ang sukaranang bato sa pagpamatuod” (“Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 53). Samtang ang mga estudyante mopalawum sa ilang mga pagpamatuod sa Basahon ni Mormon, mahimo silang malig-on batok niadtong nagtinguha sa pakiglantugi sa katinuod niini.

Background nga Basahunon

Ezra Taft Benson, “The Book of Mormon—Keystone of Our Religion,” Liahona, Okt. 2011, 53-58.
Jeffrey R. Holland, “Kasiguroan alang sa Kalag,” Liahona, Nob. 2009, 88–90.
“Book of Mormon and DNA Studies,” Gospel Topics, lds.org/topics.

Mga Sugyot alang sa Pagtudlo

Doktrina ug mga Pakigsaad 17:6; 19:26; 20:5–12

Ang Basahon ni Mormon maoy ebidensya nga ang Dios mipahiuli sa kamatuoran sa atong panahon

Sa dili pa magklase, isulat ang mosunod nga mga petsa ug mga panghitabo diha sa pisara.

1820 Nadawat ang Unang Panan-awon

1823 Misugod ang mga pagbisita ni Moroni

1829 Gipahiuli ang priesthood

Hunyo 1829 Nakompleto ang paghubad sa Basahon ni Mormon

Abril 6, 1830 Giorganisar ang Simbahan

Unsay atong makat-unan gikan sa han-ay niining mga panghitabo mahitungod sa tahas sa Basahon ni Mormon diha sa Pagpahiuli sa ebanghelyo? (Kinahanglang makompleto ang Basahon ni Mormon sa dili pa mapahiuli ang Simbahan. Aduna kini dakong papel sa pagpakatap sa ebanghelyo.)

Ipasabut nga sa dihang ang Simbahan naorganisar niadtong Abril 1830, ang pag-imprinta sa Basahon ni Mormon bag-o lang nakompleto, ug wala pay duha ka semana nga ang basahon gi-advertise nga gibaligya. Hangyoa ang mga estudyante nga hilum nga mobasa sa Doktrina ug mga Pakigsaad 20:8–12, nga mangita kon unsay sulod sa Basahon ni Mormon ug unsay gipamatud-an sa Basahon ni Mormon. Mahimo nimong isugyot nga markahan sa mga estudyante unsa ang ilang nadiskubrihan. (Pahinumdom: Sa tibuok niini nga kurso, mahimo nimong awhagon ang mga estudyante sa pagmarka sa importante nga mga kamatuoran nga ilang nadiskubrihan diha sa ilang mga kasulatan.) Samtang nagbasa ang mga estudyante, isulat ang mosunod nga dili kompleto nga pamahayag diha sa pisara:

Ang Basahon ni Mormon nagmatuod sa kalibutan nga …

Human sa igo nga panahon, pangutan-a ang mga estudyante sa mosunod:

Base sa inyong nabasa, unsaon ninyo sa pagkompleto ang pamahayag nga naa sa pisara? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Ang Basahon ni Mormon nagmatuod sa kalibutan nga ang mga kasulatan tinuod, nga ang Dios nagdasig ug nagtawag og mga tawo sa pagbuhat sa Iyang buhat sa atong panahon, ug nga ang Dios dili mausab.)
Sa unsang paagi ang Basahon ni Mormon nagmatuod nga ang Dios midasig ug mitawag og mga tawo sa pagbuhat sa Iyang buhat sa atong panahon?
Kon ang tawo masayud nga ang Basahon ni Mormon tinuod, unsa nga kahibalo ang iyang naangkon kabahin ni Propeta Joseph Smith?

Dapita ang mga estudyante nga hilum nga mobasa sa Doktrina ug mga Pakigsaad 17:6 ug 19:26, nga mangita kon unsa ang kapareha sa duha ka bersikulo.

Unsay kapareha niining duha ka mga bersikulo? (Ang deklarasyon sa Ginoo sa katinuod sa Basahon ni Mormon.)
Unsay bili niini kaninyo nga mahibalo nga ang Ginoo mideklarar sa Iyang pagpamatuod sa katinuod sa Basahon ni Mormon?

Ang Basahon ni Mormon mao ang sukaranang bato sa atong relihiyon

Isulat sa pisara ang mosunod nga kamatuoran: Ang Basahon ni Mormon mao ang sukaranang bato sa atong relihiyon.

Sa inyong hunahuna unsa ang gipasabut niini nga pamahayag?

I-display ang mosunod nga pamahayag ni Presidente Ezra Taft Benson (1899–1994), ug dapita ang usa ka estudyante sa pagbasa niini og kusog:

“Adunay tulo ka mga pamaagi diin ang Basahon ni Mormon mao ang sukaranang bato sa atong tinuohan. Kini mao ang sukarang bato sa atong pagsaksi kang Kristo. Kini mao ang sukaranang bato sa atong doktrina. Kini mao ang sukaranang bato sa pagpamatuod” (“Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 53).

Bahina ang klase ngadto sa gagmayng mga grupo. I-assign ang matag grupo sa paghisgot sa usa sa mosunod nga mga hilisgutan: sa unsang paagi nga ang Basahon ni Mormon mao “ang sukaranang bato sa atong pagsaksi kang Kristo”, sa unsang paagi kini “ang sukaranang bato sa atong doktrina”, o sa unsang paagi kini “ang sukaranang bato sa pagpamatuod.” (Tingali kinahanglan nimong i-assign ang matag hilisgutan ngadto sa sobra sa usa ka grupo.) Hatagi ang matag grupo og kopya sa mosunod nga handout ug hangyoa sila sa paggamit sa pamahayag nga motakdo sa ilang hilisgutan diha sa ilang mga diskusyon.

Ang Basahon ni Mormon—Sukaranang Bato sa Atong Relihiyon

Mga Pundasyon sa Pagpahiuli—Leksyon 4

“Ang Sukaranang Bato sa Atong Pagsaksi kang Kristo”

“Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod. … Ang pagpamatuod sa Agalon klaro, lunsay, ug puno sa gahum. … Kadaghanan sa kalibutan sa Kristiyano karon nagsalikway sa kabalaan sa Manluluwas. Ilang gikwestyon ang Iyang milagruso nga pagkatawo, Iyang hingpit nga kinabuhi, ug ang katinuod sa Iyang mahimayaong pagkabanhaw. Ang Basahon ni Mormon nagtudlo sa yano ug dili sayop nga mga pulong kabahin sa kamatuoran sa tanan niadtong mga butanga. Kini naghatag usab sa labing kompleto nga pagpasabut sa doktrina sa Pag-ula” (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 54–55).

“Ang Sukaranang Bato sa Atong Doktrina”

“Diha sa Basahon ni Mormon kita makakaplag sa kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug simple nga paagi aron bisan ang mga bata makakat-on sa mga pamaagi sa kaluwasan ug kahimayaan. Ang Basahon ni Mormon nagtanyag og daghan kaayo nga makapalapad sa atong pagsabut sa mga doktrina sa kaluwasan. Kon wala kini, kadaghanan sa gipangtudlo sa ubang mga kasulatan dili hapit mahimong yano ug bililhon” (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 55).

“Ang Sukaranang Bato sa Atong Pagpamatuod”

“Ang Basahon ni Mormon mao ang sukaranang bato sa pagpamatuod. Sama nga ang arko malumpag kon tangtangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. … Kon ang Basahon ni Mormon tinuod … dayon ang tawo kinahanglan nga modawat sa mga pangangkon sa Pagpahiuli ug sa tanan nga nag-uban niini” (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 55).

Human sa igo nga panahon, dapita ang mga grupo sa pagpaambit sa klase kon unsay ilang nahisgutan.

Tapusa kini nga porsyon sa leksyon pinaagi sa paghangyo sa mga estudyante sa pagpaambit kon unsay ilang gibati mahitungod sa Basahon ni Mormon ug sa pagpaambit kon sa unsang paagi kini nahimong sukaranang bato sa ilang kaugalingong mga pagpamatuod.

Ang mga kaaway misulay sa pagprobar nga dili tinuod ang Basahon ni Mormon

Dapita ang mga estudyante nga basahon og kusog ang mosunod nga pamahayag ni Elder Jeffrey°R. Holland sa Korum sa Napulog Duha ka mga Apostoles:

“Sulod sa[sobra 180] ka tuig kini nga basahon gihiling og maayo ug giatake, gilimud ug gustong bungkagon, gitabangan og saway ug gibugal-bugalan nga wala pay laing basahon ang gibuhatan sa ingon sa modernong kasaysayan sa relihiyon—tingali wala mabuhat sa laing basahon sa bisan unsang kasaysayan sa relihiyon. Ug padayon kining mibarug. Ang pakyas nga mga teyoriya kabahin sa gigikanan niini ningtumaw ug gibalik-balik ug nawala—gikan ni Ethan Smith ngadto ni Solomon Spaulding sa may problema sa utok ngadto sa igmat nga kinaadman. Wala niining subo nga prangka nga mga tubag alang niini nga basahon ang nakabarug sa pagtuki-tuki tungod kay walay laing tubag kay sa tubag nga gihatag ni Joseph isip batan-ong walay kinaadman nga tighubad niini. Niini mosuporta ako sa kaugalingon nakong apohan, nga yanong miingon, ‘Walay dautang tawo nga makasulat og ingon nga basahon sama niini; ug walay buotan nga tawo ang mosulat niini, gawas lang kon kini tinuod ug kon siya gisugo sa Dios sa paghimo niini’” (“Kasiguroan alang sa Kalag,” Liahona, Nob. 2009, 89).

Nganong importanting hinumduman nga ang modernong mga kaaway sa Simbahan kanunay nga mosulay sa pagdaut sa Basahon ni Mormon?
Sa unsang paagi ang pamahayag sa apohan sa tuhod ni Elder Holland nagsuporta sa katinuod sa Basahon ni Mormon?

Isip ehemplo, mahimo nimong ipasabut nga usa ka paagi nga ang modernong mga kaaway sa Simbahan misulay sa pagdaut sa Basahon ni Mormon mao ang paggamit sa DNA nga ebidensya aron masalikway ang koneksyon tali sa mga tawo sa Basahon ni Mormon ug sa mga Lumad nga Amerikano [Native American]. Kon ang mga estudyante dunay mga pangutana mahitungod niini nga isyu, awhaga sila sa pagbasa sa artikulo sa Gospel Topics nga “Book of Mormon and DNA Studies,” nga makita sa lds.org/topics.

Panggunit og maayo sa unsay inyong nahibaloan nga tinuod

Hangyoa ang mga estudyante sa paghunahuna nga ang usa ka higala miingon nga siya nakadungog og usa ka butang nga daw mosukwahi sa katinuod sa Basahon ni Mormon.

Unsa nga tambag ang inyong isulti sa inyong higala?
Sa unsang paagi ang inyong pagsaksi nga ang Basahon ni Mormon tinuod makatabang kaninyo kon mag-atubang kamo og mga pagpanaway sa Basahon ni Mormon?

Dapita ang mga estudyante nga basahon og kusog ang mosunod nga pamahayag ni Elder Jeffrey°R. Holland sa Korum sa Napulog Duha ka mga Apostoles:

“Sa mga higayon sa … pagduha-duha o sa malisud nga mga panahon, gamita ang hugot nga pagtuo nga napalambo na ninyo, bisan og limitado kini. … Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (“Nagatuo Ako,” Liahona, Mayo 2013, 94).

Sa unsang paagi kaha ninyo magamit ang pamahayag ni Elder Holland kon makasugat kamo og mga pangutana mahitungod sa katinuod sa Basahon ni Mormon? (Ang mga estudyante mahimong mosugyot og lain-laing mga tubag, apan mahimo nimong hatagan og gibug-aton ang mosunod nga baruganan: Kon mag-atubang kita og mga pangutana o mga pagduha-duha mahitungod sa ebanghelyo, kinahanglang manggunit kita og maayo sa unsay atong nahibaloan na nga tinuod ug mosalig nga makakita kita og tubag pinaagi sa dugang nga pagtuon o nga ang Dios mopadayag sa tubag sa umaabut nga panahon.)
Unsa nga mga kamatuoran ang nasayran na ninyo kabahin sa Basahon ni Mormon ug sa mga baruganan nga anaa niini? Giunsa ninyo pagkahibalo niana?

Tapusa ang leksyon pinaagi sa pag-display sa mosunod nga pamahayag ni Presidente Ezra Taft Benson ug sa pagdapit og usa ka estudyante sa pagbasa niini og kusog:

“Ang matag Santos sa Ulahing mga Adlaw kinahanglang magtuon niini nga basahon isip usa ka buluhaton sa tibuok kinabuhi. Kay kondili, iyang gibutang ang iyang kalag sa kakuyaw ug nagsalikway niadtong makahatag og espiritwal ug intelektwal nga panaghiusa sa iyang tibuok kinabuhi. Adunay kalainan tali sa usa ka kinabig kinsa natukod diha sa bato ni Kristo pinaagi sa Basahon ni Mormon ug nagpabiling nanggunit nianang gunitanan nga puthaw, ug sa tawo nga wala” (“The Book of Mormon Is the Word of God,” Ensign, Ene. 1988, 5).

Sa unsang paagi nga ang kanunay nga pagtuon sa Basahon ni Mormon nakapanalipod kaninyo batok niadtong nagtinguha sa pagdaut sa inyong pagtuo?

Pagpamatuod sa katinuod sa Basahon ni Mormon. Dapita ang mga estudyante sa pagkonsiderar kon sa unsang paagi ang Basahon ni Mormon nakaimpluwensya sa ilang kinabuhi. Hangyoa sila sa paghunahuna kon unsay ilang mahimo aron mohatag og mas dakong prayoridad sa pagtuon sa Basahon ni Mormon. Pahinumdumi ang mga estudyante sa saad ni Moroni, nga makita sa Moroni 10:3–5, nga kadtong nagtinguha sa paglig-on sa ilang pagpamatuod sa Basahon ni Mormon makahimo niini pinaagi sa pagtuon sa basahon ug sa pag-ampo mahitungod sa katinuod niini.

Mga Basahunon sa Estudyante

Doktrina ug mga Pakigsaad 17:6; 19:26; 20:5–12.
Ezra Taft Benson, “The Book of Mormon—Keystone of Our Religion,” Liahona, Okt. 2011, 53-58.
Jeffrey R. Holland, “Kasiguroan alang sa Kalag,” Liahona, Nob. 2009, 88–90.