“Ang Panan-awon”

Pasiuna

Ang panan-awon nga gihatag ngadto ni Propeta Joseph Smith nga karon narekord diha sa Doktrina ug mga Pakigsaad 76 naghatag kanato og sukaranang pagsabut sa kinabuhi human sa kamatayon, lakip ang mga ang-ang sa himaya. Gikan niini nakat-unan usab nato kon unsay angay natong buhaton aron magpuyo pag-usab diha sa presensya sa Langitnong Amahan ug ni Jesukristo.

Background nga Basahunon

L. Tom Perry, “Ang Plano sa Kaluwasan,” Liahona, Nob. 2006, 69–72.
Matthew McBride, “‘The Vision’: D&C 76,” Revelations in Context series, Mar. 11, 2013, history.lds.org.

Mga Sugyot alang sa Pagtudlo

Doktrina ug mga Pakigsaad 76

Sukaranang pagsabut sa kinabuhi human sa kamatayon

Ipasabut nga sa mga 1830 daghang mga Kristiyano nagtuo sa usa sa duha ka kasagarang gituohan kabahin sa langit ug impyerno, usahay gihulagway isip ang “tradisyonal” ug “malukpanon” nga mga panglantaw. Ang “tradisyonal” nga panglantaw mao lamang ang langit alang sa mga matarung ug impyerno alang sa mga masinupakon. Ang “malukpanon” nga panglantaw mao nga ang Dios dili mosilot sa mga makasasala hangtud sa kahangturan, kay ang tanan sa katapusan maluwas diha sa gingharian sa Dios. Niini nga panahon, ang mga miyembro sa Simbahan ni Jesukristo daw sama ra og nahibaloan sa ubang mga Kristiyano mahitungod sa langit ug impyerno. Sa Pebrero 1832, si Joseph Smith ug Sidney Rigdon nakasinati og usa ka panan-awon nga nakausab gayud sa panabut ug pagtuo sa mga Santos sa Ulahing mga Adlaw mahitungod sa kinabuhi human sa mortalidad. Kini nga panan-awon, nga narekord diha sa Doktrina ug mga Pakigsaad 76, mipadayag og usa ka komplikado nga kombinasyon sa gugma, kalooy, kaangayan, ug paghukom sa Dios, ug miabli kini sa pultahan ngadto sa mas hingpit nga panan-aw sa plano sa Langitnong Amahan. Sulod sa daghang katuigan, ang unang mga miyembro sa Simbahan yano nga mitawag niini nga panan-awon isip “ang Panan-awon.” (Tan-awa sa Matthew McBride, “‘The Vision’: D&C 76,” Revelations in Context series, Mar. 11, 2013, history.lds.org.)

Hangyoa ang usa ka estudyante sa paghatag og mubo nga paghulagway sa unsay narekord diha sa Doktrina ug mga Pakigsaad 76. I-display ang mosunod nga pamahayag ni Presidente Wilford Woodruff (1807–98), ug dapita ang usa ka estudyante sa pagbasa niini og kusog:

“Giisip nako nga ang Doktrina ug mga Pakigsaad [naglangkob] sa pinaka-Diosnon nga mga pagpahayag nga nahatag ngadto sa tawhanong pamilya. Akong hisgutan ang ‘Panan-awon’ [sa seksyon 76] lang, isip usa ka pagpadayag nga naghatag og dugang kahayag, dugang kamatuoran ug dugang baruganan kaysa bisan unsa nga pagpadayag nga anaa sa bisan unsa nga basahon nga atong nabasa. Nakapasayon kini sa atong pagsabut sa atong kahimtang karon, diin kita gikan, nganong ania kita dinhi, ug asa kita paingon. Bisan kinsang tawo mahimong masayud pinaagi niana nga pagpadayag kon unsa unya ang iyang dangatan ug kahimtang” (Mga Pagtulun-an sa mga Presidente sa Simbahan: Wilford Woodruff [2004], 133).

Hangyoa ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 76. Dapita ang laing estudyante sa pagbasa og kusog sa Doktrina ug mga Pakigsaad 76:15–19.

Unsa ang gibuhat ni Joseph ug Sidney nga miresulta sa ilang pagkadawat niini nga pagpadayag?
Unsa ang atong makat-unan gikan sa ilang kasinatian mahitungod sa kamahinungdanon sa pagtuon ug pagpamalandong sa mga kasulatan? (Siguroa nga ang mga estudyante makaila sa koneksyon tali sa pagpamalandong sa mga kasulatan ug sa pagdawat og pagpadayag.)

Pahinumdom: Ipasabut og maayo nga ang pagkat-on sa pagpamalandong sa mga kasulatan usa ka bililhon nga kahanas sa pagtuon sa kasulatan nga naghatag sa Espiritu Santo og mas dakong oportunidad sa pagpadayag sa mga kamatuoran ngari kanato.

Doktrina ug mga Pakigsaad 76:1–10

Mga saad ngadto sa mga matinud-anon

Dapita ang usa ka estudyante sa pagbasa og kusog sa Doktrina ug mga Pakigsaad 76:1–4. Hangyoa ang klase sa pagsunod, nga mangita sa mga pulong nga naghulagway ni Jesukristo. Mahimo nimong isugyot nga markahan sa mga estudyante ang ilang mga nakit-an. Ipasabut nga ang mga hiyas sa Manluluwas nga gihulagway niini nga mga bersikulo usa ka ehemplo sa lista sa kasulatan. Ang lista sa kasulatan “mao ang sunod-sunod nga konektado nga mga hunahuna, ideya, o instruksyon. Ang pagpangita og mga lista diha sa mga kasulatan makatabang sa mga magtutudlo ug mga estudyante sa pag-ila og importanting mga punto nga gihatagan og gibug-aton sa tigsulat” (Gospel Teaching and Learning [2012], 23). Ipasabut nga ang Doktrina ug mga Pakigsaad 76 adunay daghang mga lista sa kasulatan.

Hain sa mga hiyas ni Jesukristo nga gihisgutan diha sa mga bersikulo 1–4 ang labing makahuluganon alang kaninyo? Ngano man?

Dapita ang mga estudyante nga hilum nga mobasa sa Doktrina ug mga Pakigsaad 76:5–10, nga mangita sa mga saad sa Ginoo ngadto sa mga matinud-anon. Dapita ang mga estudyante nga timan-an ang lista sa mga saad diha sa mga bersikulo 6–10. Mahimo nimong isugyot nga markahan sa mga estudyante ang mga item niini nga lista sa paghatag og gibug-aton sa mga saad sa Ginoo.

Sumala sa bersikulo 5, unsa gayud ang kinahanglan natong buhaton aron masinati ang kalooy, kamabination, ug pasidungog sa Manluluwas?

Tabangi ang mga estudyante nga mahibalo sa mosunod nga baruganan gikan sa ilang pagtuon niini nga mga bersikulo: Samtang mahadlok kita sa Ginoo ug moserbisyo Kaniya diha sa pagkamatarung, Siya mopasidungog kanato ug magmaloloy-on kanato. Pahinumdumi ang mga estudyante nga niini nga konteksto, ang “mahadlok” sa Ginoo nagpasabut nga motahud Kaniya.

Aron matabangan ang mga estudyante nga mapalawuman ang ilang panabut bahin niini nga baruganan, ipangutana ang mosunod:

Kon ikonsiderar ang mga saad nga inyong nahibaloan gikan sa mga bersikulo 5–10, unsa ang gusto gayud ninyo nga madawat? Ngano man?
Unsa kaha ang kinahanglan ninyong buhaton aron madawat kana nga panalangin?

Hatagi ang mga estudyante og panahon sa pagpamalandong nganong angay nga tinguhaon kini nga mga panalangin ug sa pagtimbang-timbang kon unsa sila kamaayo nga nagtahud sa Ginoo ug nagserbisyo Kaniya diha sa pagkamatarung ug kamatuoran.

Ipasabut sa mga estudyante nga sugod sa bersikulo 11, ang nahibilin sa seksyon 76 nagrekord sa pagpadayag sa Ginoo sa “mga misteryo sa iyang gingharian,” nga “walay usa nga makasabut mahitungod sa himaya” (bersikulo 114). Ang pagpadayag miabli sa atong pagsabut sa katalagsaon sa kahangturan, nagtudlo kanato mahitungod sa umaabut nga kinabuhi ug nagpahibalo sa unsay wala mahibaloi kaniadto.

Doktrina ug mga Pakigsaad 76:19–24

Ang Panan-awon sa Amahan ug sa Anak

Ipasabut nga ang Doktrina ug mga Pakigsaad 76 naglangkob og sunod-sunod nga mga panan-awon. Aron mahatagan ang mga estudyante og kinatibuk-ang pagpasabut sa unsay nakita ni Joseph Smith ug Sidney Rigdon niini nga mga panan-awon, i-display ang nag-uban nga hulagway o hatagi og kopya ang matag estudyante. Ipasabut nga ang matag item sa diagram nagkatutok sa usa ka panan-awon.

Ipasabut nga ang usa sa mga panan-awon nga nabuksan ngadto ni Joseph Smith ug Sidney Rigdon nianang adlawa mao ang panan-awon sa Amahan ug sa Iyang Anak, si Jesukristo. Ipakita ang mosunod nga mga pangutana, o isulat kini diha sa pisara:

Unsa nga mga kamatuoran ang atong makat-unan mahitungod ni Jesukristo gikan niini nga pinadayag?

Hain niini nga mga kamatuoran nga kamo makapamatuod? Giunsa man ninyo sa pagkahibalo nga kini tinuod?

Dapita ang mga estudyante nga hilum nga mobasa sa Doktrina ug mga Pakigsaad 76:19–24 ug mokonsiderar kon unsaon nila sa pagtubag ang mga pangutana diha sa pisara. Human sa igo nga panahon, dapita ang mga estudyante sa pagpaambit sa ilang mga tubag sa mga pangutana. Ang mga tubag sa mga estudyante mahimong magkalain-lain, apan siguroa nga nakasabut sila sa mosunod nga mga baruganan. Si Jesukristo usa ka buhi, nahimaya nga binuhat. Si Jesukristo ang Bugtong Anak sa Amahan. Si Jesukristo ang Tiglalang niini nga kalibutan ug sa ubang kalibutan. Ang mga lumulupyo niini ug sa ubang mga kalibutan mga anak nga lalaki ug mga anak nga babaye sa Dios.

Ikonsiderar ang pagpaambit sa imong pagpamatuod bahin sa Manluluwas.

Doktrina ug mga Pakigsaad 76:25–113

Ang plano sa kaluwasan

Ipasabut nga ang mga bersikulo 25–113 sa seksyon 76 nagtudlo og talagsaong mga kamatuoran mahitungod sa plano sa kaluwasan. Dapita ang mga estudyante sa pagpili og usa ka grupo niini nga mga bersikulo nga gilista diha sa diagram ug mopaspas sa pagbasa niini. Ipares-pares ang mga estudyante ug hangyoa sila sa paghisgot sa unsay ilang nakat-unan o unsay ilang nakit-an nga makadasig diha sa mga bersikulo nga ilang gibasa. Dayon hisguti ang mosunod nga pangutana sa tibuok klase:

Unsa nga sukaranan nga mga doktrina mahitungod sa kinabuhi ug kamatayon ang gitabang sa Doktrina ug mga Pakigsaad 76 nga atong masabtan? (Ang mga estudyante mahimong mogamit og lain-laing mga pulong apan siguroa nga nakasabut sila nga sa Doktrina ug mga Pakigsaad 76, makaangkon kita og sukaranang pagsabut sa kinabuhi human sa kamatayon ug unsay kinahanglan gayud natong buhaton aron makapuyo pag-usab diha sa presensya sa Langitnong Amahan ug ni Jesukristo.)

Ipasabut nga usa sa labing importante nga mga panan-awon nga gihatag ngadto ni Joseph Smith ug Sidney Rigdon mao ang sa celestial nga gingharian. Dapita ang mga estudyante sa pagbasa sa Doktrina ug mga Pakigsaad 76:50–53, nga mangita og lista sa mga kinahanglanon aron makasulod sa celestial nga gingharian. Mahimo nimong isugyot nga markahan o numerohan sa mga estudyante kini nga mga kinahanglanon diha sa ilang mga kasulatan. Human ang usa ka estudyante makapaambit sa unsay iyang nahibaloan, pangutana og sama sa mosunod:

Unsa kaha ang gipasabut sa pagdawat og usa ka “pagpamatuod ni Jesus”? (Magbaton og hugot nga pagtuo diha sa matubsanon nga misyon sa Manluluwas ug magpuyo sumala sa Iyang mga sugo.)
Unsay gipasabut sa “nakabuntog pinaagi sa hugot nga pagtuo”? (Nakabuntog sa mga tintasyon ug mga sala pinaagi sa pagpakita og hugot nga pagtuo kang Jesukristo ug matinud-anong molahutay hangtud sa katapusan.)
Unsay gipasabut sa “gibugkos pinaagi sa Balaan nga Espiritu sa saad”? (Ang Espiritu Santo, kinsa mao usab ang Balaang Espiritu sa Saad, mosaksi ngadto sa Amahan nga nadawat nato sa tukmang paagi ang makaluwas nga mga ordinansa sa Iyang ebanghelyo ug nga kita matinud-anong nagtuman sa mga pakigsaad nga atong gihimo.)

I-summarize ang Doktrina ug mga Pakigsaad 76:54–70 pinaagi sa pagpasabut nga kini nga mga bersikulo naglista sa daghang mga panalangin nga madawat sa nahimaya nga mga lumulupyo sa celestial nga gingharian. Hatagi ang mga estudyante og pipila ka gutlo sa pagbasa niini nga mga bersikulo nga mangita sa gisaad nga mga panalangin o mga kahimtang nga labing makahuluganon alang kanila.

Unsa nga panalangin nga gisaad ngadto sa matinud-anon ang adunay piho nga kahulugan kaninyo? Ngano man?
Sa unsang paagi ang bersikulo 69 makatabang kanato nga makasabut sa tahas sa Manluluwas diha sa mga kinabuhi niadtong makapanunod sa celestial nga gingharian? (Ang matag usa kanato, bisan unsaon pa nato og paningkamot, mapakyas sa pagbuhat sa tanan nga gikinahanglan aron makapanunod sa celestial nga gingharian. Pinaagi lamang sa maulaong sakripisyo sa Manluluwas nga kita malimpyohan sa atong mga sala ug mahimong hingpit.)
Sa unsang paagi ang pagkahibalo sa mga kamatuoran mahitungod sa plano sa kaluwasan nga narekord diha sa Doktrina ug mga Pakigsaad 76 makatabang kanato sa paghimo og mas maayo nga mga pagpili sa kinabuhi?

I-display ang mosunod nga pamahayag ni Presidente Boyd K. Packer, ug dapita ang usa ka estudyante sa pagbasa niini og kusog:

“Kon walay kahibalo sa plano sa ebanghelyo, ang kalapasan maingon nga natural, inosente, gani makatarungan. Walay mas labawng makapanalipod gikan sa kaaway kay sa masayud kita sa kamatuoran—masayud sa plano!” (Our Father’s Plan [1994], 27).

Sa unsa nga mga paagi ang kahibalo sa mga kamatuoran nga makita sa Doktrina ug mga Pakigsaad 76 makatabang sa pagpanalipod kanato sa impluwensya ni Satanas?
Sa unsa nga mga paagi ang inyong kahibalo sa plano sa Langitnong Amahan mipanalipod ug mipanalangin kaninyo?

Dapita ang usa ka estudyante sa pagbasa og kusog sa Doktrina ug mga Pakigsaad 76:114–117. Hangyoa ang klase sa pagsunod, nga mangita sa saad nga gihatag ngadto niadtong nagputli sa ilang mga kaugalingon. Dapita ang mga estudyante sa paghulagway sa saad niana nga tudling.

Human motubag ang mga estudyante, i-display ang mosunod nga pamahayag ni Propeta Joseph Smith (1805–44) kalabut sa panan-awon nga narekord diha sa Doktrina ug mga Pakigsaad 76:

“Makapasabut ko og usa ka gatus pa ka pilo kay sa akong nabuhat sa mga himaya sa mga gingharian nga gipakita kanako diha sa panan-awon, kon gitugutan pa ko, ug kon andam pa ang mga tawo sa pagdawat niini” (sa History of the Church, 5:402).

Aron matabangan ang mga estudyante nga magamit ang unsay ilang nakat-unan sa klase, ipakita o isulat ang mosunod nga dili kompleto nga mga pulong diha sa pisara:

Human makatuon sa Doktrina ug mga Pakigsaad 76:

Nasayud ako nga …

Gusto nako nga …

Ako …

Dapita ang mga estudyante sa pagkompleto niini nga mga pulong diha sa usa ka piraso nga papel. Awhaga sila sa pagkonsiderar kon ang mga pagpili nga ilang ginahimo makahimo kanilang takus sa pagpanunod sa celestial nga gingharian ug makatabang kanila nga mahimong takus alang sa uban nga mga panalangin nga gisaad diha sa Doktrina ug mga Pakigsaad 76. Ipaambit ang imong pagpamatuod bahin sa mga kamatuoran nga gihisgutan sa klase karong adlawa.

Mga Basahunon sa Estudyante

Doktrina ug mga Pakigsaad 76.
L. Tom Perry, “Ang Plano sa Kaluwasan,” Liahona, Nob. 2006, 69–72.